Gado kownukondre de na ini wan sma en ati?

„A Kownukondre fu Gado e kon te wan sma e gi yesi nanga en heri ati”, na so Pawsu Benedictus XVI skrifi na ini a buku fu en (Jesus of Nazareth). Son sma e bribi taki a Kownukondre fu Gado na te wan sma e drai en libi. So wan sma e teki Yesus Krestes èn a e poti bribi na ini en. A de so taki Gado Kownukondre de na ini wan sma en ati nomo, iya, a de wan kenki nomo di wan sma e tyari kon na ini en libi?

A KOWNUKONDRE ben prenspari trutru gi Yesus. A Kownukondre ben de „a moro prenspari sani di Yesus ben preiki fu en”, na so Pawsu Benedictus e taki. Na ini a moro bigi pisi fu a syatu diniwroko fu Yesus, a ben e waka na ini a heri kondre fu „preiki a bun nyunsu fu a kownukondre” (Mateyus 4:23). Den sani di Yesus ben e leri sma èn den wondru di a ben e du, ben e sori krin taki a Kownukondre no wani taki nomo dati wan sma teki Gado na ini en libi èn taki a e gi yesi na en. A Kownukondre abi fu du nanga wan tirimakti, a krutu di a o tyari kon, èn den têgo blesi di a o meki sma kisi.

Wan tirimakti èn a krutu di a o tyari kon

Wan leisi na a kabapisi fu Yesus en diniwroko, a mama fu Yakobus nanga Yohanes, disipel di ben wroko skinskin nanga Yesus, ben kon na Yesus èn a taki: „Pramisi taki den tu manpikin fu mi o sidon na yu sei na ini a kownukondre fu yu, wan fu den na yu reti-anusei èn a trawan na yu kruktu-anusei” (Mateyus 20:21). A de krin taki a no ben e taki fu wan sani di ben de na ini na ati fu den manpikin fu en. A ben frustan taki a Kownukondre ben abi fu du nanga a tiri di sma ben o tiri makandra nanga Yesus, èn a ben wani taki den manpikin fu en kisi a makti fu tiri tu. Fu taki en leti, Yesus ben pramisi den 11 apostel di ben tan horibaka gi en, taki den ben o de na ini a Kownukondre fu en èn taki den ben o „sidon na tapu kownusturu fu krutu” sma makandra nanga en (Lukas 22:30). Sobun, gi den bakaman fu Yesus, a Kownukondre ben de wan trutru tirimakti.

Fa a ben de nanga den sma di ben libi na ini a ten fu Yesus? Den ben denki taki a Kownukondre ben de a kenki di wan sma e tyari kon na ini en libi, noso den ben fruwakti moro leki dati? We, syatu bifo a Paskafesa fu a yari 33, di Yesus ben e rèi na tapu wan buriki fu kon na ini Yerusalem, dan den ipi-ipi sma ben gi en wan switikon. Sonwan fu den ben bari: „Grantangi, wi e begi yu, frulusu a Manpikin fu David!” (Mateyus 21:9) Fu san ede den ben bari a sani dati? A no de fu taki dati den sma ben kon frustan taki Yesus ben de a pramisi Mesias, èn taki Gado ben o gi en wan Kownukondre di ben o tan fu têgo, iya, a ben o gi en „a kownusturu fu en papa David”. Den ben e angri gi a frulusu, a vrede nanga a retidu di a Kownukondre ben o tyari kon.​—Lukas 1:32; Sakaria 9:9.

Têgo blesi

Srefi sma di no ben poti prakseri na a preikiwroko di Yesus ben du, ben sabi taki a ben e gi sma leri fu a Kownukondre. Di den ben e spikri Yesus na wan postu, dan wan ogriman di ben spikri na en sei, ben begi en: „Yesus, memre mi te yu kon na ini yu kownukondre.” San Yesus piki en? Yesus ben gi a man di ben de fu dede, a dyaranti: „Yu o de nanga mi na ini Paradijs.”​—Lukas 23:42, 43.

Soleki fa a sori, na ogriman dati ben bribi taki baka te Yesus kisi wan opobaka, a ben o kisi wan Kownukondre noso a ben o go na ini wan Kownukondre. Yesus ben o abi a makti fu gi a man disi, èn sosrefi milyunmilyun tra sma, wan opobaka èn a ben o yepi en fu tyari kenki kon na ini en libi. Boiti dati, Yesus ben o wani du dati tu. Iya, Yesus ben o kisi makti leki Tiriman na hemel, èn nanga yepi fu a Kownukondre a ben o tyari têgo blesi kon gi sma na heri grontapu.—Yohanes 5:28, 29.

