Un masra, lespeki Krestes leki edeman, èn teki na eksempre fu en
„Krestes na a ede fu ibri man.”—1 KORENTESMA 11:3.
1, 2. (a) O ten yu ben o taki dati wan man na wan bun masra? (b) Fu san ede wi musu frustan taki na Gado seti a trowlibi?
OTEN yu ben o taki dati wan man na wan bun masra? Na te a koni noso te a tranga? Na te a e meki furu moni? Noso na te a e handri na wan lobi-ati fasi nanga en wefi nanga en pikin? Te wi e luku fa masra e handri nanga na osofamiri fu den, dan wi e si taki furu fu den no e handri bun, fu di den e meki a yeye fu grontapu nanga den denki fu libisma abi krakti na den tapu. Fu san ede? Nofo tron dati e kon fu di den no e lespeki, èn den no e teki den rai fu a Sma di seti a trowlibi, namku a Sma di ’teki a lebriki di a ben puru fu a man, fu meki wan uma; èn a tyari na uma go na a man’.—Genesis 2:21-24.
2 Yesus Krestes ben sori taki a Bijbel tori disi di e taki dati Gado seti a trowlibi, na wan tru tori fu di a ben taigi den sma di ben e krutu en: „Unu no leisi taki a sma di meki den na a bigin, meki den leki man nanga uma? Unu no leisi tu taki a ben taki: ’Dati meki wan man sa gowe libi en papa nanga mama èn a sa tan nanga en wefi, èn a man nanga en wefi sa de wán skin’? Sobun, den no de tu skin moro, ma wán skin. Fu dati ede, nowan sma musu prati san Gado poti na ondro wán tyatyari [namku a trowlibi]” (Mateyus 19:4-6). Fu taki en leti, a moro prenspari sani di o yepi wi fu abi wan bun trowlibi, na te wi e frustan taki na Gado seti a trowlibi, èn taki a wan-enkri fasi fa a trowlibi sa waka bun, na te wi e teki den rai di de fu feni na ini Gado Wortu, Bijbel.
A moro prenspari sani di e yepi wan man fu de wan bun masra
3, 4. (a) Fu san ede Yesus sabi bun furu fu a trowlibi? (b) Suma na a agersi wefi fu Yesus, èn fa masra musu handri nanga a wefi fu den?
3 Wan sani di kan yepi wan man fu de wan bun masra, na te a e ondrosuku san Yesus ben taki èn te a e handri neleki Yesus. Yesus sabi bun furu fu a trowlibi, fu di a ben de drape di Gado meki a fosi man nanga uma, èn di den tu sma disi trow. Yehovah Gado ben taigi Yesus: „Meki wi meki libisma leki wan prenki fu wisrefi” (Genesis 1:26). Iya, Gado ben e taki nanga a Sma di a meki bifo iniwan tra sma noso iniwan tra sani, èn a sma disi „tron wan tumusi bun wrokoman na en sei” (Odo 8:22-30). A sma disi „na a fosiwan fu ala sani di Gado meki”. En na „a bigin fu den sani di Gado meki”, èn a ben de srefi bifo Gado meki hemel nanga grontapu.—Kolosesma 1:15; Openbaring 3:14.
4 Bijbel e kari Yesus „a Pikin Skapu fu Gado”, èn na agersi fasi Yesus e prenki wan masra. Wan engel ben taki wan leisi: „Kon dya, mi o sori yu a trowmisi, a wefi fu a Pikin Skapu” (Yohanes 1:29; Openbaring 21:9). We, suma na a trowmisi, noso a wefi fu Yesus? „A wefi fu a Pikin Skapu” na den getrow bakaman fu Krestes di salfu nanga santa yeye, èn di sa tiri makandra nanga en na ini hemel (Openbaring 14:1, 3). Fu dati ede, a fasi fa Yesus handri nanga den disipel fu en di a ben de nanga den na grontapu, e sori masra fa fu handri nanga a wefi fu den.
