No frede—Yehovah de nanga yu!

MORO leki 50 yari pasa, syatu baka di den fosi atoombom sutu, dan Harold C. Urey, wan sabiman di ben wini a Nobelprijs, ben taki wan sani fu a ten di e kon. A ben taki: „Wi sa frede ibri momenti fu a dei.” Na ini a ten disi, furu sma na grontapu e frede, èn wi kan frustan fu san ede dati de so! Ala dei, sma e skreki te den e leisi na ini koranti fa sma e du ogri-ati sani fu gens tirimakti, fa sma e du ogri nanga tranga, èn fa sma e kisi ala sortu freimde siki.

Wi leki Kresten sabi san den sani disi wani taki. Den sani di e pasa now e sori wi taki wi e libi na ini „den lasti dei” fu na ogri sistema disi. Bijbel ben taki na fesi dati na ini den dei disi sma ben o kisi fu du nanga ’muilek ten di tranga fu pasa’ (2 Timoteyus 3:1). A sani disi e gi wi wan moro tranga overtoigi taki heri esi Yehovah Gado sa tyari wan nyun grontapu kon pe regtfardikifasi o de (2 Petrus 3:13). Ma disi wani taki dati wi leki Kresten no e frede?

Den futuboi fu Gado e frede?

Yakob, David, nanga Elia, ben de wan tu fu den futuboi fu Yehovah di ben e frede di den ben de na ini situwâsi pe ogri ben kan miti den (Genesis 32:6, 7; 1 Samuel 21:11, 12; 1 Kownu 19:2, 3). A no ben de so taki den man disi no ben abi bribi. Ma kontrari fu dati den ben sori taki den ben e frutrow dorodoro tapu Yehovah. Ma toku, Yakob, David, nanga Elia ben de libisma nomo, èn fu dati ede den ben e frede. A disipel Yakobus ben skrifi: „Elia ben de wan man di ben abi den srefi firi leki wi.”—Yakobus 5:17.

Srefi wi kan frede tu te wi e prakseri wan problema di wi abi now, noso di wi kan kisi na ini a ten di e kon. A sani disi kan pasa nanga ala sma. Wi no musu frigiti taki Bijbel e taki dati Satan Didibri de nomonomo fu „feti” nanga den wan di ’e du san den komando fu Gado e taki, èn di kisi a wroko fu kotoigi fu Yesus’ (Openbaring 12:17). Aladi den wortu disi abi fu du spesrutu nanga den salfu Kresten, toku Paulus ben skrifi: „Ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu” (2 Timoteyus 3:12). Ma te wi e kisi fu du nanga problema, dan wi no abi fu frede so te taki wi no sabi san fu du. Fu san ede?

„Wan Gado di e du sani fu frulusu sma”

A psalm skrifiman David ben skrifi: „Gi wi, a tru Gado na wan Gado di e du sani fu frulusu sma” (Psalm 68:20). Ibri tron baka Yehovah sori taki a man frulusu en pipel. Son leisi Yehovah frulusu den na ini situwâsi pe ogri ben kan miti den, èn tra leisi baka a gi den a krakti fu horidoro (Psalm 34:17; Danièl 6:22; 1 Korentesma 10:13). Efu yu studeri Bijbel, dan omeni eksempre yu kan memre ete di e sori fa Yehovah „du sani fu frulusu sma”?

Kande yu kan gebroiki na Index van Wachttoren-publikatiesa fu ondrosuku tru tori, soleki a Frudu na ini a ten fu Noa, a fasi fa Yehovah frulusu Lot nanga den umapikin fu en fu Sodom nanga Gomora, fa Israel komoto na ini Egepte èn fa den pasa na ini a Redi Se, èn sosrefi fa a prakseri di Haman ben abi fu kiri den Dyu no ben abi bun bakapisi. Te yu e leisi den span tori disi èn te yu e denki dipi fu den, dan dati sa tranga a bribi di yu abi taki Yehovah na wan Gado di e du sani fu frulusu sma. Na tranga overtoigi dati sa yepi yu fu no frede te a bribi fu yu e kisi tesi.

