Yu ben sabi a sani disi?
San meki sma fu Bijbel ten gebroiki blaka tara leki smenti?
▪ Bijbel e taki dati den sma di ben bow a Toren fu Babel „gebroiki klèiston na presi fu bergiston èn den gebroiki blaka tara leki smenti”.—Genesis 11:3.
Blaka tara de fu feni na ini gron èn den e puru en fu blaka oli. A de fu feni na furu presi na ini Mesopotamia pe a e opo komoto na ini a gron èn e kon deki. Sma na ini Bijbel ten ben sabi taki blaka tara ben bun fu plak sani na makandra. A „ben bun fu bow oso noso fu meki ston”, na so wan buku e taki.
Wan tijdschrift di nen Archaeology e taki fu sma di ben go luku den brokopresi fu wan hei toren fu na owruten foto Ur na ini Mesopotamia. A skrifiman e taki: „Blaka tara na wan fu den fosi sani di den puru na ini na oli di den feni na zuidsei fu Irak èn te now ete yu man si en na mindri den ston di bron. Na ini a ten disi blaka tara e meki taki someni problema nanga feti de na ini a kontren dati, aladi wan ten ben de taki a ben e bondru sma kon na wán. Te den Sumeriasma ben e gebroiki blaka tara leki smenti noso fu meki pasi, dan den swaki klèiston no ben e hori watra. Dati meki den oso di den bow nanga den ston disi tan dusundusun yari langa.”
Sortu papira ben de na ini Bijbel ten?
▪ Na aksi disi opo kon fu di a Bijbel skrifiman Yohanes skrifi: „Aladi mi musu skrifi unu furu sani ete, toku mi no wani taki fu den na ini wan brifi.”—2 Yohanes 12. Ma sortu papira den ben gebroiki fu skrifi brifi na ini Bijbel ten?
A Griki wortu kartes di vertaal nanga „papira”, abi fu du nanga a papira di meki fu papirus, wan sortu grasi di e gro na ini watra. Wan buku di e sori fa den ben meki papira nanga den tiki fu a grasi disi, e taki: „Den ben piri den tiki, di ben kan gro kon tron 3 meter son leisi, èn den ben koti den na ini smara pisi di den ben naki kon plata. Baka dati den ben plak den na makandra. Dan den ben naki den plata pisi disi nanga wan pisi udu èn te fu kaba den ben meki en kon grati nanga wan sortu skafu.”
Sabiman di e ondrosuku owruten sani feni furu owruten papirus dokumenti na ini Egepte èn na ini a birti fu a Dede Se. Sonwan fu den papirus dokumenti disi abi Bijbeltekst èn den de fu a ten fu Yesus, noso srefi bifo a ten dati. A kan taki disi ben de a sortu papira pe den ben skrifi den brifi fu Bijbel na tapu, soleki fa den apostel ben du dati fosi.
[Sma di abi a reti fu den prenki na tapu bladzijde 11]
Spectrumphotofile/photographersdirect.com
© FLPA/David Hosking/age fotostock