Ondrofenitori
A ben de wan tyalensi nanga wan prisiri fu kweki aiti pikin na a fasi fa Yehovah wani
SOLEKI FA JOYCELYN VALENTINE FRUTERI
Na ini 1989, mi masra go wroko na wan tra kondre. A ben pramisi fu seni moni kon so taki mi ben kan sorgu gi den aiti pikin fu mi. Furu wiki ben pasa, ma mi no yere noti fu en. Wan tu mun ben pasa, ma mi no ben yere noti ete fu mi masra. Mi ben e tan taigi misrefi: ’So esi leki sani e waka bun gi en, a o kon na oso.’
FU DI mi no ben abi moni fu sorgu mi osofamiri, meki mi lasi howpu. Furu neti mi no ben man sribi. Mi no ben man bribi san pasa, èn mi aksi misrefi: ’Fa a kan du disi nanga en osofamiri?’ Te fu kaba mi kon frustan taki trutru mi masra ben gowe libi wi, aladi a ben tranga gi mi fu bribi dati. Tide, sowan 16 yari baka di a gowe libi wi, a no drai kon baka ete. Leki bakapisi fu dati mi kweki den pikin fu mi sondro masra. Disi no ben de wan makriki sani, ma te mi e luku fa den pikin fu mi teki a pasi fu Yehovah, dan mi e prisiri trutru. Ma fosi mi e fruteri fa wi kakafutu leki osofamiri, kon meki mi fruteri unu fa mi kweki.
Mi ben e suku a tiri fu Bijbel
Mi gebore na ini 1938 na tapu a Karibis èilanti Yamaika. Aladi mi papa no ben de fu wan kerki, toku a ben e si ensrefi leki wan sma di abi frede gi Gado. Nofo tron te neti, a ben e aksi mi fu leisi den psalm gi en na ini Bijbel. A no teki langa di mi ben sabi furu psalm na ede. Mi mama ben e go na wan kerki na ini a birti, èn wanwan leisi a ben e tyari mi go na den kerki konmakandra.
Na a kerki dati, sma ben fruteri wi taki Gado e meki bunsma go na hemel èn taki a e bron ogrisma fu têgo na ini wan helfaya. Wi ben leri tu taki Yesus na Gado èn taki a lobi pikin. Den sani disi ben bruya mi srefisrefi èn mi ben kon frede gi Gado. Mi ben aksi misrefi: ’Fa wan Gado di lobi wi, kan pina sma na ini faya?’
Mi ben e kisi takru dren te mi ben e prakseri taki wan helfaya de. Bakaten mi teki wan bijbelstudie na den Zevendedagsadventist. Den ben e leri taki ogrisma no ben o nyan pina fu têgo, ma taki den ben o bron kon tron asisi na ini a faya. A sani disi no ben e trobi mi so, èn fu dati ede mi bigin go na a kerki fu den. Ma den leri fu den ben e bruya mi, èn den no ben yepi mi fu kenki a fowtu fasi fa mi ben e libi.
Na a ten dati, furu sma ben feni taki hurudu no bun. Ma mi nanga furu trawan ben e bribi taki na soso sma di ben abi seks demakandra nanga moro leki wán sma, na huruman. Sobun, te tu sma di no trow abi seks soso nanga makandra, dan den no e sondu (1 Korentesma 6:9, 10; Hebrewsma 13:4). A denki dati meki taki mi tron wan mama fu siksi pikin, aladi mi no ben trow.
Mi e go na fesi na yeye fasi
Na ini 1965, Vaslyn Goodison nanga Ethel Chambers kon libi na ini a foto Bath, di de krosibei. Den ben de pionier, noso furuten dinari fu Yehovah Kotoigi, èn wan dei den taki nanga mi papa. Di den aksi en efu a ben wani wan oso-bijbelstudie, dan a ben feni dati bun. Efu mi ben de na oso te den ben e kon na mi papa, dan den ben e taki nanga mi tu. Aladi mi no ben e frutrow Yehovah Kotoigi srefisrefi, toku mi teki a bosroiti fu studeri Bijbel nanga den, soso fu sori den taki den leri fu den no e kruderi nanga Bijbel.
