Jehovah, wan Gado di de „klariklari foe gi pardon”

„Joe, o Jehovah, boen èn de klariklari foe gi pardon.” — PSALM 86:5.

1. Sortoe hebi lai Kownoe David ben tjari, èn fa a ben feni trowstoe gi en ati di ben de na djompo?

KOWNOE DAVID foe Israèl foe owroeten ben sabi o hebi a hebi foe wan konsensi fonfon ben kan de. A ben skrifi: „Den fowtoe foe mi pasa mi ede; leki wan hebi lai den de toemoesi hebi gi mi. Mi kon lam èn kon masi pasa marki; mi bari tranga foe a djeme di mi ati e geme” (Psalm 38:4, 8). Ma David ben feni trowstoe gi en ati di ben de na djompo. A ben sabi taki ala di Jehovah no wani si sondoe na ai, tokoe a no de so, taki a no wani si a sondari na ai — efoe a sma dati troetroe abi berow èn e poti en sondoe fasi foe libi na wan sei (Psalm 32:5; 103:3). Nanga ala froetrow na ini a wani di Jehovah wani foe sori sari-ati gi sma di abi berow, David ben taki: „Joe, o Jehovah, boen èn de klariklari foe gi pardon.” — Psalm 86:5.

2, 3. (a) Sortoe hebi wi e tjari kande leki bakapisi te wi e sondoe, èn foe san ede a sani dati e gi winimarki? (b) Sortoe kefar de te wi e „broko-saka” foe konsensi fonfon ede? (c) Sortoe djaranti bijbel e gi wi foe a wani di Jehovah wani gi pardon?

² Te wi e sondoe, dan a kan taki leki wan bakapisi foe dati, wi toe e tjari a hebi foe a pen foe wan konsensi fonfon di e masi wi. A konsensi fonfon disi de wan normaal sani, a e gi srefi winimarki. A kan boeweigi wi foe doe positief sani foe poti den fowtoe foe wi kon reti baka. Ma son kresten e meki taki konsensi fonfon e moro den. Na ati foe den di e kroetoe den, ben sa kan tan taigi den taki Gado no sa gi den pardon dorodoro, awansi omeni berow den abi. „A de wan takroe firi te joe e prakseri taki kande Jehovah no lobi joe moro”, na so wan sisa ben taki di a ben prakseri foe wan fowtoe di a ben meki. Srefi baka di a abi berow èn teki rai foe den owroeman foe a gemeente di kan jepi en, tokoe a ben tan abi a firi taki a no warti foe kisi pardon foe Gado. A e tjari kon na krin: „No wan dei e pasa pe mi no aksi Jehovah foe gi mi pardon.” Efoe wi e kon „broko-saka” foe konsensi fonfon ede, dan Satan kan proeberi foe meki wi gi abra, foe meki wi abi a firi taki wi no warti foe dini Jehovah. — 2 Korentesma 2:5-7, 11.

³ Ma dati seiker no de a fasi fa Jehovah e si den afersi! En Wortoe e gi wi a djaranti taki, te wi e sori opregti berow komoto foe wi ati, dan Jehovah wani, ija, de klariklari srefi foe gi pardon (Odo 28:13). So boen, efoe oiti a gersi taki joe no kan kisi pardon foe Gado, dan kande san joe abi fanowdoe, na foe kon froestan moro boen foe san ede èn fa a e gi pardon.

Foe san ede Jehovah „de klariklari foe gi pardon”?

