Noiti a lati fu dini Gado
Na ini Málaga, na a zuidsei fu Spanyorokondre, wan mama nanga en umapikin teki dopu tapu 19 december 2009. Den ala tu nen Ana. Na ini a yari dati, 2352 sma teki dopu na ini Spanyorokondre. Ma wan aparti sani fu a mama disi nanga en umapikin, na a yari di den ben abi di den teki dopu. A mama ben abi 107 yari, èn na umapikin ben abi 83 yari!
San meki taki den teki dopu fu sori taki den gi densrefi abra na Yehovah? Syatu baka 1970, wan birtisma fu den di de wan Kotoigi fu Yehovah, ben gwenti fu kari na umapikin Ana kon na a Gemeente Bukustudie di ben e hori na en oso. Ana ben e go wanwan leisi. Ma fu di Ana ben abi wan grontapuwroko, meki Ana no go na fesi moro fara.
Sowan tin yari baka dati, wan tu fu den pikin fu Ana bigin studeri Bijbel, èn te fu kaba den tron futuboi fu Yehovah. Wan fu den pikin dati, namku Mari Carmen, ben man wiki a lobi baka di en mama ben abi gi den tru tori fu Bijbel, èn a yepi en so taki a bigin studeri Bijbel. Baka dati, Mari Carmen en granmama, namku a moro owru Ana, bigin sori tu taki a ben wani kon sabi moro fu Bijbel. Te fu kaba, tin sma fu a famiri disi teki dopu.
A dei di den tu Ana, mama nanga umapikin, teki dopu, den ben e prisiri srefisrefi. „Yehovah du furu bun sani gi mi, èn a gi mi okasi fu kon leri sabi en”, na so Ana di ben abi 107 yari, ben taki. Na umapikin fu en ben taki tu: „Fosi Paradijs doro, mi wani dini Yehovah, mi wani du a wani fu en, èn mi wani preiki a bun nyunsu so furu leki mi man.”
Den tu uma disi di lasi den masra na ini dede, lobi fu go na den konmakandra. Disi e gi den prisiri moro leki ala tra sani. Wan owruman fu a gemeente fu den e taki: „Den no e misi nowan konmakandra. Ala ten den de srekasreka fu gi piki na a Waktitoren-studie.”
Na eksempre fu den e meki wi prakseri wan tra uma di ben nen Ana èn di ben e dini Gado nanga en heri ati. Na uma dati ben lasi en masra tu na ini dede, èn „noiti a pasa taki a no ben de na ini a tempel, ma dei nanga neti a ben e dini drape aladi a ben e faste èn a ben begi fayafaya”. Na so a kisi a grani fu si a yongu pikin Yesus (Luk. 2:36-38). Aladi Ana ben abi 84 yari, toku a no ben owru tumusi fu dini Yehovah, èn na so a de tu nanga den tu tra Ana na ini a ten disi.
Yu abi famiriman di de klariklari fu arki a boskopu fu Bijbel? Noso yu miti wan owru sma di wani kon sabi moro fu Bijbel èn di de klariklari fu arki te yu e go preiki na den oso? Den sortu sma dati kan tron leki den tu Ana di kari na ini na artikel disi, bika noiti a lati fu dini a tru Gado, Yehovah.
[Prenspari pisi na tapu bladzijde 25]
„Yehovah du furu bun sani gi mi”
[Prenspari pisi na tapu bladzijde 25]
„Fosi Paradijs doro, mi wani dini Yehovah”