Suma e tiri grontapu trutru?

KANDE noiti yu no miti wan bigi basi fu wan grupu ogriman. Ma a sani dati wani taki dati den sortu sma dati no de trutru? Den bigi basi fu ogriman sabi fa fu sorgu taki sma no e kon sabi suma na den. Son leisi den e seti den tori fu den aladi den de na strafu-oso. Ma toku koranti e skrifi fu feti di abi fu du nanga drugs, fu a dwengi di sma e dwengi trawan fu seri den skin èn fu a seri di sma e seri trawan na wan kibri fasi, fu kari wan tu nomo fu den ogri di e pasa. Den sani disi e memre wi sortu takru bakapisi a e tyari kon te sma e du den sortu ogri disi èn den e memre wi tu taki den ogriman disi de trutru. Fu di so furu ogri e pasa na ini a libimakandra, meki wi sabi taki den ogri basi disi de trutru.

Gado Wortu, Bijbel e tyari kon na krin taki Satan na wan trutru sma di e sorgu taki sani e waka soleki fa a wani, neleki fa wan bigi basi fu ogriman e du dati. Fu dati ede ’a e sori sma bigi sani fu kori den’ èn a e ’bedrigi den na ala sortu fasi’. Fu taki en leti, Bijbel e sori taki a e „tan du neleki en na wan engel fu leti” (2 Tesalonikasma 2:9, 10; 2 Korentesma 11:14). Den sani di Didibri e du, e sori taki a de trutru. Toku furu sma no man bribi taki wan ogri yeye de di wi no man si. Fosi wi go luku moro fini san Bijbel e taki fu Didibri, wi sa poti prakseri na wan tu sani èn na wan tu fowtu denki di e tapu furu sma fu bribi taki Didibri de trutru.

◼ „Fa wan lobi-ati Gado ben kan meki Didibri?” Fu di Bijbel e taki dati Gado bun èn taki a no abi fowtu, meki a no kan de so taki a ben o meki wan ogri-ati yeye di lai triki. Ma Bijbel no e taki dati Gado ben meki so wan sma. Na presi fu dati, Bijbel e taki fu Gado: „A de wan Stonbergi èn a e du sani di bun dorodoro. Ala ten a e du san reti. A de wan Gado di de fu frutrow. A no e du kruktudu. A de wan reti-ati sma èn a abi wan krin ati.”​—Deuteronomium 32:4; Psalm 5:4.

Ma wi musu aksi wisrefi efu a de so taki wan sma di Gado meki sondro fowtu no ben o man du ogri kwetikweti. Gado no meki libisma nanga engel leki robot, ma na presi fu dati a gi den a grani fu teki den eigi bosroiti. Fu dati ede, wan libisma noso wan engel di no abi fowtu, kan bosroiti fu du bun noso ogri. Fu taki en leti, wi no ben o man taki dati wan libisma noso wan engel e du bun noso ogri, efu a no ben man teki bosroiti gi ensrefi.

Dati meki wi kan frustan taki Gado no ben o gi libisma nanga engel a grani fu teki den eigi bosroiti èn na a srefi ten tapu pasi gi den fu du ogri te den ben o wani du dati. Yesus ben sori fa Didibri ben gebroiki a grani dati na wan fowtu fasi. Yesus ben taki: „A drai baka gi san tru” (Yohanes 8:44). Den wortu dati e sori krin taki na a bigin, a sma di tron Didibri ben de wan yeye di no ben abi fowtu, èn wan ten ben de taki a ben „lobi san tru”.a Yehovah Gado gi libisma nanga engel a grani fu teki den eigi bosroiti fu di a lobi den èn fu di a e frutrow den.​—Luku a faki „Wan sma di no abi sondu kan meki fowtu?” na tapu bladzijde 6.

◼ „Didibri na wan futuboi fu Gado” Son sma e bribi taki a prakseri disi e kon na krin na ini a buku Yob. Wan buku di e taki fu Bijbel e sori taki den wortu di e taki dati Didibri ben e „koiri na grontapu”, abi fu du nanga spion fu owruten Persiakondre di ben musu go na tra kondre gi a kownu fu den fu go luku fa sani ben e waka drape (Yob 1:7). Ma efu trutru Didibri ben de wan spion fu Gado, dan a no ben o abi fu taigi Gado taki na koiri a ben go „koiri na grontapu”? A tori fu Yob no e sori kwetikweti taki Didibri e wroko makandra nanga Gado, ma a e kari Didibri Satan, san wani taki „Gensman”. Dati e sori taki Satan trutru na a moro bigi Feanti fu Gado (Yob 1:6). Ma pe sma komoto nanga a denki taki Didibri na wan futuboi fu Gado?

