Na prakseri foe Gado foe meki son sma kon „njoen gebore”
„Foe troe mi e taigi joe: Efoe wan sma no gebore foe watra nanga jeje, a no kan go ini na Kownoekondre foe Gado. No froewondroe foedi mi ben taigi joe: Oenoe moe kon gebore baka.” — Johannes 3:5, 7.
1, 2. (a) San wi moe froestan èn warderi bifo wi kan bodoi tapoe wan tevréde fasi na prakseri foe Gado foe meki son sma „kon njoen gebore”? (b) Sortoe kotoigi Gado Wortoe e gi foe en geregtigheid, ma san en geregtigheid no e verprekti en foe doe?
BIFO wi kan bodoi tapoe wan tevréde fasi Gado prakseri foe meki son sma kon „njoen gebore”, dan wi moe froestan èn waarderi wan sani foe den fundament égifasi foe Jehovah Gado nanga en prakseri di a abi nanga na grontapoe èn libisma.
2 A Wortoe foe Gado e kotoigi sondro foe degedege dati wan foe den aparti égifasi foe Gado de geregtigheid. So toe, regtvaardiki fasi de na fundamenti foe en troon (Deuteronomium 32:4; Psalm 89:14). Ma en geregtigheid nanga regtvaardiki fasi no e verprekti en foe sori a srefi boen-ati gi ala mekisani foe en, di abi froestan. So foe eksempre a meki son sani leki jeje mekisani, engel, di de foeroe tron moro hé leki libisma. Ooktoe a no de pai ala en getrow, grontapoe mekisani tapoe a srefi fasi. Jezus ben taki foe datede foe Johannes na Dopoeman dati ’a moro pikin wan ini na Kownoekondre foe hemel de moro bigi leki en’ (Mattéus 11:11, NBG). Now di wi o taki foe na tori foe „kon gebore njoen”, a boen foe wi hori den punt disi na prakseri.
Gado prakseri nanga na grontapoe èn libisma
3. Sortoe switi froewakti ben poti na Adam nanga Eva fesi di Gado ben meki den?
3 Foe waarderi Gado prakseri foe meki son sma kon „njoen gebore baka”, dan a de toemsi prenspari foe froestan den omstandigheden di meki Gado doe disi. Te wi go na a fosi papa nanga mama foe wi alamala, dan wi e si dati Gado ben gi den na komando: „Meki pikin èn kon foeroe èn foeroe na grontapoe èn poti en na oen ondro, èn abi ala libi mekisani di e bewégi na grontapoe, na oen ondro” (Genesis 1:28). Ini a volmaakti fasi foe den, dan Adam nanga Eva ben de pikin foe Gado. Foedi Gado ben poti den ini wan toemsi moi djari, wan park di ben de foeroe nanga ala sortoe moi meti nanga bromki èn switi froktoe, dan troetroe wan kolokoe libi den ben abi. Te den ben sa go doro foe poti grontapoe na den ondro èn ben foeroe en nanga den égi sortoe, dan te foe kaba na heri grontapoe ben sa tron wan paradijs pe volmaakti libisma ben sa libi, soleki Adam nanga Eva ben de volmaakti. Fa disi ben de wan switi froewakti di den ben abi na den fesi!
4, 5. (a) Fa a doe kon dati a fosi papa nanga mama foe wi ben misi foe dini na marki, foe sanede Gado ben meki den? (b) Sortoe sani Jehovah seti foe datede dati en prakseri nanga na grontapoe èn libisma ben sa tjari kon troe, èn nanga jepi foe soema disi ben sa doe kon?
4 Ma wi fosi papa nanga mama ben mankeri waarderi foe den foeroe seti di Gado ben seti gi den èn den ben pasa en wèt. Gado ben poeroe den foe datede foe en osofamiri foe manpikin èn kroetoe den dati den moe dede. Leki wan bakapisi foe disi, meki ala den bakapikin foe den gebore leki sondari di de ondro dede (Genesis 3:19; Romeini 5:12). No wi fosi papa nanga mama, no wantoe foe den bakapikin foe den ben kan meki na fosi komando foe Gado gi a libisma famiri kon troe. Disi ben wani taki dati Gado prakseri nanga na grontapoe èn libisma noiti sa kon troe? Kwetkweti, bikasi Gado Wortoe e gi wi na djaranti dati en prakseri noiti e fadon. — Jesaja 46:10, 11; 55:10, 11.
