Freide „gi sma di Gado feni bun”

Wan reide fu san ede sma e hori Kresneti.

Ibri yari, a pawsu nanga tra kerki fesiman e preiki boskopu fu freide, fu di den e howpu taki na Kresnetiten a sani disi di den engel ben meki bekènti o kon tru: „Meki sani waka bun na grontapu gi sma di Gado feni bun.” Son sma e teki waka go na spesrutu santa presi na Kresnetiten.

Fu san ede dati no makriki?

Nofo tron a freide di de na Kresnetiten na fu wan syatu pisi ten nomo. Luku na eksempre disi: Na ini december 1914, di den kondre fu Europa ben e feti nanga makandra, dan srudati fu Ingrisikondre nanga Doisrikondre komoto na ini den gotro di den ben diki fu feni kibri, èn den hori Kresneti makandra. Den prati nyanyan, dringi, nanga tabaka nanga makandra. Den prei bal srefi. Ma a freide disi no ben de fu langa. Wan fu den srudati fu Ingrisikondre di ben de na ini a feti, ben skrifi wan brifi pe a fruteri san wan srudati fu Doisrikondre ben taigi en. A srudati ben taki: „Tide wi abi freide. Ma tamara yu e feti gi yu kondre èn mi e feti gi a di fu mi.”

Sortu leri fu Bijbel kan yepi sma?

„Wan pikin gebore gi wi. . . . Den o kari en . . . Granman fu Freide. Na ala sei a o abi makti leki wan granman èn ala ten sani o waka bun” (Yesaya 9:6, 7). A profeititori dati di e taki fu Yesus e gi wi deki-ati, a no so? Yesus no ben gebore na grontapu fu tyari freide kon gi wán dei nomo. Leki Tiriman na hemel, a o tyari trutru freide kon di no o kaba noiti.

„Mi [Yesus] taigi unu den sani disi, so taki sani kan waka bun nanga unu. Na grontapu unu e kisi banawtu, ma hori deki-ati! Mi wini grontapu” (Yohanes 16:33). Srefi na ini a ten disi, Yesus e yepi den bakaman fu en fu abi freide nanga makandra. A tru taki banawtu e miti Kresten. Ma Bijbel yepi den fu frustan fu san ede sma e pina èn fa Yesus o tyari freide kon di o tan fu têgo. Dati meki den abi wan korostu firi.

Fu di Yehovah Kotoigi e gi yesi na den sani di Yesus taki, meki den abi a freide dati. Dati de so awansi fu sortu kondre, ras, noso kulturu den de, noso awansi sortu tongo den e taki. Yusrefi o si dati te yu e go na wan konmakandra di e hori na ini a Kownukondre zaal fu den. Kande neleki furu tra sma, yu o agri taki a freide disi bun moro iniwan freide di Kresneti e tyari kon.