Wan Kownukondre di ben de na den mindri

A no de so taki Yesus ben taki dati „a kownukondre fu Gado de na un mindri”? Iya, den wortu dati di Yesus taki, skrifi na ini Lukas 17:21. Fu taki en leti, son Bijbelvertaling e taki dati „da kownoekondre foe Gado de na oen ini”, aladi trawan e taki dati a de „na un mindri”. (Luku fu eksempre, Da Bijbel na ini Sranantongo nanga Nyun Testamenti.) San Yesus ben wani taki nanga den wortu dati?

Den vers na fesi e sori taki Yesus ben taki nanga den Fariseiman, wan Dyu kerkigrupu di ben teige en. Den ben abi den eigi denki te a ben abi fu du nanga a Mesias èn nanga en Kownukondre. Den ben denki taki a Mesias ben o kon „na tapu den wolku” leki wan Kownu nanga furu glori, di ben o frulusu den Dyu fu den Romesma èn di ben o seti a kownukondre fu Israel baka (Danièl 7:13, 14). Ma Yesus ben sori den taki den ben abi wan fowtu denki fu di a taigi den: „A kownukondre fu Gado no o kon na so wan aparti fasi taki sma o si en krinkrin.” Baka dati a taki: „A kownukondre fu Gado de na un mindri.”​—Lukas 17:20, 21.

Aladi Yesus ben e gi sma leri èn a ben e du wondru di ben sori krin taki a ben de a pramisi Kownu fu a Kownukondre dati, toku den Fariseiman di no ben abi wan krin ati èn di no ben abi trutru bribi, ben gens en moro nanga moro. Den no ben bribi taki Yesus ben de a Mesias. Dati meki Yesus sori den krin taki a Kownukondre ben de na den mindri fu di a Kownu di ben o tiri ben de ’na den mindri’. A no aksi den fu luku na ini den ati.a Yesus nanga den disipel fu en ben tanapu na den fesi. A taki: „Gado kownukondre de dyaso nanga unu.”​—Lukas 17:21, Contemporary English Version.

Wan Kownukondre di de prenspari gi wi

Aladi Gado Kownukondre no de na ini na ati fu sondu libisma, toku a musu de wan sani di de prenspari gi wi. Yesus ben e leri sma, èn a ben e du wondru fu meki den sma di ben arki en, kisi bribi nanga den heri ati taki wan tirimakti ben o kon di ben o tiri na wan reti fasi. A tirimakti disi ben o tyari trutru vrede kon èn a ben o meki sani waka bun. A ben wani taki den ben musu abi bribi di ben o meki den libi na wan moro bun fasi. Fu taki en leti, a leri den fu begi na a fasi disi: „Wi Tata na hemel, meki yu nen kon santa. Meki yu kownukondre kon. Meki yu wani pasa na grontapu soleki fa a e pasa na hemel” (Mateyus 6:9, 10). Den wortu di Yesus taki ben naki na ati fu furu fu den arkiman fu en. Den ben kon kisi a bribi di meki taki den waka baka Yesus èn taki den du muiti fu kisi den blesi fu Gado Kownukondre.

Yu wani kisi a srefi sortu bribi dati? We, dan san yu musu du fu kon abi so wan bribi? Memre den bigin wortu fu Yesus di a ben hori a Bergitaki fu en. A ben taki: „Koloku fu den sma di sabi taki den de na nowtu na yeye fasi, bika den sa kisi a kownukondre fu hemel” (Mateyus 5:3). Fu san ede yu no e teki a kari fu studeri Bijbel nanga Yehovah Kotoigi, den sma di tyari a tijdschrift disi kon gi yu? Disi o meki taki yu kisi howpu. A no a howpu nomo taki yu o kenki yu libi, ma yu o abi a howpu taki wan tirimakti o kon di e tiri na wan reti fasi, iya, dati na a Kownukondre di o tyari vrede kon èn di o meki ala sani waka bun.

[Futuwortu]

[Prenspari pisi na tapu bladzijde 11]

A Kownukondre fu Gado ben de na ini na ati fu den tranga-ede gensman fu Yesus di ben wani kiri en?