Vrede o de na grontapu fu di Yesus gebore

DI DEN engel ben pramisi taki ’vrede o de na grontapu gi sma di Gado feni bun’, dan dati no ben de a wan-enkri profeititori di ben abi fu du nanga a ten di Yesus ben o gebore. Boiti a boskopu di den engel ben tyari gi den skapuman di ben e fruwondru, tra engel ben tyari boskopu fu Gado tu gi Maria nanga en masra Yosef. Den boskopu dati ben abi fu du nanga a beibi Yesus di ben gebore. Te wi o poti prakseri na den boskopu disi, dan wi sa man frustan moro bun fu san ede Yesus gebore èn san a pramisi fu den engel wani taki trutru.

Bifo Yesus gebore, èn srefi bifo Maria ben kon de nanga bere, dan wan engel di Bijbel e kari Gabrièl ben go na en. Na engel ben taki: „Odi, yu di kisi wan bigi grani, Yehovah de nanga yu.” Yu kan frustan taki Maria skreki srefisrefi èn kande a ben frede pikinso tu. San den wortu fu na engel ben wani taki?

Gabrièl fruklari: „Yu o de nanga bere èn yu o kisi wan manpikin di yu musu kari Yesus. A o abi biginen èn den o kari en a Manpikin fu a Moro Heiwan; Yehovah Gado o gi en a kownusturu fu en papa David; a o tiri fu têgo leki kownu fu a famiri fu Yakob èn en kownukondre no sa kaba.” Maria aksi na engel fa disi kan, bika a ben de wan nyunwenke, iya, a no ben abi seks demakandra nanga wan man. Gabrièl taigi en taki a ben o kon de nanga bere nanga yepi fu Gado en santa yeye. A pikin disi ben o de heri tra fasi leki ala tra pikin.—Lukas 1:28-35.

Wan kownu o gebore

A ben musu de so taki den wortu fu Gabrièl ben meki Maria kon frustan taki a manpikin di a ben o kisi, ben de a sma di owruten profeititori ben taki fu en. Di na engel taigi Maria taki Yehovah ben o gi a manpikin fu en „a kownusturu fu en papa David”, dan a sani disi meki a prakseri a pramisi di Gado gi Kownu David fu Israel. A no de fu taki dati iniwan Dyu di ben sabi den Buku fu Bijbel ben o prakseri a pramisi disi.

Yehovah ben meki a profeiti Natan taigi David: „Yu oso nanga yu kownukondre sa tan na yu fesi te ten di no skotu; iya, yu kownusturu sa tan tanapu kánkan te ten di no skotu” (2 Samuel 7:4, 16). Yehovah ben taki fu David: „Trutru mi sa poti a bakapikin fu en fu têgo, èn a kownusturu fu en leki den dei fu hemel. A bakapikin fu en sa de teleki ten di no skotu, èn a kownusturu fu en teleki a son di de na mi fesi” (Psalm 89:20, 29, 35, 36). Sobun a reide fu san ede Yehovah ben teki Maria nanga Yosef fu tron papa nanga mama fu Yesus, na fu di den ben de bakapikin fu David.

Disi no ben de den wan-enkri profeititori na ini den Hebrew Buku fu Bijbel, di ben abi fu du nanga a kownu manpikin fu David. A ben musu fu de so tu taki Maria ben sabi a profeititori fu Yesaya, di e taki: „Bika wan pikin kon gebore gi wi, wan manpikin den ben gi wi; èn a kownu tirimakti sa kon na tapu en skowru. Èn en nen sa de: Tumusi Bun Raiman, Tranga Gado, Têgo Tata, Granman fu Vrede. Na a kownu tirimakti di de pasa marki èn na vrede, wan kaba no sa kon, na tapu a kownusturu fu David èn na tapu en kownukondre so taki a kan seti en bun èn fu horibaka gi en nanga yepi fu retidu èn nanga yepi fu regtfardikifasi, fu bigin nanga now èn te ten di no skotu. Iya, a faya fu Yehovah fu den legre sa du disi.”—Yesaya 9:6, 7.