5 Fa na fosi prakseri foe Gado nanga na grontapoe èn libisma sa tjari dan kon troe? Nanga jepi foe wan Siri, soleki Gado ben taki na fesi ini na djari foe Eden èn a ben pramisi ooktoe na Abraham. Na apostel Paulus e sori dati na Siri disi de ini na fosi presi Jezus Kristus. — Genesis 3:15; 22:17, 18; Galaten 3:16, 29.
Fa a fosi prakseri foe Gado sa kon troe
6. Fa Gado ben opo na pasi baka gi den bakapikin foe Adam foe kon baka ini na osofamiri foe Gado?
6 Fa Jezus Kristus ben kan sorgoe dati Gado fosi prakseri ben kon troe? Ini na fosi presi foedi a poeroe na strafoe di ben de tapoe na libisma famiri foe na oproeroe foe Adam ede. Jezus ben man doe disi, foedi a ben gebore leki wan volmaakti sma, foedi Jehovah Gado — no a man foe Maria, Jozef — ben de en Tata. Nanga en ofrandi dede na wan paal, Jezus ben meki dati troetroe na strafoe disi ben poeroe. Wan foe den moro prenspari réde foe san-ede a ben kon na grontapoe, ben de foe dat-ede foe gi en libi. Nanga dati a ben opo na pasi gi den bakapikin foe Adam foe kon baka ini Jehovah osofamiri di a de feni boen. — Mattéus 28:20.
7. Tapoe a gron foe san meki Jezus ben kisi wan opobaka foe dede?
7 Wan dede Ferloesoeman no ben sa kan de foe na boen foe na libisma famiri. Foe datede meki Jehovah Gado ben opo Jezus Kristus baka na a di foe dri dé èn „ben meki a kon na libi ini na jeje” (1 Petrus 3:18). Jehovah ben doe disi tapoe na gron foe san ben psa na a Jordaan di Jezus ben kisi dopoe. Nanga jepi foe en santa jeje Gado ben meki Jezus kon de leki wan Manpikin di kon gebore nanga jeje. Johannes na Dopoeman no ben si wawan na jeje foe Gado saka kon tapoe Jezus leki wan doifi, ma a ben jere a sten foe Gado taki: „Disi de mi Manpikin, na lobi wan, di mi ben feni boen.” — Mattéus 3:16, 17; Hebreër 10:5-10.
8. Foe sortoe tra sani Jezus ben kisi salfoe èn poti a wroko, boiti dati a ben kon njoen gebore na a Jordaan?
8 Na so fasi Jezus no ben tron wawan wan jeje Manpikin foe Gado, ma so toe a Messias, na Kristus ofoe na sma di ben kisi salfoe foe de Kownoe foe Gado kownoekondre. Ooktoe a ben poti leki hé-priester foe na boen foe na libisma famiri di e dede foe poeroe na onvermogen foe sondoe (Hebreër 7:26). Moro fara den wortoe foe Jesaja 61:1, 2 ben kon troe now tapoe en: „Na jeje foe na Masra Jehovah de na mi tapoe, bika Jehovah ben salfoe mi foe ferteri boen njoensoe gi den safri-ati-sma. A ben seni mi foe tai den wan di ati ben broko, foe bari fri gi den sma di ben teki poti na strafoe èn na opo bradi foe den ai srefi gi den strafoeman.” Jezus ben kon gebore njoen nanga jeje, „njoen gebore” (Johannes 3:3). Leki na Manpikin foe Gado di ben kisi salfoe nanga jeje, a ben tan getrow te na dede, wansi ala sani di Satan na Didibri ben proberi foe doe foe tjari Jezus so fara foe broko en getrowfasi. Foe datede meki Gado ben opo en baka foe dede.
