Kon krosibei na Gado

„Yehovah, . . . yu sabi mi dorodoro”

„NOTI no hebi moro leki te wan sma sabi taki trawan no e broko den ede nanga en èn taki den no e frustan fa a e firi.”a Yu e agri nanga a sani dati? Oiti yu firi leki trawan no e broko den ede nanga yu, noso taki den no e frustan srefisrefi fa yu e firi? Efu dati de so, dan kande a sa de wan trowstu gi yu fu sabi a sani disi: Yehovah lobi den anbegiman fu en so te, taki a e poti prakseri na iniwan sani di e pasa nanga den na ini den aladei libi. Den wortu fu David na Psalm 139 e gi wi a dyaranti dati.

David ben sabi taki Gado ben e broko en ede nanga en, èn fu dati ede a skrifi: „Yehovah, yu ondrosuku mi èn yu sabi mi dorodoro” (Vers 1). David gebroiki moi wortu na ini a tekst disi. A Hebrew wortu di vertaal nanga „ondrosuku” kan abi fu du nanga a diki di wan sma e diki na ini a gron fu feni sani soleki isri noso kopro (Yob 28:3). A kan abi fu du tu nanga a luku di wan sma e go luku wan kondre fu kon sabi fa sani de drape (Krutuman 18:2), noso nanga na ondrosuku di sma e ondrosuku wan krutu-afersi fu kon sabi san tru (Deuteronomium 13:14). Iya, Yehovah sabi wi so bun taki a de neleki a e ondrosuku ala sani fu wi libi. Nanga a wortu „mi”, David e sori wi taki Gado e broko en ede trutru nanga ibriwan fu den futuboi fu en. A e ondrosuku den dorodoro fu kon sabi fa ibriwan fu den de.

David e fruteri moro fara fa Gado e ondrosuku wi dorodoro. A e taki: „Yu sabi o ten mi e saka sidon èn o ten mi e opo baka. Yu de farawe, ma toku yu sabi fa mi e prakseri” (Vers 2). Te yu luku en bun, dan Yehovah de „farawe”, fu di a e libi na hemel. Ma toku a sabi o ten wi e saka sidon, kande na a kaba fu wan langa dei, èn a sabi tu o ten wi e opo baka te mamanten fu go du san wi musu du. A sabi den prakseri fu wi, den sani di wi wani, èn den sani di wi wani du. Yu denki taki David ben kon frede fu di Gado ben e ondrosuku en so fini? Nôno, na presi fu dati a ben breiti taki Yehovah ben e ondrosuku en na a fasi dati (Vers 23, 24). Fu san ede?

David ben sabi taki Yehovah e ondrosuku den anbegiman fu En, fu di a abi a bun fu den na prakseri. Na dati a wani sori te a e skrifi: „Yu e si te mi e waka fu a wan presi go na a trawan èn te mi e go didon. Yu kon sabi ala san mi e du” (Vers 3). Ibri dei, Yehovah e si san wi e du, a e si den fowtu fu wi èn a e si den bun sani di wi e du. Na sortu sani a e poti prakseri, na den bun sani di wi e du, noso na den fowtu fu wi? A Hebrew wortu di vertaal nanga „yu e si”, wani taki dati wan sma e doro wan sani noso taki a e wai sani puru, neleki fa wan gronman e wai den buba puru fu na aleisi di a koti. Den wortu di vertaal nanga „kon sabi”, abi fu du nanga wan Hebrew wortu di wani taki „warderi”. Te Yehovah e ondrosuku den sani di den anbegiman fu en e taki èn e du ibri dei, dan a e poti prakseri na den bun sani. Fu san ede? Fu di a e warderi a muiti di den e du fu plisi en.

Psalm 139 e leri wi taki Yehovah e broko en ede trutru nanga den anbegiman fu en. A e ondrosuku den èn a e luku den fu sorgu taki sani e waka bun nanga den ibri dei. Na so a e kon sabi sortu problema e miti den èn a e frustan sortu broko-ede nanga sari den problema disi kan tyari kon gi den. Den sani disi no e gi yu deki-ati fu anbegi a Gado disi di e broko en ede so nanga wi? Efu dati de so, dan yu kan abi a dyaranti disi: Yehovah noiti o „frigiti a wroko di unu du nanga a lobi di unu sori gi a nen fu en”.​—Hebrewsma 6:10.

A bun fu leisi a pisi disi fu Bijbel na ini september:

◼ Psalm 119-150

[Futuwortu]