A kownoekondre foe Gado — Joe e kon froestan san a wani taki?
„A wan di den ben sai na tapoe a boen gron, dati na a wan di e jere a wortoe èn e kon froestan san a wani taki.” — MATEUS 13:23.
1. San na wan toe sani foe ’a kownoekondre foe hemel’, di sma e bribi foeroe?
JOE ’kon froestan san a Kownoekondre foe Gado wani taki’? Foeroe jarihondro kaba wan lo difrenti prakseri de foe ’a kownoekondre foe hemel’. Wan sani di son kerki sma na ini a ten disi e bribi foeroe, na taki a Kownoekondre na wan sani di Gado e poti na ini na ati foe wan sma te a drai en libi. Trawan denki taki a de wan presi pe boen sma e go baka te den dede foe njan boen dorodoro foe wan têgo kolokoe. Èn trawan e taki dati Gado libi en na libisma foe den tjari a Kownoekondre kon na grontapoe nanga jepi foe kresten leri nanga doe di den e tjari kon safrisafri na ini sociaal afersi nanga afersi foe lanti.
2. Fa bijbel e tjari kon na krin san na a Kownoekondre foe Gado, èn san disi sa doe?
2 Ma bijbel e sori krin, taki a Kownoekondre foe Gado a no wan sani di seti na grontapoe. Èn a no de wan situwâsi toe foe na ati noso a meki di den e meki a libisma libimakandra tron kresten. A troe taki, te sma kon froestan na a joisti fasi san na a Kownoekondre disi, dan dati e tjari bigi kenki kon na ini a libi foe den wan di e poti bribi na ini a Kownoekondre. Ma a Kownoekondre srefi na wan tiri di Gado seti na hemel foe doe en wani, foe poeroe den bakapisi foe sondoe nanga dede èn foe poti regtfardiki situwâsi na grontapoe baka. A Kownoekondre disi teki a makti kaba na hemel, èn heri esi „a sa broko ala den [libisma] kownoekondre disi na pisipisi èn tjari wan kaba kon na den, èn ensrefi sa tan te ten di no skotoe”. — Danièl 2:44; Openbaring 11:15; 12:10.
3. Sortoe sani ben opo gi libisma, di Jesus ben bigin nanga en diniwroko?
3 A historia skrifiman H. G. Wells ben skrifi: „A leri disi foe a Kownoekondre foe Hemel, di ben de a moro prenspari leri foe Jesus, èn di abi pikinso nomo foe doe nanga a bribi foe kresten, troetroe na wan leri di ben poesoe sma srefisrefi èn di ben tjari a moro bigi kenki kon ini a prakseri foe libisma.” Na a bigin kaba, a moro prenspari sani di Jesus ben taki foe en na ini en diniwroko ben de: „Abi berow, bika a kownoekondre foe hemel kon krosibei” (Mateus 4:17). A ben de drape na grontapoe leki salfoe Kownoe, èn wan foe den moro prisiri sani ben de, taki a pasi ben e opo now gi libisma no wawan foe abi wan prati na den blesi foe a Kownoekondre dati, ma foe de kompe tiriman nanga priester toe makandra nanga Jesus na ini a Kownoekondre dati! — Lukas 22:28-30; Openbaring 1:6; 5:10.
4. San ipi-ipi sma na ini a fosi jarihondro ben doe di ben jere a „boen njoensoe foe a kownoekondre”, èn sortoe kroetoe dati ben abi leki bakapisi?
4 Ala di foeroe sma ben jere a span „boen njoensoe foe a kownoekondre”, tokoe soso wan toe foe den ben bribi. Wan reide ben de taki den relisi fesiman ben „sroto a kownoekondre foe hemel gi den sma”. Den „ben poeroe a sroto foe sabi” nanga den falsi leri foe den. Foe di moro foeroe sma ben weigri foe teki Jesus leki a Mesias èn leki a salfoe Kownoe foe Gado en Kownoekondre, meki Jesus ben taigi den: „Den sa teki a kownoekondre foe Gado poeroe foe oenoe èn gi [en] na wan nâsi di e meki den froktoe foe en.” — Mateus 4:23; 21:43; 23:13; Lukas 11:52.
