A di fu 129 klas fu a Gileadskoro

„Disi na un dei”

TAPU 11 september 2010, sowan 8000 sma ben kon makandra gi wan spesrutu okasi. Disi ben de na okasi pe den zendeling klari a di fu 129 klas fu a Waktitoren Bijbelskoro Gilead. „Disi na un dei”, na so Samuel Herd fu a Tiri Skin fu Yehovah Kotoigi, taigi den studenti. „Wi de dyaso fu prisiri nanga unu!”

„Yesi di e yere”

Brada Herd bigin a programa nanga wan lezing pe a ben taki dati ala Kresten musu abi „yesi di e yere”, fu di den e poti prakseri na Gado Wortu (Odo 20:12). Brada Herd taigi a klas: „Unu ben e arki Yehovah na ini den mun di pasa, èn unu o tan du dati fu têgo.”

Fa nyun zendeling kan du dati na wan koni fasi? „Fu di den e poti prakseri na Gado Wortu”, na so Brada Herd taki. A taki moro fara: „Na ini a programa fu tide, yu o yere furu sani di o sreka yu gi a zendelingwroko di yu o du na ini den yari di e kon.”

„Frutrow na tapu Yehovah nanga yu heri ati”

Gerrit Lösch, wan memre fu a Tiri Skin, ben taki nanga den studenti fu a thema disi di e meki sma denki bun fu a tori disi. A ben taki fu furu difrenti okasi pe a pipel fu Gado na ini owruten èn na ini a ten fu wi, ben sori taki den e frutrow na tapu Yehovah.

Brada Lösch taki dati na a srefi fasi „zendeling musu sori taki den e frutrow na tapu Yehovah te den e go na a kondre pe den musu go”. A ben taki: „Fu eksempre, yu kan aksi yusrefi: ’Mi o man leri wan tra tongo? Mi o man fiti misrefi na wan tra kulturu? Fa mi o du te mi o misi mi famiri nanga a presi pe mi komoto?’” San na a piki tapu den aksi disi? Brada Lösch gi a klas a rai fu „frutrow na tapu Yehovah”.

Brada Lösch leisi sosrefi Odo 14:26 pe skrifi: „Te wan sma abi lespeki gi Yehovah, dan a sabi taki a kan frutrow na tapu Gado ala ten.” Wi o frutrow moro na tapu Yehovah te wi e denki fu den furu fasi fa a blesi wi.

Bijbel e taki dati a sma di e frutrow na tapu Yehovah „o tron leki wan bon di prani na sei watra èn di sutu en rutu go na wan liba. Te dreiten doro, a no o firi en. Na presi fu dati a o abi furu wiwiri.”​—Yeremia 17:7, 8.

A krin fu si san wi kan leri fu a tori disi. Brada Lösch ben taki: „Awansi san o pasa na ini a ten di e kon, yu musu frutrow na tapu Yehovah.”

„Teki na eksempre fu den engel di tan gi yesi na Gado”

Disi ben de a thema fu wan lezing di Stephen Lett, wan memre fu a Tiri Skin, ben hori. Den engel e gi wi wan moi eksempre. Brada Lett taki: „Ala sani di Bijbel e tyari kon na krin fu den engel na bun eksempre gi wi.” Dan a taki fu den fo fasi disi di den engel abi: a fasi fa den horidoro, a sakafasi fu den, a fasi fa den yepi trawan èn a fasi fa den tan gi yesi. A ben o bun fu abi den fasi dati tu.

Bijbel e taki dati ’a granman fu Persia’, wan tranga ogri yeye, ben gens wan engel 21 dei langa (Danièl 10:13). Na engel dati ben horidoro. Brada Lett sori taki sosrefi Kresten „e feti . . . nanga den ogri yeye na hemel” (Efeisesma 6:12). A ben taigi den studenti fu „feti èn fu du tranga muiti fu tan du a wroko fu den”.

Di Manowa, a papa fu Simson, ben aksi wan engel fa a nen, dan na engel no taigi en dati. Na engel dati ben sori sakafasi (Krutuman 13:17, 18). Brada Lett taigi den studenti: „Te wan sma e pruberi fu prèise yu noso a e taki o kefalek den sani de di yu du, dan sori sakafasi fu di yu no e meki a sma poti prakseri na yu, ma na Yehovah nanga en organisâsi.”​—1 Korentesma 4:7.

Di Yesus ben de na ini a dyari fu Getseimanei, syatu bifo a dede, dan „wan engel fu hemel kon na en èn a gi en krakti” (Lukas 22:43). Na engel dati ben yepi en. Brada Lett taki: „Begi Yehovah so taki yu kon si san de tranga fanowdu na ini a kontren pe yu o dini leki zendeling, èn nanga a yepi di Yehovah e gi, yu musu pruberi fu yepi sma nanga den sani di den abi fanowdu.”

Fu di na soso wan tu engel teki a sei fu Satan di a opo ensrefi teige Gado, meki wi kan taki dati moro furu fu den engel, na tumusi moi eksempre te wi e luku a fasi fa den tan gi yesi na Gado.​—Openbaring 12:4.

