Aksi fu leisiman

Efu wan beibi dede na ini en mama bere, dan a kan kisi wan opobaka?

Wan sma di noiti no ondrofeni taki en beibi dede bifo a gebore, no man frustan fa den sma di ondrofeni a sani disi e firi. Son papa nanga mama e sari srefisrefi te a sani disi miti den. Wan mama lasi feifi pikin bifo den gebore. Now, a de wan blesi gi en fu abi tu gosontu boi. Ma toku, a e memre ete fa a ben hebi gi en fu lasi ibriwan fu den pikin. Solanga a e libi, a sabi omeni yari den pikin ben o abi efu den no ben dede. Den Kresten disi kan howpu taki wan opobaka o de gi den pikin disi di den lasi?

Fu taki en leti, wi no sabi san na a piki tapu na aksi disi. Bijbel no e taki krin efu wan pikin di ben dede kaba fosi a gebore, o kisi wan opobaka. Ma na ini Gado Wortu, gronprakseri skrifi di abi fu du nanga a tori disi, èn di kan trowstu wi pikinso.

Meki wi go luku tu aksi di abi fu du nanga a tori disi. A fosiwan na: O ten a libi fu wan sma e bigin gi Yehovah, na te en mama kon de nanga bere, noso te a pikin gebore? A di fu tu aksi na: Yehovah e si wan pikin di no gebore ete leki wan sma, noso leki wan tu cel nomo na ini a bere fu wan uma? Bijbel gronprakseri e gi krin piki tapu den tu aksi dati.

A Wet di Gado gi Moses, e sori krin taki a libi no e bigin te wan pikin gebore, ma a e bigin langa ten na fesi. Fa so ? A Wet ben sori taki wan sma di ben kiri wan pikin di no gebore ete, ben kan kisi dedestrafu gi dati. Luku san a wet ben taki: „Efu na uma noso a pikin dede, dan a man dati musu dede tu” (Ex. 21:22, 23).a Sobun, wan pikin di de na ini en mamabere, de na libi èn a de wan libisma. Fu dati ede, milyunmilyun Kresten di e frustan a tru tori dati, e weigri fu puru bere fu di den e si dati leki wan seryusu sondu teige Gado.

A no de fu taki dati a pikin di de na ini en mamabere, de na libi. Ma o warti a libi fu so wan pikin de gi Yehovah? A wet di wi ben taki fu en kaba, ben sori taki den ben musu kiri a sma di meki taki wan pikin kon dede na ini en mamabere. Fu dati ede, a de krin fu si taki a libi fu wan pikin di de na ini en mamabere warti srefisrefi gi Gado. Boiti dati, furu tra Bijbeltekst e sori taki Yehovah e si wan pikin di de na ini en mamabere, leki wan sma. Fu eksempre, nanga yepi fu santa yeye, Kownu David ben taki disi fu Yehovah: „Yu ben kibri mi na ini a bere fu mi mama. . . . Yu ai ben si mi bifo mi gebore, èn ala den pisi fu mi ben skrifi na ini a buku fu yu, sosrefi den dei di den ben meki.”​—Ps. 139:13-16; Yob 31:14, 15.

Yehovah e si sosrefi taki pikin di no gebore ete, abi den eigi fasi èn taki den kan du prenspari sani te den kon bigi. Di Rebeka, a wefi fu Isak, ben de nanga bere fu wan twelengi, dan Yehovah ben taki wan profeititori di abi fu du nanga den tu boi di ben e feti na ini en bere. Yehovah ben si kaba fa den boi dati ben o de èn taki den ben o abi krakti tapu bun furu sma na ini a ten di ben o kon.​—Gen. 25:22, 23; Rom. 9:10-13.

A tori fu Yohanes a Dopuman na wan moi tori tu. Na Evangelietori e taki: „Di Elisabet yere na odi fu Maria, a pikin na ini en bere dyompo èn Elisabet kon furu nanga santa yeye” (Luk. 1:41). Di a datra Lukas skrifi a tori disi, a gebroiki wan Griki wortu di abi fu du nanga wan pikin di no gebore ete, noso wan beibi di gebore kaba. Lukas ben gebroiki a srefi wortu dati, di a ben taki dati Yesus ben de wan beibi di ben e didon na ini wan baki pe meti e nyan.​—Luk. 2:12, 16; 18:15.