Mi poti furu aksi na a studie, èn den Kotoigi piki ala den aksi nanga yepi fu Bijbel. Den yepi mi fu kon si taki den dedewan no sabi noti, èn taki den no e nyan pina na ini hel (Preikiman 9:5, 10). Mi kon sabi sosrefi fu a howpu di Bijbel e gi sma taki den kan libi fu têgo na ini Paradijs na grontapu (Psalm 37:11, 29; Openbaring 21:3, 4). Mi papa no go doro nanga a bijbelstudie fu en, ma mi bigin go na den konmakandra na ini a gemeente fu Yehovah Kotoigi na ini a kontren fu wi. A moi fasi èn na orga fasi fa den konmakandra ben e hori, meki taki mi leri furu fu Yehovah. Mi go tu na kring konmakandra nanga distrikt kongres, den bigi konmakandra di den Kotoigi e hori. Den sani di mi ben e leri fu Bijbel meki taki mi kon de fayafaya fu anbegi Yehovah na a yoisti fasi. Ma wan sani ben e tapu pasi gi mi fu du dati.
Na a ten dati, mi ben e libi nanga a papa fu dri fu den siksi pikin fu mi, èn mi no ben trow nanga en. Mi ben leri na ini Bijbel taki Gado e krutu sma di abi seks demakandra sondro taki den trow, èn mi konsensi bigin fon mi (Odo 5:15-20; Galasiasma 5:19). Fu di mi bigin lobi a waarheid moro nanga moro, meki mi ben e angri fu seti mi libi akruderi a wet fu Gado. Te fu kaba, mi teki wan bosroiti. Mi taigi a man di mi ben e libi nanga en, taki efu wi no ben o trow, dan wi ben musu prati. Aladi mi masra no ben abi a srefi bribi leki mi, toku wi trow tapu 15 augustus 1970, feifi yari baka di den Kotoigi ben taki nanga mi fu a fosi leisi. Na ini december 1970 mi teki dopu fu sori taki mi gi misrefi abra na Yehovah.
Noiti mi sa frigiti a fosi dei di mi bigin teki prati na a preikiwroko. Mi ben e senwe èn mi no ben sabi fa fu bigin wan Bijbel takimakandra. Fu taki en leti, mi ben breiti di na ososma tapu a takimakandra esi-esi. Ma heri esi mi no ben e senwe moro. Na a kaba fu a dei mi ben breiti trutru, fu di mi ben taki syatu fu Bijbel nanga difrenti sma, èn mi ben libi wan tu Bijbel publikâsi gi den.
Mi e tan gi mi osofamiri deki-ati na yeye fasi
Na ini 1977, na osofamiri fu wi ben e teri aiti pikin. Mi ben abi a fasti bosroiti fu du ala san mi man fu yepi mi osofamiri fu dini Yehovah (Yosua 24:15). Fu dati ede mi ben e meki ala muiti fu studeri doronomo nanga mi osofamiri. Son leisi, mi ben weri so te taki mi ben e dyonko te wan fu den pikin ben e leisi wan paragraaf, èn den pikin ben musu wiki mi. Awinsi fa mi ben weri, noiti dati tapu mi fu studeri Bijbel nanga mi osofamiri.
Mi ben gwenti begi nanga den pikin fu mi. So esi leki den ben owru nofo, mi leri den fa densrefi ben kan begi Yehovah. Mi ben sorgu taki ibriwan fu den ben e begi fosi den go sribi. Mi ben begi nanga ibriwan fu den pikin di ben yongu tumusi fu begi gi ensrefi.
Biginbigin, mi masra no ben wani taki mi tyari den pikin go na den gemeente konmakandra. Ma fu di a kon si taki ensrefi ben o musu luku den pikin te mi ben de na den konmakandra, meki a no gens wi so furu moro. Te neti, a ben lobi fu go na strati èn fu go na en mati, ma a no ben wani denki srefisrefi fu du dati makandra nanga aiti pikin! Bakaten a bigin srefi fu yepi mi sreka den pikin fu go na a Kownukondre zaal.
Heri esi den pikin kon gwenti fu go na ala den gemeente konmakandra, èn fu teki prati na a preikiwroko. Te den ben abi fakansi, dan nofo tron den ben e go na ini a preikiwroko makandra nanga den pionier, noso furuten dinari na ini a gemeente. Disi yepi den yonguwan fu mi fu kisi wan waran lobi gi a gemeente èn gi a preikiwroko.—Mateyus 24:14.