Brada Lett gi den studenti deki-ati fu „kakafutu gi Didibri, neleki fa den engel di tan gi yesi na Gado ben du.” „Kakafutu gi Didibri, èn a sa lon gowe fu unu.”​—Yakobus 4:7.

Dri prenspari pisi di ben kon na ini a programa tu

„Meki Yehovah tan de a stonbergi di yu e frutrow nanga yu heri ati.” Brada Gary Breaux, wan memre fu a Bijkantoro Komte fu Amerkankondre, ben taki fu a moi thema dati di teki puru fu Psalm 73:26. A lezing disi yepi den studenti fu frustan o prenspari a de fu frutrow tapu Yehovah. Na sortu fasi Yehovah de leki wan stonbergi? Brada Breaux taki: „Wan ston kan hori wan pisi papira na gron te wan bigi winti e wai. Na a srefi fasi, Yehovah kan meki taki wi no e degedege èn a kan kibri wi ati.” A no de fu taki dati wi ati kan kori wi te wi e kisi fu du nanga tesi pe wi sa abi fu horidoro (Yeremia 17:9). Wan tra weer, tra sortu nyanyan, tra sma nanga suma yu abi fu libi na ini wan zendeling-oso, iya, iniwan fu den sani disi kan meki taki yu wani tapu nanga a wroko. Brada Breaux taki: „Yu o kisi fu du nanga situwâsi pe yu o abi fu luku sortu sani yu kan du èn pe yu o abi fu teki wan bosroiti. Yu o teki wan bosroiti di o plisi Yehovah? Te yu du dati, dan Yehovah o tron ’a stonbergi fu yu di yu o frutrow nanga yu heri ati’. A o sori yu sortu pasi yu musu waka.”

„Yu abi nofo bribi fu meki yu futu kon nati?” Sam Roberson, wan leriman fu a Gileadskoro, taki fu a thema dati di teki puru fu Yosua kapitel 3. Fa milyunmilyun Israelsma ben kan abra a Yordan-liba, aladi frudu ben de? Yehovah taigi Yosua fu taigi den priester fu „tanapu na ini a watra fu a liba”. Gado ben pramisi: „Fa den futu o kisi a watra, a watra . . . fu a liba o tapu fu lon. A watra o tan tanapu leki wan bigi dan” (Yosua 3:8, 13). Brada Roberson taigi den studenti: „Neleki fa a Yordan-liba ben kan meki taki den Israelsma no kisi den blesi, na so yu o kisi fu du nanga muilek situwâsi di kan meki taki yu no kisi blesi, efu yu gi pasi taki dati pasa.” Fu eksempre, a kan muilek fu feni en nanga den tra zendeling. Fa yu o lusu a problema disi? „Luku a wroko, ma no luku den wrokoman.” Brada Roberson gi a klas a rai disi: „Efu yu e sori nofo bribi fu meki yu futu kon nati, dan Yehovah o yepi yu fu pasa den muilek situwâsi na ini yu wroko leki zendeling.”

„Den sani di yu wani du o waka bun.” Dati na a thema fu a lezing di William Samuelson, wan leriman fu a Gileadskoro, ben hori. A lezing fu en ben teki puru fu Odo 16:3, pe skrifi: „Poti ala den hebi fu yu na ini Yehovah anu, dan den sani di yu wani du, o waka bun.” Brada Samuelson aksi den studenti: „A tekst disi wani taki dati yu no abi fu du noti fu meki den sani di yu wani du waka bun? A wani taki dati yu musu fu ’poti den hebi’ fu yu nomo na ini Yehovah anu?” Nôno, bika a ben taki dati Odo 16:1 e sori: „Na libisma srefi e bosroiti san e kon na ini den ati, ma a piki di den e gi na fu Yehovah.” Brada Samuelson taki: „Yehovah no o piki yu na wan wondru fasi. Na presi fu dati, yu musu sorgu taki yu e kisi a deki-ati fu du san reti. Te yu e studeri, te yu e begi, èn te yu e wroko bun makandra nanga a bijkantoro na ini a kondre pe yu o dini leki zendeling, dan yu o tan abi wan yoisti denki èn Yehovah srefi o meki den sani di yu wani du, waka bun.”

Ondrofenitori nanga interview

Di den studenti ben kisi leri na a Gileadskoro, dan den ben musu go na ini a preikiwroko makandra nanga den gemeente fu Yehovah Kotoigi na ini a kontren drape. Mark Noumair, wan tra leriman fu a Gileadskoro, interview wan tu studenti so taki den fruteri san den ondrofeni. Wan prenspari sani di ben kon na fesi na ini den ondrofenitori, na a fasi fa begi yepi den fu feni reti-ati sma na ini a kontren.

