Gado e kon na a fosi presi na ini joe osofamiri?
„Joe moesoe lobi Jehovah, joe Gado nanga joe heri ati.” — MARKUS 12:29, 30.
1. O prenspari a de taki wi lobi Jehovah?
„SORTOE komando na a fosiwan foe alamala?”, wan leriman foe Wet ben aksi Jesus. Na presi taki Jesus ben taki fa ensrefi e prakseri foe a tori, a ben piki na aksi foe a man nanga den wortoe foe Gado na Deuteronomium 6:4, 5. Jesus ben piki: „A fosiwan na: ’Jere O Israèl, Jehovah wi Gado na wán Jehovah, èn joe moesoe lobi Jehovah, joe Gado nanga joe heri ati èn nanga joe heri sili èn nanga joe heri froestan èn nanga joe heri krakti.’” — Markus 12:28-30.
2. (a) Na sortoe gens Jesus ben tanapoe na fesi? (b) San kan meki taki son tron a de moeilek foe plisi Jehovah?
2 Foe gi jesi na san Jesus ben kari a fosi komando — a moro prenspari wan — e aksi foe wi taki ala ten wi e doe san e plisi Jehovah. Jesus ben doe dati, ala di na wan okasi na apostel Petrus ben sori taki a no ben agri nanga a pasi foe Jesus, èn na wan tra okasi den eigi krosibei famiri foe en ben doe dati toe (Mateus 16:21-23; Markus 3:21; Johanes 8:29). San joe sa doe efoe joe de na ini wan srefi sortoe situwâsi? Kon meki wi taki dati den memre foe joe osofamiri wani foe joe tapoe nanga joe bijbelstudie èn tapoe foe abi demakandra nanga Jehovah Kotoigi. Joe sa poti Gado na a fosi presi foe di joe e doe sani di e plisi en? Gado e kon na a fosi presi, ala di memre foe na osofamiri kande e gens den moeiti di joe e doe foe dini en?
A trapoe foe a gens di na osofamiri e gens
3. (a) San kan de den bakapisi foe den leri foe Jesus gi na osofamiri? (b) Fa den memre foe na osofamiri kan sori gi soema den abi moro foeroe lobi?
3 Jesus no ben taki dati den problema no ben sa hebi te tra memre na ini na osofamiri e gens wan memre di e teki den sani di Jesus e leri. „Den feanti foe wan sma sa de sma foe en eigi osofamiri”, Jesus ben taki. Ma ala di a sari bakapisi dati sa de, Jesus ben sori soema ben moesoe kon na a fosi presi: „A sma di abi moro bigi lobi gi papa noso mama leki gi mi, no warti gi mi; èn a sma di abi moro bigi lobi gi manpikin noso oemapikin leki gi mi, no warti gi mi” (Mateus 10:34-37). Wi e poti Jehovah Gado na a fosi presi te wi e waka na baka den leri foe en Manpikin Jesus Krestes, di de „a soifri prenki foe a de di [Gado] de wan sma”. — Hebrewsma 1:3; Johanes 14:9.
4. (a) Sortoe sani abi foe doe nanga a de di wan sma de wan bakaman foe Jesus, soleki fa a ben taki? (b) Na sortoe fasi kresten no moesoe wani si den memre foe den osofamiri na ai?
4 Na wan tra okasi di Jesus ben abi wan takimakandra foe san a wani taki troetroe foe de wan troe bakaman foe en, a ben taki: „Efoe wan sma e kon na mi sondro foe a no wani si en papa nanga mama nanga wefi nanga pikin nanga brada nanga sisa, na ai, ija, èn srefi en eigi sili, dan a no kan de mi disipel” (Lukas 14:26). A de krin taki Jesus no ben wani taki dati den bakaman foe en troetroe no ben moesoe wani si den memre foe den osofamiri na ai, foe di a ben komanderi den sma foe lobi srefi den feanti foe den (Mateus 5:44). Na presi foe dati, djaso Jesus ben wani taki dati den bakaman foe en moesoe lobi den memre foe na osofamiri moro mendri leki fa den moesoe lobi Gado. (Teki gersi Mateus 6:24.) Akroederi a fasi dati fa wi e froestan disi, bijbel e taki dati Jakob „no ben wani si [Lea] na ai” èn taki a ben lobi Rakel, san ben wani taki dati a no ben lobi Lea someni leki fa a ben lobi en sisa Rakel (Genesis 29:30-32). Srefi wi eigi „sili”, noso libi, Jesus ben taki dati wi no moesoe wani si dati na ai, noso foe lobi dati moro mendri leki Jehovah!
