„Unu sa de kotoigi fu mi”

1, 2. (a) Suma na „a kotoigi di de fu frutrow èn di e taki san tru”? (b) San a nen fu Yesus wani taki èn san a du fu yepi den Dyu so taki Yehovah feni den bun?

DI YESUS ben de na fesi krutu, dan sondro fu frede a taigi Granman Pontius Pilatus di ben e tiri Yudea: „Na fu disi ede mi gebore èn na fu disi ede mi kon na grontapu, so taki mi kan fruteri sma san tru.” (Leisi Yohanes 18:33-37.) Wan tu yari baka dati, na apostel Paulus taki dati Yesus „kotoigi na fesi Pontius Pilatus na wan tumusi moi fasi” (1 Tim. 6:13). Wi e libi na ini wan grontapu pe Satan de a basi èn pe sma no lobi makandra kwetikweti. Fu man tan de kotoigi fu Gado, wi musu abi furu deki-ati neleki Yesus, „a kotoigi di de fu frutrow èn di e taki san tru”.​—Openb. 3:14.

² Fu di Yesus ben de wan Dyu, meki a ben de wan kotoigi fu Yehovah sensi di a gebore (Yes. 43:10). Iya, a ben de a moro bigi kotoigi di oiti ben de èn Gado poti en fu opo taki gi a nen fu En. Yesus ben si a nen di Gado gi en leki wan seryusu sani. Wan engel taigi Yesus kwekipapa Yosef taki santa yeye ben meki Maria kon de nanga bere. Baka dati na engel taki: „[Maria] o kisi wan manpikin di yu musu kari Yesus, bika na en o puru den sondu fu en pipel” (Mat. 1:20, 21). Furu Bijbel sabiman taki dati Yesus nen teki puru fu a Hebrew nen Yesuwa. A nen disi abi wan pisi na ini fu Gado nen èn a wani taki „Yehovah na frulusu”. Sobun, Yehovah ben o gebroiki Yesus fu frulusu libisma fu sondu nanga dede. Yesus fruteri den Dyu taki den ben musu sori berow fu den sondu fu den so taki Yehovah feni den bun (Mat. 10:6; 15:24; Luk. 19:10). Dati meki Yesus preiki fayafaya fu Gado Kownukondre. A Bijbel skrifiman Markus ben taki: „Yesus go na Galilea fu preiki a bun nyunsu fu Gado. A ben taki: ’A reti ten doro kaba, èn a Kownukondre fu Gado kon krosibei kaba. Un abi berow èn bribi a bun nyunsu’” (Mark. 1:14, 15). Boiti dati, sondro fu frede Yesus krutu den Dyu kerki fesiman di kiri en te fu kaba na wan pinapostu.​—Mark. 11:17, 18; 15:1-15.

„DEN BIGI SANI DI GADO DU”

3. San pasa dri dei baka a dede fu Yesus?

³ Dri dei baka di Yesus dede na wan ogri-ati fasi, wan bigi wondru pasa. Yehovah gi Yesus wan opobaka. A no meki a kon na libi leki wan libisma, ma leki wan yeye di no man dede (1 Petr. 3:18). Fu sori den bakaman fu en taki a kon na libi baka trutru, Masra Yesus teki wan libisma skin èn a sori ensrefi na den. Na a srefi dei di a kon na libi baka, a sori ensrefi feifi tron na difrenti bakaman fu en.​—Mat. 28:8-10; Luk. 24:13-16, 30-36; Yoh. 20:11-18.

4. Sortu konmakandra Yesus hori a dei di a sori ensrefi na den bakaman fu en èn san a taigi den fu du?

⁴ Di Yesus sori ensrefi a di fu feifi leisi, den apostel ben kon makandra nanga tra sma. Na a spesrutu okasi dati, yu kan taki dati Yesus studeri Gado Wortu nanga den. Bijbel e taki: „A opo den ai, so taki den ben kon frustan ala san Gado Buku ben taki.” Na so den kon si taki san Bijbel taki fu Yesus, kon tru di den feanti fu Gado kiri en èn di a kisi wan opobaka. Na a kaba fu a konmakandra dati, Yesus sori den bakaman fu en sortu frantwortu den abi. A taigi den taki den „ben o preiki na ini en nen gi ala pipel” èn taki den ben musu taigi sma fu abi berow so taki den ben kan kisi pardon fu sondu. Den ben o bigin a wroko disi na ini Yerusalem èn den ben go na tra presi tu. A taki tu: „Fruteri sma ala san unu si.”​—Luk. 24:44-48.