Wan ten fu tesi
Fu man abi moro moni fu sorgu gi na osofamiri, meki mi masra bigin go na tra kondre fu wroko. A ben e tan gowe fu na osofamiri langa pisi ten, ma baka wan spesrutu pisi ten a ben gwenti fu drai kon baka na oso. Ma na ini 1989, a gowe èn a no drai kon baka. Soleki fa mi ben taki na ini a bigin, dan a gowe di mi masra gowe libi mi, meki taki mi lasi howpu. Furu neti mi krei èn mi begi Yehovah fayafaya fu kisi trowstu nanga krakti fu man kakafutu, èn mi firi taki a piki den begi fu mi. Bijbeltekst soleki Yesaya 54:4 nanga 1 Korentesma 7:15 ben meki mi firi korostu, èn den gi mi krakti fu go doro nanga mi libi. Na ini a Kresten gemeente, famiriman nanga mati ben trowstu mi tu, èn den gi mi sani di mi ben abi fanowdu. Mi breiti srefisrefi nanga a yepi di mi kisi fu Yehovah èn fu a pipel fu en.
Wi kisi fu du nanga tra tesi tu. Wan leisi wán fu den umapikin fu mi ben puru fu a gemeente fu di a ben tyari ensrefi na wan fasi di no e kruderi nanga Bijbel. Mi lobi ala den pikin fu mi trutru, ma a de moro prenspari gi mi fu de loyaal na Yehovah. Sobun, na a ten dati, mi nanga den tra pikin fu mi ben e hori wisrefi doronomo na a rai fu Bijbel di e sori fa fu handri nanga sma di puru fu a gemeente (1 Korentesma 5:11, 13). Furu sma di no ben frustan a bribi fu wi ben krutu wi fu di wi ben teki a bosroiti disi. Ma baka di mi umapikin kon baka na ini a gemeente, dan en masra taigi mi taki a fasti bosroiti di wi ben teki fu hori wisrefi na Bijbel gronprakseri, ben naki en ati. A e dini Yehovah now makandra nanga en osofamiri.
Mi e kisi moni problema
Di mi masra gowe libi wi, mi no ben abi moni doronomo, èn a no ben seni moni moro gi na osofamiri. A situwâsi disi leri wi fu de tevrede nanga wan libi sondro tumusi furu pranpran, èn a leri wi tu fu abi moro warderi gi yeye sani leki gi materia sani. Fu di den pikin ben leri fu sori lobi gi makandra èn fu yepi makandra, meki den kisi wan tranga banti nanga makandra. Di den moro bigiwan bigin wroko, dan den ben de klariklari fu yepi den brada nanga sisa fu den di ben moro yongu. Marseree, a moro bigi umapikin fu mi, ben yepi Nicole, a moro yongu sisa fu en, fu pasa a Mulo-skoro. Boiti dati, mi ben abi wan pikin wenkri pe mi ben e seri gruntu. A pikinso moni di mi ben e meki ben yepi mi fu sorgu gi sonwan fu den sani di wi ben abi fanowdu.
Noiti Yehovah drai baka gi wi. Wan leisi, mi fruteri wan Kresten sisa taki wi no ben abi moni fu go na a distrikt kongres. A sisa taki: „Sisa Val, te yu yere taki wan kongres o hori, bigin sreka yusrefi! Yehovah sa sorgu gi den sani di yu abi fanowdu.” Mi teki a rai fu en. Yehovah gi wi san wi ben abi fanowdu, èn a e du dati ete. Na osofamiri fu mi noiti no misi wan bigi konmakandra noso wan kongres fu di wi no ben abi moni.
Na ini 1988, a bigi ogri winti di nen Gilbert, pori Yamaika, èn wi gowe libi wi oso fu go na wan moro bun kibripresi. Di na ogri winti saka pikinso, dan mi nanga a boi fu mi gowe libi a kibripresi fu go luku san ben libi ete fu na oso fu wi. Di mi ben e sukusuku sani na ini a broko oso, dan mi si wan sani di mi ben wani teki. Wantronso, a winti bigin bari baka, ma mi tan hori a sani di mi ben wani teki nomonomo. „Mama, libi a telefisi. Yu na a wefi fu Lot?” (Lukas 17:31, 32) A sani dati di a boi fu mi taki meki taki mi kisi misrefi. Mi libi a telefisi di ben nati dorodoro, èn wi ala tu lon go kibri.
Mi e beifi te mi e prakseri taki mi ben kan lasi mi libi fu wan telefisi ede. Ma mi ati e prisiri te mi e prakseri san a boi fu mi ben taki na a okasi dati, fu di a sani dati ben sori taki a ben sabi san na den moro prenspari sani. Nanga yepi fu a Bijbel leri di a kisi na ini a Kresten gemeente, a ben kan yepi mi fu no kisi mankeri na skin fasi, èn kande na yeye fasi sosrefi.