Fu dati ede a boskopu di Gabrièl ben gi Maria no ben abi fu du nomo nanga wan beibi boi di ben o gebore na wan wondru fasi, ma a ben abi fu du nanga wan moro prenspari sani. A manpikin fu en ben o kisi a kownumakti fu Kownu David, iya, a ben o tiri fu têgo leki Kownu na ini wan Kownukondre di Gado seti. Den sani di Gabrièl ben taki fu a posisi di Yesus ben o kisi, de tumusi prenspari gi wi alamala.

Di Yosef kon sabi taki na uma di ben o tron en wefi ben de nanga bere, dan a bosroiti fu prati nanga en. A ben sabi taki a pikin no ben de fu en, fu di noiti a ben abi seks demakandra nanga Maria. Yu kan frustan taki a ben muilek srefisrefi gi Yosef fu bribi Maria di a fruteri en fa a du kon taki a de nanga bere. Na Evangelietori e taki: „Na engel fu Yehovah kon na en na ini wan dren. A taki: ’Yosef, manpikin fu David, no frede fu tyari yu wefi Maria go na oso, bika na santa yeye meki a de nanga bere. A sa kisi wan manpikin di yu musu kari Yesus, bika na en sa puru den sondu fu en pipel.’”—Mateyus 1:20, 21.

Bijbel no e taki efu Yosef ben frustan krin na sortu fasi a pikin ben o „puru den sondu fu en pipel”. Toku, a boskopu disi gi Yosef a dyaranti taki Maria no ben du hurudu. Yosef du san na engel ben taigi en, èn a tyari Maria go na en oso. A sani disi ben sori taki den trow.

Tra pisi fu Bijbel e yepi wi fu frustan san den wortu fu na engel wani taki. Syatu baka di Yehovah meki den fosi tu libisma, wan engel opo ensrefi teige Yehovah èn a taki dati Yehovah no abi a reti fu tiri ala sani. Den Hebrew Buku fu Bijbel e sori taki wan fu den fasi fa a ben krutu Gado, na taki Gado no e tiri na wan reti fasi, èn taki nowan libisma ben o tan dini Yehovah te a e kisi tesi (Genesis 3:2-5; Yob 1:6-12). Adam ben de wan fu den sma di no tan dini Yehovah. Fu di a du sondu, meki ala libisma kisi sondu, èn leki bakapisi fu dati den e dede (Romesma 5:12; 6:23). Ma Yesus no gebore nanga sondu, fu di en papa no ben de wan libisma. A libi fu Yesus di ben de sondro sondu, ben abi a srefi waarde leki a libi di Adam ben lasi. Yesus ben de klariklari fu gi a libi disi leki wan ofrandi, èn na so a frulusu libisma fu den sondu fu den so taki den ben kan abi a howpu fu libi fu têgo.—1 Timoteyus 2:3-6; Titus 3:6, 7; 1 Yohanes 2:25.

Di Yesus ben du a diniwroko fu en na grontapu, dan a sori fa a sa de te sma no e pina moro leki bakapisi fu sondu. A dresi ibri sortu siki èn a meki den dedewan kon na libi baka (Mateyus 4:23; Yohanes 11:1-44). Den wondru dati ben e sori sma san a sa du na ini a ten di e kon. Yesus srefi ben taki: „A yuru o kon te ala den sma di de na ini den grebi o yere [mi] sten, èn den o komopo drape.”—Yohanes 5:28, 29.

A pramisi disi di e taki dati sma o kisi wan opobaka na ini a ten di e kon, e sori wi fu san ede a de tumusi prenspari gi wi taki Yesus gebore, èn san moro prenspari srefi, na taki a dede gi wi. Gado seni en Manpikin kon na grontapu „fu meki grontapu kisi frulusu nanga yepi fu en”, na so Yohanes 3:17 e taki. A tumusi moi nyunsu disi e meki wi prakseri a boskopu baka di den skapuman ben kisi di den ben e luku den skapu fu den a neti di Yesus gebore.