5. Suma musu teki na eksempre fu Yesus?
5 Iya, Bijbel e sori wi taki Yesus na wan bun eksempre gi ala den bakaman fu en, fu di wi e leisi drape: „Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petrus 2:21). Ma Yesus na wan eksempre gi mansma spesrutu. Bijbel e taki: „Krestes na a ede fu ibri man; a man na a ede fu na uma, èn Gado na a ede fu Krestes” (1 Korentesma 11:3). Fu di Krestes na a ede fu mansma, meki masra musu teki na eksempre fu en. Fu dati ede, efu wi wani abi wan koloku osofamiri-libi, dan wi musu lespeki a gronprakseri di e sori taki ala sma abi wan edeman. Iya, masra musu handri na wan lobi-ati fasi nanga a wefi fu den, neleki fa Yesus e handri na wan lobi-ati fasi nanga na agersi uma fu en, namku den salfu disipel fu en.
San fu du te problema e kon na ini a trowlibi
6. Fa masra musu libi nanga a wefi fu den?
6 Na ini a disiten grontapu di lai nanga problema, masra spesrutu musu teki na eksempre fu Yesus fu di a ben abi pasensi, a ben lobi trawan, èn a ben e tan hori ensrefi na regtfardiki markitiki (2 Timoteyus 3:1-5). Te a abi fu du nanga na eksempre di Yesus gi wi, dan Bijbel e taki: „Un masra, na so un musu tan libi tu nanga un wefi na wan fasi di e sori taki unu abi sabi” (1 Petrus 3:7). Iya, te problema e kon na ini a trowlibi, dan masra musu sori taki den abi sabi, neleki fa Yesus ben sori dati te a ben kisi fu du nanga muilek situwâsi. Yesus kisi moro hebi tesi leki iniwan tra libisma, ma a ben sabi taki Satan, den ogri yeye fu Satan, nanga na ogri grontapu disi ben meki taki a kisi den tesi disi (Yohanes 14:30; Efeisesma 6:12). Noiti Yesus ben fruwondru taki a kisi tesi, èn fu dati ede trowpatna no musu fruwondru te den e kisi „banawtu na ini den libi”. Bijbel e warskow taki den sma di o trow kan fruwakti taki den o kisi a banawtu dati.—1 Korentesma 7:28.
7, 8. (a) San a wani taki dati wan masra e libi nanga en wefi na wan fasi di e sori taki a abi sabi? (b) Fu san ede wefi warti fu kisi grani?
7 Bijbel e taki dati masra musu libi nanga a wefi fu den ’na wan fasi di e sori taki den abi sabi, aladi den e gi na uma grani fu di a de wan moro swaki prapi’ (1 Petrus 3:7). Wan masra no musu basi en wefi na wan grofu fasi, soleki fa Bijbel e taki dati mansma ben o du, ma na presi fu dati, a musu gi en wefi grani efu a wani taki Gado feni en bun (Genesis 3:16). Wan masra musu handri nanga en wefi neleki a de wan diri gudu, èn noiti a masra musu gebroiki a krakti di a abi fu du a wefi fu en ogri, fu di a wefi swaki moro en. Na presi fu dati a sa hori den firi fu en wefi na prakseri, èn ala ten a sa handri nanga en na wan lespeki fasi èn na wan fasi di sa meki a firi taki a warti.
8 Fu san ede a fiti taki masra e gi grani na a wefi fu den? Bijbel e taki: „Bika unu nanga den o kisi libi fu Gado aladi unu no frudini dati, èn un musu du dati so taki nowan sani e tapu den begi fu unu” (1 Petrus 3:7). Masra musu frustan taki na ini Gado ai, wan mansma di e anbegi En, no prenspari moro leki wan umasma di e du a srefi. Umasma di Gado feni bun, sa kisi a srefi têgo libi di mansma o kisi, èn fu taki en leti, furu umasma sa libi na ini hemel, pe ’nowan difrenti de na mindri mansma nanga umasma’ (Galasiasma 3:28). Sobun, masra musu hori na prakseri taki a sani di e meki taki wan sma warti na ini Gado ai, na te a de getrow. A no abi trobi efu na wan mansma noso wan umasma, wan masra noso wan wefi, noso efu na wan pikin srefi.—1 Korentesma 4:2.
9. (a) Fu san ede masra musu gi grani na a wefi fu den, soleki fa Petrus e taki? (b) Fa Yesus sori lespeki gi umasma?
