„Kon njoen gebore baka” — Na prati foe libisma èn na prati foe Gado
„Ibrisma di gebore foe Gado, no e doe sondoe, bikasi a siri foe en di e meki froktoe e tan ini so wan sma, èn a no kan doe sondoe, foedi a gebore foe Gado.” — 1 Johannes 3:9.
1, 2. San wi ben leri (a) foe na presi foe sma di ben kisi ferloesoe? (b) foe na réde foe san-ede Gado prakseri de foe meki son sma „kon gebore njoen baka”?
INI na artikel a fesi wi ben si dati foeroe miljoen sma di taki dati den de kristen e taki dati den „kon gebore baka”. Boiti dati, wi ben leri foe den Santa Boekoe dati aladi soso wán ferloesoe de — tapoe na gron foe a bribi ini a ferloesoe-ofrandi foe Kristus — 2 difrenti presi de pe den groepoe disi sa kan prisiri densrefi, wan hemel èn wan grontapoe presi.
2 A kon de krin gi wi toe, dati Jezus Kristus baka en dopoe ini na Jordaan ben kon gebore njoen baka. Jehovah Gado ben meki na a ten dati, dati santa jeje ben saka kon tapoe Jezus leki wan doifi, èn na a okasi dati Gado ben èrkèn Jezus leki en Manpikin di ben gebore nanga jeje. Moro fara wi ben si nana sortoe prakseri Jehovah ben meki Jezus kon gebore njoen baka, namkoe, sodati baka en dede èn opobaka a ben kan de na makti glori kownoe foe Gado kownoekondre. Boiti dati, wi ben leri dati a de na wani foe Jehovah dati Jezus Kristus abi kompe di e tiri makandra nanga en èn dati den disi toe moe kon „de njoen gebore baka”. — Mattéus 3:13-17; Johannes 1:12; 3:3; Hebreër 10:5-10; Openbaring 20:6.
3. Fa den kownoekondre-kompe foe Jezus e kenki foe en, tapoe na tori foe a „kon gebore njoen”?
3 Fa a de nanga den salfoe foetoeboi disi foe Jezus Kristus? Oten den e kon „de njoen gebore baka”? Sortoe sani den moe doe bifosi Jehovah doe wan sani foe na boen foe den èn meki den kon de jeje manpikin? Jezus ben gebore leki wan volmaakti sma, foedi Gado ben de en Tata. Dritenti jari a baka en Tata ben meki a gebore leki wan jeje manpikin, foedi a ben meki „a kon njoen gebore baka”. Ma ala bakapikin foe Adam ben gebore leki sondari, „leki freemde sma èn foe troe féjanti foe Gado foedi den froestan de tapoe ogri wroko”. Na so fasi den no de ini na positie dati Jehovah kan handri foe na boen foe den èn kan meki den gebore leki jeje manpikin. — Psalm 51:5; Kolosse 1:21.
Na prati foe na libisma: siksi prenspari stap
4, 5. (a) Omeni stap discipel foe a ten di e kon moe doe bifo Gado e feni den boen foe de jeje manpikin? (b) San de na fosi stap?
4 Sortoe stap a de aksi foe a sé foe discipel foe a ten di e kon bifo Jehovah feni den boen foe de jeje manpikin? Den moe doe 6 difrenti stap. Ma wi moe taki dja a fesi dati Gado e aksi densrefi sani disi foe ala sma di wani tron troe kristen èn di wani kisi ferloesoe, ofoe te foe kaba den kisi wan hemel ofoe wan grontapoe paiman.
5 Foe bigin, den sortoe sma disi moe teki ini den soifri sabi foe Jehovah Gado, den Mekiman èn a Sma di gi den libi, èn foe en Manpikin, Jezus Kristus den Jepiman èn Ferloesoeman (Psalm 36:9; 100:3; Mattéus 20:28; Romeini 10:13-15). Jezus ben poti krakti tapoe na prenspari fasi foe na stap disi ini na begi di a ben begi Gado na a laatste neti di a ben de na grontapoe leki libisma: „Disi wani taki tego libi, dati den teki alaten sabi ini den foe joe, na wan enkri troe Gado, èn foe en, di joe ben seni kon, Jezus Kristus.” — Johannes 17:3.
