PIKI TAPU AKSI FU BIJBEL

Fa Gado de?

Gado na wan yeye, wi no man si en. A meki hemel, grontapu, nanga ala libisani. Nowan sma no meki Gado, a no ben abi bigin (Psalm 90:2). Gado wani taki sma suku en èn taki den sabi den tru tori fu en.​—Leisi Tori fu den apostel 17:24-27.

Wi man kon sabi fa Gado nen. Wi kan kon sabi wan tu fu den fasi fu en te wi poti prakseri na den sani di a meki (Romesma 1:20). Ma fu man sabi Gado bun, dan wi musu studeri Bijbel, a Wortu fu en. Na so wi o kon sabi den moi fasi fu en.​—Leisi Psalm 103:7-10.

Fa Gado e denki fu kruktudu?

Wi Mekiman, Yehovah, no lobi kruktudu kwetikweti. A meki libisma soleki fa en srefi de (Deuteronomium 25:16). Dati meki furu fu wi no lobi kruktudu. A no Gado de frantwortu gi den kruka sani di e pasa na wi lontu. Gado gi libisma a grani fu teki den eigi bosroiti. Ma a de wan sari sani taki furu sma e gebroiki a grani dati fu du kruktudu. Yehovah e sari srefisrefi.​—Leisi Genesis 6:5, 6; Deuteronomium 32:4, 5.

Yehovah lobi retidu èn a no o gi pasi fu ala ten taki sma e du kruktudu (Psalm 37:28, 29). Bijbel e pramisi taki heri esi Gado o tyari wan kaba kon na ala kruktudu.​—Leisi 2 Petrus 3:7-9, 13.