A bigi ogri winti ben pori wi oso èn sosrefi ala san wi ben abi, èn wi ben brokosaka srefisrefi. Baka dati, den Kresten brada fu wi doro. Den gi wi deki-ati fu poti wi frutrow tapu Yehovah èn fu tan go doro nanga a preikiwroko, èn den yepi wi fu bow wi oso baka. A wroko di den Kotoigi wrokoman fu Yamaika nanga tra kondre ben de klariklari fu du na wan lobi-ati fasi èn sondro fu denki densrefi, naki wi ati trutru.
Wi e poti Yehovah na a fosi presi
Baka di Melaine, a di fu tu pikin fu mi, kaba a skoro fu en, dan a go dini leki pionier. Baka dati, a teki a kari fu go dini leki pionier na ini wan tra gemeente, èn disi ben wani taki dati a ben o musu libi a wroko fu en. Nanga a wroko dati a ben e yepi na osofamiri fu wi bun na moni sei, ma wi ben abi a frutrow taki Yehovah ben o sorgu gi wi efu wi alamala ben e poti a Kownukondre na a fosi presi (Mateyus 6:33). Bakaten, mi manpikin, Ewan, kisi wan kari tu fu dini leki pionier. A ben e horibaka gi a famiri na moni sei, ma wi gi en a deki-ati fu teki a kari èn wi winsi en a blesi fu Yehovah. Ala ten mi gi den pikin deki-ati fu du moro na ini a diniwroko fu Yehovah, èn wi di de na oso ete noiti no ben de sondro den sani di wi abi fanowdu. Na presi fu dati, wi kisi moro prisiri, èn son tron wi ben kan yepi tra sma di ben de na nowtu.
Tide na a dei, a e gi mi furu prisiri fu si fa den pikin fu mi „e waka na ini a waarheid” (3 Yohanes 4). Nownowde, Melaine, wán fu den umapikin fu mi, de na ini a kringwroko makandra nanga en masra di e dini leki kring-opziener. Mi umapikin Andrea nanga a masra fu en na spesrutu pionier, èn a e go nanga en masra na difrenti gemeente te a e teki presi gi a kring-opziener. Ewan, a manpikin fu mi, e dini leki spesrutu pionier makandra nanga en wefi, èn a de wan gemeente owruman. Wan tra umapikin, Ava-Gay, e wroko makandra nanga en masra na a bijkantoro fu Yehovah Kotoigi na ini Yamaika. Jennifer, Genieve, nanga Nicole, e dini leki memre fu difrenti gemeente makandra nanga den masra nanga den pikin fu den. Marseree e tan nanga mi, èn wi e go now na a gemeente fu Port Morant. Mi kisi furu blesi, bika ala den aiti pikin fu mi e tan dini Yehovah.
Mi kon kisi problema na skin sei fu di mi kon grani. Now mi abi rheuma, ma a e gi mi prisiri ete fu dini leki pionier. Wan pisi ten kaba a muilek srefisrefi gi mi fu waka na ini a birti pe mi e libi, fu di a presi abi furu bergi. A ben muilek gi mi fu du mi diniwroko. Mi pruberi fu rèi baisigri, èn mi feni taki dati de moro makriki leki fu waka. Sobun, mi bai wan baisigri na wan sma, èn mi bigin gebroiki en. Na ini a bigin den pikin ben frede fu si fa a siki mama fu den e rèi wan baisigri. Ma den breiti srefisrefi fu si fa mi e tan du a preikiwroko soleki fa mi lobi du dati.
A e gi mi furu prisiri fu si fa den sma di mi ben studeri nanga den, teki a waarheid fu Bijbel. Mi e begi doronomo taki Yehovah e yepi ala den sma na ini mi osofamiri fu tan getrow na en na ini a ten fu a kaba disi, èn fu têgo. Mi e prèise èn mi e taigi Yehovah, a Bigi „Yereman fu begi”, tangi fu di a yepi mi fu pasa a tyalensi fu kweki aiti pikin na a fasi fa a wani.—Psalm 65:2.
[Prenki na tapu bladzijde 10]
Mi nanga mi pikin, den masra nanga wefi fu den, èn den granpikin fu mi
[Prenki na tapu bladzijde 12]
Now mi e rèi wan baisigri fu du mi diniwroko