6. Sortoe di foe toe stap den moe doe?
6 Ma sabi tapoe ensrefi no de nofo. A de fanowdoe foe sori bribi, soleki wi e lési: „Gado ben lobi na grontapoe sote dati a ben gi en wan enkri gebore Manpikin, sodati ala sma di e sori bribi ini en, no ben sa lasi, ma ben sa abi tego libi.” Ja, soleki na apostel Paulus e sori so krin, „sondro bribi a no kan foe prisiri Gado”. Na bribi disi e tjari wi so fara foe si ibri pramisi foe Gado leki wan troetroe sani, leki wan sani di kon troe kaba. A de moro leki soso bribi, bikasi a discipel Jakobus e memre wi, dati srefi den ogri jeje e bribi èn ete den e béfi èn moro fara dati „bribi sondro wroko na wan dede sani”. — Johannes 3:16; Hebreër 11:1, 6; Jakobus 2:19, 26.
7. (. . . ?)
7 Na fosi wroko di a de aksi foe wan sma dati a abi bribi, na beraw. Ja, wan sma moe abi beraw foe en fowtoe libifasi èn a moe tapoe foe doe sondoe foe espresi. Di Jezus ben bigin nanga en préki, a ben taki: „Abi beraw, bikasi na kownoekondre foe hemel kon krosbé” (Mattéus 4:17). Efoe wan sma wani abi beraw foe en fowtoe libifasi, dan a moe poti wan punt a baka. A moe abi foeroe sari èn spéti foe en, firi konsensi-fonfon. So toe gi ala sma di wani kisi libi tapoe na paradijs-grontapoe, a de toemsi fanowdoe foe doe disi toe, bika „ala ogri sma Gado sa pori”. — Psalm 145:20.
8. (. . . ?)
8 Ma a no de nofo wawan foe stop nanga san de sondoe. Wan sma di abi bribi, moe doe na stap foe drai-baka (bekering). Disi wani taki dati a moe drai ensrefi èn moe go na fesi na a tra sé. A moe poti prakseri na a rai di Petrus ben gi a den djoe ini en ten: „Abi foe datede beraw èn drai joesrefi, foe joe sondoe kan figi poeroe.” ’Doe wroko di e fiti beraw’ (Tori foe den Apostel 3:19; 26:20). Dati a stap disi e aksi toe foe ala sma di abi na howpoe foe prisiri ini tego libi na grontapoe, e kon na fesi krin foe den wortoe foe Odo 2:20, 21.
9. (a) Sortoe 2 tra stap den e aksi foe den sma disi, ja, foe ala sma di taki dati a de foetoeboi foe Jezus Kristus? (b) San Jezus dopoe e agersi?
9 Èn neleki fa Jezus ben pristeri ensrefi na a Jordaan foe doe na wani foe en Tata, na tra stap di den e aksi foe ala sma di wani tron foetoeboi foe Jezus Kristus, wansi sortoe howpoe den abi, de dati den pristeri densrefi na Gado. Ini na ten disi, disi wani taki, dati den e gi densrefi abra èn baka dati den moe waka ini foetoemarki foe Jezus Kristus, en Manpikin (Lukas 9:23). Moro fara, leki di foe siksi stap, den moe sori na na gi di den gi densrefi abra, èn ferteri disi a publiki, foedi den teki dopoe. — Mattéus 28:19; Teki gersi Tori foe den Apostel 2:41.
Na moro prenspari prati: Dati de foe Jehovah
10. Foe sortoe eksempre e kon na krin dati na prati foe a libisma no de nofo foe kan „kon njoen gebore baka”?
10 Den stap di wan sma e doe, soleki na pisi foe sabi foe Jehovah Gado nanga Jezus Kristus, na sori foe bribi, na abi foe beraw, na drai foe ensrefi, na gi ensrefi abra nanga na teki foe dopoe, e meki dati automatisch a „kon njoen gebore”? Kwetkweti! Net soleki joe no ben kan meki na a fosi presi dati joe ben gebore leki wan bakapisi foe joe égi moeiti, na so, leki wan bakapisi foe joe égi moeiti joe no ben kan „kon njoen gebore baka”. Neleki fa a de fanowdoe na wan gebortoe na skin fasi, dati libisma papa nanga mama pré wan actieve rol, na so a de fanowdoe gi na jeje gebortoe disi, na „njoen gebortoe” disi, dati na Tata, Jehovah Gado, èn en hemel organisaatsi ofoe „oema”, pré wan actieve rol (Jesaja 54:1, 5). Ala san wan sma di doe den stap di wi kari dja a fesi, kan doe, na foe sorgoe dati Gado feni en boen foe „kon njoen gebore baka” efoe dati de Gado wani.