Na ini a fosi yarihondro kaba, Dyu buku di no de wan pisi fu Bijbel ben e sori taki Didibri ben e strei nanga Gado, aladi a ben e du a wani fu En. Soleki fa historia skrifiman J. B. Russell, ben taki na ini a buku fu en, dan Maarten Luther, a Protestantsma di ben opo ensrefi teige a Lomsu Kerki, taki dati Didibri de leki wan wrokosani fu Gado, „leki wan kron nefi noso wan tyapu di a e gebroiki fu wroko na ini a dyari fu en”. Russell ben taki moro fara dati a sani disi na fu sori taki „a tyapu lobi fu koti grasi puru”, ma a e tan na ini Gado en makti anu èn na so a e du a wani fu Gado. A leri disi fu Luther, di a Fransi kerki sabiman Johannes Calvijn ben teki abra bakaten, afrontu furu bribiman fu di den ben feni taki a sani dati no kan. Fa wan lobi-ati Gado ben kan gi pasi taki ogri de, èn fa a ben kan wani taki den sani dati pasa? (Yakobus 1:13) A falsi leri disi, nanga den ogri-ati sani di pasa na ini a di fu 20 yarihondro, meki taki furu sma no wani bribi taki Gado nanga Didibri de trutru.

◼ „Didibri na soso na ogri di e pasa na wi lontu” Te wi ben o si Didibri soso leki na ogri di e pasa na wi lontu, dan wi no ben o man frustan son pisi fu Bijbel. Fu eksempre, nanga suma Gado ben e taki na Yob 2:3-6? A ben e taki nanga na ogri di ben de na ini Yob, noso a ben e taki nanga ensrefi? Boiti dati, yu denki taki Gado ben o prèise Yob gi den bun fasi fu en, soso fu meki Yob kisi tesi bakaten fu na ogri di ben de na ini en? Te wi ben o taki dati Gado ben handri na a fasi disi, dan wi ben o si En leki wan ogri-ati sma, na presi fu si en leki a sma di ’ala ten e du san reti’ (Psalm 92:15). Na presi fu dati, Gado weigri fu ’langa en anu’ fu du wan ogri nanga Yob. A de krin taki Didibri no de na ogri di e pasa na wi lontu èn a no de wan takru sei tu di Gado ben sa abi, ma a de wan yeye di meki ensrefi tron a Feanti fu Gado.

Suma e tiri grontapu trutru?

Na ini a ten disi, furu sma no e bribi moro taki Didibri de trutru. Ma te now ete, nowan sma man sori fa a kan taki so furu ogridu de, sondro taki Didibri abi wan sani fu du nanga dati? Fu taki en leti, na fu di furu sma no wani bribi taki Didibri de, meki den e weigri fu bribi na ini Gado, èn den no e hori den srefi tu na den markitiki fu En.

„A moro prenspari fasi fa Didibri e suku fu kori libisma, na fu meki den denki taki a no de trutru”, na so Charles-Pierre Baudelaire, wan puwema skrifiman fu a di fu 19 yarihondro e taki. Fu di Didibri no e meki sma kon sabi suma na en, meki sma bigin tweifri efu Gado de trutru. Efu Didibri no ben de, dan na Gado ben o de frantwortu gi ala ogridu, a no so? A no dati Didibri wani sma fu bribi?

Neleki fa wan bigi basi fu ogriman gwenti du, na so Didibri no e meki sma kon sabi suma na en. Na so fasi a kan du san a abi na prakseri. Ma san a abi na prakseri? Bijbel e taki: „A gado fu a grontapu disi breni a frustan fu den sma di no e bribi, so taki den no man si a leti fu a tumusi moi bun nyunsu fu Krestes di de leki Gado.”​—2 Korentesma 4:4.

Ma ete wan prenspari aksi musu kisi piki. San Gado o du nanga a bigi ogriman disi di de frantwortu gi ala ogridu nanga pina? Wi o poti prakseri na a aksi dati na ini a tra artikel.

[Futuwortu]

[Prenspari pisi na tapu bladzijde 5]

Didibri na wan futuboi noso wan gensman fu Gado?

[Faki/​Prenki na tapu bladzijde 6]

Wan sma di no abi sondu kan meki fowtu?

Di Gado meki libisma nanga engel sondro sondu, dan dati no ben wani taki dati den ben kan du iniwan sani di den ben wani. Aladi Adam no ben abi fowtu, toku a ben musu hori na prakseri taki a Mekiman fu en ben poti spesrutu wèt gi en. Fu eksempre, a no ben man nyan doti, ston, noso udu, sondro taki wan sani pasa nanga en. Efu a ben o dyompo komoto fu wan hei bergi, dan a ben o dede, noso a ben o kisi hebi mankeri.

Na so a de tu taki nowan sma noso engel di no abi sondu, kan pasa den wèt fu Gado sondro taki a kisi takru bakapisi. Sobun, wan libisma noso wan engel di e teki bosroiti di Gado no feni bun o meki fowtu makriki èn a o du sondu makriki tu.​—Genesis 1:29; Mateyus 4:4.