Ondrofenitori

A preikiwroko ben abi krakti tapu den bosroiti di mi teki na ini mi libi

Soleki fa Lynette Peters fruteri

Den srudati fu Amerkankondre ben kon fu tyari wi gowe. Wan fu den srudati di sabi sutu bun ben tanapu na tapu a daki fu na oso. Den srudati ben didon na ini a grasi nanga den gon fu den, èn den ben de srekasreka fu sutu. Di wi ben e lon go na a helikopter di ben e wakti wi a sonde mamanten dati, dan mi nanga den tra zendeling ben du muiti fu no bruya. Di wi ben de na ini a helikopter kaba, dan a frei gowe wantewante. Baka tin miniti, wi ben feni kibri na tapu wan srudati sipi di ben de krosibei fu a syoro.

A TRA mamanten, wi yere taki den sma di opo densrefi teige a tirimakti, trowe bom na tapu a hotel pe wi ben kibri a neti na fesi. Furu yari langa den borgu fu Sièra Leon opo densrefi teige a tirimakti, èn te fu kaba wan bigi feti bigin. Wi èn sosrefi ala den sma di ben de fu tra kondre, ben musu lowe gowe wantronso fu a kondre. Meki mi fruteri unu fa mi du kon na ini a situwâsi disi.

Mi gro kon bigi na ini Brits Gayana, di sma sabi leki Gayana sensi 1966. Di mi ben yongu ete, dan mi ben abi wan switi libi èn mi ben de koloku. Furu papa nanga mama ben si skoroleri leki wan prenspari sani, èn den ben fruwakti taki den pikin fu den musu leri bun na skoro. Mi kan memre ete taki wan leisi wan man di ben e wroko na bangi, aksi mi papa: „Fu san ede yu e pai so furu moni fu meki den pikin fu yu kisi skoroleri?” Mi papa ben piki en: „Soso te den kisi a moro bun skoroleri, den sa abi wan bun libi.” Na a ten dati, mi papa ben denki taki wi ben kan kisi a moro bun skoroleri na den kefalek skoro. Heri esi mi papa ben o denki tra fasi fu a tori disi.

Di mi ben abi 11 yari, mi mama bigin studeri Bijbel nanga Yehovah Kotoigi. A ben go na a Kownukondre zaal makandra nanga wan uma fu a birti. Den sani di den yere a neti dati, overtoigi den taki den feni a tru anbegi. Bakaten, mi mama fruteri wan tra uma fu a birti san a ben yere na a konmakandra. Syatu baka dati, den ala dri ben e studeri nanga Daphne Harry (bakaten a ben nen Baird) èn nanga Rose Cuffie, di ben de zendeling. A no ben doro wan yari ete, di mi mama nanga den tu mati fu en teki dopu. Feifi yari baka dati, mi papa komoto na ini a Zevendedagsadventist Kerki, èn a tron wan Kotoigi fu Yehovah di a teki dopu.

Sensi pikin-nengreten, mi nanga den tu sisa fu mi di de den moro owruwan fu den tin pikin na ini wi osofamiri, ben lobi fu go na a zendeling-oso pe Daphne nanga Rose ben e libi. Drape wi ben arki den ondrofenitori di den ben abi na ini a preikiwroko. Wi ben kan si taki den zendeling disi ben abi furu prisiri te den ben wroko tranga fu yepi sma fu kon leri sabi Gado. Na eksempre fu den meki taki misrefi ben wani de wan zendeling tu.

Furu famiriman nanga skoromati fu mi ben teki heiskoro-leri so taki den ben kan abi wan bun libi bakaten. Ma mi ben wani go na ini a furuten diniwroko. San ben yepi mi fu doro a marki dati? Furu sani ben de di mi ben kan du na ini grontapu. Mi ben kan go studeri fu tron wan afkati, wan pokuman, wan datra, noso iniwan tra sani. Ma a moi eksempre fu mi papa nanga mama yepi mi fu teki wan bun bosroiti. Ala ten den ben e hori densrefi na Bijbel gronprakseri, den ben e studeri Bijbel fayafaya, èn den ben e gebroiki furu ten fu yepi trawan fu kon leri sabi Yehovah.a Boiti dati, den ben abi a gwenti fu kari zendeling kon na wi oso. Den brada nanga sisa disi ben abi furu prisiri èn den ben de koloku. Disi meki taki misrefi ben wani du moro na ini a preikiwroko, èn dati ben abi krakti tapu den bosroiti di mi ben teki na ini mi libi.

