PIKI TAPU AKSI FU BIJBEL

Gado e arki ala begi?

Gado e arki sma fu ala kondre (Psalm 145:18, 19). A Wortu fu en, Bijbel e gi wi deki-ati fu taki nanga en fu ala sani di e gi wi broko-ede (Filipisma 4:6, 7). Ma Gado no e prisiri nanga ala begi. Fu eksempre, a no e feni en bun te sma e taki den srefi sani ibri leisi te den e begi.​—Leisi Mateyus 6:7.

Boiti dati, Yehovah no lobi den begi fu den sma di e trangayesi den wèt fu en fu espresi (Odo 28:9). Fu eksempre na ini owruten, Gado no ben arki den Israelsma di ben de kiriman. Sobun, wi musu du san Gado e taki so taki a kan arki den begi fu wi.​—Leisi Yesaya 1:15.

San wi musu du so taki Gado kan arki den begi fu wi?

Wi no kan begi Gado sondro taki wi e bribi (Yakobus 1:5, 6). Wi musu bribi taki a de trutru èn taki a lobi wi. Te wi e studeri Bijbel wi kan tranga a bribi fu wi, fu di wan sma kan abi trutru bribi te a e si den buweisi na ini Gado Wortu.​—Leisi Hebrewsma 11:1, 6.

Wi musu taki trutru san de na ini wi ati èn wi musu abi sakafasi. Srefi Yesus a Manpikin fu Gado ben abi sakafasi di a ben begi (Lukas 22:41, 42). Sobun na presi fu taigi Gado san a musu du, wi musu pruberi fu frustan den wèt fu en te wi e leisi Bijbel. Te wi du dati, dan wi o begi soleki fa Gado wani.​—Leisi 1 Yohanes 5:14.