Wan kaba o kon na kruktudu!

YU DE leki furu sma di e denki taki libisma no o man tyari wan kaba kon na kruktudu èn taki a o tan fu ala ten? Efu yu e denki so, dan wi kan frustan dati. Dusundusun yari kaba, libisma pruberi ala sortu fasi fu tiri. Ma noiti den ben man puru ala kruktudu. Howpu de taki wan ten o kon pe sma no o bedrigi makandra moro?

Koloku taki Bijbel e sori taki a sani disi man. A e sori wi taki heri esi Gado o puru kruktudu na grontapu. Fa a o du dati? A o gebroiki en Kownukondre. Dati na wan tirimakti na hemel di o kenki a grontapu fu wi krinkrin. Na fu a srefi Kownukondre disi Yesus ben leri den bakaman fu en fu begi. Na ini a begi di son sma e kari a Wi Tata Begi, Yesus ben taki: „Joe kownoekondre moe kom! Joe wani moe go doro na grontapoe.”​—Mateyus 6:10, Da Bijbel na ini Sranantongo.

Bijbel e taki disi fu Yesus Krestes, a Tiriman fu a Kownukondre: „A o frulusu den pôti sma di e bari suku yepi, sosrefi ala den mofina sma nanga iniwan sma di no abi yepiman. A o firi sari gi den mofina sma èn gi den pôti sma èn a o frulusu den pôti sma. A o kibri den libi, so taki sma no man kwinsi den moro noso du ogri-ati sani nanga den” (Psalm 72:12-14). Luku taki Yesus e firi sari gi den sma di trawan e bedrigi èn a o du wan sani so taki sma no o pina den moro. Disi na wan bigi trowstu.

Te a makti Tiriman dati di abi sari-ati o tiri, dan Gado Kownukondre o puru kruktudu na grontapu. Fa a o du dati? A o puru den dri sani di e tyari kruktudu kon.

Den bakapisi fu sondu

Nownowde wi alamala musu feti nanga den sondu firi fu wi di kan meki taki wi e denki wisrefi nomo (Romesma 7:21-23). Toku yu abi bun sma di wani du san reti. Di Yesus dede, dan Gado meki taki libisma kisi pardon fu sondu (1 Yohanes 1:7, 9).a Den sma di e bribi na ini a seti disi o kisi wini fu a moro bigi sani di Gado du fu di a lobi wi. Wi kan leisi dati na ini Yohanes 3:16: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”

Gado o du wan moi sani gi den sma di e gi yesi na en. Na ini a nyun grontapu di e kon, a o puru ala sondu èn safrisafri a o meki taki ala libisma di e tan gi yesi na en, kon de sondro sondu te fu kaba. Boiti dati, Gado o si den leki reti-ati sma (Yesaya 26:9; 2 Petrus 3:13). Noiti moro sondu o meki taki sma du kruka sani. Te Gado Kownukondre o tiri grontapu, dan reti-ati libisma no o de ’srafu fu sondu moro’.​—2 Petrus 2:19.

Den bakapisi fu na ogri grontapu pe wi e libi na ini

A sari fu si taki na fu espresi furu sma na ini a ten disi e du ogri nanga trawan. Den e bedrigi den mofinasma nanga den pôtisma èn den e gi tra sma deki-ati fu du kruka sani tu. Bijbel e warskow den sortu sma disi: „Meki den ogri sma libi den pasi fu den èn meki den sma di e du ogri, puru den takru prakseri fu den na den ede.” Bijbel e pramisi taki efu den kruka sma disi abi berow, dan Gado „o gi den pardon nanga en heri ati”.​—Yesaya 55:7.

Ma a wan-enkri sani di Gado o abi fu du na fu puru den sma di trangayesi èn di e weigri fu kenki den libi. Gado Kownukondre o meki a pramisi fu Bijbel kon tru di e taki: „Howpu na tapu Yehovah èn tan waka a pasi fu en . . . Te a kiri den ogriwan, yu o si dati” (Psalm 37:34).b Te den ogrisma di no wani kenki no de moro, dan reti-ati anbegiman fu Gado no o kisi fu du nanga kruktudu.

A krakti di Satan Didibri abi na tapu sma

A moro bigi sondusma na Satan Didibri. Wi kan de nanga tangi taki dyonsro Yehovah o tapu Satan so taki a no abi krakti na tapu libisma moro. Te fu kaba, Gado o pori Satan krinkrin. Noiti moro na ogri-ati Satan disi o kori sma fu du kruktudu.

A tru taki son sma no e bribi taki Gado o man puru ala kruktudu. Kande yu e aksi yusrefi: ’Gado abi a makti trutru fu tyari den sortu kenki disi kon? Efu dati de so, dan fu san ede a e wakti so langa?’ Disi na bun aksi èn Bijbel e piki den na wan moi fasi.c Wi e gi yu deki-ati fu go luku san Bijbel e leri fu a ten te nowan kruktudu no o de moro.