Mi dopu di mi ben abi 15 yari. Syatu baka di mi kaba nanga middelbaar skoro, mi bigin pionier. Philomena, wan uma di ben e wroko na wan ati-oso, ben de a fosi sma di mi yepi fu gi ensrefi abra na Yehovah èn fu teki dopu. Mi ben e prisiri fu si taki a kon lobi Yehovah, èn disi gi mi deki-ati fu tan du a furuten diniwroko. Syatu baka dati mi kisi na okasi fu feni wan moro bun wroko na wan lanti kantoro, pe mi ben wroko kaba leki sekretarsi. Mi no teki a wroko dati, ma mi bosroiti fu tan du a pionierwroko.

Na a ten dati, mi ben libi na a oso fu mi papa nanga mama ete, èn den zendeling ben tan kon na wi oso. Mi ben lobi en srefisrefi fu arki den ondrofenitori fu den! Ala den sani disi gi mi moro deki-ati fu tron wan zendeling. Ma mi ben denki taki dati no ben o pasa, fu di na a ten dati, a Tiri Skin ben seni zendeling kon na Gayana, èn den e du dati te now ete. Ma wan dei na ini a yari 1969, mi ben fruwondru taki mi kisi wan kari fu go na a Waktitoren Bijbelskoro Gilead na ini Brooklyn, New York.

Mi no ben fruwakti taki den ben o seni mi go drape

Na ini a di fu 48 klas fu a Gileadskoro 54 studenti ben de, èn den ben kon fu 21 kondre. Tinaseibi fu den studenti ben de sisa di no ben trow ete. Aladi mi ben de na a skoro disi 37 yari pasa, toku mi kan memre bun ete fa den feifi mun dati ben de. Wi ben leri furu sani, iya, wi ben leri sani fu Bijbel, èn wi ben kisi bun rai sosrefi di ben o yepi wi na ini a zendelingwroko. Fu eksempre, mi leri fu gi yesi na den brada di ben e teki fesi, mi leri fu no teki ala den nyun modo abra, èn mi leri fu horidoro aladi problema de.

Ala ten mi papa nanga mama ben taigi wi taki a de prenspari fu go na den konmakandra doronomo. Efu wán fu wi ben du neleki a siki tumusi fu go na a konmakandra tapu sonde, dan a sma dati no ben kan betre wantronso a tra dei fu go meki prisiri. Ma di mi ben de na a Gileadskoro, dan wan pisi ten mi no ben e go na ala den konmakandra. Don nanga Dolores Adams, wan trowpaar fu Bethel di ben tyari mi go na den konmakandra, aksi mi wan freida neti fu san ede mi no e go na a konmakandra. Mi ben denki taki mi ben abi wan bun reide fu no go na a konmakandra, bika mi ben abi furu sani fu sreka gi a Gileadskoro. Fu dati ede mi no ben man go na a Theokrasia Diniwroko-skoro nanga a Diniwroko Konmakandra. Baka di brada Adams taki nanga mi fu a tori, dan a taigi mi: „Du san yu konsensi e taigi yu fu du.” Mi teki a rai fu en, èn noiti moro mi misi wan konmakandra baka dati. Na ini ala den yari di pasa, mi no meki noti tapu mi fu go na den Kresten konmakandra, boiti te mi no ben man go trutru.

Baka di wi ben de sowan tu nanga afu mun tapu a skoro, dan wi bigin aksi wisrefi na sortu kondre den ben o seni wi go. Ala ten mi ben denki taki den ben o seni mi go na Gayana, bika drape den ben abi furu sma fanowdu fu yepi nanga a preikiwroko. Mi ben fruwondru srefisrefi di mi yere taki mi no ben o go baka na Gayana. Na presi fu dati, den ben seni mi go na Sièra Leon, na ini West Afrika. Sensi ten mi ben wani tron wan zendeling na ini wan tra kondre. Mi ben taigi Yehovah tangi taki te fu kaba, mi kisi san mi ben wani!

