Soema e kon gebore njoen baka?

ALA boen sma e go na hemel? Foeroe sma e denki so, ma Jesus Krestes no ben agri nanga dati. Di Jesus ben e taki nanga a djoe tiriman Nikodeimus, di na neti ben kon na en na kibri fasi, a ben taki: „No wan sma opo go na hemel.” — Johanes 3:13.

Tokoe ete, Jesus ben sori Nikodeimus taki a ten ben o kon taki son sma ben sa abi na okasi foe go na ini a Kownoekondre foe hemel. Foe den sma disi Jesus ben taki: „Efoe wan sma no kon gebore foe watra nanga jeje, a no man go na ini a kownoekondre foe Gado. San ben kon gebore foe a skin na skin, èn san ben kon gebore foe a jeje na jeje. No froewondroe foe di mi taigi joe taki: Oenoe moesoe kon gebore njoen baka.” Ma Nikodeimus ben aksi ensrefi, fa wan sma ben kan kon gebore njoen baka. — Johanes 3:1-9.

Kande joe e aksi joesrefi toe san Jesus ben abi na prakseri. Den wortoe foe en ben kan abi foe doe nanga a drai di sma e drai den libi wantronso, so leki fa foeroe sma, di e firi taki den ben kon foeroe nanga Gado santa jeje, ben taki dati ben pasa nanga den?

Firi nanga a froestan

Son sma e taki, dati foe kan sabi efoe wan sma ben kon gebore njoen baka, dan na a firi di wan sma e firi a krakti foe a jeje na san e teri. Ma tokoe wi ati nanga froestan kan kori wi, spesroetoe efoe tranga firi abi krakti na wi tapoe. — Jeremia 17:9.

William Sargant, wan man di e ondrosoekoe a krakti di firi abi tapoe a prakseri, e taki foe a fanowdoe „foe loekoe boen nanga overtoigi di wi kon kisi, ini situwâsi pe wi firi ben wiki, ala di na ede-tonton foe wi e tori wi kande”. So leki fa Sargant e taki, dan wán eksempel na a krakti di preiki abi foe wiki sma firi èn a kefar foe kisi a strafoe foe hèlfaja. Soema no ben sa wani kon gebore njoen baka foe go na hemel, efoe a wan enkri sani di tan abra ben de foe njan pina ini têgo skin-ati? Sargant e taki, dati na ondro den sortoe druk foe firi disi, „gesontoe denki e poti na wan sei, a normaal computer foe na ede-tonton no e wroko foe wan pisi ten èn sondro kisi moro bodoi sma ben teki njoen idea nanga overtoigi.” — The Mind Possessed.

So boen, fa wan sma kan taki efoe „sondro foe kisi moro bodoi” sma ben teki wan overtoigi ini a tori foe kon gebore njoen baka? A pasi foe troe koni na foe meki ala sani di Gado santa jeje ben meki den bijbel skrifiman skrifi, tiri joe. Kresten e kisi deki-ati foe anbegi Gado ’nanga a krakti foe a gesontoe froestan foe den’ èn den moesoe de seiker taki san den e bribi de troe. — Romesma 12:1, 2; 1 Tesalonikasma 5:21.

Kon gebore njoen baka, e opo wán foe den moro bigi grani di libisma kisi wan ten. A abi foe doe nanga wan troetroe aparti sani di be o pasa foe tjari a prakseri foe Gado kon na wan kaba. Ala di ala den sani disi de troe, tokoe aksi leki disi e kon na fesi: Soema e kon gebore njoen baka? Fa disi e pasa? Sortoe froewakti e poti na fesi den sma disi? Èn den wawan sa kisi froeloesoe?

[Prenki na tapoe bladzijde 3]

Nikodeimus ben aksi ensrefi fa wan sma ben kan kon gebore njoen baka