5. Fa moro foeroe sma di ben jere den agersitori foe Jesus ben sori taki den no ben jere nanga den froestan?
5 Wán leisi di Jesus ben gi leri na wan bigi ipi sma, dan soleki fa a ben gwenti, a ben gebroiki wan lo agersitori foe ondrosoekoe na ipi sma èn foe poeroe den sma di ben abi pikinso belangstelling nomo gi a Kownoekondre. A fosi agersitori ben abi foe doe nanga wan saiman di ben sai siri na tapoe fo sortoe gron. Den fosi dri sortoe gron no ben boen foe sani gro na den tapoe, ma a lasti sortoe gron ben de „boen gron” pe boen froktoe ben gro na tapoe. A sjatoe agersitori ben kaba nanga a froemane: „Meki a sma di abi jesi, arki” (Mateus 13:1-9). Moro foeroe foe den sma di ben de drape, ben jere en, ma den no ben „arki”. Den no ben abi reide, noso no wan troetroe belangstelling foe kon sabi fa siri di sai na tapoe difrenti gron ben gersi a Kownoekondre foe hemel. Den ben go na oso baka na den aladei libi, kande foe di den ben denki taki den agersitori foe Jesus ben de noti moro leki moi tori di ben taki foe a fasi fa sma moesoe tjari densrefi. Troetroe den ben lasi na okasi foe kisi boen foeroe sabi, nanga bigi grani nanga okasi, foe di na ati foe den no ben opo!
6. Foe san ede soso den disipel foe Jesus wawan ben kisi a grani foe froestan „den santa kibritori foe a kownoekondre”?
6 Jesus ben taigi den disipel foe en: „Na oenoe e kisi a grani foe froestan den santa kibritori foe a kownoekondre foe hemel, ma den sma dati no e kisi a grani disi.” A ben teki wortoe foe Jesaja, èn a ben taki moro fara: „’Bika na ati foe a pipel disi kon tranga, èn nanga den jesi foe den, den jere sondro foe doe wan sani na tapoe, èn den tapoe den ai foe den, so taki noiti den no ben sa kan si nanga den ai foe den èn jere nanga den jesi foe den èn kon froestan nanga na ati foe den san a wani taki èn drai kon baka, èn mi e meki den kon betre.’ Ma kolokoe foe oen ai, foe di den e si, èn foe oen jesi foe di den e jere.” — Mateus 13:10-16; Markus 4:11-13.
’Kon froestan san a Kownoekondre wani taki’
7. Foe san ede a de prenspari foe „kon froestan san a [Kownoekondre] wani taki”?
7 Jesus ben tjari kon na krin san ben de a problema. A ben abi foe doe nanga ’a froestan di den ben moesoe kon froestan san a Kownoekondre boskopoe ben wani taki’. Di a ben de en wawan nanga den disipel foe en, a ben taigi den: „Oenoe, foe dati ede, arki na agersitori foe a man di ben sai. Te wan sma jere a wortoe foe a kownoekondre, ma a no kon froestan san a wani taki, dan na ogriwan e kon èn a e hari poeroe san ben sai na ini en ati.” A ben go doro foe tjari kon na krin taki den fo sortoe gron e prenki difrenti fasi foe na ati pe „a wortoe foe a kownoekondre” ben sa sai. — Mateus 13:18-23; Lukas 8:9-15.
