Wan lusu gi a pina di sma e pina na heri grontapu

NA HERI grontapu sma de di e pina, èn furu tra sma e yepi den wan disi fu di den e sari den. Fu eksempre, sma na ati-oso e wroko bun langa fu yepi den wan di siki, noso di kisi mankeri. Brandweer-man, skowtu, sma di e meki wet, nanga sma di e yepi trawan wantewante te wan rampu pasa, e du muiti fu yepi sma di de na nowtu noso den e sorgu taki ogri no miti sma. A muiti disi di sma e du, na wan yepi gi wan tu sma nomo. Ma nowan sma noso organisâsi man puru a pina di libisma e pina na heri grontapu. Na a tra sei, Gado man tyari wan lusu kon na a problema disi na heri grontapu, èn a o du dati tu.

Wi e kisi a dyaranti disi na ini a lasti buku fu Bijbel: „[Gado] o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe” (Openbaring 21:4). Prakseri omeni sma o kisi wini fu a pramisi dati. A tekst disi e sori taki Gado abi na prakseri fu tyari wan kaba kon na ala a pina di libisma e pina. Te a o du dati, dan a o puru feti, angriten, siki, nanga kruktudu na grontapu, èn sosrefi ala den ogrisma. Nowan enkri libisma man du dati.

San Gado Kownukondre o du?

Gado o meki a pramisi fu en kon tru, nanga yepi fu a sma di abi a moro bigi makti baka en. A sma dati na Yesus Krestes di kisi wan opobaka. A ten e kon te Yesus sa tiri leki Kownu fu heri grontapu, sondro taki wan sma gens en. Libisma kownu, presidenti, nanga politiekman no o tiri libisma moro. Na presi fu dati, wán Kownu nanga wán tirimakti nomo o de. Dati na a Kownukondre fu Gado.

A Kownukondre dati o puru ala libisma tirimakti. Langa ten na fesi Bijbel ben taki disi: „A Gado fu hemel o opo wan kownukondre di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo” (Danièl 2:44). Sma na heri grontapu o saka densrefi na ondro wán tirimakti di e tiri na wan reti fasi, èn dati na Gado Kownukondre.

Di Yesus ben de na grontapu leki libisma, dan na furu okasi a ben taki fu a Kownukondre dati. A ben taki fu en di a leri den disipel fu en fu begi na a fasi disi: „Meki yu kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Luku taki Yesus e sori taki a Kownukondre de fanowdu fu meki a wani fu Gado pasa na grontapu, èn Gado wani puru ala a pina di sma e pina na heri grontapu.

A bun tirimakti fu Gado o tyari blesi kon di nowan libisma tirimakti o man tyari kon. Prakseri taki Yehovah gi en Manpikin, fu pai a lusu-paiman so taki libisma kan kisi têgo libi. Te a Kownukondre dati di o tyari blesi kon, e tiri, dan safrisafri libisma no o abi sondu moro. San o de a bakapisi? Yehovah „o swari dede fu têgo, èn a o figi den watra-ai fu ala sma puru na den fesi”.—Yesaya 25:8.

Kande son sma e aksi densrefi: ’Fu san ede Gado no du noti ete? San a e wakti?’ Yehovah ben kan du wan sani langa ten kaba fu puru a pina di sma e pina, noso fu sorgu srefi taki sma no e pina moro. Na presi fu dati, a e gi pasi taki sma e pina ete, no fu di a e denki ensrefi nomo, ma fu di a wani taki den pikin fu en na grontapu kisi blesi fu têgo. Wan lobi-ati papa nanga mama o gi pasi taki a pikin fu den nyan pina, efu den sabi taki disi o tyari wini kon gi en fu wan langa pisi ten. Na a srefi fasi tu, Yehovah abi bun reide fu san ede a gi pasi taki libisma e pina fu wan pisi ten, èn Bijbel e tyari kon na krin san na den reide dati. Den reide dati abi fu du nanga a grani di wi abi fu teki wi eigi bosroiti, den abi fu du nanga sondu, èn den abi fu du nanga a reti di Yehovah abi fu tiri. Bijbel e taki tu dati fu wan syatu pisi ten, Gado gi pasi taki wan ogri yeye tiri grontapu.a

Aladi wi no man taki fu ala den reide dati na tapu wan tu bladzijde nomo, toku tu sani de di e gi wi howpu nanga deki-ati. A fosi sani na disi: Awansi sortu pina wi e ondrofeni now, den blesi di Yehovah sa gi wi, o meki ala sani kon bun baka. Boiti dati, Gado e gi wi a dyaranti disi: „Sma no o memre den fositen sani moro, èn den sani dati no o abi krakti na den tapu moro” (Yesaya 65:17). Gado sa puru iniwan pina di sma e pina leki bakapisi fu a gi di a gi pasi taki ogri de fu wan pisi ten.

A di fu tu sani na disi: Gado poti wan ten te a o tyari wan kaba kon na a pina di wi e pina, èn nowan sma kan kenki a sani dati. Yu e memre ete taki a profeiti Habakuk ben aksi Yehovah o langa a ben o gi pasi ete taki sma du ogri èn taki den e strei nanga makandra. Yehovah ben taigi en: „A fisyun o kon tru na wan spesrutu ten . . . A no o kon lati” (Habakuk 2:3). Soleki fa wi o si na ini a tra artikel, dan a „spesrutu ten” dati de krosibei.

[Futuwortu]

[Faki na tapu bladzijde 7]

Bijbeltekst di e taki fu wan tumusi moi tamara

FETI NO O DE MORO:

„Un pipel, kon luku san Yehovah du. Un kon luku sortu bigi sani a du na grontapu. Na ala sei fu grontapu a e meki taki feti e kon na wan kaba.”—Psalm 46:8, 9.

DEN LOBIWAN FU WI O KISI WAN OPOBAKA:

„Gado sa gi wan opobaka na den regtfardikiwan èn na den onregtfardikiwan.”—Tori fu den Apostel 24:15.

NYANYAN O DE GI ALA SMA:

„Furu nyanyan o kon de na grontapu. Srefi na tapu den ede fu den bergi nyanyan o de pasa marki.”—Psalm 72:16.

SIKI NO O DE MORO:

„Nowan sma di e tan na ini a kondre o taki: ’Mi siki.’”—Yesaya 33:24.

OGRISMA NO O DE MORO:

„Gado o figi den ogrisma puru na grontapu. Den bedrigiman, a o rutu puru.”—Odo 2:22.

RETIDU O DE NA ALA SEI:

„Luku, wan kownu [Krestes Yesus] di o tyari retidu kon o tiri, èn den granman o tiri na wan reti fasi.”—Yesaya 32:1.

[Prenki na tapu bladzijde 7]

Gado Kownukondre o tyari wan lusu kon na ala a pina di wi ondrofeni