A kownukondre fu Gado de na ini yu ati?
A piki fu Bijbel
Nôno, Gado Kownukondre no de na ini na ati fu wan Kresten.a Bijbel e taki pe a de te a e kari en „a Kownukondre fu hemel” (Mateyus 4:17). Bijbel e sori taki a Kownukondre na wan trutru tirimakti di e tiri komoto fu hemel.
Gado Kownukondre abi tiriman, a abi sma di a e tiri, a abi wet èn a kisi a makti fu meki a wani fu Gado pasa na hemel nanga grontapu.—Mateyus 6:10; Openbaring 5:10.
Gado en regering noso Kownukondre o tiri ala „den pipel, nanga den sma di de fu den difrenti kondre èn di e taki difrenti tongo” na grontapu (Danièl 7:13, 14). A makti di a abi fu tiri no e kon fu den sma di a e tiri, ma a e kon fu Gado srefi.—Psalm 2;4-6; Yesaya 9:7.
Yesus ben taigi den apostel fu en di ben tan horibaka gi en taki den ben o de makandra nanga en na ini a Kownukondre fu hemel fu „sidon na tapu kownusturu”.—Lukas 22:28, 30.
A Kownukondre abi feanti di a o pori.—Psalm 2:1, 2, 8, 9; 110:1, 2; 1 Korentesma 15:25, 26.
Bijbel no e leri taki a Kownukondre fu hemel de na ini yu ati noso taki a e tiri na ati fu wan sma. Toku a e sori dati „a wortu fu a Kownukondre” noso a „bun nyunsu fu a Kownukondre” kan abi krakti na tapu wi ati.—Mateyus 13:19; 24:14.
San den wortu „a kownukondre fu Gado de na ini yu” wani taki?
A fasi fa son Bijbelvertaling vertaal Lukas 17:21 e meki taki son sma e bruya. Den no man frustan pe a Kownukondre de. Fu eksempre, son vertaling e taki dati Kownukondre fu Gado de na ini yu. Fu frustan san a vers disi wani taki, wi musu luku san den tra tekst na ini a kapitel e taki.
Gado Kownukondre no ben de na ini a ati fu den gensman di ben wani kiri Yesus.
Yesus ben e taki nanga den Fariseiman, a grupu kerki leriman di ben e gens en èn di ben seti sani fu kiri en (Mateyus 12:14; Lukas 17:20). A ben o bun fu denki taki a Kownukondre ben de na ini na ati fu den man disi di ben gens Yesus? Yesus ben taigi den: „Na ini un ati unu e hoigri kefalek èn unu e prakseri soso kruktudu.”—Mateyus 23:27, 28.
Sobun, a Kownukondre fu hemel ben de na „mindri” den Fariseiman fu di Yesus, a sma di Gado poti fu tiri leki Kownu, ben tanapu na den fesi.—Lukas 1:32, 33.
a Furu Kresten kerki e leri taki a Kownukondre fu Gado de na ini sma noso na ini sma ati. Fu eksempre, wan kerki na ini Amerkankondre (Southern Baptist Convention) ben fruklari taki wan pisi fu a Kownukondre fu Gado na „a tiri di Gado e tiri na ati nanga a libi fu wan sma”. Paus Benedict XVI taki a srefi sani na ini en buku Jesus of Nazareth (Yesus fu Nasaret). A taki dati „a Kownukondre fu Gado e kon na wan sma te a e opo en ati gi Gado”.