San Bijbel e taki fu puru bere?

A piki fu Bijbel

Bijbel no e gebroiki a wortu „puru bere” fu taki fu a kiri di sma e kiri wan sma di no gebore ete. Toku, furu tekst na ini Bijbel e sori fa Gado e si a libi fu wan libisma, srefi a di fu wan pikin di no gebore ete.

A libi na wan kado di Gado gi wi (Genesis 9:6; Psalm 36:9). Ala libi warti gi en, srefi a libi fu wan pikin di de ini en mama bere. Dati meki efu wan sma kiri wan pikin di no gebore ete, fu espresi, dan en na wan kiriman.

A wet di Gado ben gi den Israelsma ben e taki: „Efu tu man e feti èn den e gi wan bere-uma mankeri, so taki a e meki a pikin èn na uma nanga a pikin tan na libi, dan a man di gi na uma mankeri musu pai san a masra fu na uma e aksi èn soleki fa den krutuman bosroiti. Ma efu na uma noso a pikin dede, dan a man dati musu dede tu.”​—Eksodes 21:22, 23.a

• O ten wan sma libi e bigin?

• Gado o gi wan sma di ben puru bere pardon?

• A fowtu fu puru bere efu a libi fu a mama noso a pikin de na ini kefar?

O ten wan sma libi e bigin?

Gi Gado a libi fu wan sma e bigin na a momenti di a bigin gro na ini en mama bere. Na ini en Wortu Bijbel, furu tron Gado e agersi wan pikin di no gebore ete leki wan trutru sma. Luku wan tu eksempre di e sori taki Gado e si a libi fu wan pikin di no gebore ete a srefi leki a libi fu a wan di gebore kaba.

• Nanga yepi fu santa yeye, Kownu David taigi Gado taki: „Yu ai ben si mi di mi ben de na ini mi mama bere” (Psalm 139:16). Srefi di David no ben gebore ete, Gado ben e si en kaba leki wan sma.

• Fosi Yeremia gebore, Gado ben sabi kaba taki a abi wan spesrutu wroko gi a profeiti Yeremia. Gado taigi en: „Mi ben sabi yu kaba fosi mi ben meki yu na ini yu mama bere. Fosi yu mama meki yu, mi ben bosroiti kaba taki yu o du wan santa wroko. Mi o meki yu tron wan profeiti gi den pipel.”​—Yeremia 1:5.

• A Bijbel skrifiman Lukas, di ben de wan datra tu, gebroiki a srefi Griki wortu gi wan beibi di no gebore ete nanga wan beibi di gebore no so langa ete.​—Lukas 1:41; 2:12, 16.

Gado o gi wan sma di ben puru bere pardon?

Den sma di ben puru bere kan kisi pardon. Efu den e si a libi leki fa Gado e si en now, dan den no abi fu tan firi sari fu san den ben du. „Yehovah na wan Gado di abi sari-ati nanga switifasi . . . So fara leki son-opo de fu sondongo, na so fara fu wi a poti den sondu fu wi”b (Psalm 103:8-12). Yehovah e gi pardon na ibri sma di abi berow fu den sondu di den ben du, srefi efu den ben puru bere.​—Psalm 86:5.

A fowtu fu puru bere efu a libi fu a mama noso a pikin de na ini kefar?

Te wi luku san Bijbel e taki fu a libi fu wan beibi di no gebore ete, dan wan sma no abi a reti fu puru a bere fu di a denki taki a libi fu a mama nanga a pikin de ini kefar.

Fa a de efu wan situwâsi opo kon na a momenti te a beibi e gebore pe nomonomo den musu kibri a libi fu a mama noso a beibi? Na ini den sortu situwâsi dati, dan den wan di abi fu du nanga a tori musu bosroiti suma libi den o du muiti fu kibri.