Kresten oemasma e froedini grani nanga lespeki
„Oenoe trowmasra, tan libi . . . nanga den akroederi sabi, gi den grani leki wan moro swaki patoe, a wan di abi oemasmafasi.” — 1 PETRUS 3:7.
1, 2. (a) Sortoe broko-ede ben opo foe a takimakandra foe Jesus nanga a Samaria oema na a watrapeti, èn foe san ede? (Loekoe a foetoewortoe toe.) (b) San Jesus ben sori foe di a ben preiki gi a Samaria oema?
NA A watrapeti foe owroeten, krosibei foe a foto Sikar, wan brekten na a kaba foe a jari 30 Gewoon Teri, Jesus ben tjari kon na krin fa a ben denki taki sma moesoe handri nanga oemasma. A heri mamanten a ben waka pasa a heri bergi kondre foe Samaria èn a ben doro na a watrapeti ala di a ben weri, a ben abi angri èn dringi ben kiri en. Di a ben sidon sei a watrapeti, dan wan Samaria oema ben kon foe teki watra. „Gi mi pikinso foe dringi”, Jesus ben taigi en. A ben moesoe de so taki na oema ben loekoe en nanga froewondroe. A ben aksi: „Fa joe, ala di joe na wan djoe, kan aksi mi foe gi joe dringi, ala di mi na wan Samaria oema?” Baka ten di den disipel foe Jesus ben drai kon baka, baka di den ben bai njanjan sani, dan den ben froewondroe e aksi densrefi foe san ede Jesus ben „e taki nanga wan oema”. — Johanes 4:4-9, 27.
2 San ben de a reide taki na oema ben poti na aksi disi èn taki den disipel ben broko den ede? A ben de wan Samariasma, èn djoe no ben abi noti foe doe nanga den Samariasma (Johanes 8:48). Ma soleki fa a sori, dan ete wan tra reide ben de di moesoe hori na prakseri. Na a ten dati, den gwenti foe den rabi no ben gi mansma deki-ati foe taki na poebliki nanga oemasma.a Ma Jesus ben preiki na poebliki gi na opregti oema disi, èn srefi a ben tjari kon na krin gi en taki a ben de a Mesias (Johanes 4:25, 26). Nanga dati Jesus ben sori taki a no ben sa meki den gwenti di no abi den gron tapoe bijbel tai en, so srefi den gwenti di ben lagi oemasma (Markus 7:9-13). Kontrari foe dati, nanga den sani di a ben doe èn nanga den sani di a ben leri sma, Jesus ben sori taki sma moesoe handri oemasma nanga grani èn nanga lespeki.
Fa Jesus ben handri nanga oemasma
3, 4. (a) Fa Jesus ben handri nanga na oema di ben fasi en krosi? (b) Fa Jesus ben poti wan boen eksempre gi kresten mansma, spesroetoe gi opziener?
3 A safoe sari-atifasi di Jesus abi gi sma, ben de foe si na ini a fasi fa a ben handri nanga oemasma. Na wan okasi wan oema di ben pina foe a lasi di a ben e lasi broedoe 12 jari kaba, ben soekoe Jesus na mindri wan ipi sma. A situwâsi foe en ben meki taki a no ben de krin na ceremonieelsei, so boen a no ben moesoe de drape (Lefitikus 15:25-27). Ma foe di a no ben sabi san a moesoe doe moro, meki a waka safrisafri go na baka Jesus na wan kibri fasi. Di a ben fasi en krosi, dan wantewante a kon betre! Ala di Jesus ben de na pasi e go na a oso foe Jairus foe go na en oemapikin di ben siki serjoesoe, tokoe Jesus ben stòp. Di a ben firi taki krakti ben gowe foe en, a ben loekoe lontoe foe si soema ben fasi en. Te foe kaba, na oema ben kon èn ben trowe ensrefi na gron na fesi en èn a ben beifi. Jesus ben sa piri-ai gi en foe di a ben de na mindri na ipi sma, noso foe di a ben fasi en krosi sondro primisi? Kontrari foe dati, na oema ben feni taki Jesus ben abi waran firi èn switifasi. „Oemapikin,” Jesus ben taki, „a bribi foe joe meki joe kon betre.” Dati ben de a wan-enkri leisi di Jesus ben kari wan oema, „oemapikin”. A wortoe dati ben moesoe de wan trowstoe gi en! — Mateus 9:18-22; Markus 5:21-34.
