Ondrofenitori
Mi libi kenki di mi kon sabi fu san ede Gado e gi pasi taki sma e pina
SOLEKI FA HARRY PELOYAN FRUTERI
Fu san ede Gado e gi pasi taki sma e pina? Mi ben e broko mi ede nanga a sani dati sensi mi ben de wan pikin boi. Mi papa nanga mi mama ben e wroko tranga, den ben de opregti, èn den ben e sorgu bun gi na osofamiri. Mi papa no ben e go na kerki, èn mi mama ben e go wanwan leisi. Fu dati ede den no ben man gi mi wan piki tapu na aksi di mi ben abi.
MI BEN e angri moro srefi fu kisi piki tapu na aksi dati na a ten fu a di fu Tu Grontapufeti, èn sosrefi baka dati. Na a ten dati mi ben e wroko moro leki dri yari kaba leki srudati na ini a legre fu Amerkankondre. Baka di a feti kon na wan kaba, mi ben musu wroko na tapu wan sipi di ben musu tyari sani go na den sma di ben de na nowtu na ini China. Mi ben de drape pikinmoro wan yari, èn mi si fa bun furu sma ben e pina srefisrefi.
Den Sneisi na sma di e wroko tranga, èn den koni. Ma furu fu den ben e pina srefisrefi fu di den ben pôti, èn fu di furu ogri-ati sani ben e pasa leki bakapisi fu a di fu Tu Grontapufeti. A sani di ben broko mi ati trutru, na di mi si den moi pikin di ben mangri èn di ben e weri broko krosi. Furu fu den pikin disi ben gwenti fu begi wi sani te wi ben go na syoro.
Fu san ede sma e pina?
Mi gebore na ini 1925 èn mi gro kon bigi na ini Kalifornia, na Amerkankondre. Noiti ete mi ben si taki sma ben pina so. Fu dati ede, mi ben aksi misrefi ibri leisi baka: ’Efu wan almakti Mekiman de, dan fu san ede a e gi pasi taki someni sma e pina so, spesrutu pikin-nengre di no du no wan ogri?’
Na ini a libisma historia, spesrutu na a ten fu a di fu Tu Grontapufeti, pikinmoro 50 milyun sma lasi den libi. Dati kon fu di sma tyari bigi pori kon, fu di den kiri ipi-ipi sma, fu di bun furu sma dede, èn fu di bun furu sma nyan pina. Mi ben aksi misrefi tu taki, efu wan Gado de trutru, dan fu san ede a gi pasi taki den sani disi pasa? Na ini a feti dati, sma fu a srefi bribi ben e kisi deki-ati fu den kerki fesiman fu den fu kiri makandra, soso fu di den ben de fu wan tra kondre. Mi ben aksi misrefi tu fu san ede dati ben e pasa.
A telescoop
Di a di fu Tu Grontapufeti ben bigin na ini 1939 èn sma ben e kiri dusundusun trawan, dan mi ben feni taki wan Gado no de. Na a ten dati, di mi ben de na middelbaar skoro, dan ibri studenti ben musu meki wan sani di abi fu du nanga sabidensi. Mi ben wani sabi moro fu den stari, den planeiti nanga tra sani na hemel, èn fu dati ede mi meki wan bigi telescoop. A sani dati ben teki pikinmoro dri mun, èn ala mi ten ben go na ini a sani dati.
Wan neti di a loktu ben krin èn a mun no ben skèin, dan mi tyari a telescoop go na dorosei fu a fosi leisi, èn mi luku den stari nanga planeiti fu wi stari sistema. Mi ben fruwondru fu si omeni stari nanga planeiti de èn fa ala den sani disi orga so bun. A sani di meki mi fruwondru moro, na di mi kon sabi taki sonwan fu den stari di mi ben si, trutru na stari sistema neleki wi Melkwegstelsel. Ibriwan fu den stari sistema abi milyunmilyun stari.
’Den sani disi noiti no ben kan kon fu densrefi’, na so mi ben denki. ’A ben musu fu de so taki wan sma orga den sani disi. Den stari, planeiti, nanga tra sani na hemel orga so bun, taki a gersi leki wan kefalek koniman meki den. A kan taki toku wan Gado de?’ Den sani di mi ben si nanga a telescoop meki taki mi bigin tweifri pikinso efu a denki di mi ben abi taki wan Gado no de, ben tru.
