San ede son sma e kon gebore njoen baka

„EFOE wan sma no kon gebore njoen baka, a no kan si a kownoekondre foe Gado” (Johanes 3:3). Den wortoe disi ben meki foeroe sma beifi èn broeja foe sensi a ten di Jesus Krestes ben taki den moro leki 1900 jari pasa kaba.

Foe froestan na wan joisti fasi san Jesus ben taki foe a kon gebore njoen baka, dan wi moesoe piki den aksi disi fosi: San na a prakseri foe Gado gi a libisma famiri? San e pasa nanga a sili te sma e dede? San a Kownoekondre foe Gado abi na prakseri foe doe?

A prakseri foe Gado gi a libisma famiri

Gado ben meki a fosi libisma, Adam, leki wan volmaakti libisma manpikin foe en (Lukas 3:38). Jehovah Gado noiti ben abi ini prakseri taki Adam ben moesoe dede. Adam nanga en wefi Eva, ben abi a froewakti foe meki wan libisma famiri di ben de sondro sondoe, doe kon èn di ben sa libi foe têgo èn di ben sa foeroe a paradijs grontapoe (Genesis 1:28). Dede no ben de wan pisi foe Gado fosi prakseri gi man nanga oema. Dede ben kon na ini a libi foe a libisma famiri leki wan bakapisi soso foe na opo di den opo densrefi kontrari a wet foe Gado. — Genesis 2:15-17; 3:17-19.

Na opo disi di sma ben opo densrefi kontrari Gado, ben meki bigi moreel strei opo ede kon, so leki a retifasi foe Gado soevereiniteit èn a man di libisma man tan getrow na den wet foe en. Ten ben sa de fanowdoe foe koti den strei disi. Ma a prakseri foe Jehovah Gado gi a libisma famiri no ben kenki èn a no man misi ini san a ben poti foe doe. A abi troetroe na prakseri foe foeroe grontapoe nanga wan volmaakti libisma famiri di sa njanboen foe têgo libi na ini a Paradijs (Psalm 37:29; 104:5; Jesaja 45:18; Lukas 23:43). Wi moesoe hori a prenspari waarheid disi na prakseri te wi e go loekoe den wortoe foe Jesus di ben abi foe doe nanga a kon di wan sma moesoe kon gebore njoen baka.

San e pasa nanga a sili te sma e dede?

Foe di Griki filosoofman no ben sabi san a santa jeje foe Gado ben tjari kon na krin gi bijbel skrifiman, meki den ben doe moeiti foe feni san a libi wani taki. Den no ben man bribi taki libisma ben moesoe libi soso wan toe jari, nofotron ini takroe kondisi, èn dan stòp nomo foe libi. Ini a tori disi den ben abi leti. Ma den ben fowtoe ini den bosroiti foe den foe a froewakti foe libisma baka dede. Den ben bosroiti taki a libi foe libisma ben go doro ini wan tra fasi baka dede, taki na inisei foe ibri sma wan sili ben de di no e dede.

A fasi dati foe si sani ben abi krakti tapoe djoe nanga sma di ben taki, dati den na kresten. A boekoe Heaven—A History e taki: „Pe djoe, di ben panja na ala sei, ben miti Griki koniman toe, a prakseri foe wan sili di no e dede ben opo ede kon.” A boekoe e taki moro fara: „Griki leri foe a sili ben abi bigi krakti tapoe a bribi foe djoe èn te foe kaba tapoe a di foe kresten. . . . Foe di Filo [wan djoe filosoofman foe Aleksandria foe a fosi jarihondro] ben moksi a toemoesi aparti filosofie foe Plato nanga bijbel gwenti kon na makandra, meki a ben sreka a pasi gi baka ten kresten, bradi-edeman.”

San Filo ben bribi? A srefi boekoe e go doro: „Gi en, dede e poti a sili baka na a fasi foe en fa a ben de biginbigin, bifo a ben gebore. Foe di a sili de foe a jeje kondre, meki libi ini a skin e kon de noti moro leki wan sjatoe, nofotron sari, sani di pasa.” Ma a „fasi [foe Adam] bifo a ben gebore” ben de, taki a no ben de. So leki fa a bijbel tori e taki, Gado noiti ben abi na prakseri taki foe ensrefi wan kenki abra go na wan tra kondre ben moesoe de te sma e dede, neleki grontapoe ben de wan presi pe den e sreka sma foe go na wan presi foe kisi wan moro hei noso wan moro lagi libi.

