San Gado Kownukondre o du gi yu?

Kande den artikel na fesi sori yu taki Gado Kownukondre prenspari srefisrefi gi Yehovah Kotoigi. Kande yu lobi wan tu fu den blesi di Gado Kownukondre o tyari kon. Ma kande yu e aksi yusrefi tu efu den sani dati o pasa trutru.

A de wan koni sani te yu no de gaw fu bribi iniwan sani di yu e yere (Odo 14:15). Na so den Bereasma fu owruten ben de.a Di den yere a bun nyunsu fu a Kownukondre fu a fosi leisi, dan den bribi den sani di den yere, ma den no du dati soso fu di den ben wani taki den sani dati ben de tru tori. Na presi fu dati, den ondrosuku Gado Wortu finifini „fu si efu den sani di den yere tru” (Tori fu den apostel 17:11). Fu taki en leti, den Bereasma luku efu a bun nyunsu di den ben yere ben e kruderi nanga san Gado Wortu e taki. Baka wan pisi ten, den ben de seiker taki a bun nyunsu ben komoto fu Gado Wortu.

Yehovah Kotoigi e gi yu deki-ati fu du a srefi. Yehovah Kotoigi wani studeri Bijbel nanga yu, sondro taki yu abi fu pai gi dati. Na so yu srefi kan ondrosuku efu den sani di den e bribi fu Gado Kownukondre e kruderi nanga san Bijbel e leri.

Boiti taki yu e kon sabi moro fu Gado Kownukondre te yu e studeri Bijbel, yu o kisi piki tu tapu wan tu fu den prenspari aksi fu a libi.

• Pe wi komoto?

• Fu san ede wi de na libi?

• Fu san ede Gado e gi pasi taki sma e pina?

• San e pasa nanga wi te wi dede?

• Grontapu o pori krinkrin?

• Fa wi kan abi wan koloku osofamiri-libi?

San moro prenspari, na taki te yu e studeri Bijbel, dan dati o yepi yu fu „kon krosibei na Gado” (Yakobus 4:8). O moro yu e kon krosibei na Gado, o moro yu o si fa Gado Kownukondre o du bun sani gi yu, a no nownow wawan, ma fu ala ten. Yesus srefi ben taigi en Papa na ini begi: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes.”​—Yohanes 17:3.