A di fu 130 klas fu a Gileadskoro
Wan prisiri dei pe sma ben e fruwakti moi sani
TAPU satra 12 maart 2011, moro leki 8.500 sma ben de na a konmakandra di ben hori, fu di den sma fu a di fu 130 klas fu a Waktitoren Bijbelskoro Gilead ben klari a skoro fu den. Den wan di ben de drape ben de nanga bigi prisiri èn den ben e fruwakti moi sani. Na den mindri yu ben abi den studenti, den famiri fu den, nanga mati. Furu sma ben e angri fu kon sabi san den ben o yere na a konmakandra disi. Den ben wani sabi tu fa a ben o waka nanga den zendeling disi di heri esi ben o go dini na difrenti kondre na grontapu fu leri sma den tru tori fu Bijbel.
„Koloku fu ala den sma di e tan wakti” Yehovah
A moi prakseri dati di teki puru fu Yesaya 30:18 ben de a nen fu a lezing di Geoffrey Jackson hori. A brada disi na wan memre fu a Tiri Skin fu Yehovah Kotoigi, èn sosrefi fesiman fu a programa. Na wan switi fasi èn nanga pikinso lafulafu, a brada disi fristeri den studenti èn a taigi den taki efu den ben man pasa den tyalensi fu a Gileadskoro, dan seiker den ben o man pasa a dei disi tu. San den studenti ben kan fruwakti fu a ten di ben de na den fesi? A brada taki fu dri moi sani di wi kan leri fu Yesaya 30:18-21.
A fosi sani di Brada Jackson taki, na disi: „Yu kan fruwakti taki Yehovah sa arki den begi fu yu.” A taki fu a dyaranti di skrifi na ini vers 19: „Te [Gado] yere wan fu unu e bari kari en, a o du bun gi en nomonomo.” Brada Jackson sori tu taki na ini Hebrewtongo, a tekst disi no abi fu du nanga wan grupu sma, ma nanga wán sma nomo. A taki dati Yehovah e arki ibriwan fu den begi fu wi. „Aladi Yehovah na wi papa, toku a no e aksi wi ’Fu san ede yu no kan abi deki-ati neleki a sma dati?’ Na presi fu dati, a e arki ibriwan fu wi bun, èn a e piki den begi fu wi.”
Leki di fu tu sani, a takiman sori taki wi kan fruwakti fu kisi problema. A ben taki: „Yehovah no e pramisi wi taki wi libi o de sondro problema, ma a o yepi wi.” Soleki fa vers 20 e sori, Gado ben taki dati te feanti ben o lontu Israel, dan banawtu nanga nowtu ben o kon de leki nyanyan nanga watra gi den. Ma ala ten Yehovah ben o de klariklari fu frulusu a pipel fu en. Den Gilead studenti o kisi fu du tu nanga problema nanga tyalensi, ma a no abi fu de sani di den e fruwakti! Brada Jackson ben taki moro fara: „Ma yu kan fruwakti taki Yehovah o de drape fu yepi yu fu pasa ibriwan fu den tyalensi disi.”
Leki di fu dri sani, Brada Jackson memre den studenti san vers 20 nanga 21 e sori. A taigi den: „Unu kan fruwakti taki Gado o sori unu pe fu go, sobun, suku a tiri dati!” A ben taki dati na ini a ten disi, ibri Kresten musu arki bun te Yehovah e taki nanga yepi fu Bijbel nanga Bijbel publikâsi. Na wan switi fasi a takiman gi den studenti deki-ati fu tan leisi Bijbel ibri dei, fu di den libi de na ini a tori.
„Un musu abi bigi lespeki gi Yehovah”
Anthony Morris fu a Tiri Skin tyari kon na krin san den Bijbel wortu „abi bigi lespeki [noso frede] gi Yehovah” wani taki (2 Kroniki 19:7). Den wortu dati no wani taki dati wan libisma frede wan trawan fu di a no wani taki a sma dati du ogri nanga en. Na presi fu dati, den wortu e sori taki a sma e angri fu du san bun. A lespeki di a sma disi abi bigi so te èn a de so wan trutru lespeki, taki a sma e senwe srefi. „Na a srefi frede dati yu musu abi te yu e go na a presi pe yu musu go dini”, na so Brada Morris ben taigi den studenti. Fa den kan sori a srefi frede dati gi Yehovah? A takiman poti prakseri na tu prenspari fasi fa den kan du dati.
