Gado de na ala sei na wi lontu?
A piki fu Bijbel
Gado man si ala sani èn a man du san a wani na iniwan presi (Odo 15:3; Hebrewsma 4:13). Ma toku Bijbel no e leri taki Gado de na ala presi na ini ala sani. Na presi fu dati Bijbel e leri wi taki Gado na wan sma èn a abi en eigi tanpresi.
A fasi fa Gado de: Gado na wan yeye (Yohanes 4:24). Wi no man si en (Yohanes 1:18). Den fisyun na ini Bijbel e sori taki Gado abi wan spesrutu presi pe a e tan. Noiti Bijbel taki dati Gado e tan na ala sei.—Yesaya 6:1, 2; Openbaring 4:2, 3, 8.
A tanpresi fu Gado: A tanpresi fu Gado e difrenti fu a di fu libisma. Wi no man si pe a e tan fu di a ’tanpresi disi de na ini hemel’ (1 Kownu 8:30). Bijbel e taki fu wan tori pe yeye-mekisani ’ben kon na fesi Yehovah’.a Disi e sori taki Gado abi wan spesrutu presi pe a e tan.—Yob 1:6.
Efu Gado no de na ala sei na wi lontu, dan a de so taki a man broko en ede nanga mi trutru?
Iya. Gado e broko en ede trutru nanga ibriwan fu wi. Aladi a e libi na ini hemel, toku a e poti prakseri na den wan na grontapu di e suku fu dini en nanga den heri ati èn a e yepi den (1 Kownu 8:39; 2 Kroniki 16:9). Luku fa Yehovah e yepi den wan di e dini en nanga wan krin ati:
Te yu e begi: Yehovah man yere wi na a srefi momenti te wi e begi en.—2 Kroniki 18:31.
Te yu e firi brokosaka: „Yehovah de krosibei fu den sma di lasi-ati. A e frulusu den wan di brokosaka”—Psalm 34:18.
Te wi abi rai fanowdu: Yehovah ’o gi yu koni èn a o sori yu a pasi di yu musu waka’ nanga yepi fu en wortu Bijbel.—Psalm 32:8.
Fowtu denki di sma abi fu pe Gado de
Fowtu denki: Gado de na ini ala den sani di a meki.
A tru: Gado no e tan na grontapu noso na ini iniwan sani di a meki (1 Kownu 8:27). A tru taki den stari nanga tra sani di Gado meki ’e taki fu a glori fu en’ (Psalm 19:1). Ma toku Gado no e tan na ini den sani di a meki, neleki fa wan sma di e teken moi sani no man tan na ini den sani disi. Toku yu kan kon sabi fa wan sma de te yu luku den sani di a e teken. Na so a de tu taki wi man kon sabi den fasi fu Gado ’te wi luku den sani di a meki.’ Wan tu fu den fasi disi na lobi, koni nanga a makti fu en.—Romesma 1:20.
Fowtu denki: Gado musu de na ala presi fu kan sabi ala sani èn fu man de almakti.
A tru: A santa yeye fu Gado na a krakti di a e gebroiki fu du a wani fu en. Nanga yepi fu a krakti disi Gado man du ala sani èn a man si ala sani sondro taki ensrefi de drape. A kan du disi na iniwan momenti di a wani.—Psalm 139:7.
Fowtu denki: Psalm 139:8 e leri wi taki Gado de na ini ala sani, fu di a e taki: „Efu mi ben o opo go na hemel, yu ben o de drape. Efu mi ben o seti mi bedi na ini Grebi, dan yu ben o de drape tu.”
A tru: A tekst disi no e taki fu a presi pe Gado e tan. Ma a e sori wi taki presi no de pe Gado no man doro fu yepi wi.
a Yehovah na a nen fu Gado soleki fa a skrifi na ini Bijbel.