Mi feni wan sani di moro boen leki gowtoe

SO LEKI FA CHARLES MYLTON BEN FROETERI

Wan dei papa ben taki: „Meki wi seni Charlie go na Amerkankondre pe moni de foe piki na strati? A ben sa kan kisi pikinso èn seni en kon baka gi wi!”

TE JOE loekoe en boen dan sma ben denki taki a ben makriki foe kon goedoe na Amerkankondre. Libi ben tranga srefisrefi gi den na owstoesei foe Europa a ten dati. Mi papa nanga mama ben abi wan pikin boeroegron èn den ben e kweki wan toe kaw nanga wan toe fowroe. Wi no ben abi elektris faja noso watra na ini oso. Ma no wan tra sma na ini a birti no ben abi.

Mi ben gebore na Hoszowczyk tapoe 1 januari 1893, pikinmoro 106 jari pasa kaba. A dorpoe foe wi ben de na ini Galicia, wan distrikt di na a ten dati ben de wan pisi foe na Austro-Hongaria gran tirimakti. Now sma kan feni Hoszowczyk na owstoesei foe Polen no so fara foe Slowâkia nanga Oekraini. Den winter drape ben hebi srefisrefi èn a snew ben hei. Di mi ben abi so wan seibi jari, dan mi ben gwenti foe waka so wan afoe kilometer go na a kriki èn nanga wan aksi mi ben e kapoe wan olo opo ini na ijs foe kan kisi watra. Mi ben gwenti foe tjari en go na oso èn mama ben gwenti foe gebroiki en foe bori èn foe krin sani. A ben e wasi krosi na a kriki, ala di a ben e gebroiki den moro bigi pisi ijs leki wan wasi-oema.

Na Hoszowczyk skoro no ben de, ma mi ben leri foe taki Pôlsoe, Rosiatongo, Slowâkiatongo nanga Oekraini. Wi ben kweki leki Griki-Orthodoxsma, èn mi ben e dini leki wan boi foe na altari. Ma jongoejongoe kaba den priester ben meki mi broeja, foe di den ben e taki dati wi no moesoe njan meti na freida, ma densrefi ben e njan meti na freida.

Wan toe foe den mati foe wi ben drai kon baka nanga moni foe Amerkankondre, pe den ben wroko, foe kon meki den oso èn foe bai masjin foe wroko den boeroegron. Na a sani disi ben poesoe papa foe taki dati a ben o seni mi go na Amerkankondre makandra nanga wan toe birtisma di ben e meki plan foe go baka drape. Dati ben de na ini 1907 di mi ben abi 14 jari.

Mi ben kon broeja na Amerkankondre

Sjatoe baka dati mi ben de tapoe wan sipi èn na ini toe wiki wi ben koti na Atlantis Oceaan abra. A ten dati, joe ben abi 20 Amerkan dala fanowdoe noso den ben o seni joe go baka na joe mamakondre. Mi ben abi wan 20-dala solfroe moni, èn so mi ben de wan foe den miljoenmiljoen sma di ben pasa na Ellis èilanti, New York, a doro foe go na Amerkankondre. A no de foe taki dati moni no ben de foe piki na strati èn taki a no ben makriki foe kon goedoe. Te joe loekoe en boen dan foeroe foe den strati no ben meki grati kwetikweti!

Wi ben teki wan loko go na Johnstown, Pennsylvania. Den man di mi ben de nanga den ben de drape bifo èn den ben sabi wan oso pe sma ben e pai èn ben kan tan wan pisi ten. A prakseri ben de foe mi ben kan feni mi moro owroe sisa di ben e libi na Jerome, Pennsylvania, di baka ten mi ben kon sabi taki a ben de nomo 25 kilometer moro fara. Ma mi ben e taki Yarome, na presi foe Jerome, foe di na ini mi mamatongo den e taki a „J” leki wan „Y”. No wan sma ben jere foe Yarome, so now mi ben de ini wan freimde kondre, pikinmoro mi no ben man taki Ingrisitongo èn mi no ben abi foeroe moni.

Ala mamanten mi ben e waka soekoe wroko. Na a kantoro di ben e jepi sma foe feni wroko, soso toe noso dri sma den ben sa teki foe na bigi ipi di ben tanapoe na dorosei e wakti ini lin. So ibri dei mi ben e drai go baka na a oso pe mi ben e pai foe tan foe wan pisi ten, foe stoeka Ingrisitongo nanga jepi foe boekoe di ben jepi mi foe leri Ingrisitongo misrefi. Son tron mi ben e feni wan wroko di trawan no ben wani, ma someni moen ben e pasa èn pikinmoro mi moni ben kaba.