A fosi rai di Brada Morris gi den studenti, na taki a taigi den fu du san skrifi na Yakobus 1:19: „Ibriwan sma musu de gaw fu yere. A no musu de gaw fu taki.” A ben taki dati den studenti ben leri bun furu na ini den feifi mun di den ben de na a skoro. Ma te den ben o doro a kondre pe den musu go dini, den ben musu luku bun fu no meki bigi nanga den sani di den ben leri. A ben taigi den: „Yu musu arki fosi. Arki den sma fu a gemeente pe unu o dini, èn arki sosrefi den brada di e teki fesi na ini a kondre drape. Arki san den e taki fu a kondre èn fu a kulturu fu en. No syen fu taki dati yu no sabi wan sani. Efu yu kisi wini trutru fu a leri di yu kisi, dan o moro yu e leri, o moro yu o kon si taki yu no sabi furu.”
Baka dati, Brada Morris leisi Odo 27:21 pe skrifi: „A patu pe sma gwenti smèlter sani, na fu meki solfru kon soifri èn na onfu na fu meki gowtu kon soifri. A glori di wan sma e kisi e sori suma a de.” A tyari kon na krin taki neleki fa gowtu noso solfru musu meki kon soifri, na so a prèise di wi e kisi kan meki wi kon soifri tu. Fa so? Te sma e prèise wi, dan dati kan tyari kon na krin suma wi de trutru na ini wi ati. A kan meki wi kisi bigifasi èn a kan meki wi lasi a matifasi di wi abi nanga Yehovah. Ma na a tra sei, a kan meki wi sori taki wi e frustan taki na Yehovah na a sma di musu kisi grani èn na so wi sa abi wan moro fasti bosroiti fu tan hori wisrefi na den markitiki fu en. Fu dati ede, Brada Morris gi den studenti a rai fu abi a yoisti denki fu a prèise di den e kisi. Iya, den musu abi a yoisti ’frede gi Yehovah’.
„Abi warderi gi a wroko di unu kisi fu du”
Guy Pierce fu a Tiri Skin ben hori a moro prenspari taki fu a programa. A ben taki fu a thema di skrifi na tapusei fu a paragraaf disi. A tyari kon na krin taki a wortu „zendeling” wani taki: „Wan sma di den seni fu go du wan wroko.” Dati meki a taki dati a no e fruwondru wi taki furu difrenti sortu zendeling de di e du ala sortu wroko. Furu fu den sma dati e suku nomo fu dresi sma èn fu lusu den problema fu grontapu nanga yepi fu politiek. Ne Brada Pierce taki: „Unu de tra fasi.” Fa so?
Di den studenti ben e studeri Bijbel, dan den poti prakseri na furu tori di abi fu du nanga siki sma di ben kon betre baka. Di Yesus gi wan yongu meisje wan opobaka, dan a papa nanga mama fu a meisje disi „bigin prisiri srefisrefi” (Markus 5:42). Sosrefi, di Yesus ben meki breni sma kon betre baka na wan wondru fasi, dan den sma disi ben breiti srefisrefi tu. Krestes ben du den sortu wondru disi fu sori wi na ini a ten disi san a o du na ini a nyun grontapu di e kon. Na a ten dati, a „bigi ipi” fu reti-ati sma di o pasa a kaba fu na ogri sistema disi libilibi, o kon betre baka fu iniwan siki di den abi (Openbaring 7:9, 14). Te den o gi den lobiwan fu den wan switikon na ini na opobaka, dan den nanga den sma dati o de gosontu dorodoro. A no de fu taki dati sma o prisiri trutru!