’Bun nyunsu fu wan prisiri sani’

Iya, libisma ben kisi trutru ’bun nyunsu fu wan prisiri sani’, di den engel ben meki bekènti taki ’wan Frulusuman gebore èn en na Krestes, a Masra’ (Lukas 2:10, 11). A pikin disi ben o tron a Mesias, a bigi Profeiti èn Tiriman di a pipel fu Gado ben e fruwakti langa ten kaba (Deuteronomium 18:18; Mika 5:2). A libi nanga a dede fu en na grontapu ben o de wan prenspari buweisi taki Yehovah abi a reti fu tiri hemel nanga grontapu, èn na fu dati ede den engel ben man taki: „Glori gi Gado na ini den moro hei presi na hemel.”—Lukas 2:14.

Yesus, di Bijbel e kari „a lasti Adam”, sori taki wan libisma man tan getrow na Yehovah srefi te a kisi bun hebi tesi (1 Korentesma 15:45). Na so Yesus sori taki Satan na wan ogri-ati leiman. A sani disi gi den getrow engel na hemel prisiri.

Ma meki wi go luku na aksi disi baka: „Wi kan fruwakti taki den sani di den engel meki bekènti na a neti di Yesus gebore, sa kon tru?” A piki tapu na aksi disi na taki a sani disi sa kon tru seiker! Vrede na grontapu na wan tumusi prenspari sani di de fanowdu so taki grontapu kan tron wan paradijs, soleki fa Gado pramisi. Te vrede de na heri grontapu, dan ala sma sa sori lobi èn den sa de getrow. Sobun te Yehovah o meki den sani dati kon tru, dan a sa pori ala sma di e weigri fu saka densrefi na ondro a tiri fu en. A sani disi a no bun nyunsu gi den sma di teki a sei fu Satan, fu di den e taki dati den markitiki fu Yehovah no de fu a bun fu libisma. Den sma disi sa kisi pori.—Psalm 37:11; Odo 2:21, 22.

Hori na prakseri taki den engel no ben taigi den skapuman taki vrede o de gi ala sma èn taki Gado o feni ala sma bun. Na presi fu dati, den taki dati ’vrede o de gi sma di Gado feni bun’. Den sma di e sori trutru bribi na ini Yehovah, e tron getrow bakaman fu Yesus èn den e teki na eksempre fu en. Den sma disi de klariklari fu du bun gi trawan èn fu broko den ede nanga trawan, èn den no e du dati wan tu dei nomo na ini a yari, ma ibri dei.

Sma e tyari densrefi leki Kresten ibri dei fu a yari

A bun nyunsu di Yesus ben e preiki, ben abi krakti tapu a libi fu bun furu sma. Furu sma e tyari densrefi akruderi Kresten gronprakseri na ini ibri afersi fu den libi. Sma di ben abi a gwenti fosi fu denki densrefi nomo, bigin aksi densrefi san Yesus ben o du te a ben o de na ini a srefi situwâsi di den de na ini. Son sma di ben e suku nomo fu kon gudu èn fu abi prisiri, kon frustan taki den musu hori densrefi na den markitiki fu Gado èn taki den musu meki tra sma kon sabi den markitiki disi tu. Den sma di e du den sani dati, e meki muiti fu du bun gi trawan èn fu sori switifasi gi trawan ibri dei fu a yari. Na dati yu e fruwakti fu tru Kresten, a no so?

A ben o bun te ala opregtisma ben o teki ten fu prakseri san a boskopu fu den engel wani taki trutru, èn te den ben o du san den engel ben taki. Te sma ben o du dati, dan sani ben o waka moro bun na grontapu.

Den profeititori di abi fu du nanga a ten di Yesus ben o gebore, e gi den sma di Gado feni bun a dyaranti taki den o libi na ini vrede fu têgo. A no dati yu wani? Wi kan abi a dyaranti taki a tumusi moi profeiti boskopu fu vrede di den engel ben meki bekènti a neti di Yesus gebore, sa kon tru seiker. Aladi sma e taki na Kresnetiten taki vrede o de na grontapu, toku den no e bribi dati trutru. Ma wi kan abi a dyaranti taki vrede o de na grontapu fu têgo.

[Prenki na tapu bladzijde 7]

Wi kan tyari wisrefi leki Kresten ibri dei fu a yari èn wi musu du dati tu