4 Jesus ben loekoe moro fara leki nomo san skrifi na ini a Wet. A ben si a sani di a wet wani taki troetroe èn taki a ben de fanowdoe foe sori sari-ati nanga safri-atifasi. (Teki gersi Mateus 23:23.) Jesus ben si a serjoesoe situwâsi foe a siki oema èn a ben hori na prakseri taki bribi ben boeweigi na oema. Nanga dati a poti wan boen eksempre gi den kresten mansma, spesroetoe gi opziener. Efoe wan kresten oema abi persoonlijk problema noso wan situwâsi di de toemoesi moeilek gi en noso di de wan tesi gi en, dan den owroeman moesoe proeberi foe loekoe moro fara leki den sani di a sisa e taki wantewante, noso den sani di a e doe, èn den moesoe hori na prakseri den omstandigheid èn den reide foe san ede a e doe sani. So wan koni foe man si sani krin, kan sori taki pasensi nanga a froestan di wi moesoe froestan sma, nanga sari-atifasi de fanowdoe, na presi foe gi rai èn foe poti a sma kon reti baka. — Odo 10:19; 16:23; 19:11.
5. (a) Fa den gwenti foe den rabi ben skotoe den oemasma? (Loekoe a foetoewortoe.) (b) Soema ben de den fosiwan di ben si Jesus èn ben e gi kotoigi foe en di a ben opo baka?
5 Foe di den gwenti foe den rabi ben tai den, meki den oemasma di ben libi na a ten di Jesus ben de na grontapoe, no ben man de leki kotoigi di a wet ben erken.b Loekoe san ben pasa sjatoe baka di Jesus ben opo baka na dede tapoe a mamanten foe 16 Nisan 33 Gewoon Teri. Soema ben sa de a fosiwan di ben sa si Jesus te a ben opo baka, èn foe kotoigi foe dati na den tra disipel taki a Masra foe den ben kisi wan opobaka? A ben kon de so, taki a ben de den oemasma di ben tan krosibei na a presi pe den ben spikri en na wan postoe te leki a ben lasi libi. — Mateus 27:55, 56, 61.
6, 7. (a) San Jesus ben taigi na oema di ben kon na a grebikamra? (b) Fa den disipel foe Jesus ben handri a fosi leisi na tapoe a kotoigi foe den oemasma, èn san wi kan leri foe disi?
6 Froekoe mamanten tapoe a fosi dei foe a wiki, dan Maria Magdalena nanga tra oemasma ben go nanga spesrei na a grebikamra foe sreka a skin foe Jesus. Di Maria ben si taki a grebikamra ben leigi, dan a ben lon gowe foe taigi Petrus nanga Johanes. Den tra oema ben tan drape. No langa na baka, wan engel ben kon na den èn ben taigi den taki Jesus ben kisi wan opobaka. „Go esi-esi èn froeteri den disipel foe en”, na engel ben komanderi den. Di den oema disi ben e meki esi-esi foe tjari a njoensoe disi, dan Jesus ben sori ensrefi na den. „Go, froeteri den brada foe mi”, Jesus ben taigi den (Mateus 28:1-10; Markus 16:1, 2; Johanes 20:1, 2). Maria Magdalena ben drai go baka na a leigi grebikamra, ala di a no ben sabi foe a fisiti foe na engel èn ala di a ben de nanga foeroe sari. Jesus ben sori ensrefi na en drape, èn baka di Maria ben kon si soema a ben de te foe kaba, dan Jesus ben taki: „Go na den brada foe mi èn taigi den: ’Mi e opo go na mi Tata nanga oen Tata èn na mi Gado nanga oen Gado.’” — Johanes 20:11-18; teki gersi Mateus 28:9, 10.