Na ini Gado Wortoe, bijbel, di skrifi nanga jepi foe santa jeje, den no e leri a bribi taki a libisma sili no e dede. No wan leisi a e gebroiki den wortoe „sili di no e dede”. A e taki, dati Gado ben meki Adam leki wan sili, no nanga wan sili. Genesis 2:7 e taki: „Jehovah Gado ben go abra foe meki libisma foe a doti foe a gron èn foe bro na libibro na ini en noso-olo èn libisma ben tron wan libi sili.” A libisma famiri noiti ben kon tanapoe na fesi a froewakti foe kisi têgo libi na hemel noso têgo skin-ati ini hèlfaja. Bijbel e sori taki a sili noso sma di e dede no de moro èn no sabi notinoti (Psalm 146:3, 4; Preikiman 9:5, 10; Esekièl 18:4). So boen, filosoofman ben bribi sani foe a sili di no skrifi ini bijbel. Wi moesoe loekoe boen nanga denki di e kori sma èn di ben kan troeboe a froestan di wi e froestan Jesus wortoe di ben abi foe doe nanga kon gebore njoen baka.

Kon gebore njoen baka foe tiri leki kownoe

Jesus ben taigi Nikodeimus taki den sma di „kon gebore njoen baka . . . e go ini a kownoekondre foe Gado” (Johanes 3:3-5). San na a Kownoekondre dati? Ini wortoe di taki na agersi fasi na a bigin foe a libisma historia, Jehovah Gado ben froeteri foe a prakseri foe en, foe gebroiki wan spesroetoe „siri” — wan tiriman di ben o kon — foe masi na ede foe a fosi Sneki, Satan Didibri (Genesis 3:15; Openbaring 12:9). So leki fa safrisafri den ben tjari disi kon na krin na ini den Boekoe, dan sma ben kon sabi a „siri” disi leki Jesus Krestes, di e tiri nanga kompe tiriman ini wan aparti sori foe Gado soevereiniteit, a Mesian Kownoekondre (Psalm 2:8, 9; Jesaja 9:6, 7; Danièl 2:44; 7:13, 14). Disi na a Kownoekondre foe hemel, wan tiri ini hemel di sa regtfardiki a soevereiniteit foe Jehovah èn froeloesoe a libisma famiri foe katibo foe sondoe nanga dede. — Mateus 6:9, 10.

Makandra nanga Jesus, joe abi 144.000 sma leki kompe tiriman di den bai poeroe foe a libisma famiri (Openbaring 5:9, 10; 14:1-4). Gado ben teki wan toe sma foe Adam onvolmaakti libisma famiri foe tron den „santawan [disi] foe a Moro Heiwan”, èn den e tiri nanga Krestes ini a Mesian Kownoekondre (Danièl 7:27; 1 Korentesma 6:2; Openbaring 3:21; 20:6). Den man nanga oema disi ben poti bribi ini Jesus Krestes, di ben taki, dati den ben sa „kon gebore njoen baka” (Johanes 3:5-7). Fa èn foe san ede a gebortoe disi e pasa?

Den sma disi ben kisi dopoe na ini watra leki Krestes bakaman. Gado ben gi den pardon foe den sondoe foe den, tapoe a fondamenti foe Jesus froeloesoe ofrandi, ben froeklari den regtfardiki èn ben teki den leki manpikin na jeje fasi (Romesma 3:23-26; 5:12-21; Kolosesma 1:13, 14). Na apostel Paulus ben taigi den sortoe sma disi: „Joe ben kisi wan jeje taki den teki joe leki manpikin, wan jeje di nanga en wi e bari taki: ’Abba, Tata!’ A jeje srefi e kotoigi nanga wi jeje taki wi na pikin foe Gado. Foe dati ede, efoe wi na pikin, dan wi na erfgenaam toe: foe troe erfgenaam foe Gado, ma kompe erfgenaam nanga Krestes, nanga a kondisi taki wi e pina makandra, so taki makandra wi kan kisi glori toe.” — Romesma 8:15-17.