5, 6. (a) Fu san ede Yesus taki: „Unu sa de kotoigi fu mi”? (b) Sortu boskopu den bakaman fu Yesus ben o fruteri sma?

⁵ Fotenti dei baka di Yesus sori ensrefi na den apostel fu en wan lasti leisi, a taigi den: „Unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori 1:8). A sani di Yesus taki yepi den fu kon frustan moro krin sortu wroko den ben o du. Ma fu san ede Yesus taki: „Unu sa de kotoigi fu mi” èn no fu Yehovah? Yesus ben kan taki dati den ben o de kotoigi fu Yehovah. Ma den bakaman fu en ben de kotoigi fu Yehovah kaba fu di den ben de Israelsma.

⁶ Now den disipel fu Yesus ben o taki fu wan nyun sani di Yehovah ben o du. A sani disi ben o bigi moro leki san a du di a fri den Israelsma na Egepte èn bakaten na Babilon. A dede nanga na opobaka fu Yesus Krestes ben meki den kon fri fu a moro ogri sani di de. Iya, den no ben o de srafu moro fu sondu nanga dede. Na a Pinksterfesa fu a yari 33, den bakaman fu Yesus di ben salfu nanga santa yeye, fruteri sma „den bigi sani di Gado du”. Furu sma di yere a boskopu disi, sori berow èn den bigin bribi na ini a frulusu-ofrandi fu Yesus. Now Yesus ben kisi moro makti na hemel èn Yehovah gebroiki en fu frulusu dusundusun sma na grontapu.​—Tori 2:5, 11, 37-41.

„WAN LUSU-PAIMAN FU FRULUSU FURU SMA”

7. San den sani di pasa na a Pinksterfesa fu a yari 33 e sori?

⁷ Den sani di pasa na a Pinksterfesa fu a yari 33, sori taki Yehovah teki a frulusu-ofrandi di Yesus tyari fu meki libisma kon bun baka nanga Gado èn fu tapu den sondu fu den (Hebr. 9:11, 12, 24). Soleki fa Yesus taki, dan a „no kon fu sma dini en, ma a kon fu dini sma èn fu gi en libi leki wan lusu-paiman fu frulusu furu sma” (Mat. 20:28). Den „furu sma” di ben o kisi wini fu Yesus lusu-paiman no ben de den Dyu nomo di ben sori berow. Ma Gado wani taki „ala sortu sma musu kisi frulusu”, fu di a lusu-paiman e „puru a sondu fu grontapu”.​—1 Tim. 2:4-6; Yoh. 1:29.

8. Fa a du kon taki den bakaman fu Yesus ben man tan preiki fu en èn san den ben man du?

⁸ A de so taki den fosi bakaman fu Yesus ben abi nofo deki-ati fu tan preiki fu en? Iya, den ben abi a deki-ati fu go doro, ma den no du dati nanga den eigi krakti. A santa yeye fu Yehovah gi den a krakti fu tan fruteri sma a boskopu fu Gado. (Leisi Tori fu den apostel 5:30-32.) Sowan 27 yari baka a Pinksterfesa fu a yari 33, sma ben kan taki dati ’a tru boskopu, dati na a bun nyunsu’, ben preiki gi ala Dyu nanga trakondre sma „na grontapu”.​—Kol. 1:5, 23.

9. San pasa nanga a fosi Kresten gemeente, soleki fa Yesus ben taki kaba?

⁹ Ma na wan sari sani taki baka wan pisi ten, sma na ini a fosi Kresten gemeente bigin leri trawan sani di no tru (Tori 20:29, 30; 2 Petr. 2:2, 3; Yud. 3, 4). Yesus ben taki dati Satan, na „ogriwan”, ben o meki moro nanga moro sma na ini a gemeente kon nanga falsi leri. Te fu kaba, sma no ben o man si krin moro san na a tru bribi. Disi ben o go doro teleki „a kaba fu a grontapu disi” (Mat. 13:37-43). Baka dati Yehovah ben o poti Yesus leki Kownu fu libisma. Disi pasa na ini oktober 1914 èn na so sma ben sabi taki „den lasti dei” fu Satan en ogri grontapu bigin.​—2 Tim. 3:1.