7 Jesus ben kan sori ensrefi fosi na Petrus, Johanes, noso wan foe den tra mansma disipel. Na presi foe dati, a ben froekisi foe doe boen gi den oema disi, foe di a ben meki den de den fosi sma di ben de kotoigi foe na opobaka foe en èn foe di a ben gi den a komando foe gi kotoigi foe dati na den mansma disipel foe en. Fa den man ben handri na ini a bigin? A tori e taki: „Den sani disi di den [oema] ben taki, ben gersi foe de lawlaw sani gi den èn den no ben wani bribi den oema” (Lukas 24:11). A ben kan de taki a ben de moeilek gi den foe bribi a kotoigi, foe di a ben kon foe oemasma? Efoe dati de so, dan baka ten den ben kisi foeroe boeweisi taki Jesus ben kisi wan opobaka na dede (Lukas 24:13-46; 1 Korentesma 15:3-8). Na ini a ten disi toe, kresten mansma e handri koni te den e hori na prakseri den komentaar foe den sisa na jejefasi. — Teki gersi Genesis 21:12.
8. San Jesus ben tjari kon na krin nanga a fasi fa a ben handri nanga oemasma?
8 A de wan prisiri sani troetroe foe si a fasi fa Jesus ben handri nanga oemasma. A no ben lagi den èn a no ben wisiwasi den, foe di ala ten a ben abi sari-atifasi èn dorodoro balansifasi na ini a fasi fa a ben handri nanga oemasma (Johanes 2:3-5). A no ben wani no wan sani foe doe nanga den gwenti foe den rabi di ben poeroe a wartifasi foe den oemasma èn di ben meki a Wortoe foe Gado kon swaki. (Teki gersi Mateus 15:3-9.) Foe di Jesus ben handri oemasma nanga grani èn nanga lespeki, Jesus ben tjari langalanga kon na krin fa Jehovah Gado wani taki sma moesoe handri nanga oemasma (Johanes 5:19). Jesus srefi ben poti wan heri boen eksempre gi kresten mansma foe den waka na baka. — 1 Petrus 2:21.
Den leri foe Jesus di abi foe doe nanga oemasma
9, 10. Fa Jesus ben trowe den gwenti foe den rabi, di abi foe doe nanga oemasma, èn san a ben taki baka di den Fariseiman ben poti wan aksi foe a broko di sma e broko trow?
9 Jesus ben sori taki den gwenti foe den rabi ben de falsi èn a ben handri na wan warti fasi nanga oemasma no soso nanga a fasi fa a ben handri, ma so srefi nanga den sani di a ben leri sma. Loekoe foe eksempre, san a ben leri sma foe a broko di sma e broko trow èn foe soetadoe.
10 Na ini a tori foe broko trow, den ben poti na aksi disi gi Jesus: „A Wet e gi wan man pasi foe broko a trow nanga en wefi foe ibri sortoe sani ede?” Akroederi a tori foe Markus, dan Jesus ben taki: „A sma di broko a trow nanga en wefi [boiti foe hoeroedoe ede] èn e trow wan trawan, e doe soetadoe teige en [wefi], èn efoe oiti wan oemasma e trow nanga wan tra man, baka te a brokotrow nanga en trowmasra, dan a e doe soetadoe” (Markus 10:10-12; Mateus 19:3, 9). Den wortoe dati di a ben taki na wan eenvoudig fasi, ben sori lespeki gi a wartifasi foe oemasma. Fa so?
11. San den wortoe foe Jesus „boiti tapoe gron foe hoeroedoe” e sori foe a banti foe a trowlibi?
11 Na a fosi presi, nanga den wortoe „boiti foe hoeroedoe ede” (di wi e feni na ini na evangelie-tori foe Mateus), Jesus ben sori taki sma no moesoe si a trowbanti leki wan soso sani, noso taki sma kan broko en makriki. A leri di den rabi ben gi, di ben de na alasei, ben gi pasi foe brokotrow tapoe gron foe ibri sortoe pikin sani, soleki te wan wefi e pori wan preti njanjan, noso te a e taki nanga wan freimde man. Ija, den ben gi pasi foe broko trow, srefi te wan trowmasra ben feni wan oema di a feni moro moi! Wan bijbel sabiman e taki: „Di Jesus ben taki soleki fa a ben doe . . . a ben horibaka gi oemasma di a ben proeberi foe tjari a trow kon reti baka na a posisi di a ben moesoe abi.” Foe troe, a trowlibi ben moesoe de wan banti foe wánfasi di e tan, na ini san wan oema kan abi seikerhèit. — Markus 10:6-9.