9. Foe réde foe en getrow fasi te na dede, fa èn nanga sortoe prakseri Gado ben sreka Jezus?
9 Baka dati „Gado ben gi en wan moro hé presi èn ben gi en na nen di de hé moro ibri tra nen” (Filippi 2:9-11). Hondro hondro sma ben gi kotoigi dati Jezus ben kisi opobaka foe dede. Sjatoe bifo a ben drai go baka na en Tata ini hemel, a ben taki gi en discipel: „Ala makti ini hemel nanga grontapoe ben gi na mi” (Mattéus 28:18). Tapoe na gron foe en ofrandi dede a ben sreka now dorodoro nanga na reti foe meki na libisma famiri kon boen baka, aladi tapoe na gron foe en opobaka èn opo go na hemel na a reti anoe foe Gado ini hemel, a ben abi na makti foe disi toe (Lukas 22:69). Jezus Kristus kan sorgoe now soboen, dati Gado fosi prakseri nanga na grontapoe nanga libisma kon troe. Ala profétitori foe na Messias ooktoe abi foe doe nanga en. — Loekoe Psalm 72; Jesaja 9:6, 7; 11:1-10.
Foe san-ede trawan moe „gebore njoen baka”
10, 11. (a) Sortoe kotoigi foe bijbel e sori dati Jezus sa abi kompe ini en kownoekondre? (b) Omeni sma sa teki prati ini na grani disi èn fa wi sabi dati na nomroe di kari moe teki letterlek?
10 Jezus Kristus sa doe ala den sani disi en wawan? Nono. Engel sa de nanga en makandra ini en tiri? Nono. Makandra nanga wantoe soema di neleki en ben de na grontapoe sa teki prati ini na kontroe foe den Messias profétitori dati. Ma bifo den kan teki prati ini Kristus Kownoekondre-tiri, dan neleki en, den moe „kon njoèn gebore baka” aladi den de na grontapoe ete. Na jeje foe Jehovah di e wroko tapoe den, e meki den gebore leki jeje manpikin di abi na den fesi tego libi ini hemel. Na so fasi den e prisiri ini wan spesroetoe matifasi nanga Gado, „wan jeje foe teki den leki manpikin, wan jeje di den e bari taki: ’Abba, Tata!’” (Romeini 8:15) Jezus ben poti na howpoe disi alaten na a fesi foe den apostel foe en. (Lukas 22:28-30; Johannes 14:2, 3). Den apostel ooktoe ben taki foe na howpoe disi. — Romeini 8:17; 1 Korinte 15:52, 53; 1 Johannes 3:2.
11 Omeni sma sa kisi na hemel presi disi? Te joe loekoe ala den tekst di abi foe doe nanga a tori disi, dan na wan betrekkelek pikin nomroe foe sma sa de di sa „kon njoen gebore baka”. Disi joe kan froewakti, foedi den e kisi wan spesroetoe prijs, wan toemsi grani presi. Jezus ben taki foe den foe datede: „No frede oen pikin ipi, bika oen Tata ben feni en foe boen foe gi oenoe a kownoekondre” (Lukas 12:32). Omeni foe den sma disi sa de? Na apostel Johannes e gi kotoigi dati 144.000 jeje Israëlsma a ben si, di ben abi wan ségelmarki ini den fesi ede. A de taki ooktoe dati 144.000 sma tnapoe makandra nanga na Lam Jezus Kristus tapoe a bergi Sion. Dati wi moe teki na nomroe disi leki letterlek, e kon na krin ini na context, pe a taki ooktoe foe wan „bigi ipi, di nowan sma no kan teri”. — Openbaring 7:3, 4, 9; 14:1, 3; 20:4, 6.
Wan pipel gi en nen
12, 13. San na a disten prakseri foe Jehovah nanga den kompe foe a kownoekondre ini a ten di e kon?
12 Ma Jehovah Gado ben abi na prakseri dati den kownoe èn priester disi ben sa doe wan wroko, aladi den ben sa de ete leki libisma foe skin èn broedoe na grontapoe. Èn sortoe wroko dati de? Neleki Jezus ben kisi salfoe foe „ferteri safri-ati-sma na boen njoensoe” na so den disi kisi salfoe foe préki na boen njoensoe foe na kownoekondre (Jesaja 61:1, 2; Lukas 4:16-21; Tori foe den Apostel 8:4, 12). Foe datede meki Jezus ben gi en fosi discipel leki adjosi na dekati foe „meki discipel foe sma foe ala naatsi, dopoe den” (Mattéus 28:19, 20). Èn let bifo Jezus ben opo go na hemel, a ben taki gi en erfoe getrow apostel dati „den ben moe de kotoigi foe en te na den moro farawe kontren foe grontapoe”. — Tori foe den Apostel 1:8.
