Leisiman e aksi
Efu Gado ben meki Adam sondro fowtu, dan fa a du kon taki a sondu?
Gado ben meki Adam na so wan fasi taki a ben man teki en eigi bosroiti. Sobun, Adam ben kan sondu efu a ben o bosroiti fu du dati. A reti di a ben abi fu teki en eigi bosroiti, na wan grani di Gado ben gi en. Dati no wani taki dati Adam ben mankeri wan sani di Gado meki en. Hori na prakseri taki Gado na a wan-enkri sma di bun dorodoro (Deuteronomium 32:3, 4; Psalm 18:30; Markus 10:18). Nowan tra sma èn nowan tra sani de leki Gado. Ma toku wan sma noso wan sani kan bun. Fu eksempre, wan nefi bun fu koti meti, ma yu no ben o gebroiki en fu nyan supu, a no so? Sobun, wan sani bun soso te yu e gebroiki en gi a sani di a meki fu du.
We, fu san ede Gado meki Adam? Gado ben wani taki Adam meki pikin, so taki grontapu ben o kon furu nanga koni libisma di man teki den eigi bosroiti. Efu den ben wani, dan densrefi ben o bosroiti fu hori den wet fu Gado. Na so fasi den ben o sori taki den lobi Gado èn taki den wani du san a e taki. Sobun, Gado no meki libisma na so wan fasi taki den no ben o man du tra fasi leki fu gi yesi na en. Ma libisma ben o man bosroiti gi densrefi efu den o gi yesi na en, noso efu den no o du dati (Deuteronomium 10:12, 13; 30:19, 20). Sobun, efu Adam no ben o man bosroiti fu gi yesi na Gado noso fu no du dati, dan a ben o mankeri wan sani, noso a ben o abi sondu. Te a abi fu du nanga a fasi fa Adam gebroiki a grani fu teki en eigi bosroiti, Bijbel e sori taki a du san en wefi du. Neleki en wefi, Adam no gi yesi na a komando fu Gado di ben taki dati den no ben mag nyan fu „a bon fu sabi san bun èn san ogri”.—Genesis 2:17; 3:1-6.
We, a de so taki Gado meki Adam nanga wan swakifasi, di meki taki Adam no ben man bosroiti san bun èn san ogri? A de so taki Adam no ben man teki koni bosroiti noso taki a no ben man kakafutu gi tesi? Na a bigin, bifo Adam trangayesi Yehovah Gado, dan Gado ben luku ala den sani di a meki na grontapu, èn sosrefi a fosi man nanga uma. Gado ben kon si taki ala den sani di a meki ben de „heri bun” (Genesis 1:31). Sobun, di Adam sondu, dan disi no wani taki dati wan fowtu ben de na a fasi fa Gado meki Adam. Na presi fu dati, a sondu di Adam sondu, ben de wan sani di ensrefi du, èn fu dati ede a ben musu tyari a frantwortu fu dati (Genesis 3:17-19). A lobi di Adam ben abi gi Gado èn gi san bun, no ben tranga nofo fu meki a tan gi yesi na Gado, awansi san ben o pasa.
Hori na prakseri tu, taki di Yesus ben de na grontapu, a ben de wan man sondro sondu neleki Adam. Ma tra fasi leki den bakapikin fu Adam, a santa yeye sorgu taki Yesus no kisi sondu, noso swakifasi di ben o meki taki a no man kakafutu gi tesi (Lukas 1:30, 31; 2:21; 3:23, 38). Fu di Yesus srefi ben wani dati, meki a ben tan gi yesi na en Tata, aladi a kisi hebi kwinsi. Adam srefi bosroiti fu no gi yesi na a komando fu Yehovah.
Ma fu san ede Adam bosroiti fu trangayesi Gado? A de so taki a ben denki dati a ben o abi wan moro bun libi efu a handri na so wan fasi? Nôno, fu di na apostel Paulus skrifi taki „Didibri no ben kori Adam” (1 Timoteyus 2:14). Ma Adam bosroiti fu handri soleki fa en wefi wani, di ben nyan kaba fu a froktu di den no ben mag nyan. A firi di a ben abi fu plisi en wefi, ben de moro tranga leki a firi di a ben abi fu gi yesi na en Mekiman. A no de fu taki dati, di Eva gi Adam a froktu fu nyan, dan Adam ben musu denki fosi fa a sani dati ben o abi krakti tapu a matifasi di a abi nanga Gado. Fu di Adam no ben lobi Gado nanga en heri ati, meki taki a brokokindi di en wefi dwengi en fu nyan fu a froktu.
Adam sondu bifo a meki pikin, èn fu dati ede ala den pikin nanga bakapikin fu en gebore nanga sondu. Ma neleki Adam, wi abi a grani fu teki wi eigi bosroiti. Meki a de so taki wi e bosroiti fu de nanga tangi èn fu denki dipi fu a bunfasi fu Yehovah. Boiti dati, meki wi kon abi wan tranga lobi gi Gado, fu di a warti fu wi gi yesi na en èn fu anbegi en.—Psalm 63:6; Mateyus 22:36, 37.