Mi ben musu leri furu sani ete

Di mi doro na Sièra Leon, dan mi si taki a kondre moi srefisrefi fu di a abi furu bergi èn a abi moi syoro. Ma a moro moi sani fu a kondre disi na ini West Afrika na den sma, bika den abi lobi nanga switifasi. Disi e meki taki sma di e kon fu tra kondre, firi bun. A fasi fa den sma de, yepi den nyun zendeling fu no misi den famiri so furu. Den sma fu Sièra Leon lobi fu taki fu den gwenti nanga den kulturu fu den. Den lobi fu yepi trakondre sma leri taki a tongo di den gwenti taki, namku Kriotongo.

Kriotongo abi furu moi odo. Wán fu den odo e taki so: Kesikesi e wroko, ma babun e nyan. Disi wani taki dati a no ala ten a sma di e sai, na a sma di e koti. A no de fu taki dati na odo disi e sori na wan moi fasi taki kruktudu lai na grontapu!—Yesaya 65:22.

Mi ben lobi a preikiwroko. A no ben e pasa so furu taki mi ben miti wan sma di no wani sabi noti fu Bijbel. Na ini ala den yari di pasa, zendeling èn sosrefi tra brada nanga sisa di dini Yehovah someni yari kaba, yepi owrusma nanga yongusma fu kon leri sabi a tru anbegi. Den sma disi na gudusma, pôtisma, èn sma di komoto fu difrenti lo.

Erla St. Hill, a fosi zendeling di ben wroko nanga mi, ben de wan sisa di ben e wroko tranga. Neleki fa a ben e wroko tranga na ini a preikiwroko, na so a ben e wroko tranga tu na ini a zendeling-oso. A yepi mi fu kon frustan taki furu sani de prenspari trutru. Mi kon si taki a prenspari fu kon leri sabi den birtisma, fu go luku Kotoigi di siki, fu go luku sma di wani sabi moro fu Bijbel, èn fu trowstu sma te wan lobiwan fu den dede. A leri mi tu taki a de prenspari fu no komoto na ini a kontren pe wi ben e du a preikiwroko, sondro fu go luku brada nanga sisa di e libi drape, awinsi na wan tu miniti nomo. Fu di mi du den sani disi, meki heri esi mi kon abi furu mama, brada, sisa, nanga mati, èn mi no ben misi mi famiri so furu.—Markus 10:29, 30.

Mi ben kon tron bun mati tu fu den fayafaya zendeling di ben e wroko makandra nanga mi. Tu fu den sisa di ben tan nanga mi na ini wán kamra ben de Adna Byrd, di ben e wroko na ini Sièra Leon na ini a pisi ten fu 1978 te go miti 1981, nanga Cheryl Ferguson, di e tan 24 yari kaba nanga mi.

Wan borgufeti e meki wi kisi tesi

Na ini 1997, pikinmoro wan mun baka di den gi a nyun bijkantoro na ini Sièra Leon abra na Yehovah, wi ben musu gowe libi a kondre fu di wan feti ben de, soleki fa mi ben fruteri kaba na a bigin. Siksi yari fosi dati pasa, den Kotoigi fu Liberia lowe kon na Sièra Leon, fu di wan feti ben de na ini Liberia. Den Kotoigi disi ben abi wan tranga bribi èn a sani dati naki wi ati trutru. Wan tu fu den no ben abi notinoti di den doro na Sièra Leon. Aladi den ben de na ini wan muilek situwâsi, toku ibri dei den ben go na ini a preikiwroko. A ben naki wi ati fu si fa den lobi Yehovah nanga tra sma.

Now di wisrefi ben de loweman na ini Ginea, wi tan frutrow tapu Yehovah èn wi poti Kownukondre afersi na a fosi presi, neleki den brada nanga sisa fu wi di ben lowe gowe fu Liberia. Wán yari baka dati, wi ben man drai go baka na Sièra Leon, ma a no ben teki seibi mun di den bigin feti baka èn wi ben musu lowe go na Ginea ete wan tron.