Kon de wán baka nanga mi brada nanga sisa

Wan dei mi pasa wan hotel nanga wan bar krosibei foe a loko station. A njanjan ben smeri switi srefisrefi! Den brede nanga stimofo, den hot dog èn tra sani ben de foe soso efoe wan sma ben bai a biri, di wan bigi grasi ben kostoe feifi sensi. Ala di mi no ben doro a jari ete, a barman firi sari nanga mi èn a ben seri a biri gi mi.

Ala di mi ben e njan, wan toe man kon na inisei èn den ben e taki: „Dringi joe biri esi-esi! A loko di e go na Jerome e kon.”

„Joe e bedoel Yarome?” mi ben aksi.

„Nôno, Jerome”, a man ben taki. Ne mi ben kon jere pe mi sisa ben e libi. Foe taki en leti, na a bar mi kon miti wan man di ben libi dri doro nomo moro fara foe mi sisa! Na so mi kon bai wan karta foe a loko èn te foe kaba mi ben feni mi sisa.

Mi sisa nanga a masra foe en ben abi wan oso pe sma di e wroko na ini wan krofaja mijn ben e pai foe tan wan pisi ten èn mi ben tan nanga den. Den ben feni wan wroko gi mi pe mi ben moesoe loekoe wan pompoe di ben sorgoe taki watra no ben go na ini a mijn. Ibritron te a ben stòp foe wroko, mi ben moesoe kari wan monteur. A wroko ben e pai 15 sensi wan dei. Baka dati mi ben wroko na a pasi foe a loko, na wan presi pe den ben e meki bowston èn mi ben wroko srefi leki wan assuransi man. Baka ten mi ben froisi go na Pittsburgh pe mi moro owroe brada Steve ben e libi. Drape wi ben e wroko na ini den bigi oso pe den ben e wroko staal na sei den bigi onfoe. Noiti mi ben wroko nofo moni foe seni go na oso.

Wan osofamiri nanga wan beri

Di mi ben e waka go na wrokope wan dei, mi si wan jongoe oema di abi a wroko foe krin oso èn di ben e tanapoe na fesi na oso pe a ben e wroko. Mi prakseri na misrefi: „San, a moi troetroe.” Dri wiki baka dati, na ini 1917, dan mi nanga Helen ben trow. Den tin jari di kon baka dati, wi ben kisi siksi pikin, èn wan foe den dede ala di a ben de wan pikin boi ete.

Na ini 1918 Pittsburgh Railways teki mi foe rèi wan tram. Krosibei foe na oso pe den tram ben e tan wan bar ben de pe wan sma ben kan bai wan kòp kofi. Na inisei dan a ben sori leki den toe man di ben abi a bar no ben e broko den ede efoe joe ben bisteri wan sani, so langa leki den ben kan preiki gi joe nomo foe bijbel. Mi ben taki: „Oenoe wani taigi mi taki heri grontapoe fowtoe èn taki oenoe toe wawan abi reti?”

„We, soekoe en na ini joe bijbel!”, den ben lobi foe taki. Ma na a ten dati den no ben overtoigi mi.

Na wan sari sani, taki na ini 1928, mi lobi Helen ben kon siki. Foe den pikin ben kan kisi moro boen sorgoe, mi ben tjari den foe go tan nanga mi sisa nanga a masra foe en na Jerome. Na a ten disi den ben bai wan boeroegron. Mi ben e fisiti den pikin foeroetron èn ben gi moni ibri moen foe pai foe a njanjan foe den. Mi ben seni krosi gi den toe. A sari foe taki, ma Helen en situwâsi ben kon moro takroe, èn a dede 27 augustus 1930.

Mi ben firi leki mi ben de mi wawan èn leki mi libi ben pori. Di mi ben go na a priester foe sreka beri sani, a ben taki: „Joe no de foe a kerki disi moro. Joe no ben pai a moni di joe moesoe gi leki memre foe kerki moro langa leki wan jari.”

Mi ben froeteri en taki na oema foe mi ben siki langa èn taki mi ben gi ala moni di ben tan abra na den pikin foe mi, so taki den ben kan gi moni na a kerki na Jerome. Tokoe, bifo a priester ben agri foe sorgoe gi a beri, mi ben moesoe leni 50 dala foe kan pai a moni baka di mi ben moesoe pai a kerki ete. A priester ben wani wan 15 dala toe foe hori wan mis na a oso foe a sisa foe Helen pe mati nanga famiri ben meki mofo foe kon teki afscheid foe Helen. Mi no ben man feni a 15 dala, ma a priester ben agri foe hori a mis efoe mi ben sa gi en a moni a dei di den e pai wrokoman.

