Wan nyun Ingrisitongo Waktitoren di moro makriki fu frustan
WI BREITI fu meki bekènti taki gi wan pisi ten fu wán yari, wan nyun Ingrisitongo Waktitoren nanga studie-artikel o tyari kon na doro ibri mun, makandra nanga a wan di wi e kisi kaba. A tijdschrift disi na a fosiwan fu den Waktitoren dati. A Waktitoren disi o abi den studie-artikel na ini, èn sosrefi tra artikel, efu presi de ete. Wi e bribi taki a seti disi trutru o tranga a bribi fu furu Yehovah Kotoigi. Fu san ede dati de so?
Ingrisitongo na a tongo di den brada nanga sisa fu wi na ini kondre soleki Fidyi, Gana, Kenia, Liberia, Nigeria, Papuwa Nyun Ginea, nanga Solomon-èilanti e taki. Furu fu den brada nanga sisa fu wi di e libi na ini den kondre disi e taki tra tongo fu a kontren pe den e tan, noso fu a lo fu den. Aladi dati de so, toku furu fu den gwenti taki Ingrisitongo na den gemeente konmakandra, noso na ini a preikiwroko. Ma na Ingrisitongo di den e taki makriki moro a wan di wi e gebroiki na ini den publikâsi fu wi. Boiti dati, son futuboi fu Yehovah froisi go tan na tra kondre pe den musu taki Ingrisitongo nanga trawan, aladi den no man taki a tongo disi so bun. Èn den no man go na konmakandra di e hori na ini a mamatongo fu den.
Den artikel di wi e studeri ibri wiki na a Waktitoren-studie, na a moro prenspari fasi fa wi e kisi yeye nyanyan na a reti ten. Dati meki den brada tyari na Ingrisitongo Waktitoren kon na doro di moro makriki fu frustan. A Waktitoren disi no abi ala sortu muilek wortu na ini, èn a skrifi na wan moro makriki fasi. Boiti dati, a sa yepi ala sma di de na den konmakandra, fu kisi wini dorodoro fu a leri. A nyun Waktitoren disi sa abi wan tra kafti. Na ini a Waktitoren dati, den edeprakseri, den paragraaf, den aksi fu luku baka san wi leri, nanga den prenki, sa de na a srefi presi pe den de na ini a tra Waktitoren di wi gwenti fu kisi. Sobun, ala sma kan gebroiki ibriwan fu den tu Waktitoren disi fu man teki prati na a Waktitoren-studie. Na ondrosei fu a bladzijde yu kan si na eksempre fu paragraaf 2 fu a fosi studie-artikel fu a Waktitoren disi. Luku fa den wortu fu a nyun Waktitoren di de na a reti-anusei, e difrenti fu a faki na a kruktu-anusei.
Wi e howpu taki a nyun seti disi o de wan piki tapu den begi fu furu brada nanga sisa di ben aksi Yehovah: „Yepi mi fu kisi frustan, so taki mi kan leri den komando fu yu” (Ps. 119:73). Wi abi na overtoigi taki den wan di no man taki Ingrisitongo so bun, sosrefi yonguwan di e taki Ingrisitongo, sa man sreka densrefi moro bun gi a Waktitoren-studie di e hori ibri wiki. Wi e gi Yehovah ala tangi, fu di a ’lobi di a abi gi ala brada’ meki taki a e gebroiki a „getrow èn koni srafu” fu gi wi bogobogo yeye nyanyan.—1 Petr. 2:17; Mat. 24:45.
A Tiri Skin fu Yehovah Kotoigi