Baka di wi luku ala den sani disi, a de so taki Bijbel e sori taki wan difrenti de na mindri wan beibi di de na ini en mamabere, nanga wan beibi di hari blo fu a fosi leisi? Soleki fa a sori, dati no de so. A sani disi e kruderi nanga san sabiman kon si na ini a ten disi. Fu eksempre, ondrosukuman kon si taki wan beibi di de na ini en mamabere, man firi èn buweigi te sani e pasa dorosei fu en mamabere. Sobun, a no de fu fruwondru taki wan mama di de nanga bere, trutru e kon lobi a pikin di e gro na ini en bere.

A ten di a e teki fu wan pikin gro na ini en mamabere, no langa a srefi na ibri pikin. Luku na eksempre disi: Wan mama e meki en pikin tumusi fruku èn baka wan tu dei a pikin e dede. Wan tra mama e tyari a pikin na ini en bere teleki a musu gebore, ma a pikin e dede leti fosi a gebore. A de so taki a fosi mama kan abi a howpu taki en pikin o kisi wan opobaka soso fu di a pikin fu en gebore tumusi fruku, aladi a tra mama no kan abi a howpu dati?

We, soleki fa wi si kaba, Bijbel e sori krin taki a libi fu wan pikin e bigin te en mama hori bere, èn taki Yehovah e si wan pikin di no gebore ete leki wan warti sma. Te wi e luku den tru tori dati fu Bijbel, dan son sma kan feni taki a ben o fowtu fu taki dati na opobaka howpu no de gi wan pikin di dede na ini en mamabere. Iya, den kan feni taki efu howpu no de gi so wan pikin, dan tweifri kan opo kon te a abi fu du nanga puru bere, fu di wi e gebroiki den srefi Bijbeltekst disi fu sori taki puru bere no bun.

Na ini a ten di pasa, a tijdschrift disi ben kon nanga wan tu aksi di ben abi fu du nanga a fasi fa na opobaka o pasa gi pikin di dede na ini den mamabere. Èn soleki fa a sori, den aksi disi meki sma bigin tweifri efu den sortu pikin disi o kisi wan opobaka trutru. Fu eksempre, te wan uma lasi en pikin syatu baka te a hori bere, dan Gado o poti a pikin dati di ben de wan tu cel nomo, na ini a bere fu wan uma na ini Paradijs? Di a Tiri Skin studeri a tori disi moro fara, di den denki dipi èn begi fu a tori, dan den kon si taki den sortu denki dati no abi noti fu du nanga na opobaka howpu. Yesus ben taki: „Gado man du ala sani” (Mark. 10:27). A sani di ben pasa nanga Yesus, e sori tu taki den wortu dati tru. Gado ben teki a libi fu Yesus na hemel èn a ben poti en na ini a bere fu wan nyunwenke. Te yu e luku a sani disi na libisma fasi, dan a gersi wan sani di no kan.

We, a de so taki ala den sani disi e sori taki Bijbel e leri dati pikin di dede fosi den gebore o kisi wan opobaka? Wi musu taki krin dati Bijbel no e gi piki tapu na aksi dati, èn fu dati ede sma no abi reide fu de nomonomo taki wan opobaka o de gi den sortu pikin dati. Bun furu difrenti aksi kan opo kon di abi fu du nanga a tori disi. Ma a de moro bun fu sorgu taki wi no e kon nanga wi eigi denki. A sani di wi sabi na disi: Wi e libi a tori gi Yehovah Gado, di abi bun furu switifasi nanga sari-ati (Ps. 86:15). A no de fu taki dati Yehovah trutru wani puru dede, fu di a o gi sma wan opobaka (Yob 14:14, 15). Wi kan de seiker taki ala ten a e du san reti. Yehovah sa puru ala den hati sani di e miti wi na ini na ogri grontapu disi, èn na wan lobi-ati fasi a e tiri en Manpikin fu „tyari wan kaba kon na den wroko fu Didibri”.​—1 Yoh. 3:8.

[Futuwortu]

[Prenki na tapu bladzijde 13]

Yehovah sa puru ala den sari sani di wi ondrofeni