4. San Jehovah e hori na prakseri foe a fasi foe wi, èn fa disi abi krakti na tapoe a fasi fa a e handri nanga wi?

⁴ Wi e leisi: „So fara leki son-opo de foe sondongo, na so fara foe wi a poti den sondoe foe wi. Neleki fa wan papa e sori den manpikin foe en sari-ati, na so Jehovah sori sari-ati na den wan di e frede en.” Foe san ede Jehovah wani foe sori sari-ati? A tra vers e piki: „Bika ensrefi sabi heri boen fa wi meki, foe di a e hori na prakseri taki wi na doti” (Psalm 103:12-14). Ija, Jehovah no e frigiti taki wi na kriatoeroe di meki foe doti, di abi swakifasi leki wan bakapisi foe onvolmaaktifasi. Den wortoe taki a sabi „fa wi meki”, e memre wi taki bijbel e agersi Jehovah nanga wan patoe bakriman èn e agersi wi nanga den tokotoko patoe di a e mekia (Jeremia 18:2-6). Wan patoe bakriman e handri nanga den tokotoko patoe foe en na wan steifi fasi, ma tokoe na wan safoe fasi, foe di a e hori a fasi fa den de na prakseri. Na so toe Jehovah, a Bigi Patoe Bakriman, e safoe a fasi fa a e handri nanga wi akroederi a swakifasi foe wi sondoe fasi. — Teki gersi 2 Korentesma 4:7.

5. Fa a boekoe Romesma e taki foe a tranga makti di sondoe abi tapoe na onvolmaakti fasi foe wi?

⁵ Jehovah sabi o tranga sondoe de. Den Boekoe foe bijbel e taki foe sondoe leki wan tranga krakti di abi libisma ini en makti èn kan kiri en. O tranga a makti di sondoe abi, de? Na ini a boekoe Romesma, na apostel Paulus e tjari a sani dati kon na krin na ondro a krakti foe a santa jeje, nanga jepi foe eksempre di wi kan froestan krin: Wi de „na ondro sondoe”, neleki fa sroedati de na ondro a komandanti foe den (Romesma 3:9); a „tiri” libisma leki wan kownoe (Romesma 5:21); a „e libi”, noso „de”, na ini wi (Romesma 7:17, 20); a „wet” foe en e wroko doronomo na ini wi, te joe e loekoe en boen, a e proeberi foe basi a fasi fa wi e tjari wisrefi (Romesma 7:23, 25). Wi abi troetroe wan moeilek feti foe kakafoetoe gi a tranga makti di sondoe abi tapoe na onvolmaakti fasi foe wi! — Romesma 7:21, 24.

6. Fa Jehovah e si den wan di e soekoe a sari-ati foe en nanga wan ati di sari?

⁶ Foe dati ede, wi sari-ati Gado sabi taki wi no kan gi jesi na wan volmaakti fasi, awansi omeni na ati foe wi wani gi jesi na en kande (1 Kownoe 8:46). Na wan lobi-ati fasi a e gi wi a djaranti taki, te wi e soekoe a sari-ati foe en di de leki di foe wan papa, nanga wan ati di sari, a sa gi wi pardon. A psalm singiman David ben taki: „Den srakti-ofrandi gi Gado na wan jeje di broko; wan ati di broko èn di masi, o Gado, joe no sa wisiwasi” (Psalm 51:17). Noiti Jehovah sa weigri foe teki noso drai gowe gi wan ati di broko èn di masi foe a hebi foe konsensi fonfon ede. Fa dati e taki na wan moi fasi foe a de di Jehovah de klariklari foe gi pardon!

7. Foe san ede wi no kan teki a sari-ati foe Gado leki wan gewoon sani?

⁷ Ma disi wani taki dati wi moesoe teki a sari-ati foe Gado leki wan gewoon sani èn e gebroiki a sondoe fasi foe wi leki wan primisi foe doe sondoe? Kwetikweti! Jehovah no e doe sani tapoe a gron foe firi nomo. A sari-ati foe en abi skotoe. A no sa gi den wan pardon kwetikweti di nanga wan tranga ati e doe ogri-ati sondoe foe espresi sondro foe abi berow (Hebrewsma 10:26-31). Na a tra sei, te a e si wan ati di „broko èn di masi”, dan a de „klariklari foe gi pardon” (Odo 17:3). Meki wi go loekoe wan toe foe den wortoe di gebroiki na ini bijbel foe taki foe a gi di Gado e gi pardon dorodoro.