11. Efoe a de na wani foe Gado, fa a de go doe wan sani dan foe na boen foe den sma di ben doe na prati foe den?
11 Foe na onvolmaakti fasi ede di a libisma-famiri kisi, meki Gado srefi e go doe wan sani now foe na boen foe den sma di a ferkisi foe kari go na a hemel kownoekondre. Drape wi e lési: „Leki wan bakapisi foe bribi wi ben kon de regtvaardiki” (Romeini 5:1, 9). Loekoe dati Gado èn no a sma srefi, e ferklari officiëel, dati so wan sma de regtvaardiki. Na so fasi, a de go teki wan presi di de difrenti foe di foe den „mekisani”, na libisma-famiri ini algemeen, di moe wakti tapoe „a kon na krin foe den (jeje) manpikin foe Gado” bifosi den (na libisma-famiri ini algemeen) „kan kon fri foe na katibo foe pori èn den sa abi na glori fri foe den pikin foe Gado” (Romeini 8:19-22). Soboen, den sma di e kon regtvaardiki na a fasi disi, e kisi na reti foe volmaakti libisma libi. Leki wan bakapisi foe disi Jehovah Gado, nanga jepi foe en jeje, kan handri now wantron-wantron nanga den. — Romeini 8:33.
12. Nanga sortoe marki na „njoen-gebortoe” foe Jezus nanga den fosi discipel ben go makandra, èn foe san-ede wan kaba ben kon na disi?
12 Den sma di Gado meki kon regtvaardiki, e kon de now leki en jeje manpikin. Fa so? Nanga jepi foe en santa jeje ofoe wroko krakti, di a de meki wroko foe na boen foe den, nanga leki bakapisi dati den „e kon de njoen gebore”. Ini a tori foe Jezus, èn so toe ini a tori foe en discipel di ben de makandra tapoe na dé foe na pinksterfesa, Gado ben sori nanga jepi foe marki foe tapoesé, dati a ben meki den kon de leki jeje manpikin. Ma di den brifi foe bribi foe na troe kristendom tanapoe now faste, dan fanowdoe no ben de moro foe den sortoe marki disi, sodati den disi „ben poeroe a pasi” — Mattéus 3:16; Tori foe den Apostel 2:3; 10:44-48; 1 Korrinte 13:8-10.
13. Na watra nanga na jeje abi foe doe nanga san? (Johannes 3:5)
13 Tapoe na seti disi foe jeje njoen-gebortoe Jezus ben poti prakseri, di a ben taki gi na djoe tiriman Nikodémus: „Foe troe mi taigi joe: Efoe wan sma no gebore foe watra nanga jeje, a no kan go ini na kownoekondre foe Gado. San gebore foe skin, na skin, èn san gebore foe na jeje, na jeje. No froewondroe foedi mi ben taigi joe: Oenoe moe kon njoen gebore baka” (Johannes 3:1, 5-7). Na watra di kari dja, a no de foe degedege, abi foe doe nanga na letterlek watra foe na dopoe. Èn na jeje? Nanga na santa jeje foe Jehovah di e wroko foe na boen foe na sma.
14. Ini san na „kari” èn na „ferkisi” de èn nanga sortoe prakseri den kristen disi e kisi salfoe èn poti na wroko?
14 Den Boekoe e taki foe den sma di „kon njoen gebore”, leki sma di den „kari” fosi. Na „kari” di den e kisi, de wan kari foe Gado srefi foe de kompe foe Jezus Kristus. Den sma di e teki na kari boen, e tron „sma di den ferkisi” (Openbaring 17:14). Den e tron wan pisi foe na gemeente di den „ferkisi”, èn di kisi na komando „foe meki alape bekenti den toemsi boen wroko” foe Jehovah Gado (1 Petrus 2:9). Neleki Jezus den kristen disi „di kon njoen gebore” e kisi salfoe nanga Gado santa jeje foe préki. Wi e lési foe disi: „En di e gi na djaranti dati joe èn wi de foe Kristus, èn en di ben salfoe wi, na Gado.” — Jesaja 61:1, 2; Lukas 4:16-21; 2 Korinte 1:21.