9 Na apostel Petrus e sori na a kaba fu 1 Petrus 3:7 fu san ede a de prenspari taki wan masra e gi grani na a wefi fu en. A musu du dati ’so taki nowan sani e tapu den begi fu en’. A no ben o bun kwetikweti te dati ben o pasa! A sani dati kan meki srefi taki Gado no e arki den begi fu en, neleki fa dati ben pasa nanga wan tu fositen futuboi fu Gado di ben trangayesi en (Kragisingi 3:43, 44). A de wan koni sani te Kresten man di trow èn sosrefi den wan di wani trow, e luku fa Yesus ben e handri nanga umasma, fu kon sabi fa den kan sori lespeki gi umasma. A ben feni en bun taki den ben e go makandra nanga en na ini a diniwroko fu en, èn a ben e sori switifasi nanga lespeki gi den. Wan leisi, Yesus meki umasma fosi kon sabi wan tumusi moi tru tori, èn a taigi den umasma fu fruteri den mansma a tori dati!—Mateyus 28:1, 8-10; Lukas 8:1-3.
Wan eksempre spesrutu gi masra
10, 11. (a) Fu san ede masra spesrutu musu ondrosuku na eksempre fu Yesus? (b) Fa masra musu sori lobi gi a wefi fu den?
10 Soleki fa wi si kaba, dan Bijbel e agersi a banti di wan masra nanga wan wefi abi, nanga a banti di Krestes nanga a „trowmisi” fu en abi, èn a trowmisi dati na a gemeente fu salfu bakaman fu en. Bijbel e taki: „Wan masra na a ede fu en wefi, neleki fa Krestes na a ede tu fu a gemeente” (Efeisesma 5:23). Den wortu disi musu gi masra a deki-ati fu ondrosuku fa Yesus ben e tiri den bakaman fu en. Soso te masra e ondrosuku a sani disi, den sa man teki na eksempre fu Yesus, èn den sa man tiri a wefi fu den, den sa man sori lobi gi en, èn den sa man sorgu gi en neleki fa Yesus ben du dati nanga a gemeente fu en.
11 Bijbel e gi Kresten a rai disi: „Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente” (Efeisesma 5:25). Na ini kapitel fo fu Efeisesma, Bijbel e kari „a gemeente” „a skin fu Krestes”. Na agersi skin disi abi furu memre, namku memre fu mansma èn fu umasma, èn den alamala e yepi fu meki a skin wroko bun. A no de fu taki dati Yesus na ’a ede fu a skin, namku a gemeente’.—Efeisesma 4:12; Kolosesma 1:18; 1 Korentesma 12:12, 13, 27.
12. Na sortu fasi Yesus ben e sori lobi gi na agersi skin fu en?
12 Yesus ben sori lobi gi na agersi skin fu en, namku „a gemeente”, èn dati ben de fu si spesrutu na a lobi-ati fasi fa a sorgu gi den wan di ben o tron memre fu a gemeente. Fu eksempre, di den disipel fu en ben weri, dan a taigi den: „Kon, meki wi wawan go na wan tiri presi fu kan rostu pikinso” (Markus 6:31). Wán fu den apostel fu Yesus ben skrifi san Yesus ben du wan tu yuru bifo sma kiri en: „Yesus . . . ben lobi den sma fu en [namku den memre fu na agersi skin fu en] . . . te na a kaba” (Yohanes 13:1). Yesus e gi masra wan heri moi eksempre fa den musu handri nanga a wefi fu den!
13. Fa masra musu lobi a wefi fu den?
13 Na apostel Paulus ben e taki moro fara fu na eksempre di Yesus ben gi masra, èn a gi den a rai disi: „Masra musu lobi den wefi leki den eigi skin. A man di lobi en wefi, lobi ensrefi tu, bika nowan man abi bita-ati gi en eigi skin; ma a e sorgu a skin èn a e luku en bun, neleki fa Krestes e du nanga a gemeente.” Paulus e taki moro fara: „Meki ibriwan fu unu sosrefi lobi en wefi leki fa a lobi ensrefi.”—Efeisesma 5:28, 29, 33.
14. Fa wan masra e handri nanga en eigi sondu skin, èn fa a musu handri nanga a wefi fu en?
14 Prakseri den sani di Paulus taki. Wan man di bun na en frustan oiti o gi ensrefi mankeri fu espresi? Te wan man misi fu fadon fu di a stotu en futu, dan a no e naki a futu fu di a e atibron, a no so? Nôno, kwetikweti! Wan masra e kosi ensrefi na fesi den mati fu en, noso a e fruteri trawan fu en eigi swakifasi? Nôno! We, dan fu san ede wan masra ben o kosi, noso fon a wefi fu en, te a wefi meki wan fowtu? Masra no musu suku den eigi bun nomo, ma sosrefi a di fu a wefi fu den.—1 Korentesma 10:24; 13:5.