8. San ben meki taki boen froktoe no ben kon foe a „siri” di ben sai na tapoe den fosi dri sortoe gron?
8 Ala den leisi a „siri” ben boen, ma a fasi fa a gron ben de, ben sa meki sani gro na en tapoe efoe no. Efoe a gron foe na ati ben de leki wan toemoesi druk pasi, èn a ben kon tranga foe di foeroe sani ben de na tapoe di no abi foe doe nanga jeje afersi, dan a ben sa makriki gi a sma di e jere a Kownoekondre boskopoe foe taki dati a no man arki, ala di a e taki dati ten no de gi a Kownoekondre. Makriki a siri, di den no ben sorgoe boen, ben sa kan hari poeroe fosi a ben kan kisi roetoe. Ma san wi kan taki foe a siri di ben sai na ini wan ati di gersi tranga gron? A siri e opo kande, ma a no ben sa makriki foe den roetoe gro dipi nofo foe feni njanjan èn foe tanapoe steifi. A prakseri nomo taki a sma moesoe de wan foetoeboi foe Gado di e gi jesi, spesroetoe te hebi froefolgoe e kon, ben sa kan de wan hebi tjalansi gi en èn a ben sa kan naki foetoe. Èn baka agen, efoe a gron foe na ati ben abi so foeroe broko-ede di gersi maka noso a tranga lostoe gi materia sani, dan a swaki Kownoekondre prani ben sa stek. Na ini den dri situwâsi disi foe a libi di sma sabi so boen, den no ben sa abi no wan Kownoekondre froktoe leki bakapisi.
9. Foe san ede boen froktoe ben man kon foe a siri di ben sai na tapoe boen gron?
9 Ma fa a de nanga a Kownoekondre siri di ben sai na tapoe boen gron? Jesus e piki: „A wan di den ben sai na tapoe a boen gron, dati na a wan di e jere a wortoe èn e kon froestan san a wani taki, èn di troetroe e kisi froktoe èn e meki den toe, a wan disi hondro tron, a dati siksitenti tron, a trawan dritenti tron” (Mateus 13:23). Te den ben „kon froestan san a [Kownoekondre] wani taki”, dan den ben sa abi boen froktoe leki bakapisi akroederi a situwâsi di ibriwan foe den ben de na ini.
Frantiwortoe e kon nanga a froestan foe sani
10. (a) Fa Jesus ben sori taki a e tjari blesi nanga frantiwortoe kon te wan sma „e kon froestan san a [Kownoekondre] wani taki”? (b) A komando di Jesus ben gi foe go èn meki disipel, ben de soso gi den fosi jarihondro disipel?
10 Baka di Jesus ben froeteri siksi tra agersitori foe tjari den difrenti fasi foe a Kownoekondre kon na krin, a ben aksi den disipel foe en: „Oenoe ben froestan san ala den sani disi ben wani taki?” Di den ben piki nanga „ija”, a ben taki: „Foe di dati de so, meki ibri poebliki leriman, di e kisi leri foe a kownoekondre foe hemel, de leki wan man, wan masra foe wan oso, di e poeroe njoen sani nanga owroe sani na ini a maksin foe en.” Den leri di Jesus ben gi, ben sa bow den disipel foe en meki den kon tron lepi kresten di ben sa kan poeroe boen foeroe gosontoe jeje njanjan na ini a ’maksin’ foe den. Foeroe foe disi ben abi foe doe nanga a Kownoekondre foe Gado. Jesus ben tjari kon na krin taki ’a kon di wan sma ben kon froestan san a [Kownoekondre] wani taki’ no wawan ben sa tjari blesi kon, ma frantiwortoe toe. A ben gi leki komando: „Go foe dati ede, èn meki disipel foe sma foe ala nâsi, . . . èn leri den foe doe ala den sani di mi komanderi oenoe. Èn, loekoe! mi de nanga oenoe ala den dei te na a kaba foe a seti foe sani.” — Mateus 13:51, 52; 28:19, 20.
11. Sortoe sani di ben abi foe doe nanga a Kownoekondre ben feni presi, di 1914 ben doro?
11 Soleki fa Jesus ben pramisi, dan a tan de nanga en troe disipel na ini ala den jarihondro te leki na ini a ten disi. Na ini den lasti dei disi, a meki den kon froestan sani safrisafri, èn a aksi frantiwortoe foe den toe foe a fasi fa den gebroiki a leti foe waarheid di ben kon krin moro nanga moro (Lukas 19:11-15, 26). Na ini 1914, sani di ben abi foe doe nanga a Kownoekondre, ben kon na krin esi-esi èn na wan fasi di ben seki sma. Na ini a jari dati, a no ben de so taki soso a Kownoekondre, di sma ben howpoe na tapoe someni langa kaba, ben „gebore”, ma a „bosroiti foe a seti foe sani” ben bigin toe (Openbaring 11:15; 12:5, 10; Danièl 7:13, 14, 27). Troe kresten, di ben abi a koni foe si krin san den sani di ben pasa na a ten dati ben wani taki, hori a moro bigi Kownoekondre preikiwroko nanga leriwroko di gi na ini a historia. Jesus ben taki foe disi na fesi kaba di a ben taki: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon.” — Mateus 24:14.