15. Fa na jeje e gi kotoigi dati wan sma „kon njoen gebore”, èn nanga san na overtoigi e kon moro tranga?
15 Na apostel Paulus ben gi kotoigi na so fasi foe den „sma di Gado ben ferkisi”: „Na jeje srefi e gi kotoigi nanga wi froestan dati wi na pikin foe Gado” (Romeini 8:16). Fa Gado santa jeje e doe disi? Foedi a de prani ini den kristen disi na howpoe foe hemel. „Akroederi (Gado) bigi sari-ati-fasi a ben gi wi, nanga jepi foe na opobaka foe Jezus Kristus foe dede, wan njoen gebortoe go na wan libi howpoe, go na wan goedoe di no e pori, di no abi vlaka èn di no e flaw. A poti ini hemel gi wi” (1 Petrus 1:3, 4). Te den kristen disi tan de ini wan boen matifasi nanga den hemel Tata, a de meki kon tranga nanga a fasi fa a de tjari den, na overtoigi di e libi ini den, dati troetroe den de „njoen gebore” kristen.
Fa wan sma kan de séker foe disi
16. Sensi oten na „getrow èn koni srafoe” ben poti krakti tapoe na grontapoe howpoe, èn sortoe bosroiti disi e meki wi meki?
16 Den sma di ini a ten disi abi wan prati ini na préki foe a boen njoensoe disi foe na kownoekondre, abi na froetrow, dati Jehovah Gado e tjari en dienst-knekti di gi densrefi abra nanga jepi foe en organisaatsi di joe kan si nanga ai èn di a meki kon de nanga en jeje, na „getrow èn koni srafoe” (Mattéus 24:45-47). Ondro na tiri foe na „srafoe”-klasse disi, te nanga na jari 1935, na hemel howpoe ben poti na sma fesi, ben poti na fesi, èn ben kisi krakti. Di moro fara „leti ben skijn” sodati ben kon na krin soema de na „bigi ipi” foe Openbaring 7:9, dan wan bigin meki foe poti krakti tapoe na grontapoe howpoe (Psalm 97:11). A de foe datede wan redelek sani foe kon na a bosroiti dati na nomroe foe den 144.000 na a ten dati, pikinmoro ben doro na marki. A no de foe taki, dati sma di ben de ontrow, ben moe kisi tra sma ini den presi. Ma a de wan sani foe froestan dati a ben sa go foe soso pikinso sma. Èn soema ben sa teki na presi foe den? A gersi dati a de redelek foe meki na bosroiti, dati na hemel howpoe disi séker ben sa gi na son sma di ben horidoro ini getrowfasi èn di ini den jari ben hori faste na a gi di den ben gi densrefi abra na Gado, na presi dati na howpoe disi ben sa gi na sma di dopoe njoen, èn di no ben kakafoetoe ete gi tesi (Teki gersi Lukas 22:28-30.) Ma foe tori di wi abi e sori dati srefi wantoe kristen di ben gi densrefi abra njoenjoen, e taki dati den „kon njoen gebore baka”.
17. Sortoe firi e tjari son sma so fara tapoe wan fowtoe fasi foe prakseri dati Gado ben prani na hemel howpoe ini den?
17 Ala sma di no langa psa kaba ben gi densrefi abra èn ben teki dopoe èn di e prakseri dati den „kon njoen gebore”, ben sa doe boen foe go prakseri tranga foe den aksi di o kon now: Sortoe réde joe abi foe prakseri dati Jehovah ben prani ini joe na howpoe disi? Na firi foe joe ben sa kan de wan pisi di ben tan abra foe na fowtoe bribi di fosten joe ben hori di joe ben de ini Babylon na Bigiwan, namkoe dati hemel de na presi foe ala boen sma? Ofoe a kan de dati joe abi na prakseri disi, foedi ini joe inisé joe ben broeja troetroe, dati joe ben kakafoetoe fosi gi na prakseri ma dati safri-safri a ben kon abi makti tapoe joe? Ma a ben abi makti tapoe joe, foedi joe ben wani foe disi de so, kande srefi sondro joe ben denki? So wan inisé firi foe ensrefi no de wan bewijsi dati joe „kon de njoen gebore”.