Ma soleki fa Brada Pierce ben sori, dan a betre di sma o kon betre baka fu siki, noiti no o de a moro prenspari fasi fa den o kon betre baka. Den siki sma di Yesus ben dresi, kon siki baka te fu kaba. Den dedewan di a ben gi wan opobaka, dede baka. A moro prenspari fasi fa Yesus meki sma kon betre baka, na taki a yepi den fu tron mati fu Gado. Den zendeling fu a Gileadskoro kisi a wroko tu fu yepi sma fu tron mati fu Gado. Den e yepi sma fu tron mati baka fu wi hemel Tata, so taki a de neleki den kon na libi baka. Soso den sma di kon betre na a fasi dati, o kisi têgo libi. „Na a dresi di wi e dresi sma na so wan fasi, e gi Gado glori”, na so Brada Pierce ben taki. A ben taki moro fara: „A sani disi e meki taki yu abi bun bakapisi na ini a diniwroko fu yu.”
Ete dri moi lezing di hori a dei dati
„A dei disi o de wan bun dei?” Robert Rains fu a Bijkantoro Komte fu Amerkankondre, ben poti a moi aksi dati. A ben gi den studenti deki-ati fu sorgu taki ibri dei na ini a zendelingwroko fu den na wan bun dei. Fu dati ede, den musu leisi Gado Wortu te den e kisi tesi, èn den musu frutrow na tapu Yehovah nanga yepi fu begi.
„Yu o meki na owruwan tron wan nyunwan?” Mark Noumair, di de wan leriman na a Gileadskoro, ben poti na aksi disi na ini a lezing di a hori. A ben taki fu 1 Yohanes 2:7, 8, pe na apostel Yohanes e taki fu „wan owru komando” di ben de „wan nyun komando” tu. Den tu komando disi e taki dati den bakaman fu Krestes musu lobi makandra sondro fu prakseri densrefi nomo èn taki den musu de klariklari fu du sani gi trawan (Yohanes 13:34, 35). A komando disi ben owru fu di Krestes srefi ben gi den bakaman fu en a komando disi someni tenti yari na fesi. A ben de wan nyun komando tu fu di Kresten ben e kisi fu du nanga nyun tyalensi, èn den ben musu sori lobi na nyun fasi èn na moro bun fasi tu. Sosrefi zendeling e kisi fu du nanga nyun situwâsi èn den musu leri fu sori lobi na nyun fasi. San o yepi den fu du dati?
„No tron a sani di yusrefi no lobi”, na a rai disi Brada Noumair ben gi den studenti. A ben warskow den taki te wi e si taki wan sma e du wan sani nanga wi di wi no lobi, ma wi e du a srefi sani nanga a sma dati, dan na wisrefi wi e du. Ma te wi e si den situwâsi dati leki nyun okasi fu sori lobi, dan wi e skèin „a tru leti” èn wi e meki a dungru pasa gowe.
„Tyari a lai.” Michael Burnett, wan tra leriman fu a Gileadskoro, ben taki fu a moi tori disi. A ben taki fu sma na ini Afrikan kondre di e tyari hebi lai na tapu den ede. Den e gebroiki wan kata (noso wan tyatyari). Dati na wan pisi krosi di den e lolo èn di den e poti na tapu den ede fu yepi den fu hori a lai na en presi meki a no fadon. A sani disi e meki den waka na wan moi fasi. Den zendeling fu a Gileadskoro sa musu tyari hebi frantwortu te den e dini na tra kondre, ma den kisi wan sani di wi kan agersi nanga a kata. Dati na den someni leri di den kisi fu Bijbel. Te den e du san den leri, dan den o man tyari a lai na wan bun fasi.
Ondrofenitori nanga Interview
Wan fu den sani di den studenti e du na a Gileadskoro, na taki den e go na ini a preikiwroko makandra nanga den gemeente fu Yehovah Kotoigi na ini a kontren. William Samuelson, na opziener fu a Bijbelskoro Kantoro, ben poti prakseri na wan tu fu den sani di den studenti ben ondrofeni. A ben taki fu den tori dati na ini a lezing di nen „No meki yu anu rostu” (Preikiman 11:6). Nanga yepi fu moi demo, den studenti sori fa den wroko fayafaya na ini a preikiwroko fu di den suku ala sortu fasi fu preiki a bun nyunsu na ini opolani, na ini nyanyan-oso èn na presi pe wagi e go lai oli. Den gi kotoigi oso fu oso, na iniwan okasi èn nanga yepi fu brifi. A no de fu taki dati den no meki den anu rostu èn den ben abi bun bakapisi trutru.