Di a dei di den e pai wrokoman ben doro, mi ben moesoe gebroiki a moni foe bai soesoe nanga krosi gi den pikin foe go na skoro. We, so wan toe wiki a baka, a priester kon na ini mi tram. „Te now ete joe moesoe pai mi a 15 dala dati”, a ben taki. Dan, di a ben e saka na a halte, a ben e tapoe skreki gi mi: „Mi e go na a basi foe joe èn mi o meki a poeroe a moni na ini a moni di joe e wroko.”

Di mi kaba wroko a dei dati, mi go na mi basi èn mi taigi en san ben pasa. Ala di a ben de wan katoliksma, a ben taki: „Efoe a priester dati e kon djaso, mi sa taigi en san mi abi tapoe mi ati foe a takroe fasi fa a e tjari ensrefi!” A piki dati ben meki mi bigin denki: ’Den priester wani soso a moni foe wi, ma noiti den e leri wi wan sani foe bijbel.’

Kon leri a waarheid

A tra leisi di mi ben de na ini a bar di den toe Griki man ben e sorgoe gi, wi ben taki foe na ondrofeni di mi ben abi nanga a priester. Leki wan bakapisi foe dati, mi ben bigin studeri nanga den Bijbel Ondrosoekoeman, so leki fa den ben kari Jehovah Kotoigi a ten dati. Heri neti mi ben e tan na ai e leisi bijbel nanga bijbel poeblikâsi. Mi ben leri taki Helen no ben e njan pina na ini wan vagevuur, so leki fa a priester ben taki, ma taki a ben e sribi na ini dede (Job 14:13, 14; Johanes 11:11-14). Foe troe, mi ben feni wan sani di moro boen leki gowtoe — a ben de a waarheid!

Wan toe wiki na baka, na a fosi konmakandra foe mi nanga den Bijbel Ondrosoekoeman na a Garden Theatre na Pittsburgh, mi ben opo mi anoe èn mi ben taki: „Tide neti mi leri moro foeroe foe bijbel leki san mi ben leri na ini ala den jari di mi ben de na kerki.” Baka ten, di den ben aksi soema ben wani abi wan prati na a preikiwroko a tra dei, mi anoe ben go na loktoe agen.

Dan, 4 oktober 1931, mi simboliseer a gi di mi gi misrefi abra na Jehovah foe di mi teki dopoe na ini watra. Disiten mi ben man joeroe wan oso èn tjari den pikin kon baka foe tan nanga mi, èn mi ben joeroe wan sma di e krin oso foe jepi sorgoe den. Ala di mi ben abi mi osofamiri frantiwortoe, tokoe foe januari 1932 te leki juni 1933, mi ben abi wan prati na ini wan spesroetoe diniwroko di den ben kari jepi-diniwroko, èn mi ben wroko 50 te nanga 60 joeroe ibri moen foe taki nanga tra sma foe bijbel.

A ben de a ten disi di mi ben bigin poti prakseri tapoe wan moi jongoe oema di ala ten, soleki a ben sori, ben e rèi a tram foe mi te a ben e go èn e komoto na wroko. Wi ben e loekoe wisrefi na ini a spikri foe mi tram. Na so mi nanga Maria ben miti makandra. Wi ben tron freiri foe makandra èn wi ben trow na ini augustus 1936.

Na ini 1949 mi ben de moro langa na wroko leki trawan, èn foe dati ede mi ben kan soekoe wan wroko schema di ben meki taki mi ben kan pionier, so leki fa den e kari a foeroeten diniwroko. A moro jongoe oemapikin foe mi, Jane, ben bigin pionier na ini 1945, èn wi ben pionier makandra. Baka ten Jane ben miti Sam Friend, di ben e wroko na Bethel, na edekantoro foe Jehovah Kotoigi na Brooklyn, New York.a Den ben trow na ini 1952. Mi tan pionier go doro na Pittsburgh èn mi ben hori foeroe bijbelstudie, wan leisi nanga 14 difrenti osofamiri ibri wiki. Na ini 1958, mi kisi pensjoen foe mi wroko tapoe a tram. Baka dati dan a pionierwroko ben de makriki, foe di mi no ben abi foe wroko moro aiti joeroe ibri dei na mi grontapoewroko.

Na ini 1983, Maria ben kon siki. Mi ben proeberi foe sorgoe en neleki fa en ben sorgoe so boen gi mi pikinso moro leki 50 jari langa. Te foe kaba, tapoe 14 september 1986, a lasi libi.