Fa Jehovah e gi pardon dorodoro?

8. San Jehovah e doe, te joe loekoe en boen, te a e gi wi pardon foe den sondoe foe wi, èn sortoe krakti dati moesoe abi na wi tapoe?

⁸ Kownoe David di ben abi berow ben taki: „Te foe kaba mi ben taigi joe mi sondoe, èn mi no ben tapoe mi fowtoe. Mi ben taki: ’Mi sa taigi Jehovah den sondoe foe mi.’ Èn joesrefi gi mi pardon foe a fowtoe foe den sondoe foe mi” (Psalm 32:5). Den wortoe „gi mi pardon” vertaal foe wan Hebrew wortoe di foeroetron wani taki „opo”, „tjari”. A fasi fa a gebroiki djaso wani taki ’foe poeroe sondoe, fowtoe èn a firi di wan sma abi taki a fowtoe’. So boen, Jehovah ben opo den sondoe foe David èn ben tjari den gowe, foe taki en so. (Teki gersi Lefitikus 16:20-22.) Sondro tweifri disi ben froelekti den firi di David ben abi taki a fowtoe èn di a ben e tjari. (Teki gersi Psalm 32:3.) Wi toe kan abi ala froetrow na ini a Gado di e gi pardon foe sondoe foe den wan di e soekoe foe kisi pardon foe en, na tapoe a gron foe a bribi di den abi na ini a froeloesoe-ofrandi foe Jesus Krestes. (Mateus 20:28; teki gersi Jesaja 53:12.) Den wan di Jehovah e opo den sondoe foe den èn e tjari den gowe na so wan fasi, no abi foe tan tjari a hebi foe konsensi fonfon foe sondoe di den ben doe na ini a ten di pasa.

9. San den wortoe foe Jesus: „Gi wi pardon foe den paiman foe wi”, wani taki?

⁹ Jesus ben gebroiki a fasi fa borgoeman de nanga sma di de na paiman foe gi wan eksempre fa Jehovah e gi pardon. Foe eksempre, Jesus ben gi wi tranga foe begi: „Gi wi pardon foe den paiman foe wi” (Mateus 6:12). Na so Jesus ben agersi „sondoe” nanga „paiman” (Lukas 11:4). Te wi e sondoe, wi e tron „sma di de na paiman” na Jehovah. A Griki werkwortoe di vertaal nanga „gi pardon” kan wani taki „foe libi wan paiman, foe di joe no e aksi foe en”. Na wan fasi a de so, taki, te Jehovah e gi pardon, a e fri wi foe a paiman di, efoe a no e doe dati, ben sa teki foe wi rekening. Dati meki sondari di abi berow kan feni trowstoe. Noiti Jehovah sa aksi wi foe pai wan paiman di a fri wi foe dati! — Psalm 32:1, 2; teki gersi Mateus 18:23-35.

10, 11. (a) San na a idea di den wortoe „kan figi poeroe”, di de foe feni na ini Tori foe den Apostel 3:19, e sori? (b) Fa den e gi wan eksempre foe a gi di Jehovah e gi pardon dorodoro?

¹⁰ Na ini Tori foe den Apostel 3:19, bijbel e gebroiki wan tra libilibi agersi fasi foe taki, foe taki foe a fasi fa Gado e gi pardon: „Abi berow foe dati ede èn drai baka, so taki den sondoe foe oenoe kan figi poeroe.” Den wortoe „kan figi poeroe” vertaal foe wan Griki werkwortoe di, te wi e gebroiki en na wan agersi fasi, kan wani taki „figi poeroe, poeroe, pori”. Akroederi son sabiman, dan na idea di sori djaso, na a figi di den figi wan sani poeroe di skrifi nanga anoe. Fa a sani dati ben kan? Na inki di den ben gebroiki moro foeroe na owroeten, ben meki foe wan sani di ben moksi èn di ben abi so srefi koolstof, gom, nanga watra. No langa baka te wan sma ben skrifi nanga so wan inki, dan a ben kan teki wan nati sponsoe èn figi a sani poeroe di a ben skrifi.

