Wan grontapoe sondro orlokoe — O ten?

A MAMAWET tapoe san a Verenigde Nâsi abi en fondamenti, ben kisi krakti tapoe 24 oktober 1945. A de a moro bigi plan foe grontapoe vrede di libisma ben meki oiti. Nanga den 51 kondre di ben de den fosi memre foe en, a Verenigde Nâsi ben tron a moro bigi internationaal organisâsi na ini a historia foe grontapoe. So srefi, a ben de troetroe a fosi leisi taki wan internationaal organisâsi ben sa gebroiki wan legre di e sorgoe taki vrede nanga seikerfasi sa tan èn foe tjari wan grontapoe sondro orlokoe kon.

Nojaso, a Verenigde Nâsi nanga 185 kondre leki memre, tranga moro leki noiti ete. Foe san ede dan, a moro makti internatonaal organisâsi na ini a historia no man doro den toemoesi boen marki foe en?

Relisi — Wan bigi gens

Wan bigi problema de a ròl di relisi e prei ini grontapoe afersi. A de troe, taki den moro bigi relisi foe grontapoe pramisi foe horibaka gi na organisâsi dati, sensi biginbigin. Di a ben e sori go na a di foe 50 jari foe a Verenigde Nâsi, Paus Johanes Paulus II ben e taki foe a Verenigde Nâsi leki „a moro boen wrokosani foe meki vrede go na fesi èn foe sorgoe taki vrede tan”. Relisi fesiman foe a heri grontapoe libimakandra e si a sani a srefi fasi leki en. Ma, a koni fasi disi di relisi nanga tirimakti e gebroiki foe wroko makandra, no kan kibri a de di relisi de wan gens nanga wan hebi gi a Verenigde Nâsi.

Hondrohondro jari kaba, relisi prei wan prenspari ròl foe soetoe faja noso horibaka gi orlokoe, gi a si di sma no wani si trawan na ai, nanga gi a kiri di den e kiri heri ras foe natonalisme ede. Na ini den jari di no pasa so langa, nanga na eskuus taki den de fajafaja na ini a tori foe relisi, birtisma kiri makandra. Den e gebroiki a wortoe „krin di den e krin wan ras” na ala sei na ini a tori foe a feti na ini den Balkankondre. Ma, a si di foeroe sma drape no wani si trawan na ai abi en gron tapoe a de di den de memre foe difrenti relisi na presi foe ras, foe di a moro bigi pisi foe den sma e kon foe a srefi ras. Ija, relisi moesoe erkèn dati a abi a moro bigi frantiwortoe na ini a broedoe di fadon na ini a kondre di ben nen Joegoslafia fosi, èn a Verenigde Nâsi no man foe stòp a sani disi.

No so langa pasa, wan professor ini relisitori foe wan universiteit, ben taki dati „ini wan pisi ten foe grontapoe baka a Kowroe Orlokoe pe wan gro de na ini relisi groepoe di de klariklari foe feti, dan wan studie foe relisi èn foe a kiri di sma e kiri heri ras, kan de wan sani di de tranga fanowdoe gi wi, awansi sortoe sjen a e tjari kon”. A froestan di wi kon froestan fa relisi e gens den moeiti di sma e meki foe tjari grontapoe vrede kon, de krin foe si na ini a ten disi.

Wan froeklari foe a VN foe 1981 ben e taki: „Foe di wi e broko wi ede nanga a fasi fa a kon na krin taki sma no e froedrage trawan èn foe di sma e desko trawan ini tori foe relisi noso bribi èn di de foe si te nanga now na ini son kontren foe grontapoe, meki wi e teki a fasti bosroiti foe doe ala sani di de fanowdoe foe kaba wantewante nanga den fasi taki sma no e froedrage trawan soleki fa a de foe si na ini ala den fasi fa a e sori ensrefi èn foe doe sani na fesi foe meki a no kon so fara èn foe feti teige a desko di sma e desko trawan foe den relisi noso bribi ede.”