Dan mi bigin aksi misrefi: ’Efu trutru wan Gado de di makti èn koni nofo fu meki den kefalek stari, planeiti, nanga tra sani na hemel, dan fu san ede a no e tyari wan kenki kon na a takru situwâsi na grontapu? Fu san ede a e gi pasi taki den takru sani disi e pasa?’ Te mi ben e aksi kerkisma den sani disi, dan den no ben man gi mi wan bun piki.
Baka di mi klari middelbaar skoro, èn baka di mi ben de wan tu yari na universiteit, dan mi go wroko na ini a legre fu Amerkankondre, leki srudati na se. Ma den domri di ben e du kerkiwroko na ini a legre no ben man gi piki tapu den aksi fu mi. Furu tron kerkisma ben gwenti piki mi: „Libisma noiti sa man frustan fa Gado e wroko.”
Mi e tan suku piki tapu den aksi fu mi
Baka di mi gowe libi China, dan mi tan aksi misrefi fu san ede Gado e gi pasi taki libisma e pina. Mi ben tan broko mi ede nanga a sani disi, spesrutu te mi ben si den srudati beripe na den difrenti èilanti na ini a Stille Oceaan, pe wi ben e go di wi ben de na pasi fu go baka na wi kondre. Moro furu den ben beri yonkuman na ini den grebi disi, èn den yonkuman disi dede tumusi fruku.
Di mi doro baka na ini Amerkankondre èn di mi no ben de na ini a legre moro, dan mi ben abi ete wán yari fu klari Harvard universiteit na ini Cambridge, Massachusetts. Baka dati mi kisi mi diploma, ma mi no ben drai go baka na Kalifornia pe mi ben gro kon bigi. Mi bosroiti fu tan wan pisi ten na a owstusei fu Amerkankondre èn mi ben o pruberi fu feni piki tapu den aksi fu mi. Mi ben wani go na New York City pe furu kerki de, èn mi ben wani go na den konmakandra fu den kerki dati, fu kon sabi san den e leri sma.
Di mi ben de na ini New York, dan mi tanta Isabel Kapigian kari mi fu kon tan nanga en. En nanga den tu umapikin fu en, Rose nanga Ruth, ben de Yehovah Kotoigi. Fu di mi no ben denki taki a bribi fu den ben o hari mi prakseri, meki mi bigin go na den tra kerki, pe mi ben e taki nanga den kerkisma, èn mi ben e leisi den buku fu den. Mi ben gwenti fu aksi den fu san ede Gado e gi pasi taki sma e pina, ma srefi den no ben man piki na aksi fu mi. Fu dati ede mi ben denki taki kande a de so trutru taki wan Gado no de.
Mi e kisi piki tapu den aksi fu mi
Ne mi aksi mi tanta nanga den umapikin fu en efu mi ben kan leisi wan tu fu den buku fu den fu kon sabi san Yehovah Kotoigi e bribi. Di mi leisi den buku fu den, dan a no teki langa di mi kon si taki den Kotoigi ben e difrenti fu den tra kerkisma. Den ben gi mi bun piki nanga yepi fu Bijbel. Fosi yu e denki, mi kon sabi fu san ede Gado e gi pasi taki sma e pina.
Boiti taki mi ben kisi piki tapu den aksi fu mi, mi ben kan si taki Yehovah Kotoigi ben e libi akruderi san Bijbel e taki. Fu eksempre, mi aksi mi tanta san den yonkuman di ben de Yehovah Kotoigi ben du na ini Doisrikondre na a ten fu a di fu Tu Grontapufeti. Den ben e go na ini a legre èn den ben taki: „Heil Hitler!” fu gi grani na Hitler? Den ben e taki a fraga fu den Nazi odi? Mi tanta taigi mi taki den yonkuman no du dati. Èn fu di den no ben teki sei na ini politiek afersi, meki den ben musu go na strafuman kampu pe sma kiri furu fu den. A taigi mi taki na a ten fu a di fu Tu Grontapufeti, Yehovah Kotoigi na heri grontapu no teki prati na a feti. Srefi na ini kondre di abi wan demokrasia tirimakti, den yonkuman di ben de Yehovah Kotoigi ben musu koti strafu fu di den no ben teki sei na ini politiek afersi.
