Kon krosibei na Gado

„A Gado fu ala trowstu”

2 Korentesma 1:3, 4

FURU sani na ini a libi kan meki sma sari èn den kan lasi howpu srefi. Wan tu sani di kan meki taki disi pasa, na te sma e nyan pina, te den lasi-ati, noso te den no abi mati. Na den momenti dati yu e denki kande: ’Pe mi kan feni yepi?’ Den wortu fu na apostel Paulus di skrifi na ini 2 Korentesma 1:3, 4 e sori taki wan sma de pe wi kan feni trowstu ala ten, èn a sma dati na Yehovah Gado.

Na ini vers 3, Bijbel e kari Gado „a Tata di abi bigi sari-ati”. San dati wani taki? A Griki wortu di vertaal nanga „bigi sari-ati”, wani taki dati wan sma e firi sari-ati gi trawan di e nyan pina.a Wan buku e taki dati a wortu disi kan vertaal nanga „firi sari gi” noso „broko yu ede trutru nanga trawan”. A „bigi sari-ati” di Gado abi e meki taki a du sani fu yepi sma. Te wi sabi a sani disi fu Gado, dan wi o wani kon krosibei na en, a no so?

Paulus e kari Yehovah sosrefi „a Gado fu ala trowstu”. Dyaso Paulus e gebroiki wan wortu di abi fu du nanga „a trowstu di wan sma e trowstu wan trawan di de na ini problema noso di e sari. Boiti dati, a sma e du wan sani fu yepi a trawan noso a e gi a trawan deki-ati.” Wan buku e taki: „Wi e trowstu wan sma di e sari, te wi e gi en deki-ati fu horidoro na ini a situwâsi fu en” (The Interpreter’s Bible).

Kande yu e aksi yusrefi: ’Fa Gado e trowstu wi èn fa a e gi wi deki-ati fu man horidoro te wi e sari?’ A moro prenspari fasi fa a e du dati na fu di a gi wi en Wortu, Bijbel, èn a gi wi a grani fu begi. Paulus e taigi wi taki Gado gi wi en Wortu na wan lobi-ati fasi so taki „a trowstu di Gado Buku e gi, kan gi wi howpu”. Boiti dati, te wi e begi nanga wi heri ati, dan dati kan meki wi abi „a vrede fu Gado di bigi moro leki san libisma man frustan”.—Romesma 15:4; Filipisma 4:7.

O furu trowstu Yehovah e gi a pipel fu en? Paulus e taki dati Gado „e trowstu wi na ini ala den banawtu fu wi” (2 Korentesma 1:4). Awansi sortu kwinsi wi e kisi, awansi fa wi e sari, noso awansi fa wi e nyan pina, Gado kan gi wi a deki-ati nanga a krakti di wi abi fanowdu fu man horidoro. A sani dati e trowstu wi trutru, a no so?

A trowstu di Gado e gi, no de gi den sma wawan di e kisi trowstu fu en. Paulus e taki moro fara dati Gado e trowstu wi so taki nanga yepi fu „a trowstu di wisrefi e kisi fu Gado, wi man trowstu den sma di de na ini iniwan sortu banawtu”. Te wi kisi trowstu na ini den banawtu fu wi, dan dati e yepi wi fu frustan fa trawan e firi èn a o meki taki wi wani yepi den sma di de na nowtu.

Yehovah na „a Gado fu ala trowstu”, ma a no abi fu de so taki a e puru ala den problema fu wi, noso taki a e meki wi no sari moro. Toku wi kan de seiker fu disi: Efu wi e suku trowstu na Yehovah, dan a kan gi wi a krakti fu horidoro awansi fa wi e sari, noso awansi sortu problema wi e kisi na ini a libi. A no de fu taki dati so wan Gado di abi sari-ati warti fu wi anbegi en èn fu prèise en.

[Futuwortu]