Gado e tan na wán presi nomo?

Difrenti kerki e taki dati Gado de na ala sei. Nanga dati den wani taki dati Gado e tan na ala presi na a srefi ten. Fu eksempre, wan buku e taki dati Gado na a sma di „de na ala sei èn na ini ala sani” (New Catholic Encyclopedia). John Wesley, a sma di seti a Methodist Kerki, ben skrifi wan lezing di nen „A denki di sma abi taki Gado de na ala sei”. Na ini a lezing disi a taki dati „nowan presi no de na hemel noso na grontapu pe Gado no de”.

San Bijbel e leri wi? A tru taki Gado de na ala sei, taki a de na ala presi na hemel, na grontapu, èn srefi na ini libisma na a srefi ten?

Te yu luku en bun, dan Bijbel e taki dati Gado abi wán spesrutu presi pe a e tan, èn dati na hemel. Bijbel e taki dati Kownu Salomo ben begi Gado: „Yu di de na hemel, a presi pe yu e tan fu ala ten, mi e begi yu fu arki den begi disi” (1 Kownu 8:43). Di Yesus Krestes leri den disipel fu en fa den musu begi, dan a taigi den taki a sma di den musu begi, na „wi Tata na hemel” (Mateyus 6:9). Bijbel e taki dati baka di Krestes kisi wan opobaka, a go „na ini hemel srefi fu go na fesi Gado”.​—Hebrewsma 9:24.

Den tekst disi e sori krin taki Yehovah Gado no e tan na ala sei, ma soso na ini hemel. A no de fu taki dati a „hemel” di kari na ini den tekst disi no abi fu du nanga a loktu lontu grontapu, noso nanga a hemel pe ala den stari nanga planeiti de. Den pisi fu hemel di wi man si no bigi nofo fu a Mekiman fu hemel nanga grontapu tan na ini (1 Kownu 8:27). Bijbel e taki dati „Gado na wan Yeye” (Yohanes 4:24). A e tan na ini a pisi fu hemel di wi no man si.​—1 Korentesma 15:44.

Ma fa a de nanga den pisi fu Bijbel di e gi sma a denki taki Gado de na ala sei? Fu eksempre, na ini Psalm 139:7-10, David ben taki fu Gado: „Pe mi kan go kibri gi a yeye fu yu èn pe mi kan lon go, so taki yu no si mi? Efu mi ben o opo go na hemel, yu ben o de drape. Efu mi ben o seti mi bedi na ini Grebi, dan yu ben o de drape tu. Efu mi ben o teki den frei fu musudei fu frei go na a moro farawe se, dan drape srefi yu eigi anu ben o tyari mi.” Den tekst disi e sori trutru taki Gado de na ala sei, sobun, taki a e tan na ibriwan fu den presi di kari dyaso?

Luku taki David ben aksi Gado fosi: „Pe mi kan go kibri gi a yeye fu yu?” Nanga yepi fu en santa yeye, Gado kan si iniwan sani èn a kan seni a krakti fu en go na iniwan presi, sondro taki ensrefi e go drape noso e tan drape. Luku na eksempre disi: Na ini den yari di pasa, sabiman ben man ondrosuku a gron fu a planeiti Mars di de milyunmilyun kilometer moro fara fu Grontapu. Fa den ben man du dati? Densrefi no go drape, ma den seni wrokosani go na a planeiti Mars fu meki ala sortu fowtow èn fu ondrosuku sani, so taki den ben kan kon sabi fa sani de drape.

Na so a de tu taki Yehovah Gado no abi fu de na ala sei fu man kon sabi san e pasa na iniwan presi na hemel noso na grontapu. Gado Wortu e taki: „Nowan fu den sani di Gado meki na sani di a no man si” (Hebrewsma 4:13). Iya, a bigi krakti fu Yehovah, noso a santa yeye fu en, kan doro iniwan presi. Na so a man si ala sani èn a man du a wani fu en komoto fu wan-enkri presi. Dati na a „santa tanpresi” fu en na hemel.​—Deuteronomium 26:15.