Jezus libi nanga diniwroko

Nikodemus e kisi leri

TE Jezus na ini 30 G.T. e de na a Pascha, a e doe foeroe aparti marki ofoe wondroe. A bakapisi de dati boen foeroe sma e poti bribi na ini en. Nikódemus wan memre foe na Sanhedrin, na djoe Hé Rai, e ferwondroe èn wani sabi moro. Foe dat’ede meki a neti, te a doengroe, a e tjari wan fisiti go na Jezus. A de kande taki a e frede dati a sa kisi wan takroe nen na den tra djoe tiriman efoe den si en.

„Rabbi”, ai taki, „wi sabi taki joe kon foe Gado leki leriman, bika no wan sma kan doe den marki dati di joe e doe, efoe Gado no de nanga en.” Jezus e piki Nikódemus taki wan sma „moe kon gebore baka” foe kan go na ini a Kownoekondre foe Gado.

Ma fa wan sma kan go gebore baka? „A kan go na di foe toe tron baka na ini a bere foe en mama èn kon gebore baka?” Nikódemus e aksi.

Nono, a no dati a kon gebore baka wani taki. „Efoe wan sma no kon gebore baka foe watra nanga jeje,” Jezus e tjari kon na krin, „a no kan go na ini a kownoekondre foe Gado.” Di Jezus ben kisi dopoe èn santa jej ben saka kon na tapoe en, a ben kon gebore nanga dati foe „watra nanga jeje”. Foe di na a srefi ten dati komoto foe hemel Gado ben taki: ’Disi na mi Manpikin, di mi ben feni boen’, a ben ferteri dati a ben meki wan jeje manpikin kon gebore di ben abi a ferwakti foe go na ini a hemel kownoekondre. Bakaten, na a ten foe na pinksterfesa foe 33 G.T. tra dopoewan ben kisi na santa jeje èn na tapoe a fasi dati ben kon gebore baka ooktoe leki jeje manpikin foe Gado.

Ma na rol di Gado spesroetoe libisma manpikin ben kon doe, de moro prenspari. „Soleki Mozes ben opo na ini na sabana na sneki go na loktoe”, Jezus e taigi Nikódemus, „na so ooktoe na manpikin foe libisma moe opo go na loktoe sodati ibriwan sma di e bribi na ini en sa abi tégo libi.” Ija, net soleki a ten dati den Israëlsma di takroe sneki ben beti den ben moesoe loekoe na a kopro sneki foe den kisi ferloesoe, na so ala sma di poti bribi na ini na Manpikin sa kisi ferloesoe foe na dede toestand foe den.

Foe poti krakti na tapoe na lobifasi rol di Jehovah e doe na ini disi, Jezus e taki moro fara gi Nikódemus: „Gado ben lobi grontapoe sote dati a ben gi en wan enkri manpikin, sodati ibrisma di e poti bribi na ini en no ben sa pori, ma ben sa abi tégo libl.” Na so Jezus, soso siksi moen baka na bigin foe en diniwroko, ben meki dja na ini Jeruzalem kon a krin dati en de a wrokosani di Jehovah Gado ben gi leki ferloesoe foe a libismafamiri. Johannes 2:23-3:21; Mattéus 3:16, 17; Tori foe den Apostel 2:1-4; Numeri 21:9.

◆ San ben meki Nikódemus tjari wan fisiti, èn foe san-ede a ben kon a neti?

◆ San a wani taki foe kon gebore baka?

◆ Fa Jezus ben agersi a rol di a e doe na ini a ferloesoe foe wi?