Akroederi a froeklari foe den, a Verenigde Nâsi kari a jari 1995 a Jari foe Froedrage Makandra. Ma foe taki en leti, oiti wi sa man doro vrede nanga seikerfasi na ini wan grontapoe di prati foe relisi ede?

A Tamara foe relisi

Wan profeititori na ini a bijbelboekoe Openbaring e gi a piki. A e taki foe wan simbôlis „bigi hoeroe” di e sidon leki „wan oemakownoe” èn di abi „wan kownoekondre na tapoe den kownoe foe grontapoe”. A hoeroe disi e libi „na ini bigi goedoe sondro foe abi sjen” èn a abi matifasi nanga den tirimakti foe grontapoe. Den e agersi den tirimakti disi nanga „wan redi kloroe werdri meti” tapoe san a hoeroe e rèi sondro broko-ede (Openbaring 17:1-5, 18; 18:7). A makti hoeroe disi, di de bekènti leki „Babilon a Bigiwan”, kisi en nen foe na owroe Babilon, a presi pe kroektoe falsi relisi ben bigin. A e fiti dan, taki na ini a ten disi a hoeroe e teki presi gi ala den relisi foe grontapoe di moksi densrefi nanga den afersi foe den tirimakti.

A pisi tori e go moro fara foe taki, dati tapoe a joisti ten Gado sa poti na ini den ati foe den sroedati makti foe a werdri meti foe handri. Èn den „no sa wani foe si a hoeroe na ai srefisrefi èn sa pori en èn sa libi en nanga soso skin èn den sa njan pisi foe en skin èn sa bron en krinkrin nanga faja”(Openbaring 17:16).a So boen, Jehovah ensrefi sa teki fesi foe boeweigi den makti nâsi na ini wan kampagne foe poeroe falsi relisi. A relisi sistema na heri grontapoe, nanga ala den goedoe tempel nanga kapèl, sa kisi pori dorodoro. Relisi no sa gens den politiekman moro foe tjari vrede nanga seikerfasi kon. Ma, srefi na ini a ten dati, troetroe vrede nanga seikerfasi sa de na grontapoe?

Na onvolmaakti libisma skin

Wan djaranti de taki a pori foe relisi troetroe sa opo a pasi gi wan grontapoe sondro orlokoe? Nôno. A Verenigde Nâsi sa tan ondrofeni wan situwâsi di e gi foe lafoe èn e gi foe sari. Na a wan sei, sma wani vrede nanga seikerfasi. Ma, tokoe na a tra sei, na sma srefi de a moro bigi kefar gi vrede nanga seikerfasi. A si di sma no wani si trawan na ai, bigimemre, a prakseri di wan sma e prakseri ensrefi nomo, gridifasi, nanga a ke di sma no e ke nanga trawan, dati na eigifasi foe libisma di de den reide foe san ede ala feti nanga orlokoe de. — Jakobus 4:1-4.

Bijbel ben taki na fesi dati na ini wi ten sma ben sa „lobi densrefi nomo, lobi moni, de asranti, abi heimemre, de blasfemiasma, trangajesi na papa nanga mama, de sondro tangi, no ben sa de loyaal, no sa abi wan natuulijk firi foe lobi, no sa de klariklari foe meki kroederi, de ogri-ati leiman, de sondro foe man dwengi densrefi, abi wan krasi fasi foe doe sani, de sondro lobi gi boen sani, de toriman, no ke foe noti, abi bigimemre”. — 2 Timoteus 3:1-4.

Secretaris-generaal Boutros Boutros-Ghali ben erkèn dati „grontapoe abi foe doe nanga wan toemoesi bigi problema na ini moreel nanga sociaal afersi, di de na ini foeroe libimakandra”. Sani no de di politieksma sa doe, di sa man poeroe den takroe eigifasi foe na onvolmaakti libisma skin. — Teki gersi Genesis 8:21; Jeremia 17:9.