Syatu baka dati wi yere taki wan tu fu den sma di ben e feti, go tan na ini a zendeling-oso fu wi na ini Kissy, èn den ben fufuru noso broko ala den sani fu wi. Na presi taki wi lasi-ati, wi ben breiti taki wi ben de na libi ete. Wi ben abi wan tu sani nomo, ma toku wi horidoro na ini a muilek situwâsi dati.

Di wi lowe go na Ginea a di fu tu leisi, dan mi nanga Cheryl tan drape. Fu dati ede wi ben musu leri taki Fransitongo. Wan tu fu den tra zendeling bigin taki Fransitongo esi-esi, èn den no ben abi trobi te den ben e meki fowtu. Ma mi ben de tra fasi. Mi no ben lobi meki fowtu, èn fu dati ede mi ben taki Fransitongo soso te a ben de fanowdu trutru. A sani dati ben meki mi firi brokosaka. Ibri dei mi ben musu tan hori na prakseri taki mi ben de na ini Ginea fu yepi sma fu kon leri sabi Yehovah.

Safrisafri mi bigin taki a tongo moro bun, fu di mi ben gebroiki buku fu leri a tongo. Mi ben arki sma tu di ben sabi taki a tongo bun, èn mi ben aksi den pikin na ini a gemeente fu yepi mi, bika den e taigi yu wantronso te yu meki wan fowtu. Sondro taki mi ben fruwakti dati, na organisâsi fu Yehovah seti wan moi sani di ben yepi mi. Wi Kownukondre diniwroko e gi eksempre di e sori fa wi kan prati buku nanga brochure gi sma di abi difrenti bribi. Ma sensi september 2001 Wi Kownukondre diniwroko e sori sosrefi fa wi kan prati tijdschrift èn a sani dati yepi mi trutru. Now mi no e frede fu taki Fransitongo te mi e preiki gi sma, aladi mi no man taki en so bun leki Ingrisitongo.

Fu di mi ben kweki na ini wan bigi osofamiri, meki a no ben muilek gi mi fu tan nanga furu sma na ini wán oso. Wan pisi ten, mi ben e tan nanga 17 sma na ini a zendeling-oso. Na ini den 37 yari di mi du a zendelingwroko, mi tan nanga moro leki 100 tra zendeling. A ben de wan bigi grani gi mi taki mi kon leri sabi so furu sma di abi difrenti fasi, ma toku den alamala ben e du a srefi wroko. A e gi mi prisiri tu fu wroko makandra nanga Gado èn fu si taki sma e kon na ini a tru anbegi!—1 Korentesma 3:9.

Na ini den yari di pasa, mi no ben man de nanga mi famiri te prenspari sani ben pasa, soleki a trowfesa fu den moro yongu brada nanga sisa fu mi. Mi no ben man si den pikin fu den brada nanga sisa fu mi so furu leki mi ben wani. A no ben makriki srefisrefi gi mi nanga mi famiri, ma na wan lobi-ati fasi den gi mi a deki-ati fu tan na ini a zendelingwroko.

Ma aladi mi no ben man de nanga mi famiri na den prenspari okasi dati, toku mi ondrofeni den sortu prisiri sani dati na ini a zendelingwroko. Aladi mi bosroiti fu no trow, toku mi kan taki dati mi abi furu pikin, fu di den sma di mi studeri Bijbel nanga den èn sosrefi tra sma di tron bun mati fu mi, de leki mi pikin. Boiti dati, mi si fa den pikin fu den sma dati gro kon bigi, mi si fa den trow èn fa densrefi kweki den eigi pikin soleki fa Yehovah wani. Neleki mi, sonwan fu den meki a preikiwroko abi krakti tapu den bosroiti di den teki na ini den libi.

[Futuwortu]

[Karta na tapu bladzijde 15]

(Efu yu wani si pe den sani disi skrifi, luku a tijdschrift)

Mi ben musu go leki zendeling na Sièra Leon, na ini West Afrika

GINEA

SIÈRA LEON

[Prenki na tapu bladzijde 13]

Den tu yongu sisa fu mi di ben e lobi go nanga mi na den zendeling

[Prenki na tapu bladzijde 14]

Mi nanga wan tu studenti fu a di fu 48 klas fu a Gileadskoro

[Prenki na tapu bladzijde 16]

A dei di den gi a nyun bijkantoro na ini Sièra Leon abra na Yehovah