Armagedon—​Fa sma e si a sani dati?

„Dan den tyari den kownu kon na wán na a presi di sma e kari Armagedon na ini Hebrewtongo.”​—OPENBARING 16:16.

SAN yu e prakseri te yu e yere a wortu „Armagedon”? Kande yu e prakseri a pori di wan bigi rampu kan tyari kon. Aladi a wortu dati skrifi wán leisi nomo na ini Bijbel, toku nyunsu, koranti, nanga kerki fesiman gwenti gebroiki a wortu dati.

A de so taki a fasi fa sma na ini a ten disi e si Armagedon, e kruderi nanga san Bijbel e leri wi? A bun fu sabi a piki tapu na aksi dati. Fu san ede? Fu di te yu kon sabi san na Armagedon trutru, dan yu no o abi fu frede moro, yu o abi howpu gi a ten di e kon, èn yu o kon abi wan tra denki fu Gado.

Poti prakseri na den dri aksi di e kon now, èn luku efu a fasi fa sma na ini a ten disi e denki fu Armagedon, e kruderi nanga san Bijbel e leri wi trutru.

1. ARMAGEDON NA WAN RAMPU DI LIBISMA SREFI O TYARI KON?

Nyunsuman nanga ondrosukuman gwenti gebroiki a wortu „Armagedon” fu taki fu rampu di libisma e tyari kon. Fu eksempre, sma ben kari a Fosi nanga a Di Fu Tu Grontapufeti, Armagedon. Baka den feti dati, libisma ben frede taki Amerkankondre nanga a Sovyet-Unie ben o gebroiki ogri-ati fetisani fu feti nanga makandra. Fu di a situwâsi disi ben kan tron wan bigi feti, meki nyunsuman ben kari en „wan Armagedon di ben o kon nanga yepi fu ogri-ati fetisani”. Na ini a ten disi, ondrosukuman e frede taki a doti di libisma e doti grontapu o tyari bigi kenki kon na ini a weer. Fu dati ede den e warskow sma gi wan „Armagedon pe takru weer o meki furu sma lasi den libi”.

A fasi fa libisma e si sani: Libisma wawan man bosroiti san o pasa nanga grontapu èn nanga ala sani di e libi na tapu. Efu tirimakti no e teki bun bosroiti, dan heri grontapu o kisi pori fu têgo.

San Bijbel e leri wi: Gado no o gi pasi taki libisma pori grontapu. Bijbel e gi wi a dyaranti taki Yehovaha no ben meki grontapu „fu soso”. Na presi fu dati, a ben meki en „fu sma libi na tapu” (Yesaya 45:18). Gado no o gi pasi taki libisma pori grontapu dorodoro, ma a o „pori den wan di e pori grontapu”.​—Openbaring 11:18.

2. A TRU TAKI ARMAGEDON O DE LEKI ALA TRA RAMPU?

Son leisi, nyunsuman e gebroiki a wortu „Armagedon” gi bigi rampu di e pasa. Fu eksempre, na ini 2010, nyunsu ben taki fu wan „’Armagedon’ na ini Haiti”. A nyunsu disi ben e taki fu a pina nanga a pori na ini a kondre dati, èn fu den someni sma di lasi den libi fu di a bigi gronseki ben pasa drape. Nyunsuman nanga sma di e meki felem e gebroiki a wortu dati gi sani di pasa kaba èn gi sani di den frede taki den o pasa na ini a ten di e kon. Fu eksempre, den gebroiki a wortu „Armagedon” gi den takru bakapisi di den denki taki o kon te wan bigi ston na hemel o frei kon naki grontapu.

A fasi fa libisma e si sani: Armagedon na wan rampu di kan pasa na iniwan ten èn a o kiri ala sma, awansi suma na den. Yu no man du noti fu kibri yusrefi gi a sani dati.

San Bijbel e leri wi: A no tru taki Armagedon o kiri ala sortu sma, awansi suma na den. Na presi fu dati, na ogri sma wawan o dede te Armagedon kon. Bijbel e pramisi taki heri esi „den ogriwan no sa de moro. Yu o luku pe den ben de fosi, ma den no sa de moro.”​—Psalm 37:10.

3. GADO O PORI HERI GRONTAPU NA ARMAGEDON?

Furu kerkisma e bribi taki bun nanga ogri o tuka fu a lasti leisi èn taki dati o de a kaba fu a planeiti fu wi. Na ini Amerkankondre, wan organisâsi kon si taki pikinmoro afu fu den bigisma di den ben taki nanga den e bribi taki grontapu o kon na wan kaba na ini „wan feti na Armagedon” (Princeton Survey Research Associates).

A fasi fa sma e si sani: Libisma no ben meki fu libi fu têgo na grontapu, èn grontapu no ben meki tu fu tan fu ala ten. Gado ben meki libisma fu dede te fu kaba.

San Bijbel e leri wi: Bijbel e taki krin taki Gado „seti grontapu na tapu wan steifi fondamenti. Fu ala ten, iya, fu têgo nowan sma o man seki en” (Psalm 104:5). Bijbel e taki fu den sma di e libi na grontapu: „Na den reti-ati sma o kisi grontapu èn fu têgo den o tan libi drape.”​—Psalm 37:29.

A de krin taki den difrenti fasi fa sma e si Armagedon, no e kruderi nanga san Bijbel e leri wi. Sobun, san na Armagedon trutru?

[Futuwortu]