5. Fa Satan e proeberi na wan koni fasi foe pori na osofamiri seti?
5 Leki Mekiman nanga a Sma di e gi libi, Jehovah abi a reti taki ala den foetoeboi foe en e gi densrefi abra na en krinkrin (Openbaring 4:11). „Mi e beni mi kindi gi a Tata”, na apostel Paulus ben skrifi, „na soema ibri famiri na hemel èn na grontapoe kisi en nen” (Efeisesma 3:14, 15). Jehovah ben meki a seti foe na osofamiri na so wan moi fasi taki den memre foe na osofamiri abi natuurlijk firi foe lobi gi makandra (1 Kownoe 3:25, 26; 1 Tesalonikasma 2:7). Ma Satan Didibri e proeberi na wan koni fasi foe meki wan fowtoe gebroiki foe a natuurlijk firi foe lobi di de na ini na osofamiri, san wani taki toe na angri foe plisi den lobiwan. A e wiki a faja gi a gens na famiri sei, èn foeroe sma e feni en wan tjalensi foe tanapoe kánkan gi den bijbel waarheid te famiri e gens den. — Openbaring 12:9, 12.
Kakafoetoe nanga boen bakapisi gi a tjalensi
6, 7. (a) Fa den memre foe na osofamiri kan kisi jepi foe froestan o prenspari bijbelstudie nanga den kresten demakandra de? (b) Fa wi kan sori taki wi lobi den osofamiri memre foe wi troetroe?
6 San joe sa doe efoe sma e dwengi joe foe teki wan bosroiti na mindri a plisi di joe e plisi Gado noso a plisi di joe e plisi wan memre foe na osofamiri? Joe sa denki taki Gado no e froewakti taki wi e studeri en Wortoe èn taki wi e gebroiki den gronprakseri foe en efoe dati e meki trobi kon na ini na osofamiri? Ma prakseri foe disi. Efoe joe e gi lasi èn e tapoe foe studeri bijbel noso foe abi demakandra nanga den Jehovah Kotoigi, dan fa oiti den lobiwan foe joe o froestan taki a soifri sabi foe bijbel na wan sani foe libi noso dede? — Johanes 17:3; 2 Tesalonikasma 1:6-8.
7 Wi kan agersi a situwâsi so: Kande wan memre foe na osofamiri abi wan angri pasa marki gi sopi. A ben sa tjari troetroe wini kon gi en efoe joe no ben sa poti prakseri na tapoe a sopi problema foe en noso doe neleki a problema no de? A ben sa moro boen foe hori a vrede foe di joe e libi a sani leki fa a de èn no doe wan sani na a problema? Nôno, kande joe e agri taki a ben sa moro boen foe proeberi foe jepi en foe wini a sopi problema disi, srefi efoe a wani taki dati joe moesoe hori tranga teige na atibron èn a tapoe di a e tapoe skreki gi joe (Odo 29:25). Na so a de toe, efoe troetroe joe lobi den memre foe joe osofamiri, dan joe no sa gi lasi na den moeiti di den e doe foe tapoe joe foe studeri bijbel (Tori foe den Apostel 5:29). Soso te joe e tanapoe kánkan, joe kan jepi den foe froestan taki efoe den e libi akroederi den leri foe Krestes, dan dati wani taki a libi foe wi.