12. Sortoe njoen idea Jesus ben tjari kon nanga den wortoe „e doe soetadoe teige na oema”?
12 A di foe toe, nanga den wortoe „e doe soetadoe teige en [wefi]”, Jesus ben tjari wan njoen prakseri kon di den no ben erken ini den kroetoe foe den rabi — na idea taki wan trowmasra e doe soetadoe teige en wefi. The Expositor’s Bible Commentary e froeklari: „Na ini den leri foe den rabi foe a djoe relisi, wan oema di no ben de getrow ben kan doe soetadoe teige en trowmasra; èn te wan man ben abi seks demakandra nanga a wefi foe wan tra man, dan a man ben kan doe soetadoe teige a man dati. Ma noiti wan man ben kan doe soetadoe teige en wefi, awinsi san a man ben doe. Nanga a poti di Jesus ben poti a trowmasra na ondro a srefi froeplekti foe boen gwenti nanga wet leki a wefi, Jesus ben hei a posisi èn a wartifasi foe oemasma.”
13. Fa Jesus ben sori foe a broko di sma e broko trow, taki wán markitiki ben sa de gi mansma nanga oemasma na ini a kresten sistema?
13 A di foe dri, nanga den wortoe „baka te a broko trow nanga en trowmasra”, Jesus ben erken a reti di wan oemasma abi foe broko a trow nanga wan trowmasra di no de getrow — wan sani di sma ben sabi kande, ma di no ben de wan normaal sani na ini a djoe wet foe a ten dati.c Den ben taki dati „den kan broko a trow nanga wan oema awinsi na oema ben wani noso no ben wani, ma wan oema kan prati nanga a man soso efoe a man wani”. Ma soleki fa Jesus ben taki, dan a srefi markitiki ben de gi mansma nanga oemasma na ini a kresten sistema.
14. San Jesus ben sori nanga den sani di a ben leri sma?
14 Den leri di Jesus ben gi, e sori krin taki a ben broko en ede gi a boen foe oemasma. Foe dati ede, a no moeilek foe froestan foe san ede wan toe oemasma ben abi sowan lobi gi Jesus, so taki den ben sorgoe gi en nanga den eigi goedoe foe den (Lukas 8:1-3). „San mi e leri a no foe mi,” Jesus ben taki, „ma den de foe a sma di ben seni mi” (Johanes 7:16). Nanga den leri di a ben gi, Jesus ben sori a hori di Jehovah e hori oemasma na prakseri na wan safoe fasi.
„Gi den grani”
15. San na apostel Petrus ben skrifi foe a fasi fa trowmasra moesoe handri nanga den wefi foe den?
15 Na apostel Petrus ben si langalanga fa Jesus ben handri nanga oemasma. Sowan 30 jari na baka, Petrus ben gi wefi rai na wan lobi fasi èn dan a ben skrifi: „Oenoe trowmasra, tan libi na a srefi fasi nanga den akroederi sabi, gi den grani leki wan moro swaki patoe, a wan di abi oemasmafasi, foe di oenoe de erfgenaam toe nanga den foe a no-froedini boen foe a libi, so taki den begi foe oenoe no e ondrofeni hendri” (1 Petrus 3:7). San Petrus ben wani taki nanga den wortoe „gi den grani”?
16. (a) San a Griki zelfstandig naamwortoe di den vertaal nanga „grani” wani taki? (b) Fa Jehovah ben sori grani gi Jesus na a ten foe a transfiguratie, èn san wi e leri foe disi?