10. (a) Fu sortu prenspari ten den salfu Kresten ben taki langa ten kaba? (b) San pasa na ini oktober 1914 èn fa sma ben kon sabi dati?

¹⁰ Den salfu Kresten na ini a ten disi ben sori langa ten kaba taki oktober 1914 ben o de wan prenspari ten. Den kon sabi disi di den luku a profeititori fu Danièl di e taki fu a bigi bon. Sma ben o koti a bon disi trowe èn a ben o bigin gro baka, teleki den „seibi pisi ten” pasa (Dan. 4:16). Yesus taki fu sani di ben o pasa èn di ben o yepi den bakaman fu en fu sabi taki a tron Kownu èn taki den lasti dei bigin. Sensi 1914, ala sma man si krin san na „a marki taki [Krestes] kon” èn taki a e tiri leki a nyun Kownu fu grontapu (Mat. 24:3, 7, 14; Luk. 21:24). Sobun, sensi a ten dati sma kan si taki wan fu „den bigi sani di Gado du”, na taki a poti Yesus leki Kownu fu libisma.

11, 12. (a) San pasa na ini 1919? (b) San ben de krin fu si na ini 1935? (Luku a prenki na a bigin fu na artikel.)

¹¹ Syatu baka di Yesus Krestes tron a nyun Kownu fu grontapu, a bigin puru den salfu bakaman fu en na ini „Babilon a Bigiwan”, dati na ala den falsi bribi (Openb. 18:2, 4). Na ini 1919, syatu baka a Fosi Grontapufeti, den salfu Kresten kisi moro okasi fu preiki gi sma na heri grontapu. Den fruteri sma fa den kan kisi frulusu nanga yepi fu a lusu-paiman èn den fruteri den a bun nyunsu fu Gado Kownukondre. A bakapisi ben de taki ete dusundusun sma kon na ini a tru anbegi èn Gado salfu den leki kownu di o tiri makandra nanga Krestes na ini hemel.

¹² Na ini 1935, a ben de krin taki Krestes bigin tyari milyunmilyun „tra skapu” kon na wán. Den ben o de „wan bigi ipi sma” di komoto na ala kondre. Makandra nanga den salfu Kresten, a bigi ipi sma disi e teki na eksempre fu Krestes fu di den e preiki gi sma sondro fu frede. Den e bribi tu taki na ofrandi fu Yesus na a wan-enkri fasi fa den kan kisi frulusu. Te den tan du a preikiwroko disi èn den tan sori bribi na ini a lusu-paiman fu Krestes, dan den o kisi a grani fu pasa „a bigi banawtu” libilibi. Disi o tyari wan kaba kon na a grontapu fu Satan.​—Yoh. 10:16; Openb. 7:9, 10, 14.

TEKI ’DEKI-ATI FU FRUTERI A BUN NYUNSU’

13. San wi leki Yehovah Kotoigi musu tan du èn fa wi de seiker taki wi o abi bun bakapisi?

¹³ Meki wi tan si en leki wan bigi grani fu de Kotoigi di e taki fu „den bigi sani” di Yehovah Gado du èn fu den sani di a pramisi fu du na ini a ten di e kon. A tru taki a no makriki ala ten fu preiki gi sma. Furu brada nanga sisa e wroko na ini kontren pe furu sma no e arki den, pe den e spotu den, noso pe den e frufolgu den srefi. Ma den kan teki na eksempre fu na apostel Paulus nanga den tra bakaman fu Yesus di ben horidoro na ini wan srefi sortu situwâsi. Paulus srefi ben taki: „A Gado fu wi gi wi deki-ati fu fruteri unu a bun nyunsu fu Gado, aladi sma ben e gens wi srefisrefi” (1 Tes. 2:2). Sobun, noiti wi musu tapu nanga a wroko disi. Meki wi tan du san wi pramisi di wi gi wisrefi abra na Yehovah fu di wi e preiki teleki a grontapu fu Satan kisi pori fu ala ten (Yes. 6:11). Wi no man du disi nanga wi eigi krakti. Ma wi musu teki na eksempre fu den fosi Kresten èn begi Yehovah meki a gi wi „a krakti di bigi pasa marki”.​—Leisi 2 Korentesma 4:1, 7; Luk. 11:13.