15. (a) Fa Yesus ben handri di den disipel fu en no du san a ben fruwakti fu den? (b) San wi kan leri fu na eksempre fu Yesus?
15 Poti prakseri na a fasi fa Yesus sori taki a e broko en ede nanga den disipel fu en a neti bifo a dede, di den no du san a ben fruwakti fu den. Aladi Yesus ben aksi den ibri tron baka fu begi, toku den fadon na sribi dri leisi na ini a dyari fu Getseimanei. Wantronso, wan grupu man di ben abi fetisani na den, lontu den. Yesus aksi den man: „Suma unu e suku?” Di den man piki en taki na „Yesus fu Nasaret” den e suku, dan Yesus taigi den: „Na mi.” Fu di Yesus ben sabi taki ’a ten ben doro’ taki a ben o dede, meki a taki: „Fu dati ede, efu na mi unu e suku, dan meki den wan disi gowe.” Ala ten Yesus ben e suku a bun fu den disipel fu en, di de wan pisi fu na agersi trowmisi fu en, èn a ben e suku fasi fu sorgu taki ogri no miti den. Te masra e ondrosuku a fasi fa Yesus ben e handri nanga den disipel fu en, dan den sa feni furu gronprakseri di sa leri den fa den musu handri nanga a wefi fu den.—Yohanes 18:1-9; Markus 14:34-37, 41.
Yesus no ben e tapu en ai gi sani di no fiti
16. Fa Yesus ben denki fu Marta, ma sortu piri-ai a gi en?
16 Bijbel e taki: „Yesus ben lobi Marta, nanga en sisa, nanga Lasarus”, èn den sma disi ben gwenti kari en kon na a oso fu den (Yohanes 11:5). Ma toku dati no tapu Yesus fu gi Marta rai, di Marta ben e poti tumusi furu prakseri na a nyanyan di a ben e sreka, fu di a sani dati ben e meki taki Marta no ben abi nofo ten fu arki den moi rai fu Yesus. Yesus ben taigi en: „Marta, Marta, yu e broko yu ede nanga furu sani èn yu e meki furu sani bruya yu. Ma wan tu sani nomo de fanowdu, iya, wán sani nomo” (Lukas 10:41, 42). A no de fu taki dati na fu di Marta ben sabi taki Yesus lobi en, meki a ben makriki gi en fu teki a rai fu Yesus. Masra musu sori switifasi nanga lobi tu gi a wefi fu den, èn den musu taki nanga den na wan fasi di fiti. Ma te a de fanowdu taki wan masra gi a wefi fu en piri-ai, dan neleki Yesus, a no musu frede fu du dati.
17, 18. (a) Na sortu fasi Petrus piri-ai gi Yesus, èn fu san ede Petrus ben musu kisi piri-ai? (b) Sortu frantwortu wan masra abi?
17 Wan tra leisi, Yesus taigi den apostel fu en taki a ben musu go na Yerusalem pe ’den owru man nanga den edeman fu den priester nanga den leriman fu Wet ben o frufolgu en èn kiri en, ma taki a ben o kisi wan opobaka na a di fu dri dei’. Di Petrus yere a sani disi, dan a tyari Yesus go na wan sei èn a bigin piri-ai gi en na a fasi disi: „Masra, sorgu bun gi yusrefi; a sani disi no o miti yu kwetikweti.” A de krin fu si taki Petrus no ben sabi moro san de prenspari trutru. Petrus ben musu kisi piri-ai. Sobun, Yesus taigi en: „Komoto na mi tapu, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki.”—Mateyus 16:21-23.
