Aksi fu leisiman

San Bijbel e taki fu a leri di pikin-nengre musu kisi te a papa wawan, noso a mama wawan, na wan Kotoigi fu Yehovah?

Tu prenspari Bijbel gronprakseri e yepi wan Kotoigi papa noso mama fu si fa a kan gi leri na den pikin fu en, te a abi wan trowpatna di no de wan Kotoigi. Wan fu den gronprakseri dati na: „Wi musu gi yesi na Gado leki tiriman moro leki na libisma” (Tori fu den Apostel 5:29). A tra gronprakseri na: „Wan masra na a edeman fu en wefi soleki fa Krestes na a edeman fu a gemeente” (Efeisesma 5:23). A di fu tu gronprakseri no abi fu du nomo nanga Kotoigi wefi di abi masra di de Kotoigi tu. Ma a abi fu du sosrefi nanga wefi di abi wan trowpatna di no de wan Kotoigi (1 Petrus 3:1). Fa wan papa noso wan mama di de wan Kotoigi, kan gebroiki den gronprakseri disi na wan yoisti fasi te a e gi den pikin fu en leri?

Efu a masra na wan Kotoigi fu Yehovah, dan na en abi a frantwortu fu gi en osofamiri san a abi fanowdu na yeye fasi èn sosrefi na skin fasi (1 Timoteyus 5:8). Aladi a kan de so taki a mama di no de wan Kotoigi, de moro furu nanga den pikin fu den, toku a Kotoigi papa musu gi den pikin fu en leri. A musu leri den fa fu anbegi Yehovah Gado èn a musu tyari den go na den Kresten konmakandra, bika drape den sa leri fa fu tyari densrefi na wan yoisti fasi èn den sa abi bun demakandra tu.

Ma fa a de te en wefi di no de wan Kotoigi, nomonomo wani tyari den pikin fu den go na a kerki fu en, noso te a wefi wani leri den pikin san en e bribi? A kan taki a wet fu a kondre e gi a wefi a reti fu du dati. A kan de so furu tron, taki den pikin no ben sa teki prati na a anbegi na den presi dati te a papa e gi den pikin fu en bun leri di abi fu du nanga na anbegi fu Yehovah. Te den pikin e gro kon moro owru, dan a Bijbel leri di den kisi fu a papa fu den sa musu yepi den fu hori densrefi na a waarheid fu Gado Wortu. A masra di de wan Kotoigi, ben o prisiri srefisrefi efu den pikin fu en ben o teki a sei fu a waarheid!

Efu a mama na wan Kotoigi fu Yehovah, dan a abi fu lespeki a Bijbel gronprakseri di e taki dati a masra na a edeman fu na osofamiri, ma na a srefi ten a e broko en ede nanga a tanbun fu den pikin fu en èn a howpu fu têgo libi di den kan kisi (1 Korentesma 11:3). Furu tron a masra di no de wan Kotoigi, no sa meki trobi te a Kotoigi wefi fu en e leri den pikin fu den fa den musu tyari densrefi na wan yoisti fasi, èn sosrefi te en wefi e leri den pikin fa fu anbegi Yehovah Gado. Èn na den presi pe a pipel fu Yehovah e kon makandra, a Kotoigi wefi kan kisi yepi fu gi den pikin a leri dati. A mama kan yepi en masra fu frustan san na den winimarki fu a bun leri di den pikin e kisi nanga yepi fu na organisâsi fu Yehovah. Na wan koni èn switi fasi a kan sori en masra o warti a de fu leri Bijbel gronprakseri na den pikin fu den, di musu libi na ini wan grontapu pe moro nanga moro sma e tyari densrefi na wan takru fasi.