14, 15. (a) Fa sma ben e si Kresten na ini a fosi yarihondro èn san na apostel Petrus taki fu den? (b) San wi musu hori na prakseri te sma e gens wi fu di wi na Yehovah Kotoigi?

¹⁴ Na ini a ten disi, milyunmilyun sma e taki dati den na Kresten, „ma den sani di den e du, e sori taki den no sabi [Gado], fu di den de wan tegu sani èn den trangayesi. Den no bun fu du nowan enkri bun sani” (Tit. 1:16). A bun fu hori na prakseri taki na ini a fosi yarihondro, furu sma no ben lobi den tru Kresten. Dati meki na apostel Petrus skrifi: „Efu sma e kosi unu fu Krestes nen ede, dan unu de koloku, fu di disi e sori taki unu abi a yeye fu Gado.”​—1 Petr. 4:14.

¹⁵ A sani disi di Petrus taki e fiti tu gi den Kotoigi fu Yehovah na ini a ten disi? Iya, fu di wi e fruteri sma taki Yesus na Kownu. Sobun, te sma e sori taki den no lobi wi fu di wi e tyari a nen fu Yehovah, dan dati de a srefi leki te ’sma ben o kosi wi fu [Yesus] Krestes nen ede’. Yesus srefi ben taigi den gensman fu en: „Mi kon na ini a nen fu mi Tata, ma unu no bribi mi” (Yoh. 5:43). Sobun, te a e pasa taki sma gens yu na ini a preikiwroko, dan teki deki-ati fu di disi e sori taki Gado feni yu bun èn taki yu „abi a yeye” fu en.

16, 17. (a) Fa a pipel fu Yehovah na heri grontapu e feni en fu du a preikiwroko? (b) San yu bosroiti fu du?

¹⁶ Wi musu hori na prakseri tu taki na heri grontapu, sma e kon na ini a tru anbegi. Srefi te wi e wroko furu na ini wan kontren, toku wi e feni sma ete di wani arki a moi boskopu fu wi. Meki wi du ala san wi man fu go baka na den sma di wani sabi moro. Efu a kan, wi wani studeri Bijbel nanga den èn yepi den fu go na fesi so taki den gi densrefi abra na Gado èn teki dopu. Fa yu e firi te yu e du a wroko disi? Luku a tori fu wan sisa di nen Sarie na ini Zuid-Afrika. A de wan fayafaya Kotoigi moro leki 60 yari kaba. A e taki: „Mi de nanga tangi gi a frulusu-ofrandi fu Yesus di e meki taki mi man abi wan bun matifasi nanga Yehovah, a Moro Heiwan fu hemel nanga grontapu. Mi breiti taki mi man fruteri sma fu a bigi nen fu en.” En nanga en masra Martinus yepi den dri pikin fu den èn furu tra sma fu tron anbegiman fu Yehovah. Sarie e taki: „Nowan tra wroko e gi wi so furu prisiri leki a wroko disi. Yehovah e gebroiki en santa yeye fu gi wi alamala a krakti di wi abi fanowdu fu tan go doro nanga a wroko disi di e kibri sma libi.”

¹⁷ Awinsi wi na dopu Kresten noso wi no dopu ete, wi musu de nanga tangi gi a grani di wi abi fu kon makandra nanga den Kotoigi fu Yehovah na heri grontapu. Sobun, tan preiki finifini gi sma aladi yu e tan meki muiti fu de santa na ini a pori grontapu disi fu Satan. Te yu e du dati, dan yu o gi wi lobi-ati hemel Tata glori fu di a de wan bigi grani fu tyari en nen.