12. (a) San de a bakapisi foe a bigi Kownoekondre kotoigiwroko di gi na ini a ten disi? (b) Sortoe kefar de gi kresten na ini a grontapoe disi di e tweifri na sani?
12 A bigi Kownoekondre kotoigiwroko disi doro na moro leki 230 kondre. Moro leki feifi miljoen troe disipel kaba abi wan prati na a wroko disi, èn trawan den e tjari kon na makandra ete. Ma efoe wi e teki a nomroe foe disipel gersi den 5,6 miljard sma di e libi na grontapoe, dan a de krin taki, neleki fa a ben de na ini a ten foe Jesus, a moro bigi pisi foe a libisma famiri no „e kon froestan san a [Kownoekondre] wani taki”. Soleki fa ben taki na fesi kaba, dan foeroe sma e spotoe èn e taki: „Pe a denoja disi foe en de di den ben pramisi?” (2 Petrus 3:3, 4) A kefar gi wi leki kresten de taki a fasi fa den sma foe a grontapoe disi lobi foe prakseri densrefi nomo, e tweifri na sani, èn e soekoe foe kon goedoe, safrisafri ben sa kan abi krakti na tapoe a fasi fa wi e si Kownoekondre grani. Foe di sma foe a grontapoe disi de lontoe wi, dan makriki wi kan bigin teki wan toe fasi abra fa den e denki èn e doe. A de troetroe prenspari taki wi „e kon froestan san a [Kownoekondre foe Gado] wani taki” èn tan skinskin nanga en!
Ondrosoekoe wisrefi ini a tori foe a Kownoekondre
13. Fa wi kan ondrosoekoe efoe wi e tan ’arki’ nanga a koni foe man si sani krin, ini a tori foe a komando foe preiki a boen njoensoe foe a Kownoekondre?
13 Jesus ben taki foe a kotiwroko ten pe wi e libi na ini: „A Manpikin foe libisma sa seni den engel foe en go, èn den sa tjari ala sani kon na makandra di e meki sma naki foetoe èn den sma di e doe kroektoedoe, èn poeroe den na ini en kownoekondre . . . Na a ten dati den regtfardiki sma sa skèin krin neleki son na ini a kownoekondre foe a Tata foe den. Meki a sma di abi jesi, arki” (Mateus 13:41, 43). Joe e tan ’jere’ foe di joe de klariklari foe gi jesi na a komando foe preiki a Kownoekondre èn foe meki disipel? Memre taki, „a wan di den ben sai na tapoe a boen gron”, ’ben jere a wortoe èn ben kon froestan san a ben wani taki’ èn ben abi boen froktoe leki bakapisi. — Mateus 13:23.
14. Fa wi e sori taki, te wi e kisi leri, dati wi ’kon froestan san a rai di gi wani taki’?
14 Te wi e doe persoonlijk studie èn e go na den kresten konmakandra, dan wi moesoe ’beni wi ati go na a koni foe si sani krin’ (Odo 2:1-4). Te den e gi rai di abi foe doe nanga a fasi fa wi moesoe tjari wisrefi, fa wi moesoe weri, pokoe, nanga ontspanning, dan wi moesoe meki a rai saka go na ini wi ati èn a moesoe boeweigi wi foe tjari ala kenki kon di de fanowdoe. Noiti no go denki taki joe abi leti na ini a fasi fa joe e si a tori, no go soekoe reide foe no waka baka a rai, noso no meki a de so taki joe no doe san den e taki. Efoe a Kownoekondre de wan troetroe sani na ini wi libi, dan wi sa libi akroederi den markitiki foe en èn wi sa preiki foe en na trawan fajafaja. Jesus ben taki: „A no ala sma di e taigi mi, taki: ’Masra, Masra’, sa go na ini a kownoekondre foe hemel, ma na a sma di e doe a wani foe mi Tata di de na hemel.” — Mateus 7:21-23.