Dan mi tanta aksi mi fu leisi Yohanes 13:35, pe skrifi: „Na a fasi disi ala sma o sabi taki unu na mi disipel, te unu lobi makandra.” Awansi pe Kresten e libi, den musu abi lobi, bika na dati e sori taki den na tru Kresten. Noiti den sa teki prati na feti, èn den no sa kiri makandra, soso fu di den de fu wan tra kondre. Mi tanta aksi mi: „Yu e denki taki Yesus nanga den disipel fu en ben o feti teige makandra na ini den feti di Rome ben e feti nanga tra kondre? Yu e denki taki den ben o kiri makandra?”
Mi tanta aksi mi tu fu leisi 1 Yohanes 3:10-12. Drape skrifi: „Na a fasi disi sma kan sabi suma na den pikin fu Gado èn suma na den pikin fu Didibri: Efu wan sma no abi a gwenti fu du regtfardiki sani, dan a sma dati no kon fu Gado; na so a de tu nanga a sma di no lobi en brada. . . . Wi musu lobi makandra. Wi no musu de leki Kain, di ben kon fu na ogriwan èn di ben kiri en brada.”
Bijbel e sori krin taki tru Kresten lobi makandra awansi na ini sortu kondre den e libi. Fu dati ede, noiti den sa kiri den Kresten brada fu den, noso iniwan tra sma. Dati meki Yesus ben kan taki fu den bakaman fu en: „Den no de wan pisi fu grontapu, neleki fa mi no de wan pisi fu grontapu.”—Yohanes 17:16.
Mi kon sabi fu san ede Gado e gi pasi taki sma e pina
Heri esi mi kon sabi taki Bijbel e sori fu san ede Gado e gi pasi taki sma e pina. Bijbel e taki dati di Gado meki wi fosi papa nanga mama, dan a meki den leki volmaakti sma, èn a poti den ini wan moi dyari di ben de wan paradijs (Genesis 1:26; 2:15). A ben gi den wan tumusi moi presenti tu, namku a reti fu teki den eigi bosroiti. Ma den ben musu gebroiki a reti dati na wan frantwortu fasi. Efu den ben gi yesi na Gado èn na den wet fu en, dan den ben o tan libi leki volmaakti sma na ini wan paradijs. Den ben o meki a paradijs kon moro bigi teleki a heri grontapu ben tron wan paradijs. Den bakapikin fu den ben o de volmaakti tu. Den sani disi ben o meki taki te fu kaba a grontapu disi ben o de wan tumusi moi paradijs pe volmaakti sma di de koloku, ben o libi na tapu.—Genesis 1:28.
Ma efu Adam nanga Eva ben bosroiti fu no du san Gado wani, dan A no ben o meki den de volmaakti sma moro (Genesis 2:16, 17). A de wan sari sani taki libisma musu ondrofeni den takru bakapisi fu a fasi fa wi fosi papa nanga mama gebroiki a reti di den ben abi fu teki bosroiti. Adam nanga Eva ben teki bosroiti na wan fasi di Gado no feni bun, èn den bosroiti fu no du a wani fu En. Wan yeye di ben opo ensrefi teige Gado, èn di sma ben kon sabi leki Satan Didibri, ben gi Adam nanga Eva deki-ati fu teki a bosroiti dati. Satan kwetikweti no ben wani taki Gado tiri en, èn a ben angri fu kisi na anbegi di Gado wawan abi reti na tapu.—Genesis 3:1-19; Openbaring 4:11.
Na so a du kon taki Satan tron „a gado fu a grontapu sistema disi” (2 Korentesma 4:4). Bijbel e taki: „Heri grontapu de na ini a makti fu na ogriwan” (1 Yohanes 5:19). Yesus ben kari Satan „a tiriman fu grontapu” (Yohanes 14:30). Fu di Satan nanga wi fosi papa nanga mama trangayesi Gado, meki ala libisma de onvolmaakti, den e ondrofeni ogri-ati sani, den e dede, den e sari, èn den e pina.—Romesma 5:12.