16 Akroederi wan skrifiman foe wan wortoeboekoe, dan a Griki zelfstandig naamwortoe di den vertaal nanga „grani” (ti·meʹ) wani taki „prijs, warti, grani, lespeki”. Wan toe fasi foe a Griki wortoe disi den e vertaal nanga „presenti” èn „warti foeroe” (Tori foe den Apostel 28:10; 1 Petrus 2:7). Efoe wi e ondrosoekoe a fasi fa Petrus gebroiki a srefi wortoe disi na 2 Petrus 1:17, wi kan si krin san a wani taki foe gi wan sma grani. Drape a ben taki foe a transfiguratie foe Jesus: „Gado, a Tata, ben gi en grani nanga glori, di den wortoe leki disi kon na en nanga bigi glori taki: ’Disi na mi manpikin, mi lobiwan, di misrefi feni boen.’” Na a transfiguratie foe Jesus, Jehovah ben gi grani na en Manpikin di a ben taki dati a feni Jesus boen, èn Gado ben taki dati, ala di tra sma ben kan jere (Mateus 17:1-5). Foe dati ede, a man di e gi grani na a wefi foe en, no e meki a firi sjen, noso e lagi en. Na presi foe dati, nanga den wortoe foe en èn nanga den sani di a e doe — te den de den wawan èn na poebliki — a e sori taki a wefi warti gi en. — Odo 31:28-30.
17. (a) Foe san ede kresten wefi abi a reti foe kisi grani? (b) Foe san ede wan man no moesoe denki taki a abi moro waarde moro leki wan oema na ini na ai foe Gado?
17 Petrus e taki dati kresten trowmasra moesoe ’gi’ den wefi foe den a grani disi. Den moesoe gi den grani, no foe di den wani sori boenfasi na den, ma foe di a wefi abi reti tapoe dati. Foe san ede wefi moesoe kisi a grani disi? Bikasi „oenoe na erfgenaam toe nanga den gi a no-froedini boen foe a libi”, na so Petrus e froeklari. Na ini a fosi jarihondro Gewoon Teri, ala den mansma nanga oemasma di ben kisi a brifi foe Petrus ben kisi a kari foe de erfgenaam nanga Krestes (Romesma 8:16, 17; Galasiasma 3:28). Den no ben abi den srefi frantiwortoe na ini a gemeente, ma te foe kaba, den ben sa abi wan prati foe tiri nanga Krestes na hemel (Openbaring 20:6). Na ini a ten disi toe, foe di moro foeroe foe a pipel foe Gado abi wan howpoe foe libi na grontapoe, a ben sa de wan serjoesoe fowtoe foe wan kresten mansma foe denki taki bikasi foe den grani di a abi kande na ini a gemeente, taki a moro warti na ini na ai foe Gado, moro leki den oemasma. (Teki gersi Lukas 17:10.) Mansma nanga oemasma abi a srefi posisi na jejefasi bifo Gado, bikasi na ofrandi-dede foe Jesus opo a srefi okasi gi mansma nanga gi oemasma — foe kon fri foe a kroetoe foe sondoe nanga dede, nanga têgo libi na den fesi. — Romesma 6:23.
18. Sortoe tranga reide Petrus e gi foe a gi di wan man moesoe gi grani na en wefi?
18 Petrus e gi ete wan tra tranga reide foe san ede wan trowmasra moesoe gi grani na en wefi. „So taki [en] begi no e ondrofeni hendri.” Den wortoe „e ondrofeni hendri” e kon foe a Griki werkwortoe (en·koʹpto) di wani taki troetroe „foe koti na ini”. Akroederi Expository Dictionary of New Testament Words foe Vine, a wortoe „ben gebroiki foe hendri sma foe pasa, foe di sma e broko a pasi, noso e poti wan sani na tapoe a pasi na wan fasi di de krin foe si”. So boen, a trowmasra di no e gi en wefi grani, kan ondrofeni taki wan skotoe de na mindri den begi foe en nanga Gado, di e hendri a jere di Gado kan jere a begi foe en. A man kan firi taki a no warti foe go na Gado, noso taki Jehovah no wani arki en. A de krin taki Jehovah e broko en ede srefisrefi gi a fasi fa mansma e handri nanga oemasma. — Teki gersi Kragisingi 3:44.