Fu eksempre, di wan trowpaar ben de na wan nyanyan-oso, dan wan yonkuman di ben e wroko drape, ben si fa den ben begi. A waka go na den èn a aksi efu den na Yehovah Kotoigi. Di den taki dati den na Kotoigi, dan a taigi den taki a ben kweki leki wan Kotoigi, ma taki a ben gowe libi a bribi. A ben du wan ogri srefi, èn a ben koti strafu. Now a yonkuman disi ben wani dini Yehovah baka. A ben taki tu dati fosi a trowpaar ben kon na inisei, a ben begi Gado fu yepi en fu drai en libi. A kisi piki tapu a begi fu en!

Brada Rudi Hartl, fu na afdeling di e piki den aksi di sma abi fu Bijbel, ben hori a lezing di nen „Tesi èn si taki Yehovah bun”. A ben interview Wayne Wridgway fu Mosambik, Jason Reed fu Chili, nanga Kenji Chichii fu Nepal. Ala den dri brada disi na zendeling di ben kisi leri na a Gileadskoro. Den brada disi ben taki krin fu son problema di den ben abi leki nyun zendeling soleki fu leri wan tra tongo, fu fiti densrefi na wan tra kulturu, noso fu sabi san fu du te den ben misi den famiri nanga a presi pe den komoto. Brada Chichii taki: „Wan sani di ben yepi wi na fu meki mati na ini wi nyun gemeente so esi leki wi ben man. Di wi nanga den sma fu a gemeente kon de moro bun nanga makandra, dan a ben moro makriki gi wi fu no misi wi famiri nanga a presi pe wi komoto.”

Syatu baka di ala den 56 studenti kisi den diploma, wan fu den leisi wan moi brifi fu sori o furu warderi a klas abi. Wan pisi fu a brifi ben de gi a Tiri Skin èn a ben taki: „Wi leki klas, ben si nanga wi eigi ai fa unu gi unsrefi na wan lobi-ati fasi èn sondro fu kon weri. Unu ben sorgu gi den les di wi musu leri, unu ben kon luku a klas, èn unu gi wi moi rai. Fu di unu sori lobi gi wi, meki wi o du ala san wi man fu du a srefi tu te wi doro na a kondre pe wi musu go. Unu gi wi a moi eksempre fa fu sori lobi, pasensi, sakafasi, èn fa fu sori taki wi e broko wi ede nanga trawan.”

[Prenspari pisi na tapu bladzijde 28]

’Te wan sma e pruberi fu prèise yu, dan no meki a sma poti prakseri na yu’

[Prenspari pisi na tapu bladzijde 29]

„Yu o kisi fu du nanga muilek situwâsi”

[Schema/​Karta na tapu bladzijde 31]

WAN TU SANI FU A KLAS DISI

A nomru fu den kondre pe den studenti komoto: 9

Studenti: 56

Trowpaar: 28

Gemiddeld yari di den abi: 33.0

Gemiddeld yari di den dopu: 17.9

Gemiddeld yari di den de na ini a furuten diniwroko: 13.3

[Karta]

(Efu yu wani si pe den sani disi skrifi, luku a tijdschrift)

Den 25 kondre pe den studenti o go

KONDRE PE DEN ZENDELING O GO DINI

BOLIFIA

BOTSWANA

BULGARIA

KONGO (KINSYASA)

IVOORKUST

GAMBIA

DOISRIKONDRE

INDIA

INDONESIA

KENIA

LIBERIA

MASEDONIA

MADAGASKAR

MALÈISIA

MOSAMBIK

PANAMA

PERU

POLEN

RUMEINIA

SERFIA

SIÈRA LEON

SWASILAND

TANSANIA

UGANDA

ZIMBABWE

[Prenki na tapu bladzijde 30]

Den studenti fu a Gileadskoro e demo wan fu den sani di den ondrofeni na ini a preikiwroko

[Prenki na tapu bladzijde 31]

A di fu 129 klas fu a Waktitoren Bijbelskoro Gilead

Den nen di de fu si na ondrosei, poti na ini rèi di nomru fu fesisei go na bakasei, èn na ini ibri rèi den nen poti fu a kruktu-anusei go na a reti-anusei.

(1) R. Munaretto; Y. Olofsson; K. Budden; L. Najdzion; G. Moya; G. Treviño; A. Dion; A. Fleegle

(2) J. Smith; J. Michael Raj; S. Smith; A. Paramo; J. McDonald; M. Deans; S. Joyal; L. Watson

(3) C. Joyal; T. Crawley; D. Hacker; J. Shynkarenko; T. Knapp; J. Ayling; C. Highley; B. Olofsson

(4) M. Fitzpatrick; B. Najdzion; L. Skallerud; A. Harris; S. Harris; R. Budden; Y. Paramo; K. Skallerud

(5) B. Crawley; J. Michael Raj; A. Lodge; R. Lodge; N. Herms; J. Fitzpatrick; R. Moya; P. Munaretto

(6) S. Watson; M. Deans; J. Hacker; J. McDonald; J. Treviño; S. Harris; C. Herms; P. Harris

(7) V. Shynkarenko; T. Highley; A. Smith; J. Dion; R. Ayling; B. Smith; T. Knapp; B. Fleegle