8. Fa wi e kisi wini foe a troetori taki Jesus ben doe Gado wani na wan getrow fasi?
8 Son tron a kan moeilek srefisrefi foe poti Gado na a fosi presi. Ma hori na prakseri, taki Satan ben meki en moeilek toe gi Jesus foe doe a wani foe Gado. Ma tokoe Jesus ben horidoro; a ben froedrage srefi a pen di a ben kisi na a pina-oedoe foe wi ede. „Jesus Krestes [na] wi Froeloesoeman”, bijbel e taki. „A dede gi wi” (Titus 3:6; 1 Tesalonikasma 5:10). Wi no de grantangi taki Jesus no ben gi lasi na a gens? Bika a dede wan ofrandi dede, meki wi abi a froewakti foe libi foe têgo na ini wan vrede njoen grontapoe foe regtfardikifasi, efoe wi e sori bribi na ini a broedoe foe en di a trowe. — Johanes 3:16, 36; Openbaring 21:3, 4.
Kande wan bigi pai
9. (a) Fa kresten kan abi wan prati foe froeloesoe tra sma? (b) San ben de a situwaŝi foe Timoteus en osofamiri?
9 Joe ben froestan taki joe toe kan abi wan prati foe froeloesoe tra sma, so srefi den famiri foe joe di joe lobi srefisrefi? Na apostel Paulus ben gi Timoteus tranga: „Tan na den sani disi [di joe ben leri], bikasi efoe joe e doe disi, dan joe sa froeloesoe joesrefi nanga den wan di e arki joe” (1 Timoteus 4:16). Timoteus ben libi na ini wan osofamiri di ben prati, en Griki papa no ben de na bribi (Tori foe den Apostel 16:1; 2 Timoteus 1:5; 3:14). Ala di wi no sabi efoe Timoteus papa ben tron wan sma di ben de na bribi, tokoe na okasi gi dati ben opo moro bigi nanga jepi foe a getrow fasi fa en wefi, Eunice, nanga Timoteus ben tjari densrefi.
10. San kresten kan doe gi a boen foe den patna foe den di no de na bribi?
10 Den Boekoe foe bijbel e tjari kon na krin taki masra nanga wefi di e hori tranga na bijbel waarheid, kan jepi foe froeloesoe den patna foe den di no de kresten foe di den e jepi den foe tron sma di de na bribi. Na apostel Paulus ben skrifi: „Efoe wan brada abi wan wefi di no de na bribi, èn tokoe a [wefi] e agri foe libi nanga en, no meki a gowe libi en [wefi]; èn efoe wan oema di abi wan masra di no de na bribi, èn tokoe a [masra] e agri foe libi nanga en, no meki a gowe libi a masra foe en. Bikasi, wefi, fa joe doe sabi efoe joe sa froeloesoe joe masra? Noso, masra, fa joe doe sabi efoe joe sa froeloesoe joe wefi?” (1 Korentesma 7:12, 13, 16) Na apostel Petrus ben taki fa wefi kan froeloesoe den masra foe den, èn a ben gi tranga: „Saka oensrefi na oen masra ondro, so taki efoe iniwan foe den no e gi jesi na a wortoe, kande oenoe kan wini den sondro wan wortoe nanga jepi foe a fasi fa den wefi foe den e tjari densrefi.” — 1 Petrus 3:1.
11, 12. (a) Sortoe pai doesoendoesoen kresten ben kisi, èn san den ben doe foe kisi dati? (b) Froeteri wan eksempre foe wan osofamiri memre di ben kisi pai foe di a ben horidoro na wan getrow fasi.
11 Na ini den jari di pasa no so langa ete, foeroe doesoendoesoen sma kon tron Jehovah Kotoigi baka di foeroe moen èn srefi foeroe jari langa den ben gens a kresten wroko foe den famiri foe den di ben de Kotoigi. Disi na wan pai srefisrefi gi den kresten di tan kánkan, èn na wan bigi blesi gi den wan di ben de gensman wan ten! Nanga dipi firi na ini en sten, wan kresten owroeman foe 74 jari ben froeteri: „Foeroe tron mi e taigi mi wefi nanga den pikin foe mi tangi foe di den tan na waarheid na ini den jari di mi ben gens den.” A ben taki dati dri jari langa a ben tan weigri srefi foe meki en wefi taki nanga en foe bijbel. „Ma a ben gebroiki wan ten pe kande mi ben sa wani arki”, a ben taki, „èn ben bigin gi mi kotoigi ala di a ben wrifi mi foetoe. Mi de nanga tangi srefisrefi taki a no ben gi lasi na a gens di mi ben gens en!”