Mi e feni a presi pe mi gebore

Na ini 1989, Jane nanga Sam teki mi nanga den foe go na den kongres na Polen. Wi ben fisiti a kontren toe pe mi ben gro. Di den Rosiasma ben teki a pisi dati foe grontapoe abra, den ben kenki den nen foe den foto èn ben tjari sma go abra na tra kondre. Den ben tjari wan foe den brada foe mi go abra na Istanbul èn wan sisa na Rosiakondre èn sma di wi ben aksi na ini a birti no ben sabi a nen foe a foto pe mi ben libi.

Dan, wan toe bergi di ben de farawe foe si ben gersi leki mi ben sabi den. Di wi ben kon moro krosibei, dan mi ben kon sabi tra kontren baka — wan pikin bergi, wan pisi pe a pasi e prati ensrefi, wan kerki, wan broki abra wan liba. Wantronso, wan sani di froewondroe wi, wi ben si wan bord di ben sori a pasi di ben abi a skrifi na tapoe: „Hoszowczyk!” Wan sjatoe ten bifo den komunistsma ben lasi a makti di den ben abi, èn den fosi nen foe den dorpoe ben poti baka.

Na oso foe wi no ben de moro, ma drape na onfoe ben de di wi ben gebroiki foe bori na dorosei, èn di ben beri afoe na ini a gron. Ne mi sori go na wan bigi bon en mi ben taki: „Loekoe a bon dati. Na mi ben prani en bifo mi loesoe komoto djaso foe go na Amerkankondre. Loekoe fa a gro kon bigi!” Baka dati wi ben go fisiti den berigron, èn wi ben e soekoe nen foe famiri, ma wi no ben feni no wan.

Poti a waarheid na a fosi presi

Di a masra foe Jane dede na ini 1993, dan a aksi mi efoe mi ben wani taki a libi Bethel foe kon sorgoe mi. Mi taigi en taki dati ben o de a moro ogri sani di a ben sa kan doe èn te now ete mi e denki a srefi fasi. Mi ben tan mi wawan te leki mi ben doro 102 jari, ma dan a ben kon de fanowdoe taki den froisi mi go na ini wan oso pe den e loekoe owroe sma. Te now ete mi na wan owroeman na ini a Bellevue gemeente na Pittsburgh, èn tapoe sonde den brada e kon teki mi foe go na den konmakandra na a Kownoekondre zaal. Ala di a preikiwroko foe mi now no de so foeroe moro, tokoe mi e tan tapoe a lijst foe pionier di, foe den jari nanga gosontoe ede, mag doro moro mendri joeroe leki den tra pionier.

Den jari di pasa, mi njan boen foe den spesroetoe skoro, di a Waktitoren Genootschap ben orga, pe den opziener e kisi leri. December disi di pasa, mi ben fisiti wan toe foe den programa foe a Kownoekondre diniwroko-skoro gi gemeente owroeman. Èn 11 april disi di pasa, dan Jane ben tjari mi go na a Memrefesa foe a dede foe Krestes, wan fesa di e gi mi prisiri taki mi abi wan prati na ini ibri jari sensi 1931.

Son sma di mi studeri bijbel nanga den e dini now leki owroeman, trawan na zendeling na Zuid-Amerika, èn son wan na granpapa nanga granmama, èn den e dini Gado makandra nanga den pikin foe den. Dri foe mi eigi pikin — Mary Jane, John, nanga Jean — so srefi foeroe foe den pikin nanga granpikin foe den, e dini Jehovah Gado getrow. A begi foe mi de taki wan dei a tra oemapikin foe mi nanga den tra granpikin foe mi èn den pikin foe mi granpikin sa doe so toe.

Now na a libimarki foe 105 jari, mi e gi ibri sma te now ete deki-ati foe studeri bijbel èn foe taki nanga tra sma foe sani di den leri. Ija, mi abi a fasti bribi taki efoe joe e tan krosibei foe Jehovah, dan noiti joe froewakti no sa kon troe. Dan joe toe sa kan njan boen foe wan sani di moro boen leki gowtoe di e lasi gowe — a waarheid di e gi wi na okasi foe abi wan warti matifasi nanga a Sma di e gi wi libi, Jehovah Gado.

[Foetoewortoe]

[Prenki na tapoe bladzijde 25]

Di mi ben e tjari wan tram

[Prenki na tapoe bladzijde 26]

Na a oso pe den e loekoe owroe sma èn pe mi e libi now

[Prenki na tapoe bladzijde 27]

A bord di e sori a pasi èn di wi ben feni na ini 1989