13 Wan foe den moro prenspari réde foe san-ede Gado e meki na „boen njoensoe” préki ini ala naatsi, de „foe teki na mindri den wan pipel gi en nen” (Tori foe den Apostel 15:14). Foedi a nen foe Gado de Jehovah dan den sma di de wan pisi foe a pipel, de bekenti leki . . . kotoigi foe Jehovah (Jesaja 43:10-12). Disi no wani taki dati den salfoe foetoeboi disi foe Jezus Kristus de den wan enkri wan di moe préki na „boen njoensoe” gi safri-ati-sma, foe meki sma tron discipel èn foe gi kotoigi foe Jehovah Gado. Precies soleki fositen ini Israël den wèt foe Jehovah ben de toe tapoe den vreemde sma di ben libi na ini den mindri, na so den komando di ben gi na den jeje Israël sma de toe tapoe den kompe foe den, na „bigi ipi”, „tra skapoe”. — Johannes 10:16; Openbaring 7:9.
14. Sortoe tra verprekti de tapoe den salfoe foetoeboi disi foe Kristus?
14 So toe na verprekti de tapoe den salfoe foetoeboi foe Jezus Kristus foe sori den froktoe foe a jeje foe Gado, namkoe „lobi, prisiri, vréde, langa pasensi, switifasi, boenfasi, bribi, safri-ati-fasi, dwengi joesrefi” (Galacia 5:22, 23). Jezus ben taki dati sma sa kon sabi den troe foetoeboi foe en na a lobi di den e sori gi makandra (Johannes 13:34, 35). Foe dat-ede meki na apostel Paulus e gi den a rai: „Oen moe poeroe na owroe égifasi di e akroederi nanga oen fositen libi èn di ben pori nanga den bidrigi lostoe foe en, ma oen moe kon njoen ini na krakti di e poesoe oen denki, èn weri na njoen égifasi, di ben meki na a wani foe Gado ini troe regtvaardiki fasi nanga loyaliteit.” O prenspari na verprekti disi de gi kristen, e kon na krin ini den tra wortoe foe na apostel: „Mi de tranga gi mi skin èn mi e tjari en leki wan srafoe, foe misrefi no trowe na wan sé, baka te mi ben préki gi trawan” (Efese 4:22-24; 1 Korinte 9:27). Soso te den salfoe wan bewijsi dati srefi te na dede den de getrow, den kan abi na howpoe foe kisi na „kroon foe libi”. — Openbaring 2:10.
Na fosi prakseri foe Gado no kenki
15. (a) Sortoe fowtoe tapoe a tori foe a prakseri foe Gado foeroe sma di taki den de kristen e meki? (b) Tapoe na gron foe sortoe howpoe di den kristen Griki Boekoe e meki kon boen krin, den sma ben go prakseri disi?
15 Foeroe sma di e taki dati den de kristen e meki wan fowtoe foedi den e poti Jehovah fosi prakseri nanga na grontapoe èn libisma na wan sé. Na Wortoe foe en e sori krin san ben de èn de na prakseri disi, èn a de gi wi na djaranti dati a no de kenki (Genesis 1:28; Jesaja 45:18; Maleachi 3:6). Ma den Kristen Griki Boekoe e meki kon na krin boen, dati na tra prakseri foe Jehovah di ben meki bekenti, wani taki dati wan pikin nomroe foe sma e teki, tapoe na gron foe Jezus srakti-ofrandi, foe tiri leki kompe-tiriman foe en Manpikin ini na hemel kownoekondre (Genesis 3:15; 2 Timoteus 4:7, 8, 18). Ini a tori foe ala den disi a de séker fanowdoe, dati den „kon njoen gebore” fosi neleki Jezus Kristus (Johannes 3:3). Ma a seti foe Gado foe ferloesoe, tapoe a gron foe Kristus srakti ofrandi, no de soso foe den sma di abi wan hemel howpoe. Disi e kon srefi boen krin foe den Kristen Griki Boekoe.
