„Grati a pasi pe yu e poti yu futu” fu kan go na fesi

DI A pipel fu Gado komoto na Babilon na ini 537 Fosi Krestes, Yehovah sorgu taki a pasi pe den ben musu waka go na Yerusalem ben bun. A taki: „Meki wan pasi gi a pipel. Sreka a pasi. Iya, sreka en èn puru den ston di de na en tapu” (Yes. 62:10). Pruberi fu si fa sonwan fu den Israelsma du a sani disi. Kande wan tu grupu waka go na fesi fu sreka a pasi. Kande den tapu den olo èn den puru ston fu meki a pasi kon grati. A sani disi ben o meki en moro makriki gi den tra Israelsma fu waka go baka na a kondre fu den.

Na so wi kan taki tu dati wi e waka na tapu wan pasi te wi e du muiti fu go na fesi na ini a diniwroko fu Gado. Yehovah wani taki ala den futuboi fu en go na fesi sondro taki sani di no de fanowdu, tapu den. En Wortu e gi wi a deki-ati disi: „Grati a pasi pe yu e poti yu futu èn waka sondro fu degedege” (Odo 4:26). Awinsi yu yongu, noso yu no de so yongu moro, yu kan frustan fu san ede Gado gi wi a rai disi.

TEKI BUN BOSROITI

Kande yu yere sma taki a sani disi fu wan yonguwan: ’A meisje disi o skopu en fara’ noso ’A boi disi o meki en na ini a libi’. Nofo tron a de so taki yongusma abi wan bun gosontu, den srapu èn den wani meki en na ini a libi. Bijbel e taki fu den: „Na a krakti fu yongu sma e meki taki den e kisi glori” (Odo 20:29). Wan yongusma di e gebroiki a koni fu en nanga a krakti fu en fu dini Yehovah, kan du moro na ini a diniwroko èn a kan kon de koloku trutru.

Ma soleki fa yu sabi, dan den yonguwan fu wi e du en bun èn dati meki sma na grontapu wani taki den meki en na ini a libi. Te wan yongu Kotoigi e du en bun na skoro, dan son leisi a kan pasa taki wan meneer, wan jufrow, noso wan pikin fu en skoro de nomonomo taki a teki moro hei skoroleri fu meki en na ini a grontapu disi. Kande sma fu wan sport team e kon taki nanga wan yongu brada noso sisa fu kon na ini a team fu den, fu di den si taki a bun na ini a sport dati. Yu de na ini so wan situwâsi, noso yu sabi wan sma di de na ini a situwâsi dati tu? San o yepi wan Kresten fu teki koni bosroiti?

Bijbel kan yepi wan sma fu sreka ensrefi, so taki a waka a moro bun pasi na ini a libi. Preikiman 12:1 e taki: „Memre yu Gran Mekiman na ini yu yongu yari.” Fa yu, noso wan tra yonguwan di yu sabi kan ’memre un Gran Mekiman’?

Luku san pasa nanga Erica na ini West-Afrika. A ben lobi plèi bal. Di Eric ben abi 15 yari, wan voetbal team fu a kondre aksi en fu kon plèi gi den. Efu a ben o du dati, dan a ben o kisi na okasi fu go plèi bal na ini Europa. Kande a ben o plèi gi wan team pe a ben o meki furu moni. Ma fa a ben kan teki a rai fu ’memre en Gran Mekiman’? San yu, noso wan mati fu yu kan leri fu a tori disi?

Di Eric ben de na skoro, a bigin studeri Bijbel nanga Yehovah Kotoigi. Na so a kon si taki en Mekiman o lusu den problema fu libisma fu ala ten. Eric bigin si o prenspari a de fu gebroiki en ten nanga en krakti fu du Gado wani. Dati meki a teki a koni bosroiti fu no feti fu go plèi voetbal gi wan team pe a ben o meki furu moni. Na presi fu dati, a teki dopu èn a meki muiti fu go na fesi. Baka wan pisi ten a tron dinari ini a diniwroko èn baka dati a kisi a kari fu go na a Bijbelskoro gi brada di no trow.

Efu Eric ben o feti fu tron wan sportman, dan kande a ben o kon pôpi èn gudu. Ma a kon frustan san a Bijbel rai disi wani taki: „Den gudu fu wan guduman na wan tranga foto gi en. A e si den leki wan skotu di e gi en kibri” (Odo 18:11). Efu wan sma denki taki a abi ala sani te a gudu, dan a e kori ensrefi. Nofo tron te sma e feti na baka gudu, dan ’den e gi densrefi furu pen, neleki na dyuku den e dyuku densrefi’.—1 Tim. 6:9, 10.

A moi fu si taki furu yongusma e firi koloku èn den e prisiri fu di den go na ini a furuten diniwroko. Eric e taki: „Mi go na ini wan bigi team fu furuten dinari fu Yehovah. Dati na a moro bun team di de. Mi e taki Yehovah tangi taki a sori mi a wan-enkri pasi di kan meki wan sma feni trutru koloku èn di kan meki en libi waka bun.”

Fa a de nanga yu? Fu san ede yu no e meki muiti fu go na ini a pionierwroko, na presi fu feti na baka sani na ini a grontapu disi? Te yu e pionier, dan yu e sori Yehovah taki yu wani waka a pasi fu en sondro fu meki sani tapu yu.—Luku a faki di nen „Noiti universiteit ben o man gi mi san mi abi now”.

PURU DEN SANI DI DE NA TAPU YU PASI

Di wan trowpaar go na a bijkantoro na Amerkankondre, den si taki den sma di e wroko na Betel de koloku. A sisa skrifi bakaten: „Wi ben feni taki san wi ben gwenti du, ben bun kaba.” A trowpaar disi bosroiti fu kenki wan tu sani fu kan gebroiki den ten nanga krakti fu du moro na ini a diniwroko.