18 Syatu bifo dati ben pasa, Yesus ben taki san Gado ben wani en fu du, namku taki a ben musu nyan furu pina èn taki sma musu kiri en (Psalm 16:10; Yesaya 53:12). Sobun, Petrus no ben du bun di a bigin piri-ai gi Yesus. Iya, a ben de fanowdu taki Petrus kisi seryusu piri-ai, neleki fa wi alamala musu kisi dati ten na ten. Leki na ede fu na osofamiri, a masra abi a frantwortu èn a reti fu piri-ai gi den memre fu na osofamiri, èn sosrefi gi a wefi fu en. Aladi a de fanowdu fu gi seryusu piri-ai, toku masra musu du dati na wan switi fasi èn na wan lobi-ati fasi. Sobun, neleki fa Yesus ben yepi Petrus fu kon kisi wan yoisti denki fu sani, na so a kan de fanowdu son leisi taki masra e du a srefi nanga a wefi fu den. Fu eksempre, a kan de fanowdu taki wan masra e sori en wefi na wan switi fasi fu san ede a musu tyari wan kenki kon, te a e si taki den krosi noso den moimoi sani di a wefi e weri, noso a fasi fa a e moi ensrefi, safrisafri no e kruderi moro nanga a rai di Bijbel e gi.—1 Petrus 3:3-5.
A bun te masra abi pasensi
19, 20. (a) Sortu problema ben kon de na mindri den apostel fu Yesus, èn san Yesus du fu lusu a problema dati? (b) Sortu bakapisi Yesus ben abi di a meki muiti fu yepi den apostel fu en?
19 Efu wan memre fu na osofamiri meki wan fowtu èn a masra musu poti prakseri na dati, dan a no musu fruwakti taki na opregti muiti di a du fu tyari wan kenki kon na ini a situwâsi, o abi bun bakapisi wantewante. Yesus ben musu meki muiti ibri tron baka fu tyari wan kenki kon na ini a denki fu den apostel fu en. Fu eksempre, den apostel bigin strei nanga makandra, èn dati kon na krin agen na a kaba fu Yesus en diniwroko. Den ben e haritaki nanga makandra suma fu den na a moro bigiwan (Markus 9:33-37; 10:35-45). A no langa baka a di fu tu leisi di so wan sani ben pasa, Yesus seti sani fu hori a lasti Paskafesa makandra nanga den wawan. Na a okasi dati, nowan fu den meki a muiti fu du a sani di sma fu a ten dati ben e si leki wan lagi wroko. Iya, nowan fu den no wasi den doti futu fu den tra apostel. Na Yesus du a wroko dati. Baka dati Yesus taki: „Mi gi unu na eksempre.”—Yohanes 13:2-15.
20 Te masra abi sakafasi neleki Yesus, dan nofo tron a wefi fu den sa wroko makandra nanga den èn a sa horibaka gi den. Ma a de fanowdu fu abi pasensi. Moro lati a srefi neti dati fu a Paskafesa, den apostel ben e haritaki baka nanga makandra sortuwan fu den na a moro bigiwan (Lukas 22:24). Nofo tron wan heri pisi ten e pasa fosi sma kenki a fasi fa den e denki èn e tyari densrefi, èn a sani disi e pasa safrisafri. Ma a e gi prisiri te wan sma e tyari den kenki disi kon, neleki fa den apostel ben du dati!
21. San masra musu hori na prakseri èn san den musu du te problema e opo kon na ini a trowlibi?
21 Na ini a ten disi, a de so moro leki oiti bifo taki bigi problema de na ini a trowlibi. Furu sma no e si en leki wan seryusu sani moro fu hori densrefi na a pramisi di den meki fu tan getrow na a trowpatna fu den. Fu dati ede, masra, un musu hori na prakseri suma seti a trowlibi. Hori na prakseri taki na wi lobi-ati Gado Yehovah, seti a trowlibi. A gi en Manpikin, Yesus, fu de wi Frulusuman, èn sosrefi wan eksempre gi masra.—Mateyus 20:28; Yohanes 3:29; 1 Petrus 2:21.
San yu ben sa piki?
• Fu san ede a de prenspari fu sabi suma seti a trowlibi?
• Sortu rai masra e kisi te a abi fu du nanga a lobi di den musu lobi a wefi fu den?
• Fa a fasi fa Yesus ben e handri nanga den disipel fu en, e yepi masra fu kon sabi fa den musu handri leki edeman fu na osofamiri?
[Prenki na tapu bladzijde 14]
Fu san ede masra musu ondrosuku fa Yesus ben e handri nanga umasma?
[Prenki na tapu bladzijde 15]
Te den disipel fu Yesus ben weri, dan a ben e hori den na prakseri
[Prenki na tapu bladzijde 16]
Masra musu gi a wefi fu den rai na wan switi fasi èn na wan fasi di fiti