15. Foe san ede a de prenspari foe ’soekoe fosi a kownoekondre nanga a regtfardikifasi foe Gado’?
15 Libisma abi a gwenti foe broko den ede nanga a njanjan, a krosi nanga a libipresi di den abi fanowdoe, ma Jesus ben taki: „Tan soekoe fosi a kownoekondre nanga [Gado] en regtfardikifasi, èn ala den tra sani disi oenoe sa kisi toe” (Mateus 6:33, 34). Te joe e go loekoe sortoe sani de moro prenspari, dan poti a Kownoekondre na a fosi presi na ini joe libi. Hori joe libi eenvoudig, de tevrede nanga san joe abi fanowdoe. A ben sa de wan don sani foe foeroe wi libi nanga aktiviteit di no de prenspari èn nanga a bai foe den moro njoen sani. Wi kan prakseri na wisrefi taki a fiti foe doe disi, bika foe densrefi den sani disi no abi foe de sani di no boen. Ala di dati troe kande, tokoe san ben sa pasa nanga wi persoonlijk studie schema, a go di wi e go na den kresten konmakandra, èn na a preikiwroko, te wi ben sa bai èn gebroiki den sortoe sani disi di no de prenspari? Jesus ben taki dati a Kownoekondre de leki wan bisnisman di ben feni wan „peri foe bigi waarde [èn] wantewante a ben seri ala san a ben abi èn a ben bai en” (Mateus 13:45, 46). Disi na a fasi fa wi moesoe denki foe a Kownoekondre foe Gado. Wi moesoe doe soleki fa Paulus ben doe, no soleki fa Deimas ben doe, di ben gowe libi a diniwroko „foe di a ben lobi a disiten seti foe sani”. — 2 Timoteus 4:10, 18; Mateus 19:23, 24; Filipisma 3:7, 8, 13, 14; 1 Timoteus 6:9, 10, 17-19.
„Onregtfardiki sma no sa kisi a kownoekondre foe Gado”
16. Fa ’a froestan di wi e kon froestan san a Kownoekondre foe Gado wani taki’ sa jepi wi foe tjari wisrefi na wan boen fasi?
16 Di a gemeente foe Korente ben gi pasi taki sma ben doe hoeroedoe, Paulus ben taki na wan frifasi: „San! Oenoe no sabi taki onregtfardiki sma no sa kisi a kownoekondre foe Gado? No meki sma kori oenoe. No wan hoeroeman, no wan anbegiman foe kroektoe gado, no wan soetaman, no wan man di den e hori foe doe sani di a no meki foe dati, no wan man di e didon nanga man, no wan foefoeroeman, no wan sma di abi bigi-ai, no wan droengoeman, no wan skempiman, no wan bidrigiman sa kisi a kownoekondre foe Gado” (1 Korentesma 6:9, 10). Efoe wi „e kon froestan san a [Kownoekondre foe Gado] wani taki”, dan wi no sa bidrigi wisrefi nanga a denki taki Jehovah sa gi pasi na wan fasi foe hoeroedoe so langa a e si taki wi e doe foeroe na ini a kresten diniwroko. Wi no moesoe taki srefi foe sani di no krin (Efeisesma 5:3-5). Joe kon si taki wan toe fasi fa a grontapoe disi e denki noso e doe, safrisafri e bigin kon na ini joe libi? Poeroe den na ini joe libi wantronwantron! A Kownoekondre warti toemoesi foe lasi en gi den sortoe sani disi. — Markus 9:47.
17. Na sortoe fasi a warderi di wi e warderi a Kownoekondre foe Gado, sa meki taki wi e kisi moro sakafasi èn fa a sa poeroe sani di e meki sma naki foetoe?