Na a bigin a ben sori hebi gi den. Ma wan dei den luku a deitekst di ben teki puru fu Yohanes 8:31 pe Yesus taki: „Efu unu tan du den sani di mi taki, dan unu na mi disipel trutru.” Dati meki den taki: „Awinsi sortu muiti wi musu du fu kenki wi libi, a no o de fu soso.” Den seri a bigi oso fu den, den libi den sani na baka di no ben de fanowdu èn den froisi go na wan gemeente di ben abi yepi fanowdu. Now den e pionier, den e yepi bow Kownukondre zaal tu èn den e yepi na den distrikt kongres. Fa den e feni en? „Sensi wi kenki wi libi, wi no man bribi taki wan sma kan abi so furu prisiri te a e du ala san Yehovah en organisâsi e leri wi fu du.”

TAN NA TAPU A PASI DI O MEKI YU GO NA FESI

Salomo ben skrifi: „Den ai fu yu musu luku langalanga go na fesi. Yu eigi brenki ai musu luku go na fesi nomo” (Odo 4:25). Wan sma di e rèi, e tan luku a pasi di de na en fesi. Na so wi musu tan luku san wi kan du fu go na fesi sondro fu meki tra sani puru wi prakseri.

1. Yehovah Kotoigi e gebroiki den yongu yari fu du moro gi Gado 2. Wan pasi pe sani no de na tapu moro

Sortu sani yu kan du fu go na fesi na ini a diniwroko? Wan bun sani di yu kan du na fu go na ini a furuten diniwroko. Wan tra sani na taki yu kan go dini na ini wan gemeente di no fara èn di abi lepi preikiman fanowdu fu wroko wan bigi kontren. Na a tra sei yu kan abi wan gemeente nanga furu preikiman di e wroko fayafaya, ma den no abi nofo owruman nanga dinari ini a diniwroko. Yu kan yepi na ini den sortu gemeente dati? Fu san ede yu no e taki nanga a kring-opziener fu luku efu yu man go yepi drape. Efu yu wani go na wan fara presi, dan yu kan aksi a bijkantoro sortu gemeente abi yepi fanowdu.b

Meki wi go baka na a tori di skrifi na Yesaya 62:10. A kan taki sonwan fu den Dyu wroko tranga fu puru ston èn fu grati a pasi so taki Gado pipel ben kan doro a kondre fu den. Efu yu e meki muiti fu du moro na ini a santa diniwroko fu Gado, dan no meki noti tapu yu. Yehovah o yepi yu fu du den sani di yu wani du. Tan aksi Gado koni te yu e pruberi fu puru den sani di de na tapu yu pasi. Te fu kaba yu o si fa a kan yepi yu fu „grati a pasi pe yu e poti yu futu”.—Odo 4:26.

a Wi kenki den nen.

b Luku a buku Wi orga fu du a wani fu Yehovah, bladzijde 111, 112.

Noiti universiteit ben o man gi mi san mi abi now

DI FLAVIA ben de wan pikin meisje en granmama, di ben de wan Kotoigi fu Yehovah, taki nanga en fu Bijbel. Ma Flavia papa di ben de wan skoromeester, ben wani taki a leri moro fu den sani na wi lontu soleki bon, meti, a loktu nanga watra. A ben wani tu taki Flavia go na hei skoro. Tra sma ben taigi en: „Na un yongusma kan sorgu taki a grontapu fu wi no tron wan presi pe wi no o man libi moro.” En papa yepi en fu go na wan pôpi universiteit. Drape a bigin ondrosuku fa sma kan meki oli di moro bun èn di no e doti a loktu.

A no teki langa fosi Flavia kon si taki furu studenti no ben e du muiti srefisrefi fu sorgu taki a grontapu fu wi no tron wan presi pe wi no o man libi moro. Yu ben abi bedrijf tu di ben e gi na universiteit moni fu ondrosuku son sani. Ma son tron disi ben kan meki taki ondrosukuman no ben wani du sani teige den sortu bedrijf disi. A sani disi ben trobi Flavia. Di Yehovah Kotoigi naki na en doro a ben wani luku baka san Bijbel e taki fu Gado èn fu a ten di e kon, neleki san a ben e leri di a ben yongu.

Flavia ben lobi den tru tori fu Bijbel èn a teki dopu. Ma fu di a ben e studeri na a universiteit ete fu kisi wan moro hei diploma, meki a no ben abi so furu ten gi a preikiwroko. Wan dei a yere wan kring-opziener e taki fu Yakobus 4:17. A tekst dati e taki: „Efu wan sma sabi fa fu du bun, ma toku a no e du dati, dan na wan sondu a du.” A sani disi meki Flavia go prakseri en eigi situwâsi. A e fruteri: „Mi ben wani Yehovah blesi mi, ma mi ben wani meki en tu leki sabiman. Mi ben musu bosroiti san mi ben o du.”

Flavia teki a bosroiti fu no studeri go doro na a universiteit. A sani dati hati en? A e taki:

„Mi kon si taki noiti universiteit ben o man gi mi san mi abi now na ini a diniwroko fu Yehovah. Yehovah du furu gi mi. A leri mi fu sori switifasi, fu sori lobi èn fu yepi trawan fu kon leri sabi en. Mi abi wan bun trowlibi èn wan moi howpu gi a ten di e kon. Disi bun omeni tron moro leki san mi ben o man kisi leki sabiman. Na Yehovah wawan kan sorgu taki a grontapu fu wi no tron wan presi pe wi no o man libi moro. Mi no o drai baka gi en.” Flavia nanga en masra e wroko na a edekantoro fu Yehovah Kotoigi na New York.