¹¹ Na ini a sani dati, wan moi fasi de foe taki foe a gi di Jehovah e gi pardon dorodoro. Te a e gi wi pardon foe den sondoe foe wi, dan a de neleki a e teki wan sponsoe èn e figi den poeroe. Wi no abi foe frede taki na ini a ten di e kon a sa gebroiki den sondoe dati teige wi, bika bijbel e tjari wan tra sani kon na krin foe a sari-ati foe Jehovah di de troetroe wan aparti sani: Te a e gi pardon, a e frigiti!

„Den sondoe mi no sa prakseri moro”

12. Te bijbel e taki dati Jehovah e frigiti den sondoe foe wi, dati wani taki dati a no man memre den, èn foe san ede joe e piki so?

¹² Nanga jepi foe a profeiti Jeremia, Jehovah ben pramisi ini a tori foe den wan di de na ini a njoen froebontoe: „Mi sa gi den pardon foe den sondoe, èn den sondoe mi no sa prakseri moro” (Jeremia 31:34). Dati wani taki dati te Jehovah e gi pardon, a no man memre den sondoe moro? Dati no ben kan de so kwetikweti. Bijbel e froeteri wi foe den sondoe foe foeroe sma di Jehovah ben gi pardon, so srefi foe David (2 Samuèl 11:1-17; 12:1-13). A de krin taki Jehovah sabi den fowtoe ete di den ben doe, èn so wi moesoe de. Den tori di skrifi foe den sondoe foe den, èn so srefi foe a berow di den ben abi èn a pardon di den ben kisi foe Gado, kibri, so taki wi kan kisi winimarki foe dati (Romesma 15:4). Dan san bijbel wani taki te bijbel e taki dati Jehovah no e „prakseri” den sondoe foe den wan di a e gi pardon?

13. (a) San a Hebrew werkwortoe di vertaal nanga ’mi sa prakseri’ wani taki toe? (b) Sortoe djaranti Jehovah e gi wi, te a e taki: „Den sondoe mi no sa prakseri moro”?

¹³ A Hebrew werkwortoe di vertaal nanga ’mi sa prakseri’ wani taki moro leki soso foe memre den sani nomo foe a ten di pasa. Akroederi a Theological Wordbook of the Old Testament, a wani taki toe „a tra prakseri foe doe wan joisti sani”. So boen, na a fasi disi, foe „prakseri” sondoe abi foe doe nanga a doe di Gado e doe wan sani nanga sondari. Di a profeiti Hosea ben taki foe tranga-ede Israèlsma: „A [Jehovah] sa memre a fowtoe foe den”, dan a profeiti ben wani taki dati Jehovah ben sa doe wan sani nanga den foe di den no ben abi berow. Dati meki a tra pisi foe a tekst e taki moro fara: „A sa poti prakseri na tapoe den sondoe foe den” (Hosea 9:9). Na a tra sei a de so, taki te Jehovah e taki: „Den sondoe mi no sa prakseri moro”, dan a e gi wi a djaranti taki te a e gi pardon na wan sondari di abi berow, dan a no sa doe wan sani nanga en foe den sondoe dati ede, na wan ten di de na en fesi (Esekièl 18:21, 22). Na so a e frigiti na a fasi disi, taki a no e memre wi ibritron baka na den sondoe foe wi, so taki a man kragi noso strafoe wi ibritron baka. Na a fasi disi Jehovah e poti wan toemoesi boen eksempre gi wi di wi kan waka na baka te wi e handri nanga trawan. Te kesekese e opo kon, a moro boen foe no tan prakseri foe sondoe di ben doe na ini a ten di pasa èn di joe ben agri foe gi pardon moro na fesi kaba.

Fa a de nanga den bakapisi foe den sondoe foe wi?

14. Foe san ede a kisi di wan sondari di abi berow kisi pardon, no wani taki dati a de fri foe ala den bakapisi foe a fowtoe fasi fa a ben tjari ensrefi?

