Aksi fu leisiman
San Yesus ben wani taki di a taigi Nikodeimus: „Nowan sma opo go na hemel, boiti a sma di saka komoto fu hemel, namku a Manpikin fu libisma”?—Yohanes 3:13.
Di Yesus taki a sani dati, dan a ben de na grontapu, èn a no ben drai go baka na hemel ete. Ma den sani di wi sabi fu Yesus, èn den tra tekst di abi fu du nanga a vers disi, kan yepi wi fu frustan san a ben wani taki.
Te Bijbel e taki dati Yesus ben „saka komoto fu hemel”, dan dati wani taki dati a ben e libi fosi na hemel makandra nanga en Tata. Ma di a reti ten doro, dan Gado poti a libi fu en Manpikin na ini a muru fu Maria, so taki Yesus ben kan gebore leki wan libisma (Lukas 1:30-35; Galasiasma 4:4; Hebrewsma 2:9, 14, 17). Baka te Yesus dede, a ben o kisi wan opobaka leki wan yeye, èn a ben o drai go baka na hemel fu de makandra nanga Yehovah. Fu dati ede, syatu bifo sma kiri Yesus, a ben begi: „Mi Tata, gi mi a srefi glori na yu sei di mi ben abi bifo grontapu ben de”.—Yohanes 17:5; Romesma 6:4, 9; Hebrewsma 9:24; 1 Petrus 3:18.
Di Yesus ben e taki nanga Nikodeimus, di ben de wan Fariseiman èn sosrefi wan leriman na ini Israel, dan Yesus no ben drai go baka na hemel ete. A no de fu taki dati nowan enkri tra libisma ben go na hemel, baka di a dede. Yesus srefi ben taki dati aladi nowan profeiti fu Gado ben bigi moro Yohanes a Dopuman, toku „a moro pikinwan na ini a kownukondre fu hemel, bigi moro en” (Mateyus 11:11). Èn na apostel Petrus ben taki dati srefi a getrow Kownu David dede, èn a de ete na ini en grebi; David no ben opo go na hemel (Tori fu den Apostel 2:29, 34). Wan reide ben de fu san ede getrowsma soleki David, Yohanes a Dopuman, nanga trawan di dede bifo Yesus, no go na hemel. Den sma disi dede bifo Yesus opo a pasi gi libisma fu kisi wan opobaka na hemel. Na apostel Paulus ben skrifi taki Yesus, di de a fosiwan di go na hemel, ben „opo . . . wan nyun èn libi pasi” fu go na hemel.—Hebrewsma 6:19, 20; 9:24; 10:19, 20.
Fu di a ben de so taki Yesus no ben dede ete èn taki a no ben kisi wan opobaka ete, dan san a ben wani taki di a taigi Nikodeimus: „Nowan sma opo go na hemel, boiti a sma di saka komoto fu hemel, namku a Manpikin fu libisma”? (Yohanes 3:13) Luku san Yesus e taigi Nikodeimus na ini den tra vers.
Di a Dyu tiriman dati ben kon na Yesus na ini a dungru fu a neti, dan Yesus taigi en: „Fu tru mi e taigi yu: Efu wan sma no kon gebore baka, dan a no sa man si a kownukondre fu Gado” (Yohanes 3:3). Ne Nikodeimus aksi en: ’Fa dati kan? Fa wan man kan gebore ete wan tron?’ A no ben e frustan a leri disi fu Gado di e taki dati sma sa de na ini a Kownukondre fu En. Fa a ben kan kon sabi a tori disi? We, libisma no ben o man fruteri en, fu di nowan libisma ben go na hemel, èn fu dati ede nowan sma ben sabi fa fu go na ini a Kownukondre. A wan-enkri libisma di ben man fruteri sma dati, ben de Yesus. A ben man leri Nikodeimus nanga trawan fu a tori disi, fu di a ben saka komoto fu hemel, èn fu dati ede a ben man fruteri sma den sani disi.
Na aksi di opo kon na a bigin, e sori o prenspari a de fu studeri Gado Wortu. A no ben o bun fu tweifri na Gado Wortu, soso fu di a gersi leki a muilek fu frustan san wan tekst wani taki. Te wi e leisi wan tekst na ini Bijbel, dan wi musu luku den tra tekst di abi fu du nanga a tori dati, fu si fa den e kruderi nanga makandra. Boiti dati, nofo tron a de so taki den tra tekst di e sori san ben de a situwâsi, noso san ben e pasa na a ten dati, kan yepi wi fu kon frustan wan muilek tekst.