Horibaka gi Gado Kownukondre nownow kaba!

Te yu luku en bun, dan wan bigi rampu de na pasi e kon. Yesus ben kari dati „wan bigi banawtu” (Mateyus 24:21). Wi no o man lon gi a rampu disi, ma wi kan du wan sani fu sorgu taki noti no miti wi. San wi kan du?

Wan leisi di Yesus Krestes ben e gi leri na tapu wan bergi, a taigi den sma: „Fu dati ede, tan suku fosi a Kownukondre nanga Gado en retidu” (Mateyus 6:33). Fa wi kan du dati?

Suku a Kownukondre fu Gado fosi. Disi wani taki dati Gado Kownukondre musu de a moro prenspari sani gi wi (Mateyus 6:25, 32, 33). Fu san ede wi musu si en so? Fu di libisma no man lusu den problema na grontapu. Na Gado Kownukondre wawan kan lusu den muilek problema di e miti libisma.

Suku a retidu fu en. Disi wani taki dati wi musu du ala san wi man fu hori den bun wet fu Gado èn wi musu du san a e leri wi. Fu san ede? Fu di sani no o waka bun nanga wi te wi srefi wani bosroiti san bun èn san no bun (Odo 16:25). Ma efu wi e du muiti fu libi soleki fa Gado wani, dan Gado o prisiri èn wi o de moro koloku.​—Yesaya 48:17, 18.

Tan suku fosi Gado Kownukondre nanga en retidu. Yesus ben warskow taki son sma o frigiti san na den moro prenspari sani. Den o denki taki sani o waka bun nanga den te den e meki furu moni. Tra sma abi so furu broko-ede, taki den no abi ten fu suku Gado Kownukondre.​—Mateyus 6:19-21, 25-32.

Ma Yesus pramisi taki den sma di ben o horibaka gi Gado Kownukondre o kisi ala san den abi fanowdu now èn taki na ini a ten di e kon den o kisi blesi fu têgo.​—Mateyus 6:33.

Aladi den fosi disipel fu Yesus ben tan suku Gado Kownukondre nanga en retidu fosi, toku ala sari nanga pina no kon na wan kaba na ini a ten fu den. Ma den ben feni kibri. Fa dati pasa?

Den ben e hori densrefi na den bun wet fu Gado. Na dati yepi den fu no kon de leki den sma di no ben e du san Gado taki. Fu di den ben e bribi trutru taki a Kownukondre ben o kon, meki den ben man horidoro di moro hebi problema miti den. Gado gi den „a krakti di bigi pasa marki” fu pasa den problema di ben e miti den.​—2 Korentesma 4:7-9.

YU O SUKU A KOWNUKONDRE FOSI?

Den fosi Kresten ben e suku a Kownukondre fosi, soleki fa Yesus ben taigi den. Dati meki den preiki a bun nyunsu fu a Kownukondre na ini a heri kontren pe den ben e libi (Kolosesma 1:23). Sma de di e du dati na ini a ten disi?

Iya! Yehovah Kotoigi e frustan taki a no o teki langa fosi Gado Kownukondre tyari wan kaba kon na a ogri grontapu disi. Dati meki den e du ala san den man fu du san Yesus ben taigi den: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”​—Mateyus 24:14.

Yu o gi yesi na a bun nyunsu dati? Wi e gi yu deki-ati fu de leki den Bereasma fu Masedonia di ben e libi na ini a ten fu den fosi Kresten. Di Paulus fruteri den sma disi a bun nyunsu fu a Kownukondre, dan den „teki a wortu nanga den heri ati”. Baka dati, den „ondrosuku Gado Buku finifini” fu kon sabi efu san den ben yere ben tru èn den du san den leri.​—Tori fu den apostel 17:11, 12.

Yu kan du dati tu. Te yu e suku a Kownukondre nanga Gado en retidu fosi, dan yu o feni kibri nownow kaba èn na ini a ten di e kon yu o libi na ini freide èn sani o waka bun nanga yu.