Jesus Krestes — A Kownoe foe Vrede

A de krin foe si, taki a Verenigde Nâsi no man tjari vrede kon tapoe grontapoe. Ala den memre nanga den sma di e horibaka gi en na onvolmaakti libisma, ala di den abi marki di boen srefisrefi. Bijbel e taki dati „a no de na a sma foe grontapoe foe bepaal fa a e waka. A no de na wan libisma di e waka srefi foe tiri den foetoe foe en” (Jeremia 10:23). Gado e warskow moro fara: „No poti oen froetrow tapoe heiman foe grontapoe, noso tapoe a manpikin foe libisma di no man froeloesoe trawan.” — Psalm 146:3.

Bijbel e taki na fesi san Jehovah sa doe nanga jepi foe en Manpikin, a „Kownoe foe Vrede”. Jesaja 9:6, 7 e taki: „Wan pikin kon gebore gi wi, wan manpikin den ben gi wi; èn a kownoetirimakti sa kon tapoe en skowroe. Èn en nen sa de: Wondroe Raiman, Tranga Gado, Têgo Tata, Kownoe foe Vrede. Na a kownoe tirimakti èn na vrede, wan kaba no sa kon.”

Den nâsi foe grontapoe kon weri foe den 50 jari tranga moeiti nanga den foeroe broko-ede. No so langa moro, den sa pori den relisi organisâsi di gersi hoeroe oema. Dan Jesus Krestes, a „Kownoe foe den kownoe nanga Masra foe den masra”, nanga en legre foe hemel fetiman sa poeroe ala libisma tirimakti, èn ala den wan di e weigri foe erkèn a soevereiniteit foe Gado sa kisi dedestrafoe. (Openbaring 19:11-21; teki gersi Danièl 2:44.) Nanga jepi foe a sani disi, Jehovah Gado sa tjari wan grontapoe sondro orlokoe kon.

[Foetoewortoe]

[Faki na tapoe bladzijde 5]

A FASI FA KRESTEN E SI VERENIGDE NÂSI

Na ini bijbel profeititori foeroetron den e agersi libisma tirimakti nanga werdri meti (Danièl 7:6, 12, 23; 8:20-22). Foe dati ede, someni tenti jari kaba a tijdschrift a Waktitoren sori taki den werdri meti foe Openbaring kapitel 13 nanga 17 na den grontapoe tirimakti foe wi ten. Disi abi na ini toe a Verenigde Nâsi di den e agersi na ini Openbaring kapitel 17 leki a redi kloroe werdri meti di abi seibi ede nanga tin toetoe.

Tokoe, a fasi fa den boekoe foe bijbel e si a sani no e gi pasi foe no lespeki tirimakti noso den sma di abi wan hei posisi na ini den tirimakti. Bijbel e taki krinkrin: „Meki ibri sili saka ensrefi na ondro den hei tirimakti, bika no wan tirimakti de boiti a di foe Gado; Gado poti den tirimakti di de na ini den posisi foe den, di skotoe. Foe dati ede, a sma di kakafoetoe gi tirimakti e kakafoetoe gi den sani di Gado sreka; den wan di e kakafoetoe gi den sani di Gado sreka sa kisi strafoe.” — Romesma 13:1, 2.

Akroederi nanga disi, den Kotoigi foe Jehovah di e tan neutraal srefisrefi na ini politiek afersi, no e boemoei nanga libisma tirimakti. Noiti den no e gi sma deki-ati foe bigin nanga revo noso e teki prati ini fasi foe no gi jesi na lanti. Na presi foe doe dati, den e erkèn taki wan fasi foe tiri de fanowdoe foe hori wet nanga orde na ini a libisma libimakandra. — Romesma 13:1-7; Titus 3:1.

Jehovah Kotoigi e si na organisâsi foe a Verenigde Nâsi leki fa den e si tra tirimakti foe grontapoe. Den e erkèn taki a Verenigde Nâsi de ete foe di Gado ben gi pasi foe dati. Akroederi nanga bijbel, den Kotoigi foe Jehovah e lespeki ala tirimakti foe di den abi reti na tapoe èn doe den sani sa den taki, so langa den tirimakti no e aksi foe den foe sondoe teigi Gado nomo. — Tori foe den apostel 5:29.