Te Gado e gi pardon, a e frigiti wi sondu?

A PIKI na iya. Yehovah e pramisi den wan di a lobi: „Mi o gi den pardon fu den ogri sani di den du, èn mi no o memre den sondu fu den moro” (Yeremia 31:34). Na so Yehovah e gi wi a dyaranti taki te a e gi sondusma di abi berow pardon, a no e prakseri den sondu fu den moro. Ma dati wani taki dati a Mekiman fu hemel nanga grontapu no man memre den sondu fu sma di a gi pardon? Esekièl e tyari kon na krin fa Gado e gi sma pardon èn fa a e frigiti den sondu fu den.​—Leisi Esekièl 18:19-22.

Yehovah meki a profeiti Esekièl taigi den trangayesi sma fu Yuda nanga Yerusalem taki a ben o strafu den. Furu sma na ini a kondre no ben anbegi Yehovah moro èn den ben du furu ogri. Yehovah ben taki dati den Babilonsma ben o pori Yerusalem. Ma di Yehovah meki bekènti taki a ben o krutu den, a gi den wan boskopu fu howpu tu. Ibri sma ben musu teki en eigi bosroiti èn ben musu tyari a frantwortu fu den sani di ensrefi du.​—Vers 19, 20.

Ma fa a ben o de te wan sma no ben o du ogri moro? Yehovah taki: „Efu wan ogri sma tapu nanga den ogri di a ben e du, efu a e hori ala den wèt fu mi, efu a e du san reti, èn efu a e libi bun, dan a o tan na libi trutru. A no o dede” (vers 21). Yehovah ben de ’klariklari fu gi wan sondusma pardon’ efu a ben o sori berow èn efu a ben o drai baka gi a sondu libi fu en.​—Psalm 86:5.

Ma fa a de nanga den sondu di a du? Yehovah ben taki: „Mi no o memre nowan fu den ogri di a ben du èn mi no o strafu en gi den ogri dati” (vers 22). No frigiti taki efu wan sondusma ben abi berow, dan Gado „no [ben] o memre nowan fu den ogri di a ben du”. Fu san ede disi de prenspari?

Son leisi a Hebrew wortu di Bijbel e vertaal nanga „memre” wani taki moro leki fu prakseri nomo san pasa fositen. Wan buku e taki: „Nofo tron [a wortu disi] e sori taki wan sma e du wan sani noso a wortu skrifi makandra nanga tra wortu di e sori taki wan sma e du wan sani.” Sobun, „fu memre” wan sani, wani taki son leisi „fu du” wan sani. Disi wani taki dati efu wan sma di sondu abi berow, dan Yehovah ’no o memre den sondu fu en moro’ èn a no o du noti moro nanga en fu den sondu dati ede. Iya, a no o krutu noso strafu a sma dati.a

Esekièl 18:21, 22 e sori wi na wan moi fasi o fara Yehovah e go te a e gi wi pardon fu den sondu fu wi. Te a e du dati, dan noiti moro a o taki baka fu den sondu disi. Na presi fu dati a e poti den sondu fu den sma di abi berow, na en baka (Yesaya 38:17). A de neleki a e figi den sondu disi puru.​—Tori fu den apostel 3:19.

Wi leki sondu libisma abi a sari-ati fu Gado fanowdu bika wi e sondu furu leisi (Romesma 3:23). Ma Yehovah wani taki wi musu sabi dati a de klariklari fu gi wi pardon te wi abi trutru berow. Te a e gi wi pardon, dan a e frigiti den sondu fu wi. Dati wani taki dati a no e poti prakseri moro na den sondu fu wi èn a no o krutu wi, noso strafu wi moro fu den sondu disi. Disi na wan trowstu trutru! A sari-ati fu Gado o meki taki yu wani kon moro krosibei na en?

A bun fu leisi a pisi disi fu Bijbel na ini yuli:

◼ Esekièl 6–20

[Futuwortu]