17 Den disipel foe Jesus ben aksi: „Soema na troetroe a moro bigiwan na ini a kownoekondre foe hemel?” Jesus ben piki foe di a ben poti wan jongoe pikin na den mindri èn a ben taki: „Foe troe, mi e taigi oenoe: Efoe oenoe no e drai oensrefi èn e tron leki jongoe pikin, dan oenoe no sa kon na ini a kownoekondre foe hemel kwetikweti. Foe dati ede, a sma di sa saka ensrefi neleki a jongoe pikin disi, na a sma dati na a moro bigiwan na ini a kownoekondre foe hemel” (Mateus 18:1-6). Den sma di abi heimemre, den sma di e aksi boen foeroe foe trawan, den sma di no lobi trawan, nanga den sma di e doe kroektoedoe, no sa de na ini a Kownoekondre foe Gado, èn den no sa de borgoe toe foe a Kownoekondre. A lobi di joe abi gi den brada foe joe, a sakafasi foe joe, nanga a frede di joe abi gi Gado, e boeweigi joe foe no meki trawan naki foetoe na a fasi fa joe e tjari joesrefi? Noso joe wani nomonomo taki sma moesoe hori joe „reti” na prakseri, awinsi fa a fasi nanga a waka nanga libi disi kan abi krakti na tapoe trawan? — Romesma 14:13, 17.
18. San sa de a bakapisi gi a libisma famiri di e gi jesi, te a Kownoekondre foe Gado sa meki En wani pasa „na hemel, so toe na grontapoe”?
18 Heri esi wi hemel Tata, Jehovah, sa piki a fajafaja begi krinkrin: „Meki joe kownoekondre kon. Meki joe wani pasa, soleki na hemel, so toe na grontapoe.” Heri esi a Kownoe di e tiri, Jesus Krestes, sa kon foe di a sa sidon na tapoe en kownoestoeroe foe hori kroetoe, foe poti den „skapoe” aparti foe den „bokoboko”. Na a fasti ten dati, „a kownoe sa taigi den wan di de na en reti-anoesei: ’Oen kon, oenoe di mi Tata blesi, teki a kownoekondre di sreka gi oenoe sensi di grontapoe seti’”. Den bokoboko „sa go na ini têgo koti poeroe, ma den regtfardikiwan na ini a têgo libi” (Mateus 6:10; 25:31-34, 46). „A bigi banawtoe” sa poeroe na owroe seti na pasi nanga ala den sma di no wani „kon froestan san a [Kownoekondre] wani taki”. Ma den miljoenmiljoen sma di sa pasa a „bigi banawtoe” libilibi nanga den miljarmiljard sma di sa kisi wan opobaka, sa kisi têgo Kownoekondre blesi na ini a Paradijs di poti baka na grontapoe (Openbaring 7:14). A Kownoekondre na a njoen tiri foe grontapoe, di e tiri na hemel. A sa doe san Jehovah abi na prakseri gi grontapoe nanga a libisma famiri, èn ala disi de foe santa en toemoesi santa nen. Disi a no wan goedoe di warti srefisrefi foe sma doe moeiti foe kisi en, foe òfer densrefi gi dati, èn foe e wakti na en tapoe? Disi na san a moesoe wani taki gi wi te wi „kon froestan san a [Kownoekondre] wani taki”!
Fa joe ben sa piki?
◻ San na a Kownoekondre foe Gado?
◻ Foe san ede moro foeroe foe den sma di ben arki Jesus no ben „kon froestan san a [Kownoekondre] wani taki”?
◻ Fa a e tjari blesi so srefi frantiwortoe kon te wan sma „e kon froestan san a [Kownoekondre] wani taki”?
◻ San e sori efoe wi „kon froestan san a [Kownoekondre] wani taki” ini a tori foe a preikiwroko?
◻ Fa wi e sori nanga a fasi fa wi e tjari wisrefi taki wi ’kon froestan san a rai di e gi, wani taki’?
[Prenki na tapoe bladzijde 13]
Den disipel foe Jesus ’ben kon froestan san a [Kownoekondre] ben wani taki’ èn den ben abi boen froktoe leki bakapisi