19. Fa mansma nanga oemasma kan dini makandra na ini a gemeente ala di den e sori lespeki gi makandra?
19 A froeplekti no e didon na tapoe trowmasra wawan foe sori grani. Ala di wan trowmasra moesoe sori grani na en wefi foe di a e handri na wan lobi fasi èn na wan warti fasi nanga en, wan wefi moesoe sori grani gi en trowmasra te a e saka ensrefi na en ondro èn e sori dipi lespeki gi en (1 Petrus 3:1-6). Boiti dati, Paulus ben froemane kresten foe ’sori grani gi makandra’ (Romesma 12:10). Disi e sori taki a de fanowdoe gi mansma nanga oemasma na ini a gemeente, foe wroko nanga makandra nanga lespeki gi makandra. Te so wan fasi foe doe sani de moro foeroe, dan kresten oemasma no sa taki na so wan fasi taki den e swaki a makti foe den wan di e teki fesi. Na presi foe dati, den sa horibaka gi den owroeman èn den sa wroko makandra nanga den (1 Korentesma 14:34, 35; Hebrewsma 13:17). Kresten opziener foe den sei, sa handri „moro owroe oemasma leki mama, moro jongoe oemasma leki sisa nanga ala lespeki” (1 Timoteus 5:1, 2). A sa de koni efoe den owroeman sa hori na prakseri na wan switi fasi den sani di den kresten sisa e taki. So boen, te wan sisa e sori lespeki gi theokrasia edemanwroko èn e aksi wan sani na wan lespeki fasi, noso e taki foe wan sani di abi prakseri fanowdoe, dan den owroeman sa breiti foe poti prakseri na tapoe na aksi foe en noso a problema foe en.
20. Fa sma moesoe handri nanga oemasma, akroederi den tori foe den Boekoe foe bijbel?
20 Foe sensi sondoe ben bigin na Eden, oemasma na ini foeroe koeltoeroe ben kisi wan posisi di no e sori grani. Ma na ini a bigin, dati no ben de a fasi fa Jehovah ben wani taki sma ben moesoe handri nanga den. Awinsi sortoe fasi foe si oemasma de moro foeroe na ini den koeltoeroe, a tori foe den Hebrew Boekoe nanga den Griki Boekoe foe bijbel e sori krinkrin taki sma moesoe handri oemasma di e gi densrefi na a dini foe Gado, nanga grani èn nanga lespeki. Dati na a reti di den kisi foe Gado.
[Foetoewortoe]
a The International Standard Bible Encyclopedia e froeklari: „Oemasma no ben njan nanga fisiti di ben de mansma, èn mansma no ben kisi a deki-ati foe taki nanga oemasma. . . . A ben de spesroetoe wan sjen sani te wan man ben taki nanga wan oema na wan poebliki presi.” A djoe Misjna, di abi den leri foe den rabi na ini, ben gi leki rai: „No taki foeroe nanga oemasma. . . . A man di e taki foeroe nanga oemasma e tjari ogri na tapoe ensrefi, èn a no e poti prakseri na tapoe den leri foe a Wet, èn te foe kaba a sa kisi Gehenna.” — Aboth 1:5.
b A boekoe Palestine in the Time of Christ e taki: „Na ini wan toe kefal, den ben poti na oema pikinmoro na a srefi posisi leki a srafoe. Foe eksempre, a no ben kan taki leki wan kotoigi na ini wan kroetoe-oso, boiti foe taki dati en trowmasra dede.” A Misjna e froeklari te a e taki foe Lefitikus 5:1: „[A wet foe] ’meki wan sweri foe gi kotoigi’ de gi mansma, ma no gi oemasma.” — Shebuoth 4:I.
c A djoe historiaman foe a fosi jarihondro, Josefus, e froeteri taki Salome, a sisa foe Kownoe Herodus, ben seni en trowmasra „wan papira di ben broko a trow foe den, èn a sani disi no ben de akroederi a djoe wet. Bikasi wi e gi (soso) a man primisi foe doe a sani disi”. — Jewish Antiquities, XV, 259 [vii, 10].
San na a piki foe joe?
◻ Sortoe eksempre e sori taki Jesus ben handri nanga oemasma nanga grani èn lespeki?
◻ Fa den leri di Jesus ben gi, ben sori lespeki gi a wartifasi foe oemasma?
◻ Foe san ede wan trowmasra moesoe gi grani na en kresten wefi?
◻ Sortoe froeplekti foe sori grani, ala kresten abi?
[Prenki na tapoe bladzijde 29]
Gi a prisiri foe oemasma di ben gi densrefi na a dini foe Gado, den ben de den fosiwan foe si Jesus di ben opo baka, èn di ben meki den gi kotoigi na den brada foe en