„A no de na wan libisma”
Fu di Gado ben wani sori san na den bakapisi te libisma no e hori densrefi na den wet fu a Mekiman fu den, meki dusundusun yari langa a gi pasi taki den ondrofeni den bakapisi dati. Na ini a pisi ten dati ala sma kisi nofo okasi fu agri taki san Bijbel e taki de tru, namku: „A no de na libisma fu luku gi ensrefi sortu pasi a wani teki. A no de na wan libisma di e waka, fu taki srefi pe a wani poti en futu. Poti mi na a reti pasi baka, o Yehovah.”—Yeremia 10:23, 24.
Now baka ala den hondrohondro yari, wi kan si taki sani no e waka bun kwetikweti te sma no e saka densrefi ondro a tiri fu Gado. Sobun, Gado abi na prakseri fu tyari wan kaba kon na libisma tirimakti di no e saka densrefi na en ondro, èn di no e gi yesi na den wet fu en.
Wan tumusi moi howpu gi a ten di e kon
Bijbel profeititori e sori taki heri esi Gado sa tyari wan kaba kon na a ogri-ati sistema disi. Bijbel e taki: „Ete wan syatu pisi ten èn na ogrisma no sa de moro . . . Ma den safri-ati sma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki.”—Psalm 37:10, 11.
Wan profeititori di skrifi na ini Danièl 2:44 e taki: „Na ini den dei fu den kownu dati [ala den difrenti sortu tirimakti di de now], a Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.” Noiti moro libisma sa kisi primisi fu tiri. Gado Kownukondre sa tiri a heri grontapu. Te Gado Kownukondre sa tiri, dan heri grontapu sa tron wan paradijs, èn safrisafri libisma sa kon de volmaakti, so taki den kan libi wan koloku libi fu têgo. Bijbel e pramisi: „[Gado] o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe” (Openbaring 21:4). Disi na wan tumusi moi howpu di Gado e gi wi gi a ten di e kon!
Mi kenki mi libi
Mi libi kenki di mi kisi bun piki tapu den aksi di mi ben abi. Sensi a ten dati, mi ben wani dini Gado èn mi ben wani yepi trawan fu frustan fu san ede Gado e gi pasi taki sma e pina. Mi ben frustan o seryusu a tekst fu 1 Yohanes 2:17 de, pe skrifi: „Grontapu [a disiten seti fu sani di Satan e tiri] e pasa gowe nanga den lostu fu en, ma a sma di e du a wani fu Gado sa tan fu têgo.” Mi ben e angri fu libi fu têgo na ini a nyun grontapu fu Gado. Mi bosroiti fu tan na ini New York, èn mi ben bigin go na wan gemeente fu Yehovah Kotoigi drape. Na ini a gemeente drape mi ben abi moi ondrofeni fu di mi ben meki trawan kon sabi den sani di mi ben leri.
Na ini 1949, mi miti Rose Marie Lewis. En nanga en mama, Sadie, èn sosrefi siksi sisa fu en de Yehovah Kotoigi. Rose ben e du a furuten preikiwroko. A ben abi furu moi fasi, èn fu dati ede mi ben lobi en wantewante. Wi trow na ini yuni 1950, èn wi tan na ini New York. Wi ben abi prisiri na ini a wroko di wi ben e du èn wi ben breiti taki wi ben abi a howpu fu libi fu têgo na ini a nyun grontapu fu Gado.
Na ini 1957 mi nanga Rose Marie kisi a kari fu go du furuten diniwroko na a edekantoro fu Yehovah Kotoigi na ini Brooklyn, New York. Na ini yuni 2004 wi ben trow 54 yari èn wi ben de koloku. Wi dini 47 yari na a edekantoro na ini Brooklyn. Na ini den yari dati di wi dini Yehovah èn di wi wroko makandra nanga dusundusun tra brada nanga sisa, wi kisi furu prisiri.