¹⁴ A de di Jehovah de klariklari foe gi pardon wani taki dati wan sondari di abi berow de fri foe ala den bakapisi foe a fowtoe fasi fa a ben tjari ensrefi? Kwetikweti. Wi no kan sondoe sondro foe kisi strafoe. Paulus ben skrifi: „San wan sma e sai, na dati a sa koti toe” (Galasiasma 6:7). Wi kan kisi foe doe nanga son bakapisi foe den sani di wi doe noso foe den problema foe wi, ma baka te Jehovah e gi wi pardon, a no e meki rampoe miti wi. Te problema e opo kon, wan kresten no moesoe denki: ’Kande Jehovah e strafoe mi foe den sondoe di mi ben doe na ini a ten di pasa.’ (Teki gersi Jakobus 1:13.) Na a tra sei a de so, taki Jehovah no e kibri wi gi ala den bakapisi foe den fowtoe sani di wi doe. Brokotrow, bere di wi no wani, siki di wi kisi nanga jepi foe seks, a lasi di wi lasi a froetrow nanga lespeki foe trawan — ala den sani disi kan de den sari bakapisi foe sondoe, èn Jehovah no sa kibri wi gi den. Memre taki ala di a ben gi David pardon foe den sondoe foe en ini a tori foe Batseiba nanga Uria, tokoe Jehovah no ben kibri David gi den takroe bakapisi di ben kon baka dati. — 2 Samuèl 12:9-14.

15, 16. Fa a wet di skrifi na ini Lefitikus 6:1-7 ben gi winimarki na a sma di ben ondrofeni na ogri èn so srefi gi a sma di ben doe na ogri?

¹⁵ Den sondoe foe wi kan abi tra bakapisi toe. Loekoe foe eksempre a tori na ini Lefitikus kapitel 6. A Wet foe Moses e taki djaso foe wan situwâsi pe wan sma e doe wan serjoesoe fowtoe, foe di a e teki den goedoe foe wan kompe Israèlsma nanga a foefoeroe di a e foefoeroe a sma, nanga a teki di a teki den sani foe a sma na wan kroeka fasi, noso nanga a bedrigi di a e bedrigi a sma. Baka dati a sondari e weigri foe erken taki a abi fowtoe, èn a abi so wan deki-ati taki a e sweri na wan falsi fasi srefi. A situwâsi disi na wan kefal di abi foe doe nanga wan kesekese, pe na ala toe sei boeweisi no de. Ma baka ten, a konsensi e fon a sma di doe na ogri, èn a e erken a sondoe foe en. Foe man kisi pardon foe Gado, dan a moesoe doe dri sani moro ete: gi baka san a ben teki, pai a sma di a ben doe na ogri nanga en wan boetoe foe 20 procent, èn tjari wan manskapoe leki wan ofrandi foe fowtoe di ben doe. Dan a wet e taki: „A priester moesoe meki wan verzoen gi en na fesi foe Jehovah, èn na so a moesoe kisi pardon.” — Lefitikus 6:1-7; teki gersi Mateus 5:23, 24.

¹⁶ A wet disi ben de wan sari-ati seti foe Gado. A ben gi winimarki na a sma di ben ondrofeni na ogri èn di ben kisi den goedoe foe en baka èn di seiker ben firi froelekti srefisrefi te a sma di ben doe na ogri nanga en, te foe kaba ben erken en sondoe. Na a srefi ten, a wet ben gi winimarki na a sma di, te foe kaba, en konsensi ben boeweigi en foe erken taki a fowtoe èn meki a fowtoe di a ben doe kon reti baka. Ija, efoe a ben weigri foe doe dati, dan Gado no ben sa gi en pardon.

