O ten Yesus tron Kownu?

Na artikel disi e poti prakseri na aksi di yu ben abi kande èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. San na a kownukondre di Gado pramisi Yesus?

Gado ben pramisi taki wan bakapikin fu Kownu David ben o sidon na tapu en kownusturu fu ala ten. A pramisi bakapikin dati na Yesus èn now a e tiri na ini hemel leki Kownu fu Gado Kownukondre.​—Leisi Psalm 89:4; Lukas 1:32, 33.

Di David ben de wan boi ete, dan Gado bosroiti taki na en ben o tron kownu fu Yehovah en pipel Israel. Di David dede, dan Salomo di Yehovah ben teki leki kownu, go sidon na tapu „a kownusturu fu Yehovah” (1 Kroniki 28:4, 5; 29:23). Baka di Salomo dede, dan furu kownu tiri na ini Yerusalem, ma moro furu fu den no tan dini Yehovah. Te fu kaba, Yehovah gi pasi taki den legre fu Babilon pori Yerusalem èn puru a kownu di ben e tiri drape. Dati pasa na ini a yari 607 fosi Krestes. Sensi a ten dati, nowan enkri bakapikin fu David ben e tiri leki kownu na ini a foto Yerusalem.​—Leisi Esekièl 21:27.

2. O langa Gado kownukondre na grontapu no ben tiri?

Wan pisi ten baka di Yerusalem kisi pori, Yehovah taigi en profeiti Danièl taki a ben o poti wan kownu di ben o tiri komoto na hemel. O ten a kownu disi ben o bigin tiri?​—Leisi Danièl 7:13, 14.

Danièl fruklari wan fisyun pe Gado ben taigi sma fu koti wan bun bigi bon trowe, neleki fa A ben taki dati a kownukondre na ini Yerusalem ben o koti trowe èn ben o kisi pori. Ma a rutu fu a bon ben musu tan na ini a gron, so taki baka „seibi pisi ten” a ben o bigin gro baka. Bijbel e sori taki dri nanga afu „pisi ten” na a srefi leki 1260 dei. Sobun, „seibi pisi ten” na a srefi leki 2520 dei (Openbaring 12:6, 14). Nofo tron a de so na ini Bijbel profeititori taki wán dei e teri gi wán yari (Numeri 14:34). Sobun, Gado Kownukondre no ben o tiri 2520 yari langa.​—Leisi Danièl 4:10-17.

3. O ten Yesus tron Kownu?

Gado meki Yesus tron Kownu na ini hemel na ini 1914. Dati pasa 2520 yari baka di Yerusalem kisi pori. A fosi sani di Yesus du di a tron Kownu na fu fringi Satan nanga den ogri yeye fu en komoto na ini hemel (Openbaring 12:7-10). Aladi libisma no ben man si a sani dati, toku den firi den takru bakapisi di a tyari kon gi den (Openbaring 12:12). Sani di e pasa sensi 1914, e sori taki Yesus tron Kownu na ini a yari dati.​—Leisi Mateyus 24:14; Lukas 21:10, 11, 31.

4. Now di Yesus tron Kownu, dan san yu kan fruwakti?

A fasi fa den profeititori di e taki fu a tiri fu Yesus e kon tru, e sori taki yu kan frutrow Gado Wortu. Heri esi Yesus o gebroiki en makti leki kownu fu puru ala pina gi libisma.​—Leisi Psalm 72:8, 12, 13; Danièl 2:44.

Efu yu wani sabi moro, dan luku bladzijde 215-218 fu a buku disi, San Bijbel e leri wi trutru?, di Yehovah Kotoigi tyari kon na doro.

[Schema na tapu bladzijde 17 di e tyari sani kon na krin]

(Efu yu wani si pe den sani disi skrifi, luku a tijdschrift)

oktober

607 F.K. ← 2520 yari → 1914 B.K.

1000 F.K. | 1 F.K. | 1 B.K. | 1000 B.K. | 2000 B.K.

← 606 yari nanga 3 mun →← 1913 yari nanga 9 mun →

A kownukondre na ini Yerusalem e kisi pori

Teri den yari: 606 yari nanga 3 mun + 1913 yari nanga 9 mun Dati na 2520 yari

Gado e meki Yesus tron Kownu di e tiri na ini hemel