Ma a kan, taki a masra di no de wan Kotoigi wani nomonomo taki den pikin fu en musu du sani akruderi a bribi fu en. A kan de so taki a e tyari den go na a kerki fu en, èn taki a e gi den leri soleki fa den sma e du dati na ini a bribi fu en. Wan masra kan feni tu taki nowan bribi no bun, èn dati kan meki taki a no wani kwetikweti taki den pikin fu en musu kisi leri di abi fu du nanga bribi. Fu di en na a edeman fu na osofamiri, meki en abi a moro bigi frantwortu fu teki wan bosroiti na ini den afersi disi.a

Aladi a Kotoigi wefi e lespeki en masra leki na edeman fu na osofamiri, toku leki wan Kresten di gi ensrefi abra na Gado, a musu hori a fasi fu denki fu Petrus nanga Yohanes na prakseri, di ben taki: „Ma gi wi, wi no kan tapu fu taki fu den sani di wi si èn yere” (Tori fu den Apostel 4:19, 20). Wan Kotoigi mama di e hori na prakseri taki den pikin fu en musu kon sabi Bijbel gronprakseri fu di a wani taki a go bun nanga den, sa suku okasi fu leri den pikin fa den musu tyari densrefi na wan yoisti fasi. A abi a frantwortu na fesi Yehovah fu leri trawan den tru tori di a kon sabi, èn den pikin fu en musu kisi a leri dati tu (Odo 1:8; Mateyus 28:19, 20). Fa a Kotoigi mama kan lusu a bigi problema disi?

Prakseri leki eksempre san a wefi di de wan Kotoigi, kan du fu leri en pikin fu abi bribi na ini Gado. Kande a no man hori wan bijbelstudie nanga den pikin fu en, bika en masra no wani dati. Disi wani taki dati a wefi no musu fruteri den pikin noti fu Yehovah? Nôno. Den sani di a e taki èn den sani di a e du o sori krin taki a e bribi na ini a Mekiman. A no de fu taki dati den pikin fu en sa wani aksi en wan tu sani fu a tori dati. A no musu frede fu gebroiki a fri di a abi fu taki fu a bribi fu en. A musu de klariklari fu fruteri sma, sosrefi den pikin fu en, taki a e bribi na ini a Mekiman. Srefi te a no man hori wan bijbelstudie nanga den pikin, èn srefi te a no man tyari den go na den konmakandra doronomo, toku a kan leri den fu Yehovah Gado.—Deuteronomium 6:7.

Fu a banti na mindri wan Kotoigi nanga en trowpatna di no de na bribi, Paulus ben skrifi: „A masra di no de na bribi kon santa fu en wefi ede, èn a wefi di no de na bribi kon santa fu a brada ede; efu dati no ben de so, dan den pikin fu unu no ben o krin kwetikweti, ma now den de santa” (1 Korentesma 7:14). Yehovah e si a trowlibi fu den leki wan santa sani, fu di wan fu den trowpatna e dini en, èn den pikin de santa ini Yehovah ai. A Kotoigi wefi musu du ala san a man fu yepi den pikin fu en fu frustan a waarheid, aladi a no e broko en ede nanga san o de a bakapisi te fu kaba, bika soso Yehovah kan sabi dati.

Te den pikin e kon moro owru, dan den abi fu teki a bosroiti san den o du nanga a leri di den kisi fu a papa nanga a mama fu den. Den o teki a bosroiti kande, fu du san Yesus ben taki: „A sma di abi moro lobi gi papa noso mama leki gi mi, no warti mi” (Mateyus 10:37). Boiti dati, pikin e kisi a komando tu: „Un pikin, un gi yesi na un papa nanga mama ini wánfasi nanga Masra” (Efeisesma 6:1). Furu yongusma teki a bosroiti fu ’gi yesi na Gado leki tiriman’, na presi fu gi yesi na wan papa noso mama di no de wan Kotoigi, awinsi a papa noso mama dati e gi den furu problema. A ben o de wan blesi trutru gi a Kotoigi papa noso mama efu den pikin ben o teki a bosroiti fu dini Yehovah awinsi den e kisi gens!

[Futuwortu]