PIKI TAPU AKSI FU BIJBEL

Fu san ede freide no man de na grontapu?

Bijbel e sori tu reide fu san ede dati de so. A fosiwan, na taki aladi libisma du wan lo kefalek sani, toku den no man bosroiti gi densrefi san bun èn san ogri. A di fu tu sani, na taki den sani di libisma pruberi fu du no tyari bun bakapisi kon, fu di „heri grontapu de na ini a makti fu na ogriwan”, Satan Didibri. Sobun, libisma no abi a makti fu tyari freide kon na heri grontapu.​—Leisi Yeremia 10:23; 1 Yohanes 5:19.

Fu di libisma e prakseri densrefi nomo èn fu di den de nomonomo fu kisi biginen, meki a muilek fu tyari freide kon na heri grontapu. Soso te yu abi wán tirimakti di kan leri ala sma fu lobi san reti èn fu sorgu gi makandra, dan fosi freide o kon.​—Leisi Yesaya 32:17; 48:18, 22.

Suma o tyari freide kon na grontapu?

Na Almakti Gado pramisi fu seti wán tirimakti di o tiri ala libisma. A o kon na ini a presi fu libisma tirimakti (Danièl 2:44). Gado Manpikin, Yesus, o tiri leki a Granman fu Freide. A o puru ala ogridu na grontapu èn a o leri sma a pasi fu freide.​—Leisi Yesaya 9:6, 7; 11:4, 9.

Nownow kaba, milyunmilyun sma e gebroiki Gado Wortu, Bijbel, fu leri sma fa fu libi na ini freide nanga trawan, èn Yesus e tiri a wroko disi. Heri esi freide o de na heri grontapu.​—Leisi Yesaya 2:3, 4; 54:13.