Wán ferloesoe. Ma tokoe toe difrenti froewakti foe a ten di e kon
16, 17. Sortoe tekst e sori dati den winimarki foe Kristus srakti-ofrandi no de soso gi den sma di abi wan hemel howpoe?
16 Jezus ben leri en foetoeboi foe begi: „Wi Tata ini hemel joe nen moe de santa. Joe kownoekondre moe kon. Joe wani moe pasa, soleki ini hemel, so toe na grontapoe” (Mattéus 6:9, 10). Efoe a moe de dati Gado wani moe doe na grontapoe soleki ini hemel, dan regtvaardiki sma moe libi na grontapoe, èn foe den ben taki na fesi: „Gado srefi sa de na den. Èn a sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fosi sani pasa kaba.” Disi no kan abi foe doe nanga na hemel, bikasi drape noiti babari, sari, pen nanga dede no ben de. — Openbaring 21:3, 4.
17 Dati toe groepoe sma de, di sa njan boen foe den boen-ati seti foe Jehovah, e kon na krin foe den wortoe foe na apostel Paulus ini Romeini 8:19-21: „Bikasi na faja froewakti foe den mekisani (wán groepoe) e wakti na kon na krin foe den manpikin foe Gado (wan tra groepoe). Bikasi den mekisani ben poti ondro soso fasi, no nanga den égi wani, ma foe na sma di ben poti den na ondro dati, tapoe na gron foe howpoe, dati den mekisani srefi sa kon fri foe na katibo foe pori, èn dati den sa abi na glori fri foe den pikin foe Gado.” Soboen, te foe kaba, dan ala sma di sa njan boen foe den winimarki, foedi den ben poti bribi ini Kristus srakti-ofrandi, sa kisi libi leki manpikin foe Gado — 144.000 sma di „ben bai poeroe foe na grontapoe” foe de ini hemel èn foeroe miljard sma di sa prisiri ini tego libi ini wan grontapoe paradijs. — Openbaring 7:4, 9; 14:3; Mattéus 25:31-34.
18, 19. (a) San e sori dati na kontroe foe Gado prakseri foe grontapoe nanga libisma de krosbé? (b) Omeni sma de wan pisi foe Gado kownoekondre èn Abraham „siri”? (c) Sortoe aksi wi moe loekoe ete?
18 A de kon na krin foe san wi ben taki na fesi dati na fosi prakseri foe Gado foe na grontapoe nanga na libisma-famiri sa kon troe ete. Èn na kon-troe foe bijbel profétitori, soleki den di tanapoe ini Mattéus kapitel 24, Markus kapitel 15, Lukas kapitel 21, 2 Timotéus 3:1-5 nanga Openbaring 6:1-8, e sori dati na ten de krosbé! Leki wan bakapisi foe na oproeroe foe Satan nanga na tranga jesi foe Adam nanga Eva, meki Jehovah seti sani dati wan spesroetoe groepoe, di a sa gebroiki foe meki en fosi prakseri kon troe kisi wan hemel paiman. Soso den disi e „kon njoen gebore baka”. Makandra nanga a Masra èn Méstri foe den, Jezus Kristus, den de a kownoekondre di Jezus ben leri en foetoeboi foe begi foe en. Den de a „siri foe Abraham” di sa blesi „ala naatsi foe na grontapoe”. — Genesis 22:18; Galaten 3:29.
19 Wi ben si foe san-ede na Manpikin foe Gado èn en Kownoekondre-kompe ben moe „kon njoen gebore baka”, omeni sma na laatste groepoe di wi kari e teri èn sortoe verprekti den abi now. Ma den aksi di e kon now e tan: Tapoe a tori foe na afersi disi foe „kon gebore njoen”, san de na prati foe Gado èn san de na prati foe libisma? Fa wan sma kan sabi dati Gado ben teki en foe „kon njoen gebore baka”?
[Prenki na tapoe bladzijde 40]
Na a ten foe en dopoe Jezus ben salfoe leki kownoe foe Gado kownoekondre
[Prenki na tapoe bladzijde 42]
Jezus ben konmanderi en getrow foetoeboi „foe de kotoigi foe en na den moro farawe kontren foe grontapoe”