4 Gado no e du sani na wan reti fasi​—A sani dati tru?

Kande yu yere sma e taki: „Gado e tiri a grontapu disi, èn ala sani e pasa fu di na en wani dati. Fu di furu sma na grontapu e desko trawan, e du kruktudu, èn e kwinsi trawan, meki a musu de so taki na Gado e meki den sani dati pasa.”

San Bijbel e leri wi: A no Gado e meki taki kruktudu de na grontapu. Bijbel e taki fu Yehovah: „A e du sani di bun dorodoro. Ala ten a e du san reti.”​—Deuteronomium 32:4.

Gado e gi ala sma bogobogo, srefi te a gersi leki sonwan fu den no e frudini dati. Fu eksempre, „a e meki a son fu en opo gi takru sma èn gi bun sma. A e meki alen fadon gi bun sma èn gi sma di no bun” (Mateyus 5:45). A e du san reti gi sma fu ala ras nanga kulturu, soleki fa Tori fu den apostel 10:34, 35 e sori: „Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.”

We dan, fa a du kon taki kruktudu de na grontapu? Furu sma e weigri fu du san reti, na presi fu teki na eksempre fu Gado di e du san reti ala ten (Deuteronomium 32:5). Boiti dati, Bijbel e sori taki Gado e gi pasi taki en feanti Didibri, tiri grontapu (1 Yohanes 5:19).a Ma heri esi, Gado no o gi pasi moro taki Didibri tiri grontapu. A seti sani kaba fu „tyari wan kaba kon na den wroko fu Didibri”.​—1 Yohanes 3:8.

A wini di a abi te yu sabi san tru: Kande a e gi yu broko-ede te yu e yere o furu kruka sani e pasa èn fa sma e kwinsi trawan. Te yu sabi fa a du kon taki den problema disi de, dan disi o yepi yu fu frustan fu san ede a situwâsi na grontapu takru so èn fu san ede libisma no man meki grontapu kon de wan moro bun presi, awansi fa den e pruberi dati (Psalm 146:3). Kande yu e gebroiki yu ten nanga yu krakti fu tyari kenki kon di sa de fu wan syatu pisi ten nomo, iya, kande den kenki dati no o pasa srefi. Fu taki en leti, a ben o moro bun fu poti yu howpu tapu den sani di Gado pramisi fu du na ini a ten di e kon.​—Openbaring 21:3, 4.

Te wi e frustan fa a du kon taki kruktudu de, dan dati kan yepi wi spesrutu te wi e kisi fu du nanga problema. Te sma no e libi bun nanga wi, dan a kan taki wi e begi Gado neleki fa en futuboi Habakuk ben du dati. A ben taki: „A wèt no abi krakti moro èn retidu no e teri srefisrefi” (Habakuk 1:4). Gado no ben mandi di en futuboi Habakuk ben taki a sani dati. Na presi fu dati, a trowstu en futuboi taki a ben poti wan ten fu meki sani kon bun baka, èn a yepi en fu kon de nanga prisiri baka aladi a ben de na ini wan muilek situwâsi (Habakuk 2:2-4; 3:17, 18). Te yu e bribi taki Gado o tyari wan kaba kon na kruktudu soleki fa a pramisi, dan dati kan yepi yu tu fu kon abi wan korostu firi na ini wan grontapu pe sani no e waka na wan reti fasi.

[Futuwortu]

[Prenspari pisi na tapu bladzijde 7]

A tru taki na Gado e meki taki pina nanga kruktudu de?

[Sma di abi a reti fu a prenki na tapu bladzijde 7]

© Sven Torfinn/​Panos Pictures