Eksempre fu Kresten na ini a ten disi

Yu sabi wan tu sma di e libi na ini a kontren fu yu, èn di e horidoro? Kande wan fu den sma dati musu koti strafu fu di a de getrow na Gado. Kande yu sabi wan owru Kresten di e dini Yehovah, aladi a siki. Noso prakseri den yonguwan di e hori densrefi aparti fu grontapu, aladi den skoromati fu den e dwengi den fu du sani di no fiti. Dan yu abi papa noso mama di no abi patna fu yepi den kweki den pikin fu den, èn yu abi sma tu di no trow èn di e dini Yehovah aladi den e firi leki den de den wawan. San yu e leri fu den sma disi? Te yu e denki dipi fu a getrowfasi fu den, dan dati kan yepi yu fu horidoro èn fu no frede awansi sortu tesi miti yu.

Wi no musu frede te wi e kisi gens èn te sma e frufolgu wi, èn wi no musu frede tu te wi e bigin tweifri efu Yehovah lobi wi trutru. Wi musu kon kisi a frutrow taki Krestes pai a lusu-paiman gi ibriwan fu wi (Galasiasma 2:20). Te wi abi a frutrow dati, dan wi kan begi Yehovah sondro fu frede, bika a no ben o fiti te wi frede fu begi Gado. Te wi e firi leki wi no warti fu Yehovah lobi wi, dan wi kan poti prakseri na den wortu di Yesus taigi den bakaman fu en: „A no de so, taki sma e seri tu pikin fowru gi wan sensi di no warti furu? Ma toku nowan fu den fowru sa fadon na gron sondro fu un Tata sabi. Ma a Tata teri srefi ala den wiwiri na tapu un ede. Fu dati ede no frede: un warti moro leki wan heri ipi pikin fowru.”—Mateyus 10:29-31.

Furu tron yu kan leisi ondrofenitori fu Yehovah Kotoigi na ini a ten disi na ini A Waktitoren nanga Ontwaakt! Den Kotoigi disi no ben frede di den kisi fu du nanga muilek situwâsi. Disi no wani taki dati noiti den no ben e sari, noso taki den no ben e broko den ede nanga a muilek situwâsi di den ben de na ini. Ma den no gi pasi taki den firi disi tapu den fu dini Yehovah. Den ondrofenitori fu den di skrifi na ini den tijdschrift kan yepi yu tu fu horidoro sondro fu frede. Poti prakseri na tu eksempre.

En libi kenki baka di a kisi mankeri

Na Ontwaakt! fu 22 april 2003, abi wan artikel di nen „Hoe een ongeluk mijn leven veranderde”. Na ini na artikel dati, Stanley Ombeva, wan Kotoigi fu Yehovah na ini Kenia, e taki fu den problema di a kisi baka di wan oto naki en. Di a gosontu fu en ben e go na baka, dan a lasi en wroko èn sosrefi ala yepi di a ben abi reti na tapu di a ben abi a wroko dati. Brada Ombeva ben taki: „Di mi kon frustan safrisafri o seryusu a situwâsi fu mi ben de, dan mi lasi-ati, mi ben prakseri mi eigi problema nomo, èn mi ben krakeri. Son leisi, mi ben e atibron èn mi ben abi bita-ati.” Aladi den tesi disi ben miti a Kresten man disi, toku a no ben frede. A no gi pasi taki a lasi-ati so te, taki a no ben wani dini Yehovah moro. Na presi fu dati a frutrow tapu Yehovah. „Ala ten Yehovah horibaka gi mi di mi ben abi problema, èn a yepi mi so te taki mi ben e syen son leisi”, na so Brada Ombeva e taki. „Mi teki a fasti bosroiti fu leisi den bijbeltekst di ben o trowstu mi na ini a situwâsi fu mi, èn mi denki dipi fu den tu.”

A krin fasi fa Brada Ombeva fruteri san miti en, yepi furu tra sma fu horidoro sondro frede na ini muilek situwâsi. „Mi krei di mi leisi na artikel disi”, na so wan Kresten sisa skrifi. „Mi ben feni taki Yehovah ben e sori mi nanga yepi fu na artikel disi taki a lobi mi, taki a e broko en ede nanga mi, èn mi ben si taki a ben e trowstu mi.” Wan tra Kotoigi ben skrifi: „Den sortu artikel disi e gi furu deki-ati na den wan na wi mindri di e ondrofeni den srefi sortu sani disi, èn di no e kragi fu a situwâsi fu den.”