12 Wan tra masra di ben gens en osofamiri ben skrifi: ’Mi ben de a moro ogri feanti foe mi wefi, bikasi baka di a teki a waarheid, mi ben tapoe skreki gi en, èn ibri dei wi ben abi kesekese; foe taki en leti, na mi ben bigin a kesekese. Ma a ben de foe soso; mi wefi ben tan na bijbel. Na so mi ben feti twarfoe jari langa na wan ogri-atifasi teige a waarheid èn teige mi wefi nanga mi pikin. Gi den ala toe, mi ben de Didibri srefi.’ Te foe kaba, a man ben bigin odrosoekoe en libi. ’Mi ben si o ogri mi ben de’, a ben froeklari. ’Mi ben leisi bijbel, èn tangi foe den leri foe en mi de wan dopoe Kotoigi now.’ Prakseri foe a bigi pai di a wefi kisi, ija, a ben jepi foe ’froeloesoe en masra’, foe di a ben tan getrow e horidoro 12 jari, ala di a masra ben gens en!
Leri foe Jesus
13. (a) San na a moro prenspari sani di masra nanga wefi moesoe leri foe a fasi fa Jesus ben libi? (b) Fa den sma di e feni en moeilek foe saka densrefi na ondro a wani foe Gado, sa abi winimarki foe na eksempre foe Jesus?
13 A moro prenspari sani di masra nanga wefi moesoe leri foe a libi foe Jesus na taki a ben gi jesi na Gado. „Ala ten mi e doe den sani di e plisi en”, Jesus ben taki. „Mi no e soekoe mi eigi wani, ma a wani foe en di seni mi” (Johanes 5:30; 8:29). Srefi di Jesus no ben lobi wan spesroetoe afersi foe a wani foe Gado wan leisi, tokoe a ben gi jesi. „Efoe joe wani, teki a beker disi poeroe na mi”, a ben begi. Ma esi-esi a ben taki baka dati: „Ma tokoe, no meki mi wani, ma joe wani feni presi” (Lukas 22:42). Jesus no ben aksi Gado foe kenki En wani; a ben sori taki a ben lobi Gado troetroe, nanga a gi di a ben gi jesi na ala sani di Gado ben wani gi en, na wan fasi foe saka ensrefi na Gado ondro (1 Johanes 5:3). Foe sma poti a wani foe Gado ala ten na a fosi presi, soleki fa Jesus ben doe, de toemoesi prenspari foe kisi boen bakapisi, no soso gi den sma di de den wawan foe di den no trow ete, ma so srefi gi den sma di trow èn di abi wan osofamiri-libi. Loekoe foe san ede disi de so.
14. Fa son kresten e denki na wan fowtoe fasi?
14 Soleki fa wi ben si kaba, te sma di de na bribi e poti Gado na a fosi presi, dan den e proeberi foe tan nanga den patna foe den di no de na bribi èn foeroe tron den man foe jepi den foe kon warti foe kisi froeloesoe. Srefi te ala toe patna de na bribi, a trowlibi foe den no abi foe de wan toemoesi boen libi. Bikasi foe den sondoe ede, masra nanga wefi no abi lobi prakseri gi makandra ala ten (Romesma 7:19, 20; 1 Korentesma 7:28). Son wan e go so fara srefi taki den e soekoe wan tra patna, ala di den no abi no wan gron foe broko trow di de akroederi den Boekoe foe bijbel (Mateus 19:9; Hebrewsma 13:4). Den e prakseri taki disi moro boen gi den èn taki a wani di Gado wani taki masra nanga wefi moesoe tan makandra, moeilek toemoesi (Maleaki 2:16; Mateus 19:5, 6). Sondro tweifri, disi na wan tra fasi foe denki na wan libisma fasi, na presi foe denki na a fasi fa Gado e denki.