17. San Jehovah e froewakti foe wi taki wi doe, te wi hati trawan nanga den sondoe foe wi?

¹⁷ Ala di wi no de na ondro a Wet foe Moses, tokoe a Wet e gi wi warti koni foe man si krin fa Jehovah e denki, so srefi fa a e denki foe a gi di a e gi sma pardon (Kolosesma 2:13, 14). Te wi hati trawan noso bedrigi den nanga den sondoe foe wi, dan a e plisi Jehovah te wi e doe san wi man foe „poti san kroektoe kon reti baka” (2 Korentesma 7:11). Disi wani taki toe foe erken a sondoe foe wi, foe erken taki wi fowtoe, èn srefi foe aksi pardon na a sma di wi ben hati. Dan wi kan aksi Jehovah foe jepi wi tapoe a gron foe Jesus en srakti-ofrandi èn ondrofeni a froelekti di wi kan kisi foe wan krin konsensi èn a djaranti taki Gado gi wi pardon. — Hebrewsma 10:21, 22.

18. Sortoe tranga leri kan kon so srefi nanga a gi di Jehovah e gi pardon?

¹⁸ Neleki iniwan lobi-ati papa noso mama, Jehovah kan gi pardon makandra nanga wan seiker marki foe tranga leri (Odo 3:11, 12). Wan kresten di abi berow kande moesoe saka a grani di a abi leki wan owroeman, wan dinari na ini a diniwroko, noso wan pionier. A kan hati en foe lasi grani di ben de so warti gi en, foe wan pisi ten. Ma so wan tranga leri no wani taki dati a lasi a boen-ati foe Jehovah noso taki Jehovah no gi en pardon. Boiti dati, wi moesoe prakseri taki tranga leri di kon foe Jehovah na wan boeweisi taki a lobi wi. Te wi e teki èn e gebroiki a tranga leri dati, dan a de gi wi eigi boen èn dati kan tjari wi go na têgo libi. — Hebrewsma 12:5-11.

19, 20. (a) Efoe joe meki fowtoe, foe san ede joe no moesoe denki taki joe no kan kisi a sari-ati foe Jehovah? (b) Foe san wi sa taki na ini a tra artikel?

¹⁹ Fa a e gi kowroe-ati foe sabi taki wi e dini wan Gado di de „klariklari foe gi pardon”! Jehovah e si moro fara leki den sondoe nanga fowtoe foe wi (Psalm 130:3, 4). A sabi san de na ini wi ati. Efoe joe e firi taki joe ati broko èn a masi foe fowtoe ede di joe ben meki na ini a ten di pasa, no kon na a bosroiti taki joe no kan kisi a sari-ati foe Jehovah. Efoe joe abi troetroe berow, awansi sortoe fowtoe joe meki kande, èn doe sani foe poti san kroektoe kon reti baka èn begi na wan opregti fasi foe Jehovah gi joe pardon tapoe a gron foe a broedoe foe Jesus di ben trowe gi wi, dan joe kan abi ala froetrow taki den wortoe foe 1 Johanes 1:9 e fiti gi joe: „Efoe wi e taigi en den sondoe foe wi, dan a de getrow èn regtfardiki, so taki a gi wi pardon foe wi sondoe èn e krin wi foe ala onregtfardikifasi.”

²⁰ Bijbel e gi wi a deki-ati foe waka baka a fasi fa Jehovah e gi pardon te wi handri nanga makandra. Ma te o fara den kan froewakti foe wi foe gi pardon èn frigiti te trawan e sondoe teige wi? Wi sa taki foe dati na ini na artikel di e kon now.

[Foetoewortoe]

San joe ben sa piki?

◻ Foe san ede Jehovah de „klariklari foe gi pardon”?

◻ San bijbel e taki foe a gi di Jehovah e gi pardon dorodoro?

◻ Na sortoe fasi Jehovah e frigiti te a e gi pardon?

◻ San Jehovah e froewakti foe wi taki wi doe, te wi hati trawan nanga den sondoe foe wi?

[Prenki na tapoe bladzijde 12]

Te wi hati trawan nanga den sondoe foe wi, dan Jehovah e froewakti foe wi taki wi e meki en boen baka nanga den