San a du di a lasi-ati

Wan tra moi ondrofenitori na di fu Herbert Jennings, na ini na artikel „Unu no sabi fa un libi sa de tamara”.b Brada Jennings abi wan siki di nen bipolaire stoornis. A e memre fa a ben de na a bigin di a kon siki, èn a e taki: „A ben hebi srefisrefi gi mi fu go na den Kresten konmakandra. Toku, mi ben de seiker taki a de prenspari fu abi demakandra nanga Kresten brada nanga sisa. Wan sani di ben yepi mi, na taki mi ben gwenti fu go na ini a Kownukondre zaal baka te den sma ben e sidon kaba, èn mi ben e gowe leti bifo den sma ben e bigin opo fu den sidonpresi na a kaba fu a programa.”

A ben muilek gi mi tu fu preiki. „Son ten, srefi te mi ben doro kaba na wan oso, mi no ben abi deki-ati srefisrefi fu kari den sma”, na so Brada Jennings e fruteri. „Toku, mi no tapu nanga a preikiwroko, fu di mi ben frustan taki a diniwroko fu wi wani taki frulusu gi wisrefi èn gi iniwan sma di e arki wi (1 Timoteyus 4:16). Baka wan pisi ten mi ben man teki deki-ati fu go na wan tra oso, fu pruberi ete wan leisi. Fu di mi ben e tan abi wan prati na a diniwroko, meki mi ben man tan gosontu na yeye fasi, èn dati yepi mi na ini a situwâsi fu mi.”

Na ondrofenitori di Brada Jennings fruteri na so wan krin fasi yepi furu leisiman fu no frede te den lasi-ati. Fu eksempre, wan Kresten sisa ben skrifi: „Mi e leisi A Waktitoren nanga Ontwaakt! 28 yari kaba, ma noiti ete wan artikel naki mi ati so, leki na artikel disi. Mi ben musu tapu nanga a furuten diniwroko èn mi ben e firi fruferi, fu di mi ben feni taki mi no ben o abi fu tapu nanga a wroko dati efu mi ben abi moro bribi. Di mi leisi fa Brada Jennings ben musu tapu nanga a furuten diniwroko fu di a ben siki, dan dati yepi mi fu no denki so takru fu a situwâsi fu mi. Na gi a sani disi mi ben begi Yehovah!”

Wan Kresten brada ben skrifi tu: „Mi ben e dini tin yari leki owruman kaba, ma mi no ben man du dati moro fu di mi kon siki na mi frustan. Mi ben lasi-ati so te, taki mi no ben man leisi den ondrofenitori, fu di den ben meki mi firi fruferi. Furu tron den ondrofenitori disi e taki fu den kefalek sani di a pipel fu Yehovah du. Ma a gi mi deki-ati fu leisi fa Brada Jennings horidoro. Mi leisi na artikel furu tron.”

Yu kan go na fesi nanga wan fasti bosroiti

Neleki Brada Ombeva nanga Brada Jennings, furu Yehovah Kotoigi e tan anbegi Yehovah Gado sondro frede, aladi den e kisi fu du nanga muilek situwâsi. Efu yu e du dati tu, dan wi e prèise yu gi dati. Yu abi a dyaranti disi: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en, fu di unu ben dini den santawan èn unu e tan dini den te now ete”.—Hebrewsma 6:10.

Neleki fa Yehovah yepi a getrow pipel fu en fu owruten fu wini den feanti fu den, na so a kan yepi yu fu wini iniwan problema di kan miti yu. Fu dati ede, hori den wortu na prakseri di Yehovah ben taki nanga yepi fu a profeiti Yesaya: „No frede, bika mi de nanga yu. No luku lontu, bika mi na yu Gado. Mi wani tranga yu. Mi wani yepi yu trutru. Mi wani hori yu trutru bun steifi nanga mi reti-anu fu regtfardikifasi.”—Yesaya 41:10.

[Futuwortu]

[Prenki na tapu bladzijde 16]

Neleki Stanley Ombeva (na tapusei) nanga Herbert Jennings (na reti-anusei), furu Kotoigi e dini Yehovah sondro frede

[Sma di abi a reti fu a prenki na tapu bladzijde 14]

USAF photo