Leki bakaman foe Krestes, den sma disi abi wan njoen gebortoe, noso wan njoen bigin na ini a libi. A ben abi leki bakapisi wan overtoigi taki den sa abi prati na ini Jesus hemel famiri-goedoe (Lukas 12:32; 22:28-30; 1 Petrus 1:23). Na apostel Petrus ben skrifi foe a kon gebore njoen baka na a fasi disi: „Akroederi [Gado] bigi sari-ati a ben gi wi wan njoen gebortoe go a wan libi howpoe nanga jepi foe na opobaka foe Jesus Krestes, foe kisi, wan famiri goedoe di no e pori, di no abi flaka èn di no e flaw. Den ben poti en aparti gi joe na hemel” (1 Petrus 1:3, 4). A njoen libi disi na hemel man foe de so gi den sortoe sma disi, foe di Gado e opo den baka neleki fa a ben opo Jesus baka. — 1 Korentesma 15:42-49.

San de foe taki foe grontapoe?

Disi no wani taki, dati a heri libisma famiri di e gi jesi sa kon gebore njoen baka te foe kaba, foe komoto na grontapoe go na hemel. So wan fowtoe denki ben de a srefi leki di den filosoofman leki Filo ben abi, di ben denki taki „libi ini a skin [de] noti moro leki sjatoe, nofotron sari, sani di pasa.” Ma noti fowtoe ben de na Jehovah Gado en fosi grontapoe mekisani. — Genesis 1:31; Deuteronomium 32:4.

A no ben poti na fesi taki a libi foe libisma ben sa de sjatoe èn nanga foeroe pen. Jesus Krestes nanga den wan di kon gebore njoen baka foe dini leki kownoe èn priester nanga en na hemel, sa poeroe ala den takroe bakapisi foe na opo di Satan opo ensrefi kontrari Gado (Efeisesma 1:8-10). Nanga jepi foe den leki a pramisi ’siri foe Abraham’, „ala nâsi foe grontapoe foe troe sa blesi densrefi” (Galasiasma 3:29; Genesis 22:18). Gi a libisma famiri di e gi jesi, disi sa wani taki libi na wan paradijs grontapoe, heri tra fasi leki a sjatoe libi ini a ten disi, di lai nanga pen. — Psalm 37:11, 29; Openbaring 21:1-4.

Soema sa abi wini?

Na mindri den wan di abi wini foe den sani di Gado gi foe blesi a libisma famiri, joe sa abi den dedewan di kisi opobaka èn di e poti bribi ini Jesus en froeloesoe ofrandi (Johanes 5:28, 29; Tori foe den Apostel 24:15). A moro bigi pisi foe den noiti ben leri foe Gado nanga Krestes èn foe dati ede no ben man sori bribi ini Jesus. Na mindri den sma disi di kisi opobaka, joe sa abi so srefi getrow sma leki Johanes a Dopoeman, di ben dede bifo a dede foe Jesus ben opo a pasi go na hemel libi (Mateus 11:11). Na sei foe den disi, ’wan bigi ipi di ben komoto na ala nâsi ben wasi èn ben meki den krosi foe den kon weti ini a broedoe foe a Pikin Skapoe’, Jesus Krestes. Den ben handri na wan boen fasi tapoe a Kownoekondre preikiwroko di Jesus „brada” di kon gebore njoen baka, now e teki fesi na ini, èn den sa pasa Gado orlokoe, Armagedon libilibi go na ini wan grontapoe di den meki kon krin (Openbaring 7:9-14; 16:14-16; Mateus 24:14; 25:31-46). Ini a seti foe Gado, dati ede, miljoenmiljoen sma sa kisi froeloesoe, ala di den no kon gebore njoen baka foe tiri nanga Krestes ini hemel. — 1 Johanes 2:1, 2.

Joe sa de na mindri den sma di e kisi libi na tapoe wan paradijs grontapoe? Joe kan de drape efoe joe e sori bribi ini a srakti ofrandi foe Jesus Krestes èn e kon moksi fajafaja nanga a troe kresten gemeente. A gemeente no ben kon pori nanga filosofie ma ben tan „wan postoe èn jepi foe a waarheid”. (1 Timoteus 3:15; teki gersi Johanes 4:24; 8:31, 32.) Dan joe kan loekoe go na fesi na wan toemoesi moi tamara, te manpikin foe Gado di kon gebore njoen baka e tiri na hemel èn ala den grontapoe pikin foe Gado e kon de volmaakti baka tapoe wan moi paradijs grontapoe. So boen graboe na okasi foe joe foe libi ini a njoen grontapoe dati foe têgo blesi. — Romesma 8:19-21; 2 Petrus 3:13.

[Prenki na tapoe bladzijde 6]

Adam noiti ben kisi na okasi foe teki wan bosoiti na mindri libi na hemel noso têgo skin-ati ini hèlfaja