Gado e feni ala fasi fu anbegi bun?
Sani di sma gwenti taki:
▪ „Ala kerki bun, na wán Gado wi e dini.”
▪ „A no abi trobi san yu e bribi, solanga yu ati krin.”
San Yesus ben taki?
▪ „Pasa go na ini a smara doro; bika a pasi di e tyari sma go dede, bradi èn a bigi, èn furu sma e waka a pasi dati; ma a doro di e tyari sma go na libi, pikin èn a pasi fu en smara, èn wan tu sma nomo e feni en” (Mateyus 7:13, 14). Yesus no ben e bribi taki ala kerki e leri sma fu dini Gado na a yoisti fasi.
▪ „Furu sma sa taigi mi na a dei dati: ’Masra, Masra, a no na ini yu nen wi ben taki profeititori? A no na ini yu nen wi ben puru ogri yeye na sma tapu? A no na ini yu nen wi ben du furu bigi wondru?’ Toku mi sa taigi den krin: Mi no sabi unu kwetikweti! Komoto na mi fesi, un sma di e du kruktudu” (Mateyus 7:22, 23). Yesus no e feni ala sma bun, di e taki dati den e waka na en baka.
FURU kerkisma lobi fu hori densrefi na den sani di den e bribi èn na den gwenti fu den. Ma fa a de te den leri disi no e kruderi nanga san skrifi na ini Gado Wortu, Bijbel? Yesus ben sori o takru a de fu tai hori na libisma gwenti, di a ben taigi den kerki fesiman na ini en ten, a sani disi: „Unu meki a wortu fu Gado lasi krakti, bika unu e hori unsrefi soso na den gwenti fu unu.” Baka dati, a taki den wortu disi di Gado ben taki: „A pipel disi e gi mi grani nanga den mofo, ma den ati no de nanga mi kwetikweti. Na fu soso den e tan anbegi mi, bika na den komando fu libisma den e leri trawan.”—Mateyus 15:1-9; Yesaya 29:13.
Boiti taki wan sma abi bribi, a fasi fa e tyari ensrefi de prenspari tu. Disi na san Bijbel e taki fu den sma di e taki dati den e dini Gado: „Den e taigi sma taki den sabi Gado, ma den sani di den e du e sori taki den no sabi en” (Titus 1:16). Fu taki en leti, Bijbel e taki dati den sma na ini wi ten „sa de sma di lobi prisiri na presi taki den lobi Gado; a o gersi leki den e dini Gado na wan getrow fasi, ma a libi fu den o sori taki dati no de so; yu no musu bumui nanga den sma dati”.—2 Timoteyus 3:4, 5.
A de prenspari fu abi wan krin ati, ma moro de fanowdu. Fu san ede? Fu di wan sma kan bribi wan sani nanga wan krin ati, aladi a sani dati no tru. Fu dati ede, a de tumusi prenspari fu teki soifri sabi di abi fu du nanga Gado (Romesma 10:2, 3). Te wi e teki a sabi disi, èn te wi e du san Bijbel e taki, dan dati o meki Gado feni wi bun (Mateyus 7:21). Sobun, fu de na ini a tru bribi, wani taki dati wi musu abi wan krin ati, wi musu bribi san tru, èn wi musu du san reti. Èn fu du san reti, wani taki dati wi musu du a wani fu Gado ibri dei!—1 Yohanes 2:17.
Efu yu wani sabi moro fu san Bijbel e taigi wi fu Gado, dan suku fu miti Yehovah Kotoigi, so taki den kan studeri Bijbel nanga yu, sondro taki yu abi fu pai gi dati.
[Prenspari pisi na tapu bladzijde 9]
Fu de na ini a tru bribi, wani taki dati wi musu abi wan krin ati, wi musu bribi san tru, èn wi musu du san reti