18. Foe san-ede meki waarderi gi dipi jeje afersi no de wan bewijsi ete dati wan sma ben „kon de njoen gebore baka”?
18 Ofoe joe e prakseri dati foe joe bigi waarderi ede gi jeje sani, foe na lobi di joe lobi dipi waarheid ede, dati Gado ben ferkisi joe foe de wan foe den 144.000 salfoewan? Loekoe dan dati foeroe foe den sma di no e taki dati den „kon njoen gebore”, de „sma nanga jeje fasi” dorodoro (1 Korinte 2:14, 15). Èn no wan degedege no de foe na jeje krakti foe den man nanga oema foe bribi di e kari ini Hebreër kapitel 11. Nowan foe den ben „kon de njoen gebore”. Alamala ben loekoe na den fesi na „wan moro boen opobaka (foe libi ondro Gado kownoekondre)” dja na grontapoe. — Hebreër 11:35.
19. (a) Foe san-ede meki a bigi faja foe doe wroko no de ete na bewijsi dati Gado ben gi wan sma na hemel howpoe? (b) Sortoe situwasi e gersi dati a de sori dati na overtoigi toe sonwan di taki dati den abi na hemel howpoe, ben sa kan sori tapoe mankeri foe sakafasi?
19 Ofoe a ben kan de dati na firi di e libi ini joe ben kon gro, foedi joe e sori moro faja leki son wan foe den kompe-kristen foe joe? Ma na sani disi foe ensrefi no kan de na prenspari sani, bikasi na apostel Paulus foeroe tron baka ben feni en fanowdoe foe ferteri salfoe kristen dati den moe teki den jeje verprekti tranga (1 Korinte 11:20-22; Galacia 4:9-11). Ofoe a ben sa kan de dati foe na mankeri foe sakafasi ede joe e taki dati joe de foe den salfoewan? No so langa psa kaba joe ben abi sma di ben taki dati den de foe den salfoewan, ma di, na presi foe meki na wanfasi foe a gemeente go na fesi, ben denki foe ben moe abi den égi bijbelstudi-groepoe. Lepi „kon njoen gebore” kristen e tan na a tra sé krosbé na a gemeente foe a presi pe a de libi, wansi a de moro foeroe foe sma foe den „tra skapoe” (Johannes 10:16). Ma ofoe wan sma „kon njoen gebore” de wan persoonlek afersi na mindri Gado nanga ibri kristen. Nowan sma moe kroetoe wan trawan ini na afersi disi. — Romeini 14:10.
20. Sortoe bosroiti wi e meki tapoe na tori foe „kon njoen gebore” tapoe na gron foe san wi ben loekoe na fesi?
20 Sortoe bosroiti wi kan meki tapoe na gron foe ala den sani di wi ben taki na fesi? Dati Jehovah Gado de regtvaardiki, koni èn nanga foeroe lobi. En abi na reti foe gi den mekisani foe en di abi froestan den aparti presi — sonwan foe dini en prakseri ini hemel, trawan foe doe disi dja na grontapoe. Na prijs foe hemel no de wan sani di wan sma kan kisi nanga persoonlek moeiti èn di a wani teki ofoe di a kan lostoe tapoe wan gridifasi. Na grani disi de so aparti, dati no wan libisma mekisani kan gi ensrefi fri foe disi. A de troetroe wan wondroe no-ferdini-boenfasi di Jehovah Gado e gi na wantoe foe en mekisani foe meki go na fesi en koni, regtvaardiki èn lobi prakseri, ma no leki wan bakapisi foe wan spesroetoe verdienste foe den sé. Na grani foe „kon njoen gebore baka” de soso foe den (Romeini 3:23, 24; 11:33-36). Tego libi tapoe wan paradijs grontapoe de ooktoe wan toemsi bigi grani, di regtvaardiki fasi sma kan feti na en baka (Openbaring 21:1, 3, 4). Ala sani de boenfasi di wi no ferdini. Nowan sma moe de so asranti dati a de taki gi Jehovah: „San joe ben doe?” — Daniël 4:35.
[Prenki na tapoe bladzijde 45]
Neleki ini a tori foe wan gebortoe na skin fasi, na so a de fanowdoe gi na „njoen gebortoe” dati na Tata nanga en hemel „oema” pré wan actief rol
[Sani di skrifi na a prenki na tapu bladzijde 47]
Babylon na Bigiwan meki foeroe sma bribi dati ala boen sma e go na hemel