A moro hati sani di mi ondrofeni
A de wan sari sani taki na a bigin fu december 2004, datra kon si taki Rose Marie ben abi kanker na wan fu den fokofoko fu en. Den datra ben taki dati a kanker ben e gro esi, èn taki den ben abi fu puru en. Na a kaba fu december, den koti Rose Marie, èn pikinmoro wan wiki baka dati di mi ben de na en, dan a datra di ben koti en, kon na ini a kamra èn a taki: „Rose Marie, yu kan go na oso! Yu kon betre kaba!”
Ma Rose Marie ben de wan tu dei nomo na oso di a bigin kisi hebi bere-ati. A bere-ati disi no ben e saka, èn fu dati ede a go baka na ati-oso meki datra ondrosuku en moro fara. Den datra kon si taki a brudu fu en no ben abi nofo zuurstof, ma den no ben sabi fu san ede dati ben de so. Datra du ala san den man, ma den no ben man yepi en. Wan tu wiki nomo baka dati tapu 30 yanuari 2005, mi ondrofeni a moro hati sani na ini mi libi. Mi lobi Rose Marie dede.
Na a ten dati, mi ben abi pikinmoro 80 yari, èn mi heri libi langa mi si fa sma ben e pina, ma a sani disi di miti mi ben de heri tra fasi. Mi nanga Rose Marie ben de „wán skin” soleki fa Bijbel e taki (Genesis 2:24). Mi ben si fa trawan ben e sari, èn misrefi ben sari di mati nanga famiriman fu mi dede. Ma di mi wefi dede, dan a sani dati hati mi trutru, èn mi ben e firi sari wan langa pisi ten. Now mi e frustan krin sortu bigi sari libisma e ondrofeni so langa kaba, fu di lobiwan fu den e dede.
Ma a sani di yepi mi fu no sari tumusi, na fu di mi sabi san e meki taki sma e pina èn fa wan kaba sa kon na a pina disi. Psalm 34:18 e taki: „Yehovah de krosibei fu den wan di lasi-ati; èn a e frulusu den wan di e firi brokosaka.” Te wi sabi taki libisma sa kisi wan opobaka, soleki fa Bijbel e leri, dan dati na wan prenspari sani di e yepi wi te wi e ondrofeni pina. Den wan di de na ini den grebi sa kon na libi baka, èn den sa kisi na okasi fu libi fu têgo na ini a nyun grontapu fu Gado. Tori fu den Apostel 24:15 e taki: „Gado sa gi wan opobaka na den regtfardikiwan èn na den onregtfardikiwan.” Rose Marie ben lobi Gado srefisrefi. Mi de seiker taki Gado ben lobi en tu, èn taki A sa memre en na a ten fu na opobaka. Mi e howpu taki heri esi A sa gi Rose Marie libi baka na a ten di A feni bun.—Lukas 20:38; Yohanes 11:25.
Aladi wi abi bigi sari te wan lobiwan fu wi dede, toku wi sa abi moro bigi prisiri te wan lobiwan fu wi kisi wan opobaka (Markus 5:42). A Wortu fu Gado e pramisi wi: „Den dedewan fu yu sa libi. . . . A gron srefi sa trowe den wan di no man du noti na ini dede, soleki fa dati e pasa te wan sma gebore”(Yesaya 26:19). Kande furu fu „den regtfardikiwan” di kari na ini Tori fu den Apostel 24:15 sa de den fosiwan di o kisi wan opobaka. A ten dati sa de wan tumusi moi ten! Èn Rose Marie sa de wan fu den sma di sa kisi libi baka. Den lobiwan fu en sa gi en wan switi kon trutru! Na ini a ten dati a sa de wan tumusi pisiri sani fu libi na ini wan grontapu pe nowan sma e pina!
[Prenki na tapu bladzijde 9]
Di mi ben de na ini China, dan mi si fa sma ben e pina
[Prenki na tapu bladzijde 10]
Sensi 1957, mi e dini na a edekantoro fu Yehovah Kotoigi na Brooklyn
[Prenki na tapu bladzijde 12]
Na ini 1950 mi trow nanga Rose Marie
[Prenki na tapu bladzijde 13]
A dei di mi nanga Rose Marie trow 50 yari, na ini 2000