PIKI TAPU AKSI FU BIJBEL
A tru taki Yesus ben wiki dedesma?
Yesus ben wiki Lasarus, di ben dede fo dei kaba
Bijbel e taki krin dati Yesus ben wiki dedesma. Den tori dati a no anansitori. Den ben pasa na presi di de trutru èn sma sabi o ten den pasa. Fu eksempre, na a waran pisi ten fu a yari 31, wan bigi ipi sma ben komoto na Kaperna-um fu go na Nain, makandra nanga Yesus. Di den doro drape, den miti nanga wan tra grupu sma. Drape Yesus wiki wan dedesma. Yu kan bribi taki a sani dati pasa trutru fu di a skrifi na ini Gado Wortu, Bijbel, èn a ben pasa na fesi ala den sma di ben de drape.—Leisi Lukas 7:11-15.
Yesus ben wiki en mati Lasarus tu, di ben dede fo dei kaba. Yu kan bribi a sani dati tu di Yesus du a dei dati, fu di furu sma ben si a sani disi.—Leisi Yohanes 11:39-45.
Fu san ede Yesus ben wiki dedesma?
Yesus ben wiki dedesma fu di a ben abi sari-ati. A ben du dati tu fu sori taki en Tata, a sma di gi wi libi, ben gi en a makti fu wiki dedesma.—Leisi Yohanes 5:21, 28, 29.
Fu di Yesus ben wiki dedesma, meki wi de seiker taki den sani di a pramisi o pasa trutru. A o wiki bun furu dedesma, sosrefi sma di no ben sabi noti fu a tru Gado. Den o kisi okasi fu kon sabi Yehovah Gado èn fu kon abi lobi gi en.—Leisi Tori fu den apostel 24:15.