Baka dati, Kenneth Stovall, wan brada di e wroko na a kantoro di e sorgu gi a Gileadskoro, taki nanga dri brada di ben abi furu ondrofeni leki zendeling. Dati ben de Barry Hill di ben dini na Ekwador èn na a Dominikan Republiek. Sosrefi Eddie Mobley di ben dini na Ivoorkust, nanga Tab Honsberger di ben dini na Senegal, Benin, nanga Haiti. Ala den brada disi ben abi wan heri moi prati na a lezing di nen „Tesi Yehovah èn kisi blesi” (Maleaki 3:10). Fu eksempre, Brada Hill ben fruteri fa en nanga en wefi ben musu kon gwenti a faya weer, den santi pasi, nanga a tokotoko fu Ekwador. Soleki fa a taki, dan pikinmoro tu nanga afu yari langa, den ben musu gebroiki emre fu wasi den skin. Ma noiti den prakseri fu gowe libi a kondre. Den ben e si en leki wan blesi fu Yehovah fu dini drape. A brada disi ben taki: „A ben de wi libi.”
Na a kaba fu a programa, wan fu den studenti leisi wan moi brifi di naki sma ati. A brifi ben taki fa den studenti ben abi furu warderi gi a leri di den kisi na a skoro. A ben taki moro fara: „A bribi fu wi kon moro tranga, ma toku wi sabi taki wi no kaba gro ete.” Ala den studenti kisi a diploma fu den èn den kisi a grani fu go dini na furu difrenti kondre. Na a kaba fu a programa, Brada Jackson gi den studenti a dyaranti taki den ben kan fruwakti taki Yehovah ben o yepi den moro fara, spesrutu te den ben o kisi fu du nanga tyalensi. Ala den sma di ben de na a konmakandra komoto drape nanga bigi prisiri èn a howpu fu den ben kon moro tranga. A no de fu taki dati Yehovah o gebroiki den nyun zendeling disi fu du furu bun sani.
[Karta na tapu bladzijde 31]
WAN TU SANI FU A KLAS
A nomru fu den kondre pe den studenti komoto: 9
Gemiddeld yari di den abi: 34,0
Gemiddeld yari di den dopu: 18,6
Gemiddeld yari di den de na ini a furuten diniwroko: 13,1
[Karta]
(Efu yu wani si pe den sani disi skrifi, luku a tijdschrift)
Den seni den studenti go na den kondre di skrifi na ondrosei
KONDRE PE DEN ZENDELING O GO DINI
ARGENTINIA
ARMEINIA
BURKINA FASO
BURUNDI
KONGO (KINSYASA)
TYEKIA REPUBLIEK
HAITI
HONG KONG
INDONESIA
KENIA
LITONIA
MALÈISIA
MOSAMBIK
NEPAL
PAPUWA NYUN GINEA
RUMEINIA
SENEGAL
TANSANIA
UGANDA
ZIMBABWE
[Prenki na tapu bladzijde 31]
A di fu 130 klas fu a Waktitoren Bijbelskoro Gilead
Den nen di de fu si na ondrosei, poti na ini rèi di nomru fu fesisei go na bakasei, èn na ini ibri rèi den nen poti fu a kruktu-anusei go na a reti-anusei.
(1) Z. Molina; S. Bassolino; C. Alatsis; A. Arroyo; L. Niño; S. Merkling; M. Clark.
(2) C. Little; S. Tibaudo; S. Jakobsson; J. Moreno; A. Rodriguez; K. Lee; H. Cárdenas; L. Aguilar.
(3) A. Clairbush; A. Polley; S. Caldwell; J. Adame; S. Hildebrandt; I. Shoemaker; N. Grohman; G. Galvez.
(4) J. Clark; A. Bassolino; K. Packham; J. Adame; M. Knaus; M. Niño; R. Moreno; J. Galvez.
(5) D. Rodriguez; M. Geynes; J. Molina; A. Aguilar; I. Alatsis; A. Manno; R. Grohman; J. Packham.
(6) S. Geynes; M. Cárdenas; C. Arroyo; C. Manno; J. Merkling; H. Lee; X. Clairbush; P. Jakobsson.
(7) J. Little; B. Hildebrandt; M. Shoemaker; K. Knaus; J. Caldwell; F. Tibaudo; C. Polley.