15. Foe san ede a de wan kibri foe poti Gado na a fosi presi?
15 A e gi kibri srefisrefi foe poti Gado na a fosi presi! Trowpaar di e doe disi, sa proeberi foe tan na makandra èn foe loesoe den problema foe den nanga jepi foe a gebroiki di den sa gebroiki a rai foe Gado Wortoe. Foe dati ede, den no abi no wan pen di e kon te den no e gi jesi na a wani foe en (Psalm 19:7-11). Wan jongoe paar ben sori taki disi de so di den ben de foe broko a trow, ma den ben bosroiti foe gebroiki a rai foe bijbel. Foeroe jari na baka, di a wefi ben taki foe a prisiri di a ben abi na ini en trowlibi, a ben taki: „Mi moesoe sidon èn krei te mi e prakseri taki a ben kan dati mi ben sa kan abi foe libi aparti foe mi masra ala den jari disi. Dan mi e begi Jehovah Gado èn e taigi en tangi gi a rai nanga a tiri foe en di ben tjari wi kon makandra na ini so wan kolokoe matifasi.”
Masra, wefi — waka na baka Krestes!
16. Sortoe eksempre Jesus ben poti gi masra nanga wefi?
16 Jesus, di ala ten ben poti Gado na a fosi presi, ben gi wan toemoesi moi eksempre na masra nanga wefi, èn a ben sa de wan boen sani efoe den e poti finifini prakseri na tapoe dati. Masra e kisi tranga foe waka baka a fasi fa Jesus ben gebroiki a makti foe en leki edeman na tapoe den memre foe a kresten gemeente na wan switi fasi (Efeisesma 5:23). Èn kresten wefi kan leri foe Jesus volmaakti eksempre foe wan sma di e saka ensrefi na Gado ondro. — 1 Korentesma 11:3.
17, 18. Na sortoe fasi Jesus ben poti wan toemoesi boen eksempre gi den masra?
17 Bijbel e gi a komando: „Masra, tan lobi joe wefi, neleki fa Krestes ben lobi a gemeente toe èn ben gi ensrefi abra gi en” (Efeisesma 5:25). Wan prenspari fasi fa Jesus ben sori lobi gi a gemeente foe den bakaman foe en, ben de foe di a ben de den krosibei mati. „Mi kari oenoe mati”, Jesus ben taki, „bika ala den sani di mi jere foe mi Tata, mi meki oenoe kon sabi dati” (Johanes 15:15). Prakseri foe a heri ten di Jesus ben de nanga den disipel e taki nanga den — den boen foeroe takimakandra di a ben abi nanga den — èn foe a froetrow di a ben poti na ini den! Dati a no wan heri boen eksempre gi masra?
18 Jesus ben abi troetroe belangstelling gi den disipel foe en èn a ben abi wan troetroe lobi gi den (Johanes 13:1). Te den no ben froestan den leri foe en so boen, dan nanga pasensi a ben teki ten poti na wan sei foe tjari sani kon na krin gi den (Mateus 13:36-43). Masra, a gosontoe na jejefasi foe a wefi foe oenoe, de prenspari gi oenoe? Joe e teki ten foe de nanga en, foe sorgoe taki en nanga joe abi den waarheid foe bijbel krinkrin na ini oen froestan nanga oen ati? Jesus ben go nanga den apostel foe en na ini a diniwroko, èn kande a ben leri ibri wan foe den aparti. Joe e go nanga joe wefi na ini a diniwroko e teki prati na a oso-foe-oso wroko èn foe hori bijbelstudie?
19. Fa a fasi fa Jesus ben handri nanga den swakifasi di e kon ibri tron baka foe den apostel, de wan eksempre gi den masra?
19 Spesroetoe na a fasi fa Jesus ben handri nanga den onvolmaaktifasi foe den apostel foe en, a ben poti wan heri boen eksempre gi masra. Na a lasti njanjan nanga den apostel foe en, a ben man si wan fasi foe strei di ben kon ibri tron kaba. A ben kroetoe den na wan grofoe fasi? Nôno, ma nanga sakafasi a wasi den foetoe foe ibri wan foe den (Markus 9:33-37; 10:35-45; Johanes 13:2-17). Joe abi so wan pasensi nanga joe wefi? Na presi foe kragi foe wan swakifasi di e kon ibri tron baka, joe e proeberi nanga pasensi foe jepi en èn foe doro en ati nanga na eksempre foe joe? Wefi sa handri na tapoe so wan sari-atifasi di joe e sori nanga lobi, soleki fa a ben de nanga den apostel bakaten.
20. San kresten wefi noiti no moesoe frigiti, èn soema de leki wan eksempre gi den?
20 Wefi toe moesoe poti prakseri na tapoe Jesus, di noiti ben frigiti taki „na edeman foe a Krestes na Gado”. Ala ten a ben saka ensrefi na en hemel Tata ondro. Na so a de toe, taki wefi no moesoe frigiti taki „na edeman foe na oema na a man”, ija, taki a masra foe den na a edeman foe den (1 Korentesma 11:3; Efeisesma 5:23). Na apostel Petrus ben gi kresten wefi tranga foe loekoe na eksempre foe „santa oemasma” foe fositen, spesroetoe di foe Sara, di „ben abi a gwenti foe gi jesi na Abraham, e kari en ’masra’”. —1 Petrus 3:5, 6.
21. Foe san ede a trowlibi foe Abraham nanga Sara ben waka boen, ma foe san ede a di foe Lot nanga en wefi no ben waka boen?
21 Soleki fa a sori, dan Sara ben gowe libi wan boen oso di ben de na wan goedoe foto, foe go libi na ini tenti na wan freimde kondre. Foe san ede? A ben de foe di a ben froekisi foe libi na a fasi dati? Nôno. A ben de foe di en masra ben aksi en foe go? Sondro tweifri disi ben de wan reide, bika Sara ben lobi Abraham èn ben lespeki en foe den eigifasi foe en di Gado lobi (Genesis 18:12). Ma a moro prenspari reide foe san ede a ben go, ben de a lobi di a ben abi gi Jehovah nanga na opregti angri di a ben angri foe waka na baka a tiri foe Gado (Genesis 12:1). A ben feni en wan prisiri foe gi jesi na Gado. A wefi foe Lot na a tra sei, ben draidrai foe doe a wani foe Gado èn foe dati ede a ben drai loekoe go baka na den sani di a ben libi na baka na Sodom, a foto pe a ben tan (Genesis 19:15, 25, 26; Lukas 17:32). A ben de wan takroe kaba srefisrefi di ben kon na a trowlibi dati — èn dati ben de soso foe di na oema no ben gi jesi na Gado!
22. (a) Na sortoe fasi osofamiri memre sa ondrosoekoe densrefi na wan koni fasi? (b) San wi sa go loekoe na ini a tra studie?
22 So boen, leki wan masra noso wan wefi, a de toemoesi prenspari foe aksi joesrefi: ’Gado e kon na a fosi presi na ini wi osofamiri? Mi e doe troetroe moeiti foe doe a ròl di Gado gi mi na ini na osofamiri? Mi e doe troetroe moeiti foe lobi mi patna èn foe jepi en foe kisi wan boen matifasi nanga Jehovah noso foe tan hori na dati?’ Na ini moro foeroe osofamiri, pikin de toe. Now wi sa go loekoe a ròl foe den papa nanga mama èn taki a de fanowdoe gi den èn gi den pikin foe den foe poti Gado na a fosi presi na ini den libi.
Joe e memre disi?
◻ San kan de den bakapisi foe den leri foe Jesus gi foeroe osofamiri?
◻ Sortoe pai doesoendoesoen kresten di ben tanapoe kánkan ben kisi?
◻ San sa jepi trowpatna foe no doe hoeroedoe èn foe no broko trow?
◻ San den masra kan leri foe na eksempre foe Jesus?
◻ Fa den wefi kan jepi foe kisi wan kolokoe trowlibi?
[Prenki na tapoe bladzijde 8]
